मर्कूस 16
16
येशू सीच लकीङ जीवाम सोच
(मत्ती २८:१-८; लूका २४:१-१२; यूहन्ना २०:१-१०)
1जब म्हुङ बाट्च दिन केल्ह्रखीङ मरियम मग्दलिनी र याकूबौ मोइ मरियम र सलोमीये बासना राछ द्रव्यको येशूओ लाशाङ मोल्खी डेम लोवा। 2पीउह्राक लेखो हप्तौ पहिलो याक गोराक न नाखान फेर्च बेलाङ होखुरीक येशूओ चिहानाङ नुङा। 3अनि होखुरीक नुङ्चै जाट्नाङ मेखुरीक-मेखुरीक डेया, “कानुङ लागि चिहानौ मेङ्गेराङ डाच ल्हुङ चहिँ सुये हटडीम याल्हे औला?” 4तर ढेम्लाक ङोस्नाङ होखुरीकै चिहानुङ होसे बाड्को ल्हुङ हटडीम डाच डाङा। 5अनि होखुरीकै चिहान भित्री पर्यार ङोस्नाङ होला काट जना बोच बढीन बील्छ रेन्जा भर्मी चिहानौ डोर पट्टी ङुच डाङा। अनि होखुरीक बीह्रीया। 6तर होसे भर्मीये होखुरीककी डेया, “माबीह्रीनी, नाखुरीकै नासरतुङ येशूकी पामन ले, सुकी क्रूसाङ टङ्गडीमन्या। होसको जीवाम सोम भ्यामने। होसको इला माले। डाच ठाउँ ङोस्नी ट। 7नुङ्नी, होसकुङ चेलाको र पत्रुसकी डेम यान्ही, होसको नाखुरीकुङ अगाडि-अगाडि गालीलाङ नुङ्ङन ले। होसकै नाखुरीककी डेच अनुसार नाखुरीकै होसकोकी होला डाङ्ले।” 8तब होखुरीक चिहानीङ ख्योहार भोग्डीसा, हीजैडेनाङ होखुरीक साप्फी बुरुक्चै बीह्रीम आतडीस्नन्या। होटै होखुरीकै सुकीर हीर माडेया, हीजैडेनाङ होखुरीक बीह्रीमन्या।
येशू चेलाको लेठाङ डाङ्च
(मत्ती २८:९-२०; लूका २४:१३-५३; यूहन्ना २०:११-२३; प्रेरित १:४-११)
9[हप्तौ पहिलो याकौ गोराक न येशू सीच लकीङ जीवाम सोरखीङ होसको पहिला मरियम मग्दलिनी लेठाङ डाङा। होसे लकीङ येशूये सात वटा भूतको छ्युक्ङन्या। 10मरियमै नुङार होसकुङ चेलाकोलाक इसे कुरा सेटाका। होखुरीक विलाप जाट्चै राप्म ङुमन्या। 11अनि येशू जीवाच र मरियमै डाङा डेच कुरा होखुरीकै सेया, तर होखुरीकै मापट्डीया।
12होटै न्हुइङ नीस जना चेलाको लाङ्घा पट्टी नुङ्चै जाट्च बेलाङ होखुरीक लेठाङ अर्को न रुपाङ डाङा। 13अनि होखुरीक ल्हेस्न नुङार अरुकोलाक सेटाका। तर होखुरीकै होसे नीस जनौ कुराकी र विश्वास माजाटा।
14होटै चेक न्हुइङ एघार जना चेलाको ज्याकी ङुच बेलाङ, येशू होखुरीकुङ मीघ्याङ डाङा। अनि होखुरीकुङ अविश्वास र मीमनौ कठोरतौ लागि होसकै होखुरीककी हक्कारीया। हीजैडेनाङ होसको सीच लकीङ जीवाम सोच न्हुइङ होसकोकी डाङ्च कुरा होखुरीकै विश्वास माजाट्नन्या।
15होटै येशूये होखुरीककी डेया, “सारा संसाराङ नुङार पट्ट भर्मीयो जात-जातिकोलाक सेछ समाचार सेटाक्नी। 16विश्वास जाटार बप्तिस्मा लाचये उद्धार डुप्ले, तर विश्वास माजाट्च चहिँ दोषी ठहरीस्ले। 17अनि विश्वास जाट्चकोखाटा इसे चिन्हको छान्ने: ङौ म्यार्मीनाङ होखुरीकै भूतको खेट्डीले र नयाँ भाषाको ङाक्ले। 18होखुरीकै बुलको घोले र कुसे किसिमुङ विषालु ठोक गानाङ र होखुरीककी होचे हीर हानी माजाट्ले। होखुरीकै छाचको मीटाक लहो मीहुट डाले र होखुरीक गेप्ले।”
19तब प्रभु येशू चेलाकोखाटा ङाक्ङ भ्यारखीङ होसको स्वर्गाङ गाराङ्ङ आल्हा, अनि परमेश्वरौ डोरमीहुट पट्टी ङुवा। 20होटै होसे चेलाकै नुङार पट्ट ठावाङ प्रचार जाटा। प्रभुये होखुरीकुङ साथाङ काम जाट्न न ङुवा र अचम्मौ चिन्हको लकीङ होखुरीकै ही प्रचार जाट्नन्या होसकै होसे सत्य ठहरीयाका।]#१६:२० ९-२० इसे पद कोइ कोइ संस्करनौ बाइबलाङ माले
Currently Selected:
मर्कूस 16: EMGP
Highlight
Copy
Compare
Share
Want to have your highlights saved across all your devices? Sign up or sign in
© 2025 by Mother Tongue Translators Society and Wycliffe Bible Translators, Inc.
