मर्कूस 15
15
येशू पिलातसौ म्याहासाङ
(मत्ती २७:१-२,११-२६; लूका २३:१-५,१३-२५; यूहन्ना १८:२८–१९:१६)
1गोराक छान्च बित्तिकै मुख्य पूजाहारीको खाट-खाट न अगुवाको, धर्मगुरुको र पट्ट न महासभाङ ङुच भर्मीकै योजना खासा। होटै येशूकी छ्याकार आल्हा र रोमीकुङ बडा-हाकिम पिलातसौ मीहुटाङ जिम्मा याहा। 2पिलातसै होसकोकी गीना, “ही नाको यहूदीकुङ राजा हो?” होसकै पिलातसकी डेया, “नाकै न होट डेमन ले।” 3मुख्य पूजाहारीकै येशूकी वास्टै कुराकुङ दोष लैडीया। 4पिलातसै येशूकी फेरि इट डेयार गीना, “ही नाकोखाटा हीर जवाफ माले? ङोस्नी ट नाकोकी होखुरीकै कुडीक वास्टै दोष लैडीमने।” 5तर येशूये हीर जवाफ माह्या। याङ्च डाङार पिलातस अचम्म मन्डीया।
6छुटकारौ चाडौ बेलाङ भर्मीकै सुकी डेले होसे अनुसार काट कैदीकी पिलातसै डास्न याछ चलन लेया। 7होडीक बेला बारब्बा म्यार्मीन लेच काट जना भर्मी झ्यालखानाङ पर्नन्या। होचे अरुकोखाटा खाटार आन्दोलनाङ भर्मी साट्नन्या। 8अनि भर्मीकुङ भीड पिलातस लेठाङ राहा र “अरु वर्षवाङ लेखा न इसे वर्ष र काट जना कैदीकी डास्न यान्ही” डेम बिन्ती जाटा। 9पिलातसै डेया, “ही ङा नाखुरीकुङ लागि यहूदीकुङ राजाकी डास्न येहीङ ट?” 10मुख्य पूजाहारीये मीरीस जाटार येशूकी लाहा लेठाङ राक्च हो डेयार पिलातसकी थाहा लेया।
11तर मुख्य पूजाहारीकै भर्मीकोलाक सुरडीयार “येशूकी होइन, बारब्बाकी न डास्न यान्ही” डेकी लैडीया। 12पिलातसै भर्मीकोलाक फेरि गीना, “नाखुरीकै यहूदीकुङ राजा डेचकी चहिँ ङा ही जाटीङ ट?” 13होखुरीकै च्याक्चै डेया, “होसकी क्रूसाङ टङ्गडीम यान्ही!” 14पिलातसै गीना, “हीजै? इसकै ही अपराध जाट्ने र?” तर होखुरीकै झन् च्याक्चै डेया, “होसकी क्रूसाङ टङ्गडीम यान्ही!” 15पिलातसै भीडकी खुसी पार्च मीमन जाट्च बाटै होचे बारब्बाकी होखुरीकुङ लागि डास्न याहा। येशूकी चहिँ कोर्रा ङापार क्रूसाङ टङ्गडीकी डेम रोमी सिपाहीकोलाक जिम्मा याहा।
सिपाहीकै येशूकी गिल्ला जाट्च
(मत्ती २७:२७-३१; यूहन्ना १९:२-३)
16सिपाहीकै येशूकी बडाहाकिमौ दरबारौ आर्भाङ आल्हा र अरु पट्ट न सिपाहीकोलाक आर्घाम राका। 17अनि होखुरीकै येशूकी गिल्ला जाट्चै बैजनी रङुङ बढीन बील्हाका र जुओ मुकुट खासार होसकुङ मीटालुवाङ काम याहा। #१५:१७ होडीक बेला, राजाकै होङ्च न बैजनी रङौ बढीन बील्छ जाट्न्या। 18अनि होखुरीकै होसकोकी “यहूदीकुङ राजौ जय छान्ख्यो” डेयार सलाम जाटा। 19अनि होखुरीकै आर्क्यामौ डाङ्गै येशूकी मीटालुवाङ हीर्कडीचै, मेठोक ठोक्चै अनि घुँडा टुसार होसकोकी झोरा। 20इटजाट्न खीस्डीम भ्यारखीङ होखुरीकै बैजनी रङुङ बढीन डोना र येशूओ मेखोल्हौ न बढीन बील्हाक्ङ याहा। होटै होखुरीकै होसकोकी क्रूसाङ टङ्गडीकी डेम सहर लकीङ बाहिर आल्हा।
येशूकी क्रूसाङ टङ्गडीच
(मत्ती २७:३२-४४; लूका २३:२६-४३; यूहन्ना १९:१७-२७)
21जब लामाङ नुङ्चै जाट्नाङ होखुरीकै कुरेनी#१५:२१ कुरेनी: इसे सहर अफ्रिकौ उत्तर पट्टी लेया। देशुङ सिमोन डेच भर्मी लाङ्घा लकीङ सहरलाक राछै जाट्च डुपा। होसे अलेक्जेन्डर र रुफसौ बोइ लेया। सिपाहीकै होसकी जबरजस्ती येशूओ क्रूस बुकी लैडीया। 22अनि येशूकी होखुरीकै गलगथा डेच ठावाङ आल्हा। गलगथा डेच अर्थ चहिँ “खप्परे ठाउँ हो।” 23होला टाहार होखुरीकै येशूकी अङ्गुरौ मद्याङ म्होरोक्च मूर्र मोल्होकार याहा तर येशूये मागा।#१५:२३ होखुरीककै येशूकी इसे हान लेखा म्होर्छ उसा गाच ठोक बीक्च कम छान्ख्यो डेम गाकी याहा। तर होसकै इसकी मागा, हीजैडेनाङ अन्तसम्म ही छान्नने ले डेम वार्खी होसकै मीमन जाटा। #भजनसंग्रह ६९:२२ 24होटै होखुरीकै येशूकी क्रूसाङ टङ्गडीया। होसकुङ बढीनको चहिँ सु-सुओ भाकाङ पर्ले डेयार होखुरीकै चिठ्ठा कार पुङा।
25अनि येशूकी क्रूसाङ टङ्गडीनाङ गोराकुङ नौ बजे छानन्या। 26होसकोकी दोष लैडीच दोष पत्राङ “यहूदीकुङ राजा” डेम रीक्ङन्या। 27होखुरीकै येशूखाटा नीस जना डाँकुकोलाक र क्रूसाङ टङ्गडीया। काटकी डोर पट्टी र काटकी देब्रेपट्टी। 28[धर्मशास्त्राङ रीक्च वचन इटजाट्न पूरा छाना, “होसकोकी अपराधीकोखाटा हीला।#यशैया ५३:१२”]#१५:२८ कोइ कोइ संस्करनौ बाइबलाङ इसे पद माले
29होसे लाम छान्चै नुङ्च भर्मीकै मीटालु होयोक्चै येशूकी गिल्ला जाट्चै डेया, “ङोस्नी ट! होसे न होइन परमेश्वरौ मन्दिर भत्कडीयार सोम याकाङ न खास्की ह्योक्ले डेच, 30लाहाकी जीवाटाकार क्रूस लकीङ झाल्न रान्हा!” 31होटजाट्न न मुख्य पूजाहारीको र धर्मगुरुकै र येशूकी गिल्ला जाटा। होखुरीकै मेखुरीक-मेखुरीक डेकी ठाला, “इचे अरुकी च जीवाटाका तर लाहाकी चहिँ जीवाटाक्की माह्योका। 32ए इस्राएलीकुङ राजा मुक्ति याछ ख्रीष्ट अब क्रूस लकीङ झाल्न रान्हा, कान ङोसीङ होटै टी विश्वास जाट्ले” येशूखाटा न टङ्गडीस्चकै र होसकुङ निन्दा जाटा।
येशू सीच
(मत्ती २७:४५-५६; लूका २३:४४-४९; यूहन्ना १९:२८-३०)
33नाम्सीनुङ बाह्र बजेलकीङ सोम बजेसम्म पट्ट न देशकी छुम्छये हुपा। 34सोम बजे पट्टी येशू बाड्को स्वरै च्याका, “इलोइ, इलोइ, लामा सबखथनी#१५:३४ इलोइ, इलोइ, लामा सबखथनी “इलोइ, इलोइ, लामा सबखथनी” इसे शब्दको चहिँ आरामीक हो।?” इच्यौ अर्थ हो, “ए ङौ परमेश्वर, ए ङौ परमेश्वर ङाकी नाकै हीजै डास्न याहा?”#भजनसंग्रह २२:१ 35होला खेरेप लेचकै इसे स्वर सेयार कोइ-कोये डेया, “सेनी ट! इचे एलियाकी आर्घामनले।”#१५:३५ “एलिया” म्यार्मीन “एलोइ” लेखा न सेले, होच्यो अर्थ “ङौ परमेश्वर” हो। 36होटै न्हुइङ काट जनै चहिँ खेर्न नुङार काट स्पन्ज सिर्काङ छोपार काट लोट्च आर्क्यामाङ इट डेयार येशूकी गाकी याहा, “लु ङोसीङ ट! एलिया इसकी झालाक्की राल्हे की।” 37अनि होडीक न बेला येशूये बाड्को स्वर छ्युकार प्राण डासा।
38होडीक न बेला परमेश्वरौ मन्दिर भित्री टङ्गडीच पर्दा ढेनाम लकीङ म्हाकासम्म नीस भाग छानार च्याहा।#१५:३८ इसे पर्दा पवित्र ठाउँ र महापवित्र ठाँओ मीघ्याङ लेया। परमेश्वराङ बाड्को पूजाहारी मट्टै होइन, तर जोसुकै भर्मी राखी अट ह्योकै डेम होसकै होसे पर्दाकी च्याट्न याहा। #प्रस्थान २६:३१-३३ 39येशूये इटजाट्न प्राण डास्च डाङार क्रूसौ छेवाङ टोङ्ह ङुच रोमी कप्तानै डेया, “साँच्ची न इसे भर्मी च परमेश्वरौ न मीजा लेसा!” 40कुडीक जना मास्टो भर्मीको चहिँ लोसीङ न टोङ्हार ङोस्न ङुमन्या। होखुरीक मध्याङ मरियम मग्दलिनी, सलोमी, माजा याकूब र योसेफौ मोइ मरियम लेया। 41येशू गालीलाङ लेनाङ होखुरीकै होसकोकी डुटार होसकुङ सेवा जाट्नन्या। होटबाटै येशूखाटा यरूशलेमसम्म राछ अरु वास्टै मास्टो भर्मीको र होला लेया।
येशूकी चिहानाङ डाच
(मत्ती २७:५७-६१; लूका २३:५०-५६; यूहन्ना १९:३८-४२)
42-43होसनीक चहिँ तयारीयो दिन डेच म्हुङ बाट्च दिनौ अगाडियुङ दिन लेया। अरिमाथिया सहरुङ योसेफै होसनीक न नाबीलाङ पिलातसखाटा माबीह्रीम येशूओ लाश ङेहा। योसेफ चहिँ महासभौ मन्डीकी पर्च काट जना सदस्य लेया। होचे परमेश्वरौ राज्यकी लेन्न ङुमन्या।
44येशू अघि न सीम भ्यामे डेम सेनाङ पिलातस छक्क पर्या। होचे रोमी कप्तानकी लाहा लेठाङ आर्घार येशू सीम भ्याच हो की होइन डेयार गीना। 45होसे कप्तानै साँच्ची न येशू सीम भ्याच हो डेयार सेटाक्च पछि पिलातसै योसेफकी येशूओ लाश आल्खी याहा। 46योसेफै मजुङ सुती बढीन लोम राकार येशूओ लाशकी क्रूसीङ झालाका होटै होसे न बढीनै आर्फोकार ल्हुङ खोप्डीयार खास्न डाच चिहानाङ डा। होटै बाड्को ल्हुङै चिहानौ मेङ्गेर ठुन्न याहा। 47मरियम मग्दलिनी र योसेफौ मोइ मरियमै चहिँ येशूकी चिहानाङ डाच ङोस्न ङुमन्या।
Currently Selected:
मर्कूस 15: EMGP
Highlight
Copy
Compare
Share
Want to have your highlights saved across all your devices? Sign up or sign in
© 2025 by Mother Tongue Translators Society and Wycliffe Bible Translators, Inc.
