मर्कूस 14
14
येशूकी साट्की पाच
(मत्ती २६:१-५; लूका २२:१-२; यूहन्ना ११:४५-५३)
1अब नीसयाक न्हुइङ छुटकारौ चाड र अखमिरी रोटोओ चाड लेया। मुख्य पूजाहारीको र धर्मगुरुकै कुटजाट्न येशूकी सुटुक्कै घोवार साटीङ डेम दाउ ङोस्न न लेया। 2तर होखुरीकै डेमन्या, “चाडौ बेलाङ चहिँ होइन, नभा च भर्मीकोवाङ हूलदङ्गा सोले।”
काट मास्टोये येशूकी अत्तर ह्वाक्ङ याछ
(मत्ती २६:६-१३; यूहन्ना १२:१-८)
3येशू बेथानियाङ सिमोन कुष्ठरोगीयो इमाङ नुङा। होसको ज्याकी ङुनाङ काट मास्टो सक्कली जटामसीयो महङ्गो अत्तर सिङ्गमरमरौ भुडुल्काङ लार राहा र होसे भुडुल्का भासा र होसे बासना राछ जटामसीयो अत्तर होसकुङ मीटालुवाङ ह्वाक्ङ याहा। 4तर कुडीक भर्मीकै चहिँ मीरीस जाटार मेखुरीक-मेखुरीक डेकी ठाला, “इसे बासना राछ अत्तर हीजै नोक्सानी जाट्च औला? 5हीजैडेनाङ इसे अत्तर सोम सय चाँदीयो सिक्का डेनाङ धेरैयाङ आर्लार होसे पैसा गरीबकोलाक याखी ह्योक्च लेया।” इटजाट्न होखुरीकै होसे मास्टोकी हक्कारीया।
6तर येशूये डेया, “होसकी डास्न यान्ही! हीजै नाखुरीकै होसकी हक्कारीच? इचे ङौ लागि सेछ काम जाट्नने। 7हीजैडेनाङ गरीबको च नाखुरीकखाटा सधैँ काठोवाङ छान्ने र मीमन जाट्च कुसेर समयाङ नाखुरीकै होखुरीकुङ भलाइ जाट्की ह्योक्ले। तर ङा च सधैँ नाखुरीकखाटा काठोवाङ माछान्ने। 8इसे मास्टोये ही जाट्की ह्योक्न्या होसे न जाट्नने। इचे ङौ शरीरौ दफनौ लागि अघि लकीङ न बासना राछ अत्तर मोलार तयार खास्न न ले।#१४:८होसे बेला, यहूदीकै सीच भर्मीकी ठाक्च बेला मानाम्ख्यो डेम लाशाङ बास्ना राछ अत्तर र सीडीको मोल्छ जाट्न्नया। 9साँच्ची न ङा नाखुरीककी डेले, सारा संसाराङ कुला-कुला इसे सेछ समाचार प्रचार जाट्ले, होला इसे मास्टोये ही काम जाट्नने होच्यो बारेयाङ र आर्मीट्ले।”
यहूदास येशूकी घोवाक्की तयार छान्च
(मत्ती २६:१४-१६; लूका २२:३-६)
10होटै न्हुइङ बाह्र जना चेलाको मध्याङ यहूदास इस्करियोत डेचये चहिँ मुख्य पूजाहारीको लेठाङ नुङार येशूकी घोवार नाखुरीकुङ मीहुटाङ याल्हे डेच कुरा जाटा। 11होखुरीक इसे कुरा सेयार माह्राङा र होसकी पैसा याल्हे डेम कबुल जाटा। होटै न्हुइङ येशूकी कुटजाट्न घोकी डेम होचे मौका ङोस्की ठाला।
येशूये चेलाकोखाटा अन्तिम भोज ज्याच
(मत्ती २६:१७-३०; लूका २२:७-२३; यूहन्ना १३:२१-३०; १ कोरिन्थी ११:२३-२५)
12अब अखमिरी रोटो ज्याच चाडौ पहिलुङ दिनाङ होखुरीकै छुटकारौ चाडौ थुमा भोग याछ चलन लेया। येशूओ चेलाकै होसकोकी गीना, “नाकुङ इच्छा ही ले? कान कुला नुङार नाकुङ लागि छुटकारौ चाडौ भोज तयार खास्की?”
13होटै येशूये लहो नीस जना चेलाकोलाक इट डेयार बीर्न्हका, “सहराङ नुङ्नी र होला नाखुरीकै काट जना डीकुँडा बुवार नुङ्चै जाट्च भर्मीकी डुप्ले र होच्यो न न्हुङ-न्हुङ नुङ्नी। 14होसे भर्मी कुसे इमाङ पर्ले होसे इमौ मीमुरुङ्की डेकी, ‘गुरु ज्यु गीन्ने, ङौ चेलाकोखाटा छुटकारौ चाडौ भोज ज्याकी पाहुना कोठा कुला ले?’ 15अनि होचे नाखुरीककी काट सजडीयार तयार खास्च ढेम्च तलुङ बाड्को कोठा टान्हाक्ले र होला न नाखुरीकै काल्हौ लागि भोज तयार जाट्की।” 16तब होसे नीस चेलाको नुङार सहराङ पर्च बित्तिकै येशूये होखुरीककी डेच लेखा न डुपा र होखुरीकै छुटकारौ चाडौ भोज तयार जाटा।
17नाबीलाङ येशू बाह्र जना चेलाकोखाटा राहा। 18अनि होखुरीक ज्याचै जाट्नाङ येशूये डेया, “ङा नाखुरीककी साँच्ची न डेले, नाखुरीक मध्याङ ङाखाटा ज्याच काट जनै ङाकी धोका याल्हे।” 19इसे कुरा सेयार चेलाकोलाक दु:ख लग्डीसार पालैपालो येशूकी गीना, “ही होसे ङा हो?” डेम गीन्की ठाला।
20होसकै होखुरीककी डेया, “बाह्र जना मध्याङ काट जना हो, सुये ङाखाटा थालाङ रोटो छोप्मन ले। 21भर्मीयो मीजाकी च धर्मशास्त्राङ मेन बारेयाङ रीक्च अनुसार सीकी न पर्ले, तर धिक्कार होसे भर्मीकी सु लकीङ भर्मीयो मीजाकी धोका याल्हे। होसे भर्मीयो च जन्म न माछान्च लेनाङ सेम्ह छान्च लेया!”
22ज्याचै जाट्नाङ येशूये रोटो लार परमेश्वरकी धन्यवाद याहा अनि ग्याकार चेलाकोलाक याछै डेया, “लानी, इसे ङौ शरीर हो।” 23होटै न्हुइङ कचौरा लार धन्यवाद याम्ह भ्याच न्हुइङ होसकै चेलाकोलाक याहा र होखुरीक पट्टकै होसे कचौरा लकीङ गा। 24अनि येशूये होखुरीककी डेया, “इसे ङौ ह्यु परमेश्वर र भर्मीकुङ मीघ्यीयुङ करार हो, इसे वास्टै भर्मीकुङ पाप क्षमौ लागि जोकाक्ले। 25साँच्ची न ङा नाखुरीककी डेले, परमेश्वरौ राज्याङ नयाँ जाट्न मागाठर सम्म ङा फेरि अङ्गुरौ मद्य मागाले।” 26अनि काट भजन ल्हीङार होटै ख्योहार होखुरीक जैतून डाँडा लाक नुङा।#१४:२६नाबीलुङ भोजौ ज्यामा ज्यारखीङ यहूदीकै, भजनसंग्रह ११५ लकीङ ११८ सम्म। ल्हीङको ल्हीङ्च जाट्न्या।
पत्रुसै येशूखाटा जाट्च वाचा
(मत्ती २६:३१-३५; लूका २२:३१-३४; यूहन्ना १३:३६-३८)
27येशूये चेलाकोलाक डेया, “नाखुरीक पट्ट न ङाकी डासार भोग्डीस्ले हीजैडेनाङ धर्मशास्त्राङ याङ्च रीक्ङने,
‘ङा गोठ्लाकी साट्ले र भेडाको तितरबितर छान्ने।’ #
जकरिया १३:७
28 “तर ङा जीवाम सोरखीङ ङा नाखुरीक डेनाङ पहिला गालीलाङ नुङ्ले।” 29पत्रुसै येशूकी डेया, “पट्ट जना भोग्डीस्नाङ र ङा चहिँ माभोग्डीस्ले।”
30तब येशूये होसकी डेया, “साँच्ची न, ङा नाकोकी डेले, छीनी नाबीक भाले नीस खेप राक्की डेनाङ अगाडि नाकै ङाकी सोम खेप माचीन्डीले डेयार इन्कार जाट्ले।” 31तर पत्रुसै झन् जोड जाटार डेया, “नाकोखाटा ङा सीकी न पर्नाङ र ङा नाकोकी इन्कार माजाट्ले।” होटै अरु चेलाकै र होटन डेया।
गेतसमनी बगैँचाङ येशूओ प्रार्थना
(मत्ती २६:३६-४६; लूका २२:३९-४६)
32होटै न्हुइङ येशू चेलाकोखाटा गेतसमनी डेच बगैँचाङ नुङा। अनि होसकै होखुरीककी डेया, “ङा प्रार्थना जाट्ठर नाखुरीक इला न ङुनी।” 33अनि होसकै पत्रुस, याकूब र यूहन्नाकी लाहाखाटा न आल्हा। होसकुङ मीमन पीडै साह्रै छट्पटडीस्की ठाला। 34अनि होसकै चेलाकोलाक डेया, “ङौ मीमन पीडै छट्पटडीसार सीकी पाम भ्यामने। नाखुरीक इला न मामीस्न ङुनी।” 35चेक पारी नुङार होसको झाङ घोप्टो छानार छान्की ह्योक्ले डेनाङ होसे कष्टओ घडी ङा लकीङ हटडीस्ख्यो डेयार प्रार्थना जाटा। 36अनि होसकै डेया, “ए अब्बा#१४:३६अब्बा: इसे चहिँ आरामीक भाषुङ शब्द हो इच्यौ अर्थ चहिँ “बोइ” हो।, ए बोइ, नाकै पट्ट कुरा जाट्की ह्योक्ले। इसे कचौरा ङा लकीङ हटडीम यान्ही। तर ङै जाट्च इच्छाङ होइन, नाकै जाट्च इच्छा पूरा छान्ख्यो।”
37होसको सोम जना चेलाको लेठाङ ल्हेस्न रान्हाङ होखुरीक मीमीक झ्युक्ङ ङुच डुपराहा। होसकै पत्रुसकी डेया, “सिमोन, ही नाको मीमीक झ्युक्ङ ङुमने? नाको काट घण्टा र मीमीक माझ्युक्ङ ङुकी माह्योका? 38मीमीक माझ्युक्नी र प्रार्थना जाट्नी, होटबाटै नाखुरीक परीक्षाङ मापर्ख्यो। मीमन च तयार ले तर शरीर कमजोर ले।”
39फेरि नुङार येशूये दोहोरीयार होसे न प्रार्थना जाटा। 40फेरि रान्हाङ र होसकै होखुरीककी मीमीक झ्युक्ङ ङुच डुपराहा, होखुरीक मीमीक झुकार लठ्ठै छान्चबाटै येशूकी ही जवाफ याखी पर्च होखुरीककी हीर माह्रा।
41येशू फेरि सोम खेपाङ रान्हाङ होखुरीककी डेया, “ही नाखुरीक अझै र मीमीक झ्युक्ङन ले? अब सोनी बेला राहा। ङोस्नी, भर्मीयो मीजाकी पापीकुङ मीहुटाङ घोवाक्ङ याछ बेला छान्नने। 42सोनी, अब नुइङ। ङोस्नी, ङाकी धोका याछ भर्मी खेरेप्न ले।”
येशूकी घोच
(मत्ती २६:४७-५६; लूका २२:४७-५३; यूहन्ना १८:३-१२)
43येशूये ङाक्नाङ-ङाक्नाङ न बाह्र जना चेलाको मध्याङ काट जना यहूदास डेच चेला मोसोमायाङ होला राहा। मुख्य पूजाहारीको, धर्मगुरुको र अगुवाकै बीर्न्हकाच काट हुद्दा तरवार र लठ्ठी लार होसेखाटा होला राहा। 44होसकोकी घोवाक्च यहूदासै होसे भर्मीकोलाक इट डेमन्या, “सुकी ङा चुम्ल्हे, होसे येशू हो, होसकी न घोवार पहरा याहार आल्खी।” 45अनि यहूदास सरासर येशू लेठाङ नुङा, “ए गुरु ज्यु” डेयार होसकोकी गालाङ चुम्हा। 46होडीक न बेला होखुरीकै येशूकी घोवा। 47होला येशू खेरेप टोङ्छ चेलाको मध्याङ काटै तरवार डोनार प्रधान पूजाहारीयो नोकरकी ङापा र होच्यो मेनेकेप च्वाट्टै चेम याहा।
48येशूये होखुरीककी डेया, “ही नाखुरीक काट डाकाकी लेखा तरवार र लठ्ठी लार ङाकी घोकी राछ? 49ङै दिन-दिनै परमेश्वरौ मन्दिराङ शिक्षा पाहाक्नाङ ङा नाखुरीकखाटा काठोवाङ न लेया र पनि नाखुरीकै ङाकी माघोवा। तर धर्मशास्त्राङ रीक्च कुरा पूरा छान्ख्यो।” 50होडीक न बेला पट्ट चेलाको येशूकी डासार भोग्डीसा।
51जीवाङ काट मट्टै सूती बढीन बील्छ काट जना रेन्जा भर्मी होसकुङ न्हुङ-न्हुङ नुङा। अनि होखुरीकै होसे रेन्जा भर्मीकी घोवा। 52तर बढीन डासार होसे नाङ्ग्या न भोग्डीसा।
महासभौ म्याहासाङ येशू
(मत्ती २६:५७-६८; लूका २२:५४-५५,६३-७१; यूहन्ना १८:१३-१४,१९-२४)
53तब येशूकी होखुरीकै प्रधान पूजाहारी लेठाङ आल्हा, होला पट्ट न मुख्य पूजाहारीको, अगुवाको र धर्मगुरुको जम्मा छानन्या। 54पत्रुस चहिँ चेक लोसीङ प्रधान पूजाहारीयो आर्भा भित्री येशूओ न्हुङ-न्हुङ नुङा, अनि होला सिपाहीकोखाटा ङुवार होसे म्हे गुप्की ठाला।
55मुख्य पूजाहारीको र महासभाङ ङुच पट्टकै येशूकी साट्कीयो लागि होसकुङ विरुद्धाङ साक्षी पा तर हीर माडुपा। 56र धेरै जनै येशूओ विरुद्धाङ झूटो साक्षी याहा। तर सुओर साक्षी माखाटा। 57अनि कुडीक भर्मीकै सोवार होसकुङ विरुद्धाङ इट डेचै साक्षी याहा, 58“इचे इट डेच कानै सेया, ‘भर्मीयो मीहुटै खास्च इसे मन्दिरकी ङा भत्कडीले र भर्मी बिना न अर्को मन्दिर ङा सोम याकाङ न खास्ले।’” 59तर इला र होखुरीकुङ साक्षी माखाटा।
60प्रधान पूजाहारी भर्मीकुङ अगाडि सोवार येशूकी गीना, “ही नाङखाटा हीर जवाफ माले? इसे भर्मीकै नुओ विरुद्धाङ साक्षी याछ ही हो?” 61तर येशू माच्याक्ङ न ङुवा, हीर जवाफ माह्या। फेरि प्रधान पूजाहारीये होसकोकी गीना, “ही नाङ परमधन्यौ मीजा मुक्ति याछ ख्रीष्ट हो?” 62येशूये डेया, “ङा न हो, अनि नाखुरीकै भर्मीयो मीजाकी सर्वशक्तिमानौ डोरमीहुट पट्टी ङुम-ङुच र सर्घाङ डेबुखाटा राछै जाट्च डाङ्ले।” 63प्रधान पूजाहारीये मीरीसै लहो बढीन च्याट्चै डेया, “अब कानकी अरु साक्षीको हीजै चहडीसा र? 64इचे परमेश्वरौ निन्दा जाट्च नाखुरीकै सेकी क्योटा। नाखुरीकुङ विचार चहिँ ही ले?” अनि होखुरीक पट्टकै होसकोकी ज्यान सजाय छान्की पर्ले डेया। 65अनि कुडीकै चहिँ येशूकी मेठोक ठोकार होसकुङ मीमीक हुपार थप्पड ङाप्चै डेया, “लु अगमवाणी ङाको ट, नाङ्की सुये डुङा?” होटै न्हुइङ सिपाहीकै होसकोकी जिम्मा ला अनि होखुरीकै र येशूकी डुङा।
पत्रुसै येशूकी माचीन्डीले डेच
(मत्ती २६:६९-७५; लूका २२:५६-६२; यूहन्ना १८:१५-१८,२५-२७)
66पत्रुस म्हाका आर्भाङ ङुम ङुनाङ प्रधान पूजाहारीयो काट नोकरनी होला राहा। 67होचे पत्रुसकी म्हे गुप्मङुच डाङार होसकी सेम्हजा ङोसार डेया, “नाको र नासरतुङ येशूखाटा न लेया।”
68तर पत्रुसै इट डेचै इन्कार जाटा, “नाकै ही डेच होसकोकी ङा माचीन्डीले।” होटै न्हुइङ होसे बाहिरुङ मुल गालाम पट्टी नुङा र होडीक बेला न भाल्यै राका।
69होसे नोकरनीये होसकी होला डाङार फेरि होला लेच भर्मीकोलाक डेया, “इसे च होखुरीक मध्युङ न हो।”
70तर पत्रुसै फेरि माचीन्डीले डेयार इन्कार जाटा। तर काटछीन न्हुइङ वार्लाक-पार्लाक टोङ्छ भर्मीकै फेरि पत्रुसकी डेया, “पक्कै, नाको होखुरीक मध्युङ काट हो, हीजैडेनाङ नाको गालीली हो।”
71तर पत्रुसै सपथ ज्यार डेकी ठाला, “इडीक ङै ढाट्डीच हो डेनाङ परमेश्वरौ सराप ङा मीटाक पर्ख्यो। सुओ बारेयाङ नाखुरीक डेमन ले होसे भर्मीकी ङा माचीन्डीले।”
72होटै न्हुइङ तुरुन्तै नीस पहर भाल्यै राका, अनि पत्रुसकी येशूये इट डेच कुरा आर्मीटा, “भाल्यै नीस खेप राक्की डेनाङ अगाडि नाकै ङाकी सोम खेप माचीन्डीले डेयार इन्कार जाट्ले।” अनि होसे कुराकी आर्मीटार होसे धुरु-धुरु रापा।
Currently Selected:
मर्कूस 14: EMGP
Highlight
Copy
Compare
Share
Want to have your highlights saved across all your devices? Sign up or sign in
© 2025 by Mother Tongue Translators Society and Wycliffe Bible Translators, Inc.
