मत्ती 26
26
येशूकी साट्की पाच
(मर्कूस १४:१-२; लूका २२:१-२; यूहन्ना ११:४५-५३)
1येशूये इसे पट्ट न कुरा डेम भ्याच न्हुइङ लहो चेलाकोलाक डेया, 2“नाखुरीककी थाहा ले, अब नीसयाक न्हुइङ छुटकारौ चाड राल्हे। होडीक बेला भर्मीयो मीजाकी क्रूसाङ टङ्गडीकीयो लागि घोले।”
3होडीक न बेला कैयाफा डेच प्रधान पूजाहारीयो दरबाराङ मुख्य पूजाहारीको र अगुवाको भेला छाना। 4अनि होखुरीकै येशूकी कुटजाट्न सुटुक्क घोवार साट्की डेम सल्लाह जाटा। 5तर होखुरीकै डेया, “चाडौ बेलाङ चहिँ इट माजाटीङ। नभा च भर्मीकुङ मीघ्याङ बाड्को खैलाबैला छान्ने।”
काट मास्टोये येशूकी अत्तर ह्वाक्ङ याछ
(मर्कूस १४:३-९; यूहन्ना १२:१-८)
6येशू बेथानियाङ सिमोन डेच कुष्ठरोग लकीङ गेप्च भर्मीयो इमाङ लेया। 7होडीक बेला काट मास्टो महङ्गो पर्च अत्तर सिङ्गमरमरौ काट भुडुल्काङ लार येशू लेठाङ राहा। होसको ज्याकी ङुनाङ होचे होसे होसकुङ मीटालुवाङ ह्वाक्ङ याहा। 8इट जाट्च डाङार चेलाको मीरीस ख्योछै डेया, “हीयो लागि इडीक वास्टै अत्तर खेर लोछ? 9हीजैडेनाङ इसे अत्तर वास्टै पैसाङ आर्लार होसे पैसा गरीबकोलाक याखी ह्योक्च लेया।”
10तर येशूये इसे कुरा थाहा डीन्हार होखुरीककी डेया, “हीजै नाखुरीक इसकी गन-गन जाट्ले? होचे च ङौ लागि काट सेछ काम जाट्नने। 11गरीबको च नाखुरीकखाटा सधैँ न ङुले, तर ङा च नाखुरीकखाटा सधैँ माङुले। 12इचे इसे अत्तर ङौ शरीराङ ह्वाकार ठाक्कीयो लागि ङाकी तयार जाट्च हो। 13साँच्ची न, ङा नाखुरीककी डेले, पट्ट न संसाराङ कुला-कुला इसे सेछ समाचार सेटाक्ले, भर्मीकै इसे मास्टोये चाहाँ ही जाट्नने होसे आर्मीट्ले।”
येशूकी धोका याखी यहूदास मन्डीच
(मर्कूस १४:१०-११; लूका २२:३-६)
14तब बाह्र जना चेलाको मध्याङ काट जना यहूदास इस्करियोत डेच चहिँ मुख्य पूजाहारीको लेठाङ नुङा, 15र डेया, “इडीक येशूकी ङै नाखुरीकुङ मीहुटाङ घोवाका डेनाङ, ङाकी ही याल्हे?” होटै होखुरीकै होसकी चाँदीयो तीस सिक्का#२६:१५ चाँदीयो तीस सिक्का: चाँदीयो तीस सिक्का बराबर चहिँ काट जना भर्मीयो बाङा महिनौ ज्याला हो। याहा। 16अनि होस बेला लकीङ यहूदासै होसकोकी घोवाक्ङ याछ मौका पाकी ठाला।
अन्तिम भोज
(मर्कूस १४:१२-२६; लूका २२:७-२३; १ कोरिन्थी ११:२३-२५)
17अखमिरी रोटोओ चाडौ पहिलो याक चेलाकै येशू लेठाङ राहार डेया, “नाकुङ लागि छुटकारौ चाडौ भोज ज्याच ठाउँ कानै कुला तयार खास्की?” 18अनि होसकै डेया, “सहराङ काट जना भर्मीलेठाङ नुङ्नी, र होसकी डेकी, ‘गुरु ज्यु डेले, ङौ बेला खेरेप राम्हने। ङा ङाल्हौ चेलाकोखाटा नाकुङ इमाङ छुटकारौ चाड मन्डीले।’” 19चेलाको नुङार येशूये डेनाङ लेखा न छुटकारौ चाडौ लागि भोज तयार खासा।
20नामबीक्रखीङ येशू बाह्र जना चेलाकोखाटा ज्याकी ङुवा। 21ज्याचै जाट्नाङ येशूये डेया, “साँच्ची न, ङा नाखुरीककी डेले, नाखुरीक मध्युङ काट जनै ङाकी शत्रुओ मीहुटाङ घोवाक्ले।” 22इसे कुरा सेयार पट्ट न चेलाको दु:खित छानार काट-काट जनै होसकोकी गीन्की ठाला, “प्रभु, ही होसे ङा हो?” 23होसकै होखुरीककी डेया, “सुये चाहाँ ङाखाटा न कचौराङ रोटो छोप्मने, होचे न ङाकी घोवाक्ङ याल्हे। 24भर्मीयो मीजा च धर्मशास्त्राङ रीक्च अनुसार सीकी न पर्ले। तर धिक्कार होसकी, सुये भर्मीयो मीजाकी घोवाक्ङ याल्हे। होसे च माजन्मडीस्च लेनाङ न मेन लागि सेम्ह छान्च लेया।” 25तब येशूकी घोवाक्की पाच यहूदासै गीना, “गुरु ज्यु, ही होसे ङा हो?” होसकै डेया, “नाको लहे न डेमन ले।”
26होखुरीकै भोज ज्यामन लेनाङ येशूये रोटो लार परमेश्वरकी धन्यवाद याहा अनि ग्याकार चेलाकोलाक याहा र डेया, “लानी, र ज्यानी, इसे ङौ शरीर हो।”
27येशूये कचौरा लार परमेश्वरकी धन्यवाद याहा र चेलाकोलाक याछै डेया, “नाखुरीक पट्टकै इसे लकीङ गानी। 28इसे ङौ ह्यु परमेश्वर र भर्मीकुङ मीघ्यीयुङ करार हो, इसे वास्टै भर्मीकुङ पाप क्षमौ लागि जोकाक्ले। 29नाखुरीककी ङा डेले, ङौ बोयो राज्याङ नाखुरीकखाटा नयाँ अङ्गुरौ मद्य मागाठर ङा फेरि इसे मद्य मागाले।”
30काट भजन ल्हीङार येशू चेलाकोखाटा बाहिर जैतून डाँडा लाक नुङा।
पत्रुसै इन्कार जाट्ले डेम येशूये डेच
(मर्कूस १४:२७-३१; लूका २२:३१-३४; यूहन्ना १३:३६-३८)
31होडीक बेला येशूये चेलाकोलाक डेया, “छीनी नाबीक नाखुरीक पट्टको ङाकी डासार भोग्डीस्ले। हीजैडेनाङ धर्मशास्त्राङ याङ्च रीक्ङने,
‘ङा गोठ्लाकी साट्ले,
अनि बगालुङ भेडाको पट्ट पट्टी छरपष्ट छान्ने।’ #
जकरिया १३:७
32 “तर ङा सीच लकीङ जीवाम सोच न्हुइङ नाखुरीक डेनाङ अगाडि गालीलाङ नुङ्ले।” 33पत्रुसै येशूकी डेया, “पट्टकै नाकोकी डासार भोग्डीस्नाङ र ङा चहिँ नाकोकी सेन र माडास्ले।” 34अनि येशूये होसकी डेया, “साँच्ची न, ङा नाकोकी डेले, छीनी नाबीक भाले राक्की डेनाङ अघि नाकै ङाकी सोम खेप माचीन्डीले डेम इन्कार जाट्ले।” 35पत्रुसै होसकोकी जवाफ याहा, “नाकोखाटा सीकी पर्नाङ र ङा नाकोकी माचीन्डीले डेम इन्कार माजाट्ले।” अनि अरु पट्ट न चेलाकै र होटन डेया।
गेतसमनी बगैँचाङ येशू
(मर्कूस १४:३२-४२; लूका २२:३९-४६)
36येशू गेतसमनी डेच बगैँचाङ लहो चेलाकोखाटा नुङा। अनि होखुरीककी डेया, “नाखुरीक चहिँ इला न ङुनी, ङा चेक पार्लाक नुङार प्रार्थना जाट्ले।” 37पत्रुस र जब्दियो नीस मीजाकी चहिँ येशूये लाहाखाटा न आल्हा अनि होसको साह्रै न शोक र पीडाङ व्याकुल छाना। 38तब होसकै सोम जना चेलाकोलाक डेया, “ङौ मीमन शोक र पीडै जाट्न सीनाङ लेखा न छान्नने। नाखुरीक चहिँ इला न ङुनी, र ङाखाटा न मामीस्न ङुनी।”
39होटै येशू चेक पारी नुङार झाङ खुखुप छानार प्रार्थना जाटा, “ए ङौ बोइ, छान्की ह्योक्ले डेनाङ, इसे दु:खौ कचौरा ङा लकीङ हटडीस्ख्यो। तर ङै मीमन जाट्च अनुसार चहिँ होइन, तर नाकै जाट्च मीमन अनुसार छान्ख्यो।”
40अनि येशू सोम जना चेलाको लेठाङ ल्हेस्न रान्हाङ होखुरीक मीमीक झ्युक्ङ ङुच डुपराहा, र पत्रुसकी डेया, “ही नाखुरीक ङाखाटा काट घन्टा र मीमीक माझ्युक्ङ ङुकी माह्योका? 41मीमीक माझ्युङ ङुनी, परीक्षाङ मापर्की प्रार्थना जाट्नी। आत्मा च साँच्ची न तयार ले, तर शरीर चहिँ कमजोर ले।”
42फेरि नुङार येशूये प्रार्थना जाटा, “ए ङौ बोइ, इडीक ङै मागाम इसे दु:खौ कचौरा हटडीकी सम्भव माले डेनाङ, नाकुङ न इच्छा पूरा छान्ख्यो।” 43अनि होसको फेरि चेलाको लेठाङ ल्हेस्न रान्हाङ होखुरीक मीमीक झ्युक्ङ ङुच डुपा, र होखुरीकै मीमीक फोकी न माह्योका, हीजैडेनाङ होखुरीक मीमीक म्होराङ लेया।
44होटबाटै येशूये होखुरीककी होला न डासार नुङा, अनि फेरि अघियुङ न शब्दको दोहोरीयार प्रार्थना जाटा। 45होटै होसको चेलाको लेठाङ ल्हेस्न राहार होखुरीककी डेया, “नाखुरीक चाहाँसम्म र मीस्न न ले? ङोस्नी, समय खेरेप राम्हभ्यामने। भर्मीयो मीजाकी पापी भर्मीकुङ मीहुटाङ जिम्मा याछ बेला छान्न भ्यामने। 46अब सोनी, नुइङ। ङोस्नी, ङाकी घोवाक्च भर्मी खेरेप राम्हभ्यामने।”
येशूकी घोच
(मर्कूस १४:४३-५०; लूका २२:४७-५३; यूहन्ना १८:३-१२)
47इटजाट्न येशूये ङाक्नाङ-ङाक्नाङ न, बाह्र जना चेलाको मध्याङ काट जना यहूदास डेच चेला राहा। होसेखाटा मुख्य पूजाहारीको र अगुवाकै बीर्न्हकाच काट बाड्को भीड तरवार र घोचाको लार राहा। 48येशूकी घोवाक्च यहूदासै होखुरीककी इट डेयार काट सङ्केत याम्हन्या, “कुसे भर्मीकी ङा चुम्ल्हे, होसे न येशू हो, होसकी न घोकी।” 49अनि तुरुन्तै यहूदास होसको लेठाङ नुङार “ए गुरु, झोर्ले!” डेयार होसकोकी मीगालाङ चुम्हा। 50येशूये होसकी डेया, “ए लाफा, नाङ ही जाट्की राछ हो, होसे जाट्की क्योटो।” तब होखुरीक अगाडि राहार येशूकी घोवा।
51येशूखाटा लेचको मध्याङ काट जनै लहो तरवार डोनार प्रधान पूजाहारीयो नोकरौ मेनेकेप च्वाट्टै चेम याहा। 52तब येशूये होसकी डेया, “नाकुङ तरवार दापाङ कानी। हीजैडेनाङ तरवार क्योट्चको पट्ट न तरवारै न साट्ले। 53नाकै ही आर्मीट्ने, ही ङाल्हौ बोइकी ङा बिन्ती जाट्की माह्योक्ले, होसकै ङौ लागि तुरुन्तै स्वर्गदूतकुङ बाह्र पल्टन डेनाङ वास्टै बीर्न्हकाकी माह्योक्ले र? 54तर इडीक ङै ङेहा डेनाङ च इसे छान्की न पर्ले डेयार धर्मशास्त्राङ रीक्च कुरा कुटजाट्न पूरा छान्की ह्योक्ले?”
55होडीक बेला येशूये लाहाकी घोकी राछ भर्मीकोलाक डेया, “हीजै नाखुरीक खुसकी घोकी रान्हाङ लेखा ङाकी घोकी तरवार र घोचाको लार राछ? ङा दिन-दिनै परमेश्वरौ मन्दिराङ शिक्षा याम्ह ङुनाङ नाखुरीकै ङाकी माघोवा। 56तर अगमवक्ताकै धर्मशास्त्राङ रीक्च कुराको पूरा छान्ख्यो डेम इसे पट्ट न छान्न राछ हो।”
तब होडीक न बेला पट्ट न चेलाको येशूकी डासार भोग्डीसा।
महासभौ म्याहासाङ येशू
(मर्कूस १४:५३-६५; लूका २२:५४-५५,६३-७१; यूहन्ना १८:१३-१४,१९-२४)
57येशूकी घोच भर्मीकै होसकोकी प्रधान पूजाहारी कैयाफौ इमाङ आल्हा। होला धर्मगुरुको र अगुवाको भेला छानन्या। 58पत्रुस चहिँ पारी पारीङ न येशूकी डुट्चै प्रधान पूजाहारीयो इमौ आर्भासम्म न टाहा। अब होला ही छान्च हो डेम ङोस्की होसे भित्री पर्यार पाल्याकोखाटा ङुवा। 59मुख्य पूजाहारीको र सभुङ पट्ट न भर्मीकै येशूकी मृत्युदण्ड याखीयो लागि होसकुङ विरुद्धाङ झूटो गवाही#२६:५९ झूटो गवाही: मोशौ व्यवस्था अनुसार सुयेर कुसकी साट्की पर्ले डेया डेनाङ होच्यो लागि नीस जना भर्मीये होसे डाङ्च हो डेयार गवाही याखी पर्न्या। तर काट जनै मट्टै याछ गवाहीये माछान्नन्या। पाकी ठाला। 60वास्टै झूटो गवाही याछको राहा, तर होखुरीकै काट र प्रमाण फेला पार्की माह्योका। होटै न्हुइङ नीस जना भर्मी अगाडि राहा 61र डेया, “इसे भर्मीये ‘ङा परमेश्वरौ इसे मन्दिरकी भत्कडीयार सोम याकाङ न फेरि खास्की ह्योक्ले’ डेया।”
62तब प्रधान पूजाहारीये सोवार येशूकी डेया, “ही नाङ हीर जवाफ माह्याले? इसे भर्मीकै नुओ विरुद्धाङ याछ इसे गबाहीयो बारेयाङ नीये डेकी पर्च कुरा हीर माले?” 63तर येशू माच्याक्ङ न ङुवा। अनि प्रधान पूजाहारीये फेरि डेया, “जिउँदो परमेश्वरौ म्यर्मीनाङ शपथ ज्यार डेले, कानकी डेम योहो, ही नाङ परमेश्वरौ मीजा मुक्ति याछ ख्रीष्ट हो?” 64येशूये होसकी जवाफ याहा, “होसे च नाकै न डेकी क्योटा। र ङा नाकोकी डेले, अब छिटो न नाखुरीकै भर्मीयो मीजाकी सर्वशक्तिमान परमेश्वरौ डोरमीहुट पट्टी ङुच, र स्वर्ग लकीङ डेबुवाङ राछै जाट्च डाङ्ले।”
65तब याङ्च कुरा सेयार प्रधान पूजाहारीये मीरीस ख्योहार लहो बढीन च्याटार डेया, “लौ ङोस्नी, इचे परमेश्वरौ निन्दा जाट्च नाखुरीकै सेकी क्योटा, अब कानकी अरु साक्षीको हीजै चहडीसा र? 66नाखुरीकुङ विचार ही ले?” होखुरीकै जवाफ याछै डेया, “इसे सीकीयो लागि योग्य ले।” 67तब होखुरीकै येशूओ मीटाहाङ मेठोक ठोक्ङ याहा, र डुङा अनि कुडीक जनै चहिँ थप्पड ङापा 68र इट डेया, “ए मुक्ति याछ ख्रीष्ट, लु अगमवाणी ङाको ट! नाङ्की हीर्कडीच सु हो?”
पत्रुसै येशूकी माचीन्डीले डेच
(मर्कूस १४:६६-७२; लूका २२:५६-६२; यूहन्ना १८:१५-१८,२५-२७)
69पत्रुस चहिँ बाहिर आर्भाङ ङुम-ङुमन्या। काट नोकर्नी होसे लेठाङ राहार डेया, “नाको र गालीलुङ येशूखाटा न लेया होइन र?” 70तर पत्रुसै होखुरीक पट्टओ म्याहासाङ इन्कार जाटार डेया, “नीये ही डेच, इसे कुरा ङा माह्वार्ले।” 71होसे आर्भौ गालाम पट्टी नुङा। अर्को काट नोकर्नीये होसकी होला डाङा, र होला लेच भर्मीकोलाक डेया, “इसे भर्मी र येशू नासरीखाटा न लेया।”
72पत्रुसै फेरि शपथ ज्यार डेया, “ङा होसे भर्मीकी चीन्डी र माचीन्डीले!”
73काटछीनाङ होला लेचकै र पत्रुस खेरेप राहार डेया, “साँच्ची न, नाको र होखुरीक मध्याङ काट जना हो, हीजैडेनाङ नाकुङ बोलीये न नाकोकी चीन्डीले।” 74फेरि पत्रुसै शपथ ज्यार डेकी ठाला, “इडीक ङै ढाट्डीच हो डेनाङ परमेश्वरौ सराप ङा मीटाक पर्ख्यो। ङा होसे भर्मीकी चीन्डी र माचीन्डीले!”
अनि तुरुन्तै भाले राका। 75तब येशूये, “भाले राक्की डेनाङ अघि नाकै ङाकी सोम खेप माचीन्डीले डेले” डेच कुरा पत्रुसै आर्मीटा, होटै होसे बाहिर नुङार धुरु-धुरु रापा।
Currently Selected:
मत्ती 26: EMGP
Highlight
Share
Copy
Want to have your highlights saved across all your devices? Sign up or sign in
© 2025 by Mother Tongue Translators Society and Wycliffe Bible Translators, Inc.
