मत्ती 25
25
दश कन्याकुङ उदाहरण
1 “स्वर्गौ राज्यकी दश कन्याकोखाटा तुलना जाट्की ह्योक्ले, होखुरीकै लाहा लहो बत्ती लार ब्याहुलाकी डुप्की नुङा। 2होखुरीक मध्याङ बाङा जना चहिँ बुद्धि लेचको लेया र बाङा जना चहिँ मूर्खको लेया। 3होसे मूर्खकै लहो बत्ती च लार नुङा, तर फाल्टो सीडी चहिँ माआल्हा। 4तर बुद्धि लेचकै चहिँ लहो बत्तीखाटा फाल्टो सीडी र आल्हा। 5ब्याहुलै राखी ढिलो जाट्नाङ होखुरीक पट्ट न मीमीक झुकार मीसा।
6 “तर आधा राताङ होखुरीकै ‘ङोस्नी ब्याहुला राम्हन ले, डुप्की रान्ही, डेयार च्याक्च स्वर सेया!’ 7तब होडीक बेला होसे दश जना कन्याको रीङ्हा र लाहा लहो बत्तीको तयार जाटा। 8अनि मूर्ख कन्याकै बुद्धि लेच कन्याकोलाक डेया, ‘नाखुरीकुङ सीडी कानकी र चेक्जा यान्ही, हीजैडेनाङ कानुङ बत्तीको च सीकी पामने।’ 9तर बुद्धि लेच कन्याकै जवाफ याहा, ‘नाखुरीककी याखी ओल्छ सीडी कानखाटा माले, दोकानाङ नुङ्नी र लोवार राक्नी।’
10 “होसे मूर्ख कन्याको सीडी लोकी नुङ्नाङ ब्याहुला टाह्रा। तयार छान्चको जति ब्याहुलाखाटा ब्याहौ भोजाङ भित्री पर्या र गालाम ठुना।
11 “होटै काटछीनाङ होसे मूर्ख कन्याको राहार डेकी ठाला, ‘प्रभु, ए प्रभु, कानुङ लागि गालाम फोम यान्ही!’ 12तर ब्याहुलै भित्री लकीङ जवाफ याहा, ‘साँच्ची न, ङा नाखुरीककी माचीन्डीले।’”
13होटै येशूये डेया, “होटबाटै होशियार छान्नी, हीजैडेनाङ भर्मीयो मीजा कुसनीक र कुसे समयाङ राल्हे डेयार नाखुरीककी थाहा माछान्ने।
सुनौ सिक्कौ उदाहरण
(लूका १९:११-२७)
14 “स्वर्गौ राज्य इसे ल्याक्च र हो। काट जना भर्मी प्रदेश नुङ्नाङ नोकरकोलाक आर्घार लहो पैसा बड्डीकी डेयार होखुरीककी याहा। 15अनि होचे नोकरकुङ लाहा लहो खुबी अनुसार काटकी बाङा हजार सुनौ सिक्का, अर्कोकी नीस हजार सुनौ सिक्का र अर्कोकी काट हजार सुनौ सिक्का याहार प्रदेशाङ ह्वा। 16तब बाङा हजार सुनौ सिक्का डुप्च नोकरै तुरुन्तै नुङार व्यापार जाटा र अरु बाङा हजार सिक्का कमडीया। 17होटजाट्न न नीस हजार सुनौ सिक्का डुप्च नोकरै र अरु नीस हजार सिक्का कमडीया। 18तर काट हजार सुनौ सिक्का डुप्च नोकरै चहिँ नुङार होसे झाङ ठाकार आर्च्युक्ङ डा।
19 “लोट्च समय न्हुइङ होसे नोकरकुङ मीमुरुङ ल्हेस्न राहार होचे लहो हिसाब होखुरीकखाटा ङेहा। 20तब बाङा हजार सुनौ सिक्का डुप्च नोकर राहार डेया, ‘मालिक, नाकै ङाकी बाङा हजार सुनौ सिक्का जिम्मा याम्हन्या, ङोस्नी होसे लकीङ ङै अरु बाङा हजार सिक्का कमडीया।’ 21मीमुरुङै होसकी डेया, ‘स्याबास, सेछ र विश्वासीलो नोकर! नाङ चेक्जा कुराङ र विश्वासीलो छाना, अब ङा नाङ्की वास्टै कुराकुङ जिम्मा याल्हे। रान्हा ङाखाटा न माह्राङो।’ 22अनि अर्को नीस हजार सुनौ सिक्का डुप्चये र राहार डेया, ‘मालिक, नाकै ङाकी नीस हजार सुनौ सिक्का याम्हन्या। ङोस्नी, ङै होसे लकीङ अरु नीस हजार सिक्का कमडीमने।’ 23मेन मीमुरुङै होसकी डेया, ‘स्याबास, सेछ र विश्वासीलो नोकर, नाङ चेक्जा कुराङ र विश्वासीलो छाना, अब ङा नाङ्की वास्टै कुराकुङ जिम्मा याल्हे। रान्हा ङाखाटा न माह्राङो।’
24 “होटै काट हजार सुनौ सिक्का डुप्च नोकरै राहार डेया, ‘मालिक, नाको लहे मारोप्डीच ह्यालकीङ बाली चेयार लाले, र लहे माटाप्च ठाउँ लकीङ अन्न बटुलीच नाको कठोर भर्मी ले डेयार ङाकी थाहा लेया। 25होटबाटै ङाकी बीह्रीम सेया, र नुङार नाकुङ काट हजार सुनौ सिक्का ङै झाङ ठाकार आर्च्युक्ङ डा। ङोस्नी, नाकुङ इसे सिक्काको लानी।’ 26अनि मालिकै होसकी जवाफ याहा, ‘ए दुष्ट, अल्छी नोकर, ङै मारोप्डीच ह्याङ बाली चेले र माटाप्च ठाउँ लकीङ अन्न बटुलीले डेयार इडीक नीये वार्न्हन्या डेनाङ, 27नीये ङै याछ सिक्का ब्याजाङ लैडीकी पर्न्या, अनि ङा ल्हेसार राहार ङौ सिक्काकुङ ब्याज लाकी डीन्छ लेया।’
28 “होटै मालिकै डेया, ‘होटबाटै इसे नोकर लकीङ होसे सुनौ सिक्का स्याटार होसे दश हजार सुनौ सिक्का लेचकी न यान्ही। 29हीजैडेनाङ सुखाटा ले होसकी अरु र फाट्न याल्हे, र होसेखाटा वास्टै डेनाङ वास्टै छान्ने। तर सुखाटा चेक्जा ले होच्यो चेक्जा लेच र होसे लकीङ स्याट्ले। 30अब इसे बीकाम्या नोकरकी बाहिर छुम्छ ठावाङ लोम्ह यान्ही, होला भर्मीको राप्ले र मीस्याक जीक्ले।’
न्यायो दिन
31 “जब भर्मीयो मीजा होसकुङ पट्ट न स्वर्गदूतखाटा लहो महिमाङ राल्हे, तब होसको लहो महिमामय सिंहासनाङ ङुले। 32होडीक बेला होसकुङ म्याहासाङ पट्ट न जातिको भेला छान्ने, अनि कुटजाट्न गोठ्लाकै ह्रा र भेडाकी भाक्ले, होटजाट्न न होसकै होसे भर्मीकोलाक र भाक्ले। 33होसकै भेडाकोलाक लहो डोरमीहुट पट्टी डाले, र ह्राकोलाक चहिँ देब्रेपट्टी डाले। 34तब राजै लहो डोर मीहुटपटीयुङकोलाक डेले, ‘रान्ही, होसकुङ बोइ लकीङ आशिष डुप्च भर्मीको! संसारौ सृष्टि लकीङ न नाखुरीकुङ लागि तयार जाट्च राज्यकी अधिकार जाट्नी। 35ङा मीटुक रन्छीनाङ नाखुरीकै ङाकी ज्याकी याहा। ङाकी डी सोन्हाङ नाखुरीकै ङाकी डी गाकी याहा। ङा परदेशी लेया, नाखुरीकुङ इमाङ ङाकी इज्जत र मान जाटा। 36ङा नाङ्ग्या लेया, नाखुरीकै ङाकी बढीन बील्हाक्ङ याहा। ङा छामन्या नाखुरीकै ङाकी वास्ता जाटा, र ङा झ्यालखानाङ लेया, नाखुरीक ङाकी डुप्की राहा।’
37 “तब धर्मी भर्मीकै होसकोकी गीन्ने, ‘ए प्रभु, सेन कानै नाकोकी मीटुक रन्छीच डाङा र ज्याकी याहा? सेन नाकोकी डी सोन्छ डाङा र डी गाकी याहा? 38सेन नाको परदेशी छान्नाङ कानुङ इमाङ नाकोकी इज्जत र मान जाटा? नाकोकी कानै सेन नाङ्ग्या डाङा र बढीन बील्हाक्ङ याहा? 39अनि नाको सेन छामन्या र कान नाकोकी ङोस्की राहा? नाको सेन झ्यालखानाङ पर्नन्या र कान नाकोकी डुप्की राहा?’ 40तब राजै होखुरीककी जवाफ याहार डेले, ‘साँच्ची न, ङा नाखुरीककी डेले, इसे ङौ भाइको मध्याङ पट्ट डेनाङ काट मार्जाकी नाखुरीकै ही सेछ जाटा, होसे ङौ लागि न जाट्च हो।’
41 “होटै होसकै लहो देब्रेपट्टी लेचकोलाक डेले, ‘ए परमेश्वरौ सराप पर्च भर्मीको! ङा लकीङ नुङ्की क्योट्नी, शैतान र होच्यो दूतकोलाक तयार जाट्च सेन र मासीच म्हेयाङ नुङ्नी! 42ङा मीटुक रन्छीम्या नाखुरीकै ङाकी ज्याकी माह्या। डी सोन्हन्या नाखुरीकै ङाकी डी गाकी माह्या। 43ङा परदेशी लेया, नाखुरीकै ङाकी नाखुरीकुङ इमाङ इज्जत र मान माजाटा। नाङ्या लेया, नाखुरीकै ङाकी बढीन माबील्हाका। ङा छाम ङुनाङ र झ्यालखानाङ पर्नाङ नाखुरीक ङाकी ङोस्की माह्रा।’
44 “होटै होखुरीकै इट डेयार जवाफ याल्हे, ‘ए प्रभु, सेन कानै नाकोकी मीटुक रन्छीच, डी सोन्छ, परदेशी छान्च, नाङ्ग्या छान्च, छाच अथवा झ्यालखानाङ पर्च डाङ्नाङ र नाकोकी वास्ता माजाटा?’ 45तब राजै होखुरीककी जवाफ याल्हे, ‘साँच्ची न, ङा नाखुरीककी डेले, ङौ भाइको मध्याङ पट्ट डेनाङ मार्जाकी वास्ता माजाट्की न ङाकी वास्ता माजाट्की हो।’ 46अनि होखुरीकै चहिँ सधैँभरियो लागि दण्ड डुप्ले, तर धर्मी भर्मीकै चहिँ सेन र मासीच जीवन डुप्ले।”
Currently Selected:
मत्ती 25: EMGP
Highlight
Share
Copy
Want to have your highlights saved across all your devices? Sign up or sign in
© 2025 by Mother Tongue Translators Society and Wycliffe Bible Translators, Inc.
