मत्ती 27
27
येशूकी पिलातस लेठाङ आल्छ
(मर्कूस १५:१; लूका २३:१-२; यूहन्ना १८:२८-३२)
1गोराक ङ्हासीङ न मुख्य पूजाहारीको र भर्मीकुङ अगुवाकै येशूकी मृत्युदण्ड याछ निधो जाटा। 2होटै होखुरीकै होसकोकी छ्याकार रोमी बडा-हाकिम पिलातस लेठाङ आल्हार जिम्मा याहा।
यहूदास सीच
(प्रेरित १:१८-१९)
3तब येशूकी मृत्युदण्ड याछ डाङार होसकोकी घोवाक्च यहूदासकी पछुतो छाना, अनि होचे होसे चाँदीयो तीस सिक्का लार मुख्य पूजाहारी र अरु अगुवाको लेठाङ ल्हेट्न याखी राहा। 4र डेया, “ङै निर्दोष भर्मीकी घोवाकार धोका याम्ह पाप जाट्नने।” तर होखुरीकै डेया, “कानकी ही खाँचो? इसे नुओ न कुरा हो।” 5याङच कुरा सेयार यहुदासै होसे चाँदीयो सिक्काको परमेश्वरौ मन्दिराङ ल्होम्हकार ह्वा, अनि होटै नुङार होसे चेलोहार सीया।
6मुख्य पूजाहारीकै होसे चाँदीयो सिक्का ढुमार डेया, “परमेश्वरौ मन्दिरौ ढीकुटीयाङ डाकी माछान्ने, हीजैडेनाङ इसे च भर्मी साट्की डेम याछ पैसा हो।” 7होटै होखुरीकै सल्लाह जाटार होसे चाँदीयो सिक्कै परदेशीकुङ लाश ठाक्कीयो लागि कुमालेओ ह्या लोवा। 8होटबाटै छीनीसम्म र होसे ह्याकी “ह्युओ ह्या” डेले।
9तब यर्मिया अगमवक्तै इट डेम ङाक्च कुरा पूरा छाना, “इस्राएलुङ भर्मीकै होसकुङ लागि तोक्डीच मुल्य चहिँ चाँदीयो तीस सिक्का लेया। होसे होखुरीकै ला, 10अनि परमप्रभुये ङाकी अह्रडीनाङ लेखा न जाटार होखुरीकै होसे पैसा कुमालेओ ह्या लोकी डेम याहा।”#जकरिया ११:१२-१३
पिलातसौ म्याहासाङ येशू
(मर्कूस १५:२-१५; लूका २३:३-५,१३-२५; यूहन्ना १८:२९–१९:१६)
11येशू रोमी बडाहाकिमौ म्याहासाङ टोङ्हा, अनि बडा-हाकिमै येशूकी गीना, “ही नाङ यहूदीकुङ राजा हो?” येशूये डेया, “होसे च नाकै न डेमन ले।” 12मुख्य पूजाहारीको र अरु अगुवाकै येशूकी वास्टै दोष लैडीया। तर कुडीक दोष लैडीनाङ र होसकै हीर जवाफ माह्या। 13तब पिलातसै होसकोकी डेया, “नाकुङ विरुद्धाङ होखुरीकै खाल खाल्या कुराकुङ गवाही याम्हन ले, ही नाकै होसे सेमन ले?” 14तर येशूये काट कुरौ र जवाफ माह्या बडा-हाकिम र छक्क पर्या।
15रोमी सरकारै छुटकारौ चाडौ बेलाङ भर्मीकै डेच अनुसार काट जना कैदीकी डास्न याछ चलन लेया। 16होडीक बेला मास्च काम जाट्च डेयार पट्टये चीन्डीच काट जना बारब्बा डेच भर्मी झ्यालखानाङ लेया। 17अनि पिलातसै भेला छान्च भर्मीकोलाक गीना, “नाखुरीक ही डेले? ङा नाखुरीकुङ लागि सुकी डास्न याखी? बारब्बाकी की मुक्ति याछ ख्रीष्ट डेच येशूकी?” 18यहूदी अगुवाकै येशूकी मीरीस जाटार जिम्मा याखी राक्च हो डेम बडा-हाकिमकी थाहा लेया।
19होटै पिलातस न्याय जाट्च ठावाङ ङुच बेलाङ होच्यो मास्टोये इट डेयार खबर याम्हका, “होसे निर्दोष भर्मीकी हीर माजाट्नी, हीजैडेनाङ छीनी नाबीक माङ्नामाङ होच्यो कारणै ङै वास्टै दु:ख भोग्डीमने।”
20तर मुख्य पूजाहारीको र अरु अगुवाकै बारब्बाकी डास्न याखी र येशूकी चहिँ साट्की डेयार भर्मीकुङ भीडकी सुरडीया। 21बडा-हाकिमै फेरि होखुरीककी गीना, “इसे नीस जना मध्याङ सुकी चहिँ ङा नाखुरीकुङ लागि डास्न येहीङ?” होखुरीकै डेया, “बारब्बाकी!”
22अनि पिलातसै होखुरीककी डेया, “ङा मुक्ति याछ ख्रीष्ट डेच येशूकी चहिँ ही जाटीङ ट?” होखुरीक पट्टकै च्याकार डेया, “होसे क्रूसाङ टङ्गडीस्ख्यो!” 23पिलातसै डेया, “हीजै? होचे ही पाप जाट्नने र?” तर होखुरीकै झन् च्याकार डेया, “होसकी क्रूसाङ टङ्गडीख्यो!”
24तर पिलातसै हीर सीप मालग्डीस्च डाङार, खैलाबैला मच्चडीस्ले डेम होचे डी लार भिडौ म्याहासाङ मेन मीहुट हुरार डेया, “इसे भर्मीकी साट्च दोष ङाकी होइन तर नाखुरीककी न लग्डीस्ख्यो।” 25अनि पट्ट न भर्मीकै च्याक्चै डेया, “छान्ने छान्ने, होच्यो ह्युओ दोष कान र कानुङ मीजाको मीटाक न पर्ख्यो।”
26पिलातसै होखुरीकुङ लागि बारब्बाकी डास्न याहा। तर येशूकी चहिँ कोर्रै ङापार क्रूसाङ टङ्गडीकी डेम सिपाहीकोलाक जिम्मा याहा।
सिपाहीकै येशूकी गिल्ला जाट्च
(मर्कूस १५:१६-२०; यूहन्ना १९:२-३)
27पिलातसौ सिपाहीकै येशूकी दरबार भित्री आल्हा, अनि अरु पट्ट न सिपाहीकोलाक आर्घार भेला जाटा। 28अनि होखुरीकै होसकुङ बढीन डोन्न याहार होसकोकी ग्याच राजै बील्छ ल्याक्च बढीन बील्हाक्ङ याहा। 29र जुओ मुकुट खासार होसकुङ मीटालुवाङ पुह्वाक्ङ याहा र होसकुङ डोर मीहुटै आर्क्याम लाकी लैडीया, र होसकुङ अगाडि घुँडा टुसार होखुरीकै होसकोकी इट डेचै गिल्ला जाटा, “ए यहूदीकुङ राजा झोर्ले!” 30तब होसे सिपाहीकै होसकोकी मेठोक ठोका अनि आर्क्याम स्याटार होसकुङ न मीटालुवाङ हीर्कडीया। 31अनि इटजाट्न होसकुङ गिल्ला जाट्न भ्यारखीङ होखुरीकै होसे बढीन डोना, र मेखोल्हौ न बढीन बील्हाका र होसकोकी क्रूसाङ टङ्गडीकी डेम आल्हा।
येशूकी क्रूसाङ टङ्गडीच
(मर्कूस १५:२१-३२; लूका २३:२६-४३; यूहन्ना १९:१७-२७)
32लामाङ नुङ्ङ न लेनाङ होखुरीकै सिमोन म्यार्मीनुङ कुरेनी सहरुङ काट भर्मीकी डुपा। सिपाहीकै होसकी जबरजस्ती येशूओ क्रूस बुकी लैडीया। 33अनि होखुरीक गलगथा डेच ठावाङ टाहा। गलगथा डेच चहिँ “खप्परे ठाउँ” हो। 34होला होखुरीकै अङ्गुरौ मद्याङ पित्त मोल्होकार येशूकी गाकी लैडीया। तर होसकै म्याङार होसे गाकी मामन्डीया।
35होखुरीकै येशूकी क्रूसाङ किला ठोक्डीयार टङ्गडीम भ्यारखीङ, होसकुङ बढीनको चिठ्ठा कार मेखुरीक-मेखुरीक पुङा। 36अनि होखुरीक होला ङुवार होसकोकी रुङा। 37होसकुङ मीटालु टकी “इसे येशू यहूदीकुङ राजा हो।” डेच होसकुङ विरुद्धाङ रीक्च दोष-पत्र डाम याहा। 38येशूखाटा न क्रूसाङ होखुरीकै नीस जना खुसकोलाक र होसकुङ देब्रे र डोर पट्टी टङ्गडीम्या।
39होसे लामीङ ह्वाच पट्ट न भर्मीकै मीटालु होयोक्चै येशूकी गिल्ला जाटा 40र डेया, “ए नाङ, मन्दिर भत्कडीयार सोम याकाङ खास्की ह्योक्ले डेच, इडीक नाङ परमेश्वरौ मीजा हो डेनाङ नाङ्ल्हाकी जीवाटाको र क्रूसीङ झालार म्हाका रान्हा।”
41होटजाट्न न मुख्य पूजाहारीकै र धर्मगुरुको र अरु अगुवाको खाट-खाट न येशूओ गिल्ला जाट्चै डेया, 42“इचे अरुकी च जीवाटाका, तर लाहाकी चहिँ जीवाटाक्की माह्योक्ले। इडीक इसे इस्राएलीकुङ राजा हो डेनाङ चाहाँ न क्रूसीङ म्हाका झालार राख्यो, अनि इसकी कान विश्वास जाट्ले। 43इचे परमेश्वरकी विश्वास जाट्ले। परमेश्वरै मीमन जाटा डेनाङ होसकै इसकी चाहाँ न जीवाटाक्ख्यो, हीजैडेनाङ इचे ‘ङा परमेश्वरौ मीजा हो’ डेमन्या।”
44अनि येशूखाटा क्रूसाङ टङ्गडीच होसे खुसकै र होटजाट्न न होसकुङ बेइज्जत जाटा।
येशू सीच
(मर्कूस १५:३३-४१; लूका २३:४४-४९; यूहन्ना १९:२८-३०)
45नाम्सीन बाह्र बजेलकीङ सोम बजेसम्म देशभरि न छुम्हा। 46होटै सोम बजे पट्टी येशूये इट डेयार बाड्को स्वरै च्याका, “इलोइ, इलोइ, लामा सबखथनी?”#भजनसंग्रह २२:१ इच्यौ अर्थ हो, “ए ङौ परमेश्वर, ए ङौ परमेश्वर, नाकै ङाकी हीजै डास्च?” 47होला टोङ्छको मध्याङ कुडीक जनै चहिँ होसको च्याक्च सेयार डेया, “इसे भर्मीये च एलिया अगमवक्ताकी टी आर्घामनले।”
48होडीक न बेला होखुरीक मध्याङ काट जना भर्मी खेर्न नुङार बढीनौ टाल्हो लार बीर्छ सिर्काङ छोपार आर्क्यामौ डाङ्गौ मीडुमाङ हाकाकार येशूकी गाकी याहा। 49तर अरुये डेया, “काटछीन ङोसीङ न, बा एलिया इसकी जीवाटाक्की राल्हे की?” 50होटै येशूये फेरि बाड्को स्वरै च्याकार लहो प्राण डासा।
51तब होडीक न बेला परमेश्वरौ मन्दिरुङ पर्दा ढेनाम लकीङ म्हाकासम्म न नीस भाग छानार च्याहा।#२७:५१ इसे पर्दा पवित्र ठाउँ र महापवित्र ठाँओ मीघ्याङ लेया। परमेश्वराङ बाड्को पूजाहारी मट्टै होइन, तर जोसुकै भर्मी राखी अट ह्योकै डेम होसकै होसे पर्दाकी च्याट्न याहा। ङोस्नी प्रस्थान २६:३१-३३। भूइँचालो नुङा र चट्टानको भाटा। 52चिहानको खोलीसा र सीम भ्याच वास्टै परमेश्वरौ पवित्र भर्मीको सीच लकीङ जीवाम सोवा। 53र होखुरीक चिहानको लकीङ ख्योहा, अनि येशू सीच लकीङ जीवाम सोरखीङ होखुरीक पवित्र सहर यरूशलेमाङ नुङार वास्टै भर्मीकुङ म्याहासाङ डाङा।
54जब कप्तान र होसेखाटा येशूकी रुङ्च सिपाहीकै भूइँचालो नुङ्च र होला छान्न ङुच अरु घटनाको डाङा, तब साप्फी बीह्रीया र होखुरीकै डेया, “साँच्ची न, इसको च परमेश्वरौ मीजा लेसा!”
55होला वास्टै मास्टो भर्मीको लेया, होखुरीकै लोसीङ न टोङ्हार पट्ट न कुराको ङोस्न ङुमन्या। होखुरीक येशूकी सहायता जाट्चै गालील लकीङ न राम्हनन्या#२७:५५ गालील लकीङ न राम्हनन्या: गालील क्षेत्र लकीङ न येशूये प्रचार सुरु जाट्नन्या। होसे मास्टोकै होसकुङ पट्ट न सेवाकाइभरि सहायता जाट्नन्या। । 56होखुरीक मध्याङ मरियम मग्दलिनी, याकूब र योसेफौ मोइ मरियम, र जब्दियौ नीस लेन्जा मीजाकुङ मोइ र लेया।
येशूकी चिहानाङ ठाक्च
(मर्कूस १५:४२-४७; लूका २३:५०-५६; यूहन्ना १९:३८-४२)
57नामबीक्रखीङ अरिमाथिया सहरुङ योसेफ डेच काट जना धनी भर्मी राहा। होसे र येशूओ चेला छानन्या। 58अनि होचे पिलातस लेठाङ नुङार येशूओ लाश ङेहा। पिलातसै होसकी याछ अनुमति जाटा। 59होटै योसेफै लाश आल्हार सफा लाइलनौ बढीनै बेह्रडीया, 60अनि होचे चट्टान खोप्डीयार लहो लागि खास्न डाच नयाँ चिहानाङ होसे लाश डा, र चिहानौ मेङ्गेराङ काट बाड्को ल्हुङ गुड्कडीम आल्हार ठुना र होटै होसे ह्वा। 61होला मरियम मग्दलिनी र अर्को मरियम चहिँ चिहानौ अगाडि ङुम-ङुमन्या।
सिपाहीकै चिहान रुङ्च
62पीउह्राक लेखो म्हुङ बाट्चनीक, मुख्य पूजाहारीको र फरिसीको पिलातस लेठाङ नुङा, 63र होखुरीकै डेया, “हजुर, होसे ठगाहै जिउँदै लेनाङ, ‘ङा सोम याकाङ फेरि जीवाम सोले’ डेच कुरा कानै आर्मीट्नने। 64होटबाटै सोम याकसम्म होसे चिहान सेम्ह रुङ्की डेम आदेश जाट्न यान्ही। नभा च होच्यो चेलाकै होसे लाश खुस्न आल्हार होसको च जीवाम सोमने डेयार भर्मीकोलाक आडेइ। इसे अन्तिम धोका अघियुङ#२७:६४ अघियुङ: अघियुङ धोका डेच चहिँ येशूये लाहाकी मुक्ति याछ ख्रीष्ट डेच हो। डेनाङ अझै मासेछ छान्ने।” 65पिलातसै होखुरीककी डेया, “सिपाहीकोलाक आल्हार ह्योक्ठर चिहानकी सेम्हजा रुङ्की लैडीनी।” 66तब होखुरीक नुङार चिहानुङ गालामाङ मोहोर छाप का#२७:६६ चिहानुङ गालामाङ मोहोर छाप का: चिहानकी हुप्च ल्हुङ्की साङ्लीये छ्याकार झये लाकार रोमीकुङ छाप काम याम्हन्या, र सुयेर होसे छुवा डेनाङ होखुरीककी थाहा छान्च लेया। , र सिपाहीकोलाक रुङ्की खटडीया।
Currently Selected:
मत्ती 27: EMGP
Highlight
Share
Copy
Want to have your highlights saved across all your devices? Sign up or sign in
© 2025 by Mother Tongue Translators Society and Wycliffe Bible Translators, Inc.
