मत्ती 24
24
अन्तिम दिनुङ चिन्हको
(मर्कूस १३:१-१३; लूका २१:५-१९)
1येशू परमेश्वरौ मन्दिर लकीङ ख्योहार नुङ्ङ न लेया। होडीक बेला चेलाको होसको लेठाङ राहार होसकोकी मन्दिरौ इमको टान्हाका। 2तर येशूये होखुरीककी डेया, “नाखुरीकै इसे पट्ट न डाङ्ङने, होइन ट? ङा साँच्ची न नाखुरीककी डेले, इलुङ काट ल्हुङ र अर्को ल्हुङ मीटाक माङुले, पट्ट न भत्कडीयार लोम्हकाले।”
3येशू जैतून डाँडाङ ङुम ङुनाङ चेलाको सुटुक्क राहार होसकोकी गीना, “गुरु ज्यु, कानकी डेनी, इसे कुराको सेन छान्ने? नाको फेरि ल्हेस्न रान्हाङ अनि इसे संसारौ अन्त्यौ चिन्ह ही छान्ने?”
4येशूये होखुरीककी जवाफ याहा, “होशियार छान्नी नाखुरीककी सुयेर माझुक्डीख्यो! 5हीजैडेनाङ वास्टै जना ङौ म्यार्मीनाङ ‘ङा न मुक्ति याछ ख्रीष्ट हो’ डेचै राल्हे र वास्टै भर्मीकोलाक ढाँट्डीले।
6 “नाखुरीकै लडाइँ छाना डेच र लडाइँ छान्च हल्लाको सेले। तर होडीक बेला नाखुरीक माबीह्रीखी। होसे पट्ट न कुरा च छान्की न पर्ले, तर होडीक बेला न च संसारौ अन्त्य माछान्ने। 7जाति जातियो मीघ्याङ र राज्य राज्यौ मीघ्याङ लडाइँ क्योस्ले। ठाउँ-ठावाङ अनिकाल छान्ने र भूइँचालो नुङ्ले। 8तर इसे च दु:खौ सुरु मट्टै हो।
9 “तब होडीक बेला भर्मीकै नाखुरीककी कष्टौ लागि घोवार आल्हे र साट्ले। अनि ङाकी विश्वास जाट्च बाटै पट्ट न जातियुङ भर्मीकै नाखुरीककी झीर्ले।
10 “होडीक बेला वास्टै जना लहो विश्वासकी डास्ले, काटै काटकी धोका याल्हे र झीर्ले। 11वास्टै झूटो अगमवक्ताको राल्हे र वास्टै भर्मीकोलाक बहकडीले।
12 “दुष्टता बड्डीस्च बाटै वास्टै भर्मीकुङ मीघ्याङ माया घट्डीसार नुङ्ले। 13तर अन्तिमसम्म स्थिर ङुचकोलाक चहिँ जीवाटाक्ले। 14अनि इसे राज्यौ सेछ समाचार चहिँ पट्ट जातिकुङ लागि गवाहीयो रुपाङ संसारभरि प्रचार जाट्ले, तब संसारौ अन्त्य राल्हे।
सङ्कष्टौ समय
(मर्कूस १३:१४-२३; लूका २१:२०-२४)
15 “नाखुरीकै दानिएल अगमवक्तै डेच ‘विनाश जाट्च झीर्न सेच ठोक’ #
दानिएल ९:२७; ११:३१; १२:११ पवित्र ठावाङ टोङ्छ डाङ्ले (इच्यौ अर्थ परेस्चकै वार्ख्यो)। 16होडीक बेला यहूदियाङ लेचको पहाडलाक भोग्डीस्ख्यो। 17इम बाहिर लेच भर्मीको सामानको लाकी इम भित्री मापर्न न बाहिर लकीङ न भोग्डीस्ख्यो। 18ह्याङ लेच भर्मीको लहो बढीन लाकी ल्हेसार मान्न न भोग्डीस्ख्यो। 19होडीक बेला मीटुकाङ मीजा लेच र मीकुहाङ मीजा लेच मोइकोलाक झन् कुडीक बिजोक छान्ने। 20जुङ्च महिनाङ अथवा म्हुङ बाट्चनीक नाखुरीक भोग्डीस्की मापर्ख्यो डेयार प्रार्थना जाट्नी। 21हीजैडेनाङ होडीक बेला संसारौ सुरुलकीङ चाहाँसम्म माछान्च र फेरि सेन र माछान्च महासङ्कष्ट छान्ने। 22इडीक होसे दिनको घटडीम माह्याछ लेनाङ च सुर माजीवाच लेया। तर होसकै चुन्डीच भर्मीकुङ कारणै होसे दिनको घटडीम याल्हे।
23 “होडीक बेला नाखुरीककी सुयेर ‘ङोस्नी, मुक्ति याछ ख्रीष्ट इला ले’ अथवा ‘होसको होला ले’ डेया डेनाङ विश्वास माजाट्नी। 24हीजैडेनाङ याङ्च झूटो ख्रीष्टको र झूटो अगमवक्ताको राल्हे। होखुरीकै बाड्सो बाड्सो चिन्ह र अचम्मौ कामको टान्हाकार ह्योक्ठर परमेश्वरै चुन्डीचकोलाक र भड्कडीले।
25 “ङोस्नी, ङै नाखुरीककी इसे कुरा अघि लकीङ न डेम याम्हने। 26होटबाटै होखुरीकै नाखुरीककी, ‘ङोस्नी, होसको च उजाड ठावाङ ले’ डेनाङ र नाखुरीक होला मानुङ्नी। नाखुरीकै, ‘ङोस्नी, होसको च भित्री कोठाङ ले’ डेनाङ र नाखुरीकै होसे कुरा विश्वास माजाट्नी। 27हीजैडेनाङ कुटजाट्न भर्मीकै सर्घाङ बिजुली पीझ्यानाङ पूर्व लकीङ पश्चिमसम्म ट्याङ्छ डाङ्ले, होटजाट्न न भर्मीयो मीजा रान्हाङ भर्मीकै होसकोकी डाङ्ले। 28कुला सिनु ले, होला न गिद्धको र भेला छान्ने।#२४:२८ कुटजाट्न भर्मीकै सिनु मीटाक गिद्धको भुर्न ङुच सजिलोखाटा डाङ्ले, होटजाट्न न भर्मीयो मीजा रान्हाङ पट्ट भर्मीकै डाङ्ले।
भर्मीयो मीजा राछ दिन
(मर्कूस १३:२४-२७; लूका २१:२५-२८)
29 “होसे सङ्कष्टौ दिनको भ्याच बित्तिकै नाखान छुम्पाक डाङ्च छान्ने, ग्याहोटै ट्याङ्छ याखी डास्ले, सर्घा लकीङ टुगाको झाल्ले र सर्घुङ शक्तिको होयोले।
30 “होडीक बेला ङा भर्मीयो मीजौ चिन्ह सर्घाङ डाङ्ले र पृथ्वीयुङ पट्ट न जातिकै विलाप जाट्ले। अनि होखुरीकै भर्मीयो मीजाकी सर्घुङ डेबुवाङ शक्ति र बाड्को महिमाङ राम्हन लेच डाङ्ले। 31बाड्को स्वराङ तुरही आर्म्हाट्ले अनि भर्मीयो मीजै लहो स्वर्गदूतकोलाक बीर्न्हकाले र होखुरीकै पृथ्वीयुङ पट्ट लकीङ होसकै चुन्डीचकोलाक भेला जाट्ले।
अञ्जीरौ म्यार्टुङ लकीङ शिक्षा
(मर्कूस १३:२८-३१; लूका २१:२९-३३)
32 “अब अञ्जीरौ म्यार्टुङ लकीङ काट कुरा पान्ही। जब होच्यो हाँगाको कलिलो छानार मुनाको राछ बित्तिकै अब खान्छ समय खेरेप राहा डेयार नाखुरीककी थाहा छान्ने। 33होटजाट्न न नाखुरीकै इसे पट्ट न कुराको डाङ्ले, तब भर्मीयो मीजा खेरेप न गालामटुआङ न ले डेयार वार्न्ही। 34साँच्ची न ङा नाखुरीककी डेले, इसे पट्ट न कुरा पूरा माछान्ठर इसे पुस्ता म्हाटार मानुङ्ले। 35स्वर्ग र पृथ्वी म्हाटार नुङ्ले, तर ङौ वचन सेन र म्हाटार मानुङ्ले।
होशियार छान्की पर्च शिक्षा
(मर्कूस १३:३२-३७; लूका १७:२६-३०,३४-३६)
36 “तर परमेश्वर बोइकी बाहेक होसे दिन र घडी सेन राल्हे डेयार सुकीर थाहा माले। न त स्वर्गुङ स्वर्गदूतकोलाक, न त मीजाकी। 37भर्मीयो मीजा रान्हाङ र नोऔ दिनकोवाङ लेखा न छान्ने। 38हीजैडेनाङ जलप्रलय छान्की डेनाङ अगाडि नोआ जहाज भित्री पर्च दिनसम्म र भर्मीको ज्याम, गाम, ब्याहाबारी जाट्न ङुमन्या। 39अनि जलप्रलय राहार होखुरीक पट्टकी जोकाकार माआल्ठर होखुरीकै थाहा न माढीना। भर्मीयो मीजा राछ बेलाङ र होङ्च न छान्ने। 40होडीक बेला नीस जना ह्याङ काम जाट्न ङुचको मध्याङ काट जनाकी आल्ल्हे र अर्कोकी डास्ले। 41झाटा नुक्ङ ङुच नीस जना मास्टोको मध्याङ काटकी आल्हे, अर्कोकी डास्ले।
42 “होटबाटै नाखुरीक होशियार छानार ङुनी, हीजैडेनाङ नाखुरीकुङ प्रभु कुसनीक राल्हे, होसे नाखुरीककी थाहा न माछान्ने। 43तर इसे कुरा आर्मीट्न डानी, खुस कुसे बेला राल्हे डेम थाहा डीन्छ लेनाङ च इमुङ मीमुरुङ मामीस्न न ङुच लेया र खुसकी भित्री पर्की न माह्याछ लेया। 44होटबाटै नाखुरीक र होशियार छानार ङुनी, हीजैडेनाङ भर्मीयो मीजा नाखुरीकै माचीतडीच बेलाङ राल्हे।
इमान्दार र बेइमान नोकर
(लूका १२:४१-४८)
45 “विश्वासीलो र बुद्धिमानी नोकर होसे हो, होसकी न मीमुरुङै लहो इमुङ पट्ट न कामको जिम्मा याल्हे र अरु नोकरकोलाक निश्चित समयाङ होखुरीककी ज्याच ठोक याखी डेम खटडीले। 46इमुङ मीमुरुङ ल्हेसार रान्हाङ र होटजाट्न न काम जाट्न ङुच डुपा डेनाङ झन् होसकी स्याबास याल्हे। 47साँच्ची न ङा नाखुरीककी डेले, मीमुरुङै होसे नोकरकी मेखोल्हौ पट्ट न धन-सम्पत्तियो जिम्मा याल्हे। 48तर इडीक होसे नोकर दुष्ट ले डेनाङ ‘ङौ मीमुरुङ ढिलो राल्हे’ डेयार मेन मीमनाङ आर्मीट्ले, 49अनि लाहाखाटा काम जाट्च नोकरकोलाक डुङार म्होर्चकोखाटा ज्याम, गाम जाट्की ठाल्ले। 50होटै होच्यो मीमुरुङ होचे माआर्मीट्च दिन र घडीयाङ झोस टाराल्हे। 51होटै होसकी बाड्को दण्ड याल्हे र नरकाङ होच्यो हालत चहिँ कपटीकुङ ल्याक्च न छान्ने। होला भर्मीको राप्ले र मीस्याक जीक्ले।”
Currently Selected:
मत्ती 24: EMGP
Highlight
Share
Copy
Want to have your highlights saved across all your devices? Sign up or sign in
© 2025 by Mother Tongue Translators Society and Wycliffe Bible Translators, Inc.
