मत्ती 22
22
ब्याहा भोजौ उदाहरण
(लूका १४:१५-२४)
1येशूये फेरि यहूदीकुङ अगुवाकोलाक उदाहरण याछै इट डेया, 2“स्वर्गौ राज्य काट राजा ल्याक्च हो, होचे लहो लेन्जा मीजौ लागि काट ब्याहा भोज तयार जाटा। 3अनि होचे ब्याहा भोजौ लागि निम्तो डुप्चकोलाक आर्घाकी लहो नोकरकोलाक बीर्न्हका, तर होखुरीक राखी मामन्डीया। 4होचे फेरि अरु नोकरकोलाक इट डेयार बीर्न्हका, ‘होसे निम्तो जाट्चकोलाक डेनी, ज्याच बेला छाना, ढेस्च-ढेस्च पशुको साट्नने, अब पट्ट न ठोक तयार छान्न भ्यामने। रान्ही ब्याहौ भोज ज्याकी।’ 5तर होखुरीकै वास्ता न माजाटा, काट जना लहो बारी पट्टी ह्वा, अनि अर्को चहिँ व्यापार जाट्की ह्वा। 6अरु बाँकी लेचकै चहिँ राजौ नोकरकोलाक घोवार मास्च व्यवहार जाटा, अनि साट्न याहा। 7तब होसे राजा साप्फी मीरीस ख्योहा। अनि लहो सेनाकोलाक बीर्न्हका र होसे ज्यानमाराकोलाक साटार होखुरीकुङ सहराङ म्हे लैडीम याहा।
8 “होटै होसे राजै लहो नोकरकोलाक डेया, ‘ब्याहौ भोज तयार ले, तर ङै निम्तो याहार आर्घाचको चहिँ इसे भोज ज्याकी ज्योस्च मालेसा। 9होटबाटै नाखुरीक वास्टै भर्मीको लेच चोकाङ नुङार नाखुरीकै सु-सुकी डुप्ले, होखुरीककी ब्याहौ भोज ज्याकी आर्घार राक्नी।’ 10होटै नोकरको चोकाङ नुङार डुप्च जतिकी, सेछ र मासेछ नीसकी न आर्घार राका र ब्याहौ इम पाहुनाकै न्हेपा।
11 “तर राजा पाहुनाकोलाक ङोस्की डेयार भित्री राहा, होचे होला ब्याहा भोजाङ बील्खी पर्च बढीन माबील्छ काट जना भर्मीकी डाङा। 12अनि राजै होसकी गीना, ‘ए लाफा, ब्याहौ बढीन माबील्न्ह नाको कुटजाट्न इला भित्री राहा?’ होचे हीर जवाफ याखी माह्योका। 13होटै राजै लहो नोकरकोलाक डेया, ‘इच्यौ मीहुट मीखुट्या छ्याकार बाहिर छुम्ठाङ लोम्हकानी। होला भर्मीको राप्ले र मीस्याक जीक्ले।’”
14होटै येशूये डेया, “निम्तो याछ च वास्टै ले, तर चुन्डीचको चहिँ थोरै ले।”
कर तेरीचओ बारेयाङ गीन्च
(मर्कूस १२:१३-१७; लूका २०:२०-२६)
15फरिसीको नुङार येशूकी मेखोल्हौ न कुराङ कुटजाट्न फसडीइङ डेयार सल्लाह जाटा। 16होखुरीकै लहो चेलाकोलाक हेरोद राजौ भर्मीकोखाटा येशू लेठाङ बीर्न्हका। होखुरीकै नुङार होसकोकी डेया, “ए गुरु ज्यु, कान वार्ल्हे, नाको सत्य ङाक्ले, र परमेश्वरौ लाम सत्यखाटा पाहाक्ले। अनि भर्मीकै ही डेले औला डेयार वास्ता र माजाट्ले, हीजैडेनाङ नाकै भर्मीकुङ मेङ्गेर ङोसार काम माजाट्ले। 17होटबाटै कानकी डेनी, व्यवस्था अनुसार रोमी सरकारकी कर तेरीकी नाकुङ विचाराङ ठिक ले की माले?” 18तर येशूये होखुरीकुङ दुष्ट विचार थाहा डीन्हार डेया, “ए कपटीको, नाखुरीक हीजै ङाकी फसडीकी पाले? 19कर तेरीच सिक्का ङाकी टान्हाक्नी ट।” होखुरीकै काट सिक्का राकार होसकोकी टान्हाका। 20अनि होसकै होखुरीककी गीना, “इला लेच फोटो सुओ हो? र इला रीक्च म्यार्मीन सुओ हो?” 21होखुरीकै जवाफ याहा, “कैसरौ हो।” तब येशूये होखुरीककी डेया, “होटबाटै कैसरौ जति कैसरकी यान्ही, अनि परमेश्वरौ जति परमेश्वरकी यान्ही।” 22जब इसे कुरा सेया होखुरीक छक्क पर्या। होटै येशूकी डासार होखुरीक ह्वाकी क्योटा।
सीच लकीङ जीवाच र ब्याहौ बारेयाङ गीन्च
(मर्कूस १२:१८-२७; लूका २०:२७-४०)
23भर्मी सीच लकीङ जीवाम मासोले डेच कुडीक जना सदुकीको होसनीक न येशू लेठाङ राहार इट डेयार गीना, 24“ए गुरु ज्यु, मोशै कानकी डेमने, सुर भर्मी मीजाको माछान्न न सीया डेनाङ होच्यो भाये डाज्यौ मास्टोकी ब्याहा जाटार होच्यो लागि सन्तान खडा जाट्की पर्ले।#व्यवस्था २५:५ 25अब होला सात जना डाजेभाइको लेया। जेठा डाजेये ब्याहा जाटा, तर मीजाको माछान्न न होसे सीया। होटबाटै माहिला भाये होसे विधवा भौज्युकी ब्याहा जाटा। 26तर होसे र मीजा माछान्न न सीया। साहिँला भाइ र होङ्च न छाना, अनि सातै भाये होसे भौज्युखाटा ब्याहा जाटा, र होखुरीक पट्ट न मीजा माछान्न न सीया। 27होटै अन्तिमाङ होसे मास्टो र सीया। 28अब सीच लकीङ जीवाम सोनाङ, होसे मास्टो सात जना मध्याङ सुओ मास्टो छान्ने? हीजैडेनाङ होसकी पट्ट न सात भाइये न ब्याहा जाट्नन्या।”
29येशूये होखुरीककी डेया, “नाखुरीक भुलाङ पर्नने, हीजैडेनाङ नाखुरीकै धर्मशास्त्र अथवा परमेश्वरौ शक्तियो बारेयाङ माबुझडीस्नने। 30हीजैडेनाङ सीच लकीङ जीवाम सोनाङ भर्मीकै न त ब्याहा जाट्ले, न त ब्याहा न जाट्न याल्हे। तर होखुरीक स्वर्गुङ स्वर्गदूतको लेखा न छान्ने। 31तर सीचको जीवाम सोच बारेयाङ परमेश्वरै नाखुरीककी ही डेमने, नाखुरीकै मापरेस्नने? 32परमेश्वरै डेया, ‘ङा अब्राहामौ परमेश्वर, इसहाकौ परमेश्वर र याकूबौ परमेश्वर हो।’ परमेश्वर सीचकुङ परमेश्वर होइन #२२:३२ परमेश्वर सीचकुङ परमेश्वर होइन: इच्यौ अर्थ परमेश्वर सीच भर्मीकुङ परमेश्वर होइन डेकी पाच होइन। तर इच्यौ अर्थ चहिँ भर्मी सीच न्हुइङ र होच्यो अस्तित्व माभ्याले, र परमेश्वरौ लागि पट्ट भर्मी सीच न्हुइङ र जीवाम ङुले। तर जीवाचकुङ परमेश्वर हो।” 33याङ्च शिक्षा सेयार पट्ट न भर्मीको छक्क पर्या।
पट्ट डेनाङ बाड्को आज्ञा
(मर्कूस १२:२८-३४; लूका १०:२५-२८)
34येशूओ शिक्षा सेयार सदुकीको ङाक्की न माह्योका डेच कुरा सेयार फरिसीको काट जुट छानार होसको लेठाङ राहा। 35होखुरीक मध्याङ काट जना धर्मगुरुये येशूकी फसडीच विचार जाटार गीना, 36“गुरु ज्यु, व्यवस्थुङ पट्ट डेनाङ बाड्को आज्ञा चहिँ कुसे हो?” 37येशूये जवाफ याहा, “‘नीये परमप्रभु लहो परमेश्वरकी पूरा हृदय, पूरा प्राण र पूरा मीमनै माया जाट्की।’#व्यवस्था ६:५ 38इसे पहिलो र पट्ट डेनाङ बाड्को आज्ञा हो। 39दोस्रो र होङ्च न हो, ‘नाखुरीकै लहो छिमेकीकी लाहाकी लेखा न माया जाट्नी।’#लेवी १९:१८ 40पट्ट न व्यवस्था र अगमवक्ताकुङ शिक्षौ आधार इसे नीस आज्ञा हो।”
ख्रीष्ट सुओ मीजा हो?
(मर्कूस १२:३५-३७; लूका २०:४१-४४)
41फरिसीको भेला छान्च बेलाङ येशूये होखुरीककी इट डेचै गीना, 42“मुक्ति याछ ख्रीष्टौ बारेयाङ नाखुरीकै ही विचार जाट्नने? होसको सुओ मीजा हो?” होखुरीकै डेया, “होसको च दाऊदौ मीजा हो।” 43येशूये होखुरीककी डेया, “होटडेनाङ दाऊदै परमेश्वरौ आत्मा लकीङ प्रेरणा डुपार होसकोकी कुटजाट्न ‘प्रभु’ डेकी लैडीया? हीजैडेनाङ दाऊदै डेमने,
44 ‘परमप्रभुये ङौ प्रभुकी डेया,
नाको ङौ डोरमीहुट पट्टी ङुनी,
जबसम्म ङा नाकुङ शत्रुकोलाक नाकुङ पैतला म्होकी माडाले।’ #
भजनसंग्रह ११०:१
45 “इडीक दाऊदै होसकोकी ‘प्रभु’ डेले डेनाङ कुटजाट्न होसको दाऊदौ मीजा छान्ने?” 46अनि सुयेर इच्यौ जवाफ याखी माह्योका। होसनीक लकीङ सुयेर येशूकी हीर कुरा गीन्च आँट जाट्की माह्योका।
Currently Selected:
मत्ती 22: EMGP
Highlight
Share
Copy
Want to have your highlights saved across all your devices? Sign up or sign in
© 2025 by Mother Tongue Translators Society and Wycliffe Bible Translators, Inc.
