मत्ती 21
21
यरूशलेमाङ येशूकी स्वागत जाट्च
(मर्कूस ११:१-११; लूका १९:२८-४०; यूहन्ना १२:१२-१९)
1येशू र मेकुङ चेलाको यरूशलेमौ खेरेप जैतून डाँडा छीनी बेथफागे डेच ठावाङ टाह्रा। अनि होसकै नीस जना चेलाकोलाक 2इट डेयार बीर्न्हका, “नाखुरीक उ पारी लाङ्घाङ नुङ्नी। होला टाछ बित्तिकै नाखुरीकै काट गधौ मीजा मेन मीमाखाटा छ्याक्ङ डाच डुप्ले। होखुरीककी पीसाकार ङा लेठाङ राक्नी। 3सुयेर नाखुरीककी हीर डेया डेनाङ, ‘प्रभुकी इखुरीक चहडीस्नने’ डेकी अनि होचे तुरुन्तै होखुरीककी याम्हकाले।”
4अगमवक्ता लकीङ ङाक्च वचन पूरा छान्की इसे छान्च हो,
5“यरूशलेमुङ भर्मीकोलाक डेनी,
‘ङोस्नी, नाखुरीकुङ राजा,
नम्र छानार होसको गधा मीटाक काल्हार, गधौ मीजा मीटाक काल्हार नाखुरीक लेठाङ राम्हन ले।’#जकरिया ९:९”
6होटै होसकुङ नीस जना चेलाको नुङार येशूये अह्रडीच लेखा न होखुरीकै जाटा। 7होखुरीकै होसे गधौ मीजाकी मेन मीमाखाटा न राका, र होखुरीकै होसे गधौ मीजा मीटाक लहो बढीनको टाङ्ङ याहा, अनि येशू होसे मीटाक काल्हा। 8भर्मीकै लाहा लहो बढीनको डोनार होसकोकी स्वागत जाट्की लामाङ टाङ्ङ याहा। अरु कुडीक जनै चहिँ स्याउल्हाको राकार लामाङ टाङ्ङ याहा। 9येशूओ अगाडि र पछाडी ह्वाच पट्ट न भर्मीकै इट डेचै जय-जयकार जाट्की ठाला, “दाऊदौ मीजाकी होसन्ना! परमप्रभुओ म्यार्मीनाङ राछ कुडीक आशिषित ले! पट्ट डेनाङ ढेनाम स्वर्गाङ होसन्ना!”#भजनसंग्रह ११८:२५-२६
10जब येशू यरूशलेमाङ टाहा, पूरै सहरुङ भर्मीको माह्राङार होखुरीकै गीना, “इसको सु हो?” 11भीडुङ भर्मीकै डेया, “होसको च गालीलुङ नासरतुङ अगमवक्ता येशू हो।”
येशू परमेश्वरौ मन्दिराङ नुङ्च
(मर्कूस ११:१५-१९; लूका १९:४५-४८; यूहन्ना २:१३-२२)
12येशू परमेश्वरौ मन्दिरौ आर्भाङ नुङा। होसकै होला लोम आर्लाम जाट्चको पट्टकी परमेश्वरौ मन्दिर लकीङ लगारीयार बाहिर छ्युका। होसकै पैसा योस्चकुङ टेबुलको घोप्टडीम याहा र परेवा आर्लाचकुङ र ङुच ठाउँको पल्टडीम याहा। 13होसकै होखुरीककी डेया, “धर्मशास्त्राङ याङ्च रीक्ङने, ‘ङौ इम प्रार्थनौ इम छान्की पर्ले।’ #यशैया ५६:७ तर नाखुरीकै च इसकी खुसकुङ ओडार #यर्मिया ७:११टी खास्नने।”
14मीमीक माडाङ्च र लङ्गडाको परमेश्वरौ मन्दिराङ येशू लेठाङ राहार होसकै होखुरीककी गेपाका। 15तर जब मुख्य पूजाहारीको र धर्मगुरुकै होसकै जाट्च अचम्मौ कामको डाङा, र मा-मार्जा जजाकै परमेश्वरौ मन्दिरुङ आर्भाङ “दाऊदौ मीजाकी होसन्ना” डेचै च्याक्च सेया, अनि होखुरीक साप्फी मीरीस ख्योहा। 16होखुरीकै येशूकी डेया, “इसे जजाकै ही डेमने, नाको सेमन ले?” होसकै डेया, “हो सेमन ले। ही नाखुरीकै सेन र धर्मशास्त्र मापरेस्नने, ‘मा-मार्जा जजाकै र दुध गाचै जाट्च बालककोलाक र नाकै प्रशंसा जाट्की लैडीले’#भजनसंग्रह ८:२?” 17अनि होखुरीककी डासार होसको सहरीङ बाहिर ख्योहार बेथानियाङ नुङार होला न बास ङुवा।
मीस्या मालेच अञ्जीरौ म्यार्टुङ
(मर्कूस ११:१२-१४,२०-२४)
18गोराक न सहरपट्टी ल्हेस्नाङ येशूकी मीटुक रन्छीया। 19लामौ छेवाङ काट अञ्जीरौ म्यार्टुङ डाङार होसको मीस्या लेकी डेम नुङा। तर होला मील्हा बाहेक हीर मालेया। तब होसकै होसे म्यार्टुङकी डेया, “अब लकीङ आलाक नुओ मीस्या सेन र मास्याख्यो!” तब होसे म्यार्टुङ होडीक न बेला ओइलडीस्की क्योटा।
20याङ्च डाङार चेलाको छक्क पर्यार गीना, “इसे अञ्जीरौ म्यार्टुङ कुटजाट्न इडीक छिटो ओइलडीस्की क्योटा?” 21अनि येशूये होखुरीककी जवाफ याहा, “ङा नाखुरीककी साँच्ची न डेले, नाखुरीकखाटा विश्वास ले र सेन र शंका माजाटा डेनाङ, ङै इसे अञ्जीरौ म्यार्टुङकी ही जाटा होडीक मट्टै होइन, तर नाखुरीकै इसे डाँडाकी ‘इटै नुङार समुद्राङ झालो’ डेया डेनाङ होसे झाल्ले। 22विश्वास जाटार प्रार्थनाङ ही ङेल्हे होसे नाखुरीकै डुप्ले।”
येशूओ अधिकारौ बारेयाङ गीन्च
(मर्कूस ११:२७-३३; लूका २०:१-८)
23अनि येशू परमेश्वरौ मन्दिर भित्री पर्यार शिक्षा याम्हन लेया, होडीक बेला मुख्य पूजाहारीको र अगुवाको होसको लेठाङ राहार होसकोकी गीना, “नाकै कुटै अधिकार डुपार इसे काम जाट्न न ले? इसे अधिकार नाकोकी सुये याहा?” 24येशूये होखुरीककी डेया, “ङा र नाखुरीककी काट कुरा गीन्ने, ङाकी होच्यो जवाफ याहा डेनाङ, ङा कुसे अधिकारै इसे काम जाट्नने, होसे नाखुरीककी डेले। 25यूहन्नै बप्तिस्मा याछ अधिकार कुटै डुपा? परमेश्वर लकीङ हो की भर्मी लकीङ?” अनि होखुरीक मेखुरीक-मेखुरीक इट डेचै कुरा जाट्की ठाला, “परमेश्वर लकीङ हो डेइङ डेनाङ, होसकै ‘होटडेनाङ नाखुरीकै होसकी हीजै विश्वास माजाटा?’ डेले। 26तर भर्मीको लकीङ हो डेइङ डेनाङ, कानुङ विरुद्धाङ भर्मीको सोले की डेम बीह्रीम सेले। हीजैडेनाङ पट्टकै यूहन्नाकी अगमवक्ता हो डेम मन्डीले।”
27होटबाटै होखुरीकै येशूकी डेया, “कानकी थाहा माले।” होसकै होखुरीककी डेया, “ङा र कुसे अधिकारै इसे काम जाट्नने, होसे नाखुरीककी माडेले।”
नीस लेन्जा मीजाकुङ उदाहरण
28येशूये डेया, “नाखुरीक ही विचार जाट्ले? काट जना भर्मीयो नीस जना लेन्जा मीजाको लेया। होचे जेठा चहिँ लेठाङ राहार डेया, ‘मीजा, छीनी नाङ नुङार अङ्गुर बारीयाङ काम जाट्न योहो।’ 29होचे जवाफ याहा, ‘ङा मान्ने।’ तर न्हुइङ होच्यो मीमन ल्हेसा अनि होसे नुङा। 30फेरि होसे बोइ अर्को लेन्जा मीजा लेठाङ नुङार होटन डेया। होचे जवाफ याहा, ‘छान्ने ङा नुङ्ले।’ तर होसे मानुङा। 31अब इसे नीसाङ कुसे चहिँये बोयो इच्छाकी मन्डीया?” होखुरीकै जवाफ याहा, “जेठै चहिँये।” होटै येशूये होखुरीककी डेया, “साँच्ची न ङा नाखुरीककी डेले, कर सोट्चको र वेश्याको नाखुरीक डेनाङ पहिला परमेश्वरौ राज्याङ नुङ्ले। 32हीजैडेनाङ बप्तिस्मा याछ यूहन्ना नाखुरीक लेठाङ धार्मिकतौ सत्य लाम टान्हाक्की राहा, तर होसकी नाखुरीकै विश्वास माजाटा। बरु कर सोट्चको र वेश्याकै चहिँ होसकी विश्वास जाटा। नाखुरीकै इसे डाङ्नाङ र लहो पापको माडासा र होसकी विश्वास माजाटा।”
अङ्गुर बारी र मोहीको
(मर्कूस १२:१-१२; लूका २०:९-१९)
33येशूये डेया, “अर्को काट उदाहरण सेनी। काट जना बारीयो मीमुरुङ लेया, होचे बारीयाङ अङ्गुर रोप्डीया। होच्यो वरिपरि बार बार्यार होला अङ्गुर चीप्च काट कोल र अङ्गुर बारी रुङ्च गोठ र खासा। होसे अङ्गुर बारी मोहीकोलाक ठेक्काङ याहार मेल्हा चहिँ लोस नुङा। 34जब अङ्गुर म्हीन्च बेला छाना, तब होचे लहो भाग अङ्गुर लाकी मोहीको लेठाङ नोकरको बीर्न्हका। 35तर होसे मोहीकै नोकरकोलाक घोवार काटकी डुङा, काटकी साटा अनि काटकी ल्हुङै हीर्कडीया। 36फेरि बारीओ मीमुरुङै पहिलुङ डेनाङ वास्टै नोकरकोलाक मोहीको लेठाङ बीर्न्हका। होखुरीकखाटा र मोहीकै पहिलुङकोलाक लेखा न जाटा।
37 “अन्तिमाङ बारीयो मीमुरुङै लहो लेन्जा मीजाकी मोहीको लेठाङ बीर्न्हका, अनि होचे आर्मीटा की ‘ङौ लेन्जा मीजाकी च मोहीकै आदर जाट्ले।’ 38तर मोहीकै जब मीजाकी राम्हन लेच डाङा, अनि मेखुरीक-मेखुरीक डेया, ‘इसे च हकवाला हो। रान्ही होसकी साटीङ र होच्यो हकुङ सम्पत्ति काल्हौ खासीङ।’ 39होटै होखुरीकै होसकी घोवार अङ्गुर बारीलकीङ बाहिर आल्हार साटा।”
40होटै येशूये होखुरीककी गीना, “होटबाटै जब अङ्गुर बारीयो मीमुरुङ राल्हे, अनि होचे होसे मोहीकोलाक ही जाट्ले औला?” 41होखुरीकै येशूकी जवाफ याहा, “होचे होसे दुष्ट मोहीकोलाक साट्ले, अनि अङ्गुर बारी अरु मोहीकोलाक ठेक्काङ याल्हे, सुये होसकी लहो अङ्गुरौ भाग समयाङ न याल्हे।” 42येशूये होखुरीककी डेया, “ही नाखुरीकै धर्मशास्त्राङ रीक्च कुरा सेन र मापरेस्नने?
‘कुसे ल्हुङ्की इम खास्च कर्मीकै रद्द जाटा,
होसे ल्हुङ चहिँ इमौ गारो सोट्च सुर ल्हुङ छाना।
इसे परमप्रभु लकीङ न छान्च हो,
अनि इसे कानुङ लागि अचम्मौ ले।’ #
भजनसंग्रह ११८:२२-२३
43 “होटबाटै ङा नाखुरीककी डेले, परमेश्वरौ राज्य अब नाखुरीक लकीङ स्याट्ले, अनि याङ्च काट जातिकी याल्हे, होचे होच्यो मीस्या स्याटाक्ले। 44इसे ल्हुङ मीटाक झाल्च चहिँ भाटार टुक्रा-टुक्रा छान्ने, तर सु मीटाक इसे ल्हुङ झाल्ले, होसे चहिँ धुलोपिठो छान्ने।”
45जब मुख्य पूजाहारीको र फरिसीकै येशूये डेच उदाहरण सेया, अनि होसकै इसे होखुरीकुङ बारेयाङ न डेच हो डेयार वाह्रा। 46अनि होखुरीकै होसकोकी घोकी पा, तर भर्मीको लकीङ बीह्रीया, हीजैडेनाङ भर्मीकै येशूकी अगमवक्ता हो डेम मन्डीमन्या।
Currently Selected:
मत्ती 21: EMGP
Highlight
Share
Copy
Want to have your highlights saved across all your devices? Sign up or sign in
© 2025 by Mother Tongue Translators Society and Wycliffe Bible Translators, Inc.
