लूका 8
8
येशूकी सघडीच मास्टोको
1होस न्हुइङ येशू परमेश्वरौ राज्यौ बारेयाङ सेछ समाचार सेटाक्चै सहर-सहर र लाङ्घा-लाङ्घाङ ह्वाकी ठाला। होसकोखाटा बाह्र जना चेलाको र लेया। 2होस बेला कुडीक मास्टोको र होसकोखाटा ह्वामन्या र होखुरीक चहिँ भूत र रोग लकीङ गेप्चको लेया। होखुरीक मध्याङ सात वटा भूत ख्योम्ह गेप्च मग्दलिनी डेच मरियम म्यार्मीनौ मास्टो र लेया। 3होटै हेरोद राजौ दरबाराङ काम जाट्च हाकिम खुजासौ मास्टो योअन्नाखाटा सुसन्ना र अरु वास्टै मास्टोको लेया। होखुरीकै येशू प्रभु र चेलाकोलाक धन-सम्पत्ति याहार सहयोग जाट्नन्या।
छोयो भेरेट्चौ उखान
(मत्ती १३:१-९; मर्कूस ४:१-९)
4होटै वास्टै भर्मीको लाङ्घा र सहर लकीङ येशू लेठाङ राहा। होखुरीककी येशूये काट उखान सेटाका। 5“काट जना भर्मीये ह्याङ नुङार छोयो भेरेटा। छोयो भेरेट्नाङ कुडीक छोयो लामाङ पर्या र भर्मीकै पीचीया अनि ग्वाजाकै ज्याम याहा। 6कुडीक छोयो चहिँ ल्हुङ घारीयाङ पर्या। होटै होसे छोयो गीट्की च गीटा, तर चिसो झा मालेचबाटै छोक्की क्योटा। 7कुडीक छोयो चहिँ जु घारीयाङ पर्या र बिरुवाकोखाटा न जुको ल्होङार राहा। होटै होसे बिरुवाकी ल्होङ्की माह्या। 8तर कुडीक छोयो चहिँ सेछ झाङ पर्या। होटै सेम्हजा गीटार ल्होङा होचे सय गुणा मीस्याको स्याटाका।”
इडीक डेम भ्यारखीङ होसकै बाड्को स्वरै इट डेया, “सुओ सेच मेनेकेप ले होचे सेख्यो!”
उखानौ अर्थ
(मत्ती १३:१०-२३; मर्कूस ४:१०-२०)
9येशूओ चेलाकै इसे उखानौ अर्थ चहिँ ही आले? डेयार येशूकी गीना। 10येशूये डेया, “नाखुरीककी च परमेश्वरौ राज्यौ भित्री कुरा वार्छ ज्ञान याम्हने, तर अरुखाटा चहिँ ङा उखानाङ ङाक्ले, हीजैडेनाङ ‘होखुरीकै ङोस्नाङ र माडाङ्ख्यो र सेम र माबुझडीस्ख्यो’।#यशैया ६:९-१०
11 “इसे उखानौ अर्थ याङ्च हो। छोयो चहिँ परमेश्वरौ वचन हो। 12लामाङ पर्च छोयो चहिँ होखुरीक हो, परमेश्वरौ वचन सेकी च सेले, तर मीमनाङ डाकी माह्योक्ले, हीजैडेनाङ वचन सेयार विश्वास माजाट्ख्यो र माजीवाख्यो डेम शैतानै होखुरीकुङ मीमन लकीङ वचन ढुमार आल्खी क्योट्ले। 13ल्हुङ घारीयाङ पर्च चहिँ होखुरीक हो, वचन सेयार खुसीखाटा ग्रहण जाट्ले। तर होच्यो जरा माछान्ने, होखुरीकुङ विश्वास चहिँ कालापौ लागि मट्टै छान्ने। तर परीक्षौ बेलाङ होखुरीकुङ पतन छान्ने। 14जु घारीयाङ पर्च छोयो होखुरीक हो, वचन च सेले, होटै न्हुइङ जीवनौ चिन्ता, संसारुङ धन-सम्पत्ति र मोजमज्जाङ पर्यार ल्होङ्की माढीन्ले होटै होच्यो मीस्या म्हीन्की माडुप्ले। 15तर असल झाङ पर्च छोयो चहिँ होखुरीक हो, वचन सेयार सेछ र भलो हृदयाङ जोगडीम डाले, होटै लेन्न र मीस्या स्याटाक्ले।
ढाच बत्तीयो उखान
(मर्कूस ४:२१-२५)
16 “बत्ती ढाकार सुयेर डालोये माहुप्ले, न खाट म्होकी डाले। बरु इम भित्री राछकोलाक ट्याङ्ख्यो डेम बत्तीकी सामदानाङ डाले। 17इटजाट्न न आर्च्युकार डाच ही-ही ले, होसे पट्ट न डाङ्ले र माबुझडीस्च ही-ही कुराको ले होसे र पट्ट न थाहा डीन्ल्हे, होटै पट्टकै बुझडीस्ले। 18होटबाटै नाखुरीकै सेच कुरा मीमनाङ सेम्हजा डानी, हीजैडेनाङ सुखाटा ले होसकी झन् फाट्न याल्हे, तर सुखाटा हीर माले, होचे लाहाखाटा ही ले डेम आर्मीट्ले होसे र होस लकीङ स्याट्न याल्हे।”
येशूओ मोइ र भाइको
(मत्ती १२:४६-५०; मर्कूस ३:३१-३५)
19कायाक येशूकी डुप्की डेम मेखोल्हौ मोइ र भाइको राहा। तर वास्टै भर्मीकुङ भीडै जाट्नाङ होसकुङ खेरेप राखी माह्योका। 20होला लेचकै येशूकी डेया, “नाकोकी डुप्की डेम नाकुङ मोइ र भाइको बाहिर टोङ्ह ङुमे।” 21येशूये होखुरीक पट्टकी डेया, “सुये परमेश्वरौ वचन सेले र मन्डीले होखुरीक न ङौ मोइ र भाइको हो।”
येशूये नाम्सु र समुद्रौ छालकी बाहाक्च
(मत्ती ८:२३-२७; मर्कूस ४:३५-४१)
22कायाक येशू लहो चेलाकोखाटा डुङ्गाङ काल्हार डेया, “कान ताल पारि नुइङ है” होटै होखुरीक डुङ्गाङ काल्हार ह्वा। 23नुङ्ङ न लेनाङ येशू मीमीक झुकार मीसा। होडीक न बेला बाड्को नाम्सु र समुद्रौ छाल राहार डुङ्गाङ डी न्हेप्की पा होटै होखुरीक आपताङ पर्या। 24होटै चेलाको येशू छीनी राहार होसकोकी सोट्चै इट डेकी ठाला, “ए गुरु ज्यु, काल्हाको ठाखी पाम भ्या।” होटै येशू सोवार नाम्सु र समुद्रौ छालकी हक्कारीया। होडीक न बेला नाम्सु र समुद्रौ छाल बाहा र शान्त छाना। 25होटै येशूये चेलाकोलाक डेया, “नाखुरीकुङ विश्वास कुला नुङा?”
चेलाको होसे कुरा डाङार छक्क पर्या, होटै बीह्रीचै मेखुरीक-मेखुरीक इट डेयार कुरा जाट्की ठाला, “इसको सु आले? होसकै हक्कारीनाङ च नाम्सु र समुद्रौ छाल र बाछ लेसा!”
दुष्टआत्मा लग्डीस्च भर्मी गेप्च
(मत्ती ८:२८-३४; मर्कूस ५:१-२०)
26येशू मेखोल्हौ चेलाकोखाटा गालील लकीङ पारि गेरासेनसौ ठावाङ टाहा। 27होटै डुङ्गा लकीङ ख्योह्रखीङ येशूये होसे सहरुङ काट भर्मीकी डुपा होसकी भूत लग्डीस्नन्या। होसे भर्मीये वास्टै समय लकीङ बढीन माबील्न्या। होटै इमाङ माङुमन चिहानौ ओडाराङ ङुम ह्वामन्या। 28होचे येशूकी डाङ्च बित्तिकै साप्फी चिघारीसार होसको अगाडि खुखुप छानार डेया, “ए कह्राङ्छ परमेश्वरौ मीजा येशू, नाकुङ ङाखाटा ही काम? ङा बिन्ती जाट्ले ङाकी दु:ख माह्यानी।” 29येशूये भूतकी ख्योहार नुङ्ना डेयार आज्ञा याम्हन्या। होटबाटै होसे भर्मीये इटजाट्न ङाक्न्या। वास्टै खेप दुष्टआत्मै होसे भर्मीकी दु:ख याम्हन्या। फलामौ साङ्लीये मीहुट मीखुट्याङ छ्याकार डानाङ र होसे भर्मीये साङ्ली भाराक्की क्योट्न्या होटै होसे भर्मीकी दुष्टआत्मै उजाड-ठाँवाङ आल्न्हन्या।
30येशूये होसकी गीना, “नुओ म्यार्मीन ही हो?” होचे डेया, “फौज”। हीजैडेनाङ होसे भर्मीकी वास्टै भूत लग्डीस्नन्या। 31होखुरीककी अतल कुण्डाङ माबीर्न्हकाख्यो डेम होखुरीकै येशूकी बिन्ती जाटा।
32होसे डाँडौ पाखाङ वास्टै वाकौ हुलको स्यास्न ङुमन्या। होटबाटै दुष्टआत्माकै वाकौ हुलाङ पर्की यान्ही डेम येशूखाटा बिन्ती जाटा। होटै होसकै नुङ्की याहा। 33होटै पट्ट न भूतको होसे भर्मी लकीङ ख्योहार वाकको भित्री सुल्हुवा। होटै वाकौ हुल पट्ट न भीर लकीङ कुरुह्वार तालाङ ठाहार सीया।
34याङ्च छान्च डाङार वाक आर्छाचको भोग्डीसा। होटै होखुरीक सहर र लाङ्घालाक नुङार पट्ट न कुराको सेटाका। 35होटै वास्टै भर्मीको ही छान्ननेसा डेयार ङोस्की डेम येशू लेठाङ राहा। होटै होखुरीक येशू लेठाङ रान्हाङ होसे भर्मी लकीङ भूतको ख्योम्ह सेम्हजा बढीन बील्हार येशूओ मीकु छीनी सज्जन छानार ङुम-ङुच डुपा। होसे भर्मीको र इसे डाङार बीह्रीया। 36होसे घटना डाङ्चकै अरु ङोस्की राछ भर्मीकोलाक भूत लग्डीस्च भर्मी कुटजाट्न गेपा डेम सेटाका। 37होटै गेरासेनसौ खेरेपुङ पट्ट लाङ्घुङ भर्मीकै येशूकी होखुरीकुङ लाङ्घा लकीङ नुङ्की क्योट्नी डेयार बिन्ती जाटा। हीजैडेनाङ होखुरीक साह्रै बीह्रीम्या। होटबाटै येशू डुङ्गाङ काल्हार नुङ्की पानाङ, 38होडीक बेला भूत लग्डीसार गेप्च भर्मीये येशूकी बिन्ती जाटा, “हजुर, ङाकीर नाकोखाटा आल्न्ही।” तर येशूये होसकी इट डेया, 39“नाको नाखोलौ इमाङ ल्हेस्नी र परमेश्वरै नाकोकी ही जाट्न याहा, होसे कुरा अरुकोलाक र सेटाक्नी।”
होटै होसे भर्मी सहरलाक नुङार लाहाकी येशूये जाट्न याछ कुरा पट्ट सहराङ सेटाक्चै ह्वा।
याइरसौ मास्टो मीजा र ह्यु जोक्च मास्टो
(मत्ती ९:१८-२६; मर्कूस ५:२१-४३)
40येशू ल्हेसार रान्हाङ होला लेच भीडै होसकोकी स्वागत जाटा, हीजैडेनाङ होखुरीक पट्टकै होसकोकी लेन्न ङुमन्या। 41होटै न्हुइङ काट याइरस म्यार्मीनौ भर्मी राहा। होसे चहिँ सभा ङुच इमुङ हाकिम लेया। होचे येशूकी मेन इमाङ राम्ह यान्ही डेम बिन्ती जाटा। 42हीजैडेनाङ आसकुङ काट्जा बाह्र वर्षौ मास्टो मीजा छाम सीकी पामन्या।
इसे कुरा सेम येशू नुङ्चै जाट्नाङ वास्टै भर्मीकुङ भीडै होसकोकी ढुस्न न लेया। 43होसे भीडाङ बाह्र वर्षसम्म ह्यु जोकार छाम ङुच काट मास्टो लेया। होसकी सुयेर गेपाक्की माह्योक्नन्या।#८:४३ लाहाखाटा लेच पट्ट न सम्पत्ति उसा जाट्न भ्यानाङर डेच शब्दको (कोइ कोइ संस्करनौ बाइबलाङ ठप्डीमने।) 44होसे मास्टोये येशूओ न्हुङ्लकीङ राहार होसकुङ बढीनौ छेवाङ छुच बित्तिकै ह्यु जोक्की रोकडीसा। 45होटै येशूये, “ङाकी सुये छुवा?” डेम गीना।
सुयेर ङै छुवा माडेया, होटै पत्रुसै डेया, “गुरु ज्यु, भर्मीकुङ भीडै नाकोकी घेरीम ढुस्न न ले।”
46तर येशूये डेया, “सुयेर ङाकी छुच न हो, हीजैडेनाङ ङा लकीङ शक्ति ख्योहार नुङ्च ङै थाहा डीन्हा।” 47लाहा आर्च्युम्ह ङुकी माह्योक्च छाना डेम वाह्रार होसे मास्टो बीह्रीया र बुरुक्चै राहार येशूओ मीहीलाङ खुखुप छाना। होटै होसे मास्टोये होसकोकी हीजै छुवा र छुच बित्तिकै गेप्च कुरा पट्ट भर्मीकुङ म्याहासाङ डेम याहा। 48येशूये डेया, “ए मास्टो मीजा, नाकुङ विश्वासै नाकोकी गेपाक्ङने, शान्तिखाटा नुङ्नी।”
49होसको ङाक्चै जाट्नाङ हाकिमौ इम लकीङ काट भर्मी खबर लार राहा र याइरसकी इट डेया, “नाकुङ मास्टो मीजा सीम भ्या। अब गुरुकी दु:ख माह्यानी।”
50तर येशूये इसे कुरा सेयार याइरसकी डेया, “बीह्रीखी मापर्ले विश्वास मट्टै जाट्नी! नाकुङ मास्टो मीजा गेप्ले।”
51होसको याइरसौ इमाङ राहा र होसकै पत्रुस, याकूब, यूहन्ना र मास्टो जजौ बोइ-मोइ बाहेक अरु सुकीर मेखोल्हाखाटा भित्री पर्की माह्या। 52होला जम्मा छान्च भर्मीको पट्ट न राप्चै, दु:ख मन्डीम ङुमन्या। होसकै डेया, “माराप्नी! इसे च मासीमे, तर मीमीक मट्टै झुक्नने।”
53होसकुङ कुरा मापट्डीयार होखुरीक रेटा, हीजैडेनाङ मास्टो जजा सीच न हो डेयार होखुरीकै वार्न्हन्या। 54तर येशूये होच्यो मीहुट घोवार आर्घा, “ए नानी, सोनी!” 55होच्यो प्राण ल्हेसार राहा, र जुरुक्क सोवा, अनि येशूये मास्टो जजाकी हीर ज्याकी याखी डेया। 56मेन बोइ-मोइ अचम्म मन्डीया, तर येशूये इसे कुरा सुकीर माडेकी डेम होखुरीककी आदेश याहा।
Currently Selected:
लूका 8: EMGP
Highlight
Copy
Compare
Share
Want to have your highlights saved across all your devices? Sign up or sign in
© 2025 by Mother Tongue Translators Society and Wycliffe Bible Translators, Inc.
