लूका 7
7
रोमी कप्तानौ विश्वास
(मत्ती ८:५-१३)
1लहे डेकी पर्च पट्ट न कुरा भर्मीकोलाक डेम भ्याच न्हुइङ येशू कफर्नहुमाङ नुङा। 2होला काट रोमी कप्तानै वास्टै रोच मेन नोकर छाम सीकी पामन्या। 3होचे येशूओ बारेयाङ सेया, होटै मेन नोकरकी गेपाक्ङ यान्ही डेकी डेम येशूकी आर्घाकी यहूदीकुङ अगुवाकोलाक बीर्न्हका। 4होखुरीक येशू लेठाङ राहार इट डेया, “रोमी कप्तानै नाकुङ सहायता डुप्की सेम्ह छान्ने। 5हीजैडेनाङ होचे कान यहूदी जातिकोलाक प्रेम जाट्ले, होचे न कानुङ लागि सभा ङुच इम खास्न याम्हने।” 6होटै न्हुइङ येशू होखुरीकखाटा नुङा। होखुरीक कप्तानौ इम खेरेप टान्हाङ कप्तानै लहो लाफाकोलाक येशूकी याङ्च खबर याम्हका, “हजुर, लौ दु:ख माजाट्नी। नाकोकी ङौ इम भित्री आल्खी ज्योस्च ङा माले, 7ङाल्हा र नाकुङ म्याहासाङ राखी योग्यौ माले। तर नाकै वचन मट्टै ङाक्ङ यान्ही, ङौ नोकर गेप्ले। 8हीजैडेनाङ ङा र बाड्को हाकिमकुङ अधीनाङ ङुमने। ङौ अधीनाङ र सिपाहीको ले। काटकी ‘नुङ्ना’ डेले, होसे नुङ्ले, अर्कोकी ‘रान्हा’ डेले, होसे राखी क्योट्ले। ङौ नोकरकी ‘इसे जाटो’ डेले, अनि होचे जाट्ले।”
9कप्तानौ याङ्च कुरा सेयार येशू छक्क पर्या। होटै लहो न्हुङ-न्हुङ राछ भर्मीकुङ भीडकी ङोस्चै डेया, “ङै इस्राएलाङ र याङ्च विश्वास माडाङ्ङने।” 10होसे खबर राक्च भर्मीको इमाङ ल्हेसार रान्हाङ होसे छाच नोकरकी होखुरीकै गेप्न भ्याच डुपा।
येशूये विधवौ लेन्जा मीजाकी जीवाटाक्च
11येशू हीर समय न्हुइङ नाइन डेच सहराङ नुङा। होसकुङ चेलाको र अरु वास्टै भर्मीकुङ भीड होसको न्हुङ-न्हुङ नुङा। 12येशू सहरौ गालाम खेरेप टाखी पानाङ काट सीच भर्मीकी बुवार मलामीको नुङ्ङ न लेया। होसे सीच भर्मी चहिँ काट विधवौ काट्जा लेन्जा मीजा लेया। होसे विधवाखाटा मलामी नुङ्चको सहरुङ वास्टै भर्मीको र लेया। 13प्रभुये विधवौ दु:ख डाङार रोचै डेया, “नाको माराप्नी!” 14होटै येशू खेरेप नुङार मुर्दा बुच बाकसकी छुवा र मलामीको टोङ्हा। होसकै डेया, “ए रेन्जा भर्मी, ङा नाकोकी डेले, सोनी!” 15सीच भर्मी सोवार ङुवा होटै ङाक्की ठाला र येशूये होसकी मेन मोइकी जिम्मा याहा।
16होला पट्ट न भर्मीको बीह्रीयार परमेश्वरौ प्रशंसा जाटा र डेया, “काट जना कह्राङ्छ अगमवक्ता कानुङ मीघ्याङ डाङ्ङने र परमेश्वरै लहो भर्मीकोलाक जीवाटाक्की डेम राछ हो।” 17येशूये रेन्जा भर्मीकी जीवाटाक्च खबर पट्ट न यहूदियाभरि र वार्लाक-पार्लाकुङ ठाँवाङ फैलडीसा।
येशू र बप्तिस्मा याछ यूहन्ना
(मत्ती ११:२-१९)
18येशूये जाट्च पट्ट न कुराको यूहन्नौ चेलाकै यूहन्नाकी सेटाका। 19होटै होसकै मेखोल्हौ नीस जना चेलाकोलाक आर्घार प्रभु येशू लेठाङ इट डेम गीन्की बीर्न्हका, “कानै आशा जाट्च मुक्ति याछ राजा नाको न हो कि कानै अरुओ न लाम ङोसीङ?” 20होटै होखुरीक येशू लेठाङ राहार गीना, “‘कानै आशा जाट्च मुक्ति याछ राजा नाको न हो की कानै अरुओ न लाम ङोसीङ?’ इसे कुरा गीन्की बप्तिस्मा याछ यूहन्नै कानकी बीर्न्हकाच हो।”
21होडीक न बेला येशूये वास्टै भर्मीकुङ रोग र दुष्टआत्मा लग्डीस्चकोलाक गेपाक्ङ न लेया र मीमीक माडाङ्चको र डाङ्च छाना। 22यूहन्नौ चेलाकोलाक येशूये इट डेया, “नाखुरीकै ही-ही डाङ्ने र सेमने, नुङार यूहन्नाकी पट्ट न कुरा सेटाक्नी। मीमीक माडाङ्चकै डाङ्ङने, मीकु माक्योस्चको ह्वामने, कुष्ठरोगीको गेप्नने, मेनेकेप मासेचकै सेमने, सीचको जीवाम सोमने र दु:खलाचकै सेछ समाचार सेकी डुप्ने। 23ङाकी शंका माजाट्च भर्मी साँच्ची न आशिषित हो!”
24यूहन्नौ चेलाको ल्हेस्च न्हुइङ होला लेच भर्मीकोलाक येशूये यूहन्नौ बारेयाङ इट डेया, “नाखुरीक उजाड ठावाङ ही ङोस्की नुङन्या? ही नाम्सुये होक्योचै जाट्च आर्क्यामकी? 25कि सेछ-सेछ बढीन बील्छ भर्मीकोलाक ङोस्की नुङा? सेनी, सेछ-सेछ बढीन बील्छ भर्मीको च राजौ दरबाराङ मोजमज्जा जाटार ङुले। 26ङाकी डेनी, नाखुरीक ही ङोस्की नुङन्या? ही अगमवक्ताकी? हो ङा नाखुरीककी डेले, नाखुरीकै अगमवक्ताकी डेनाङ काट कह्राङ्छकी डाङ्ङने। 27हीजैडेनाङ यूहन्नौ बारेयाङ इट डेम रीक्ङने,
‘ङोस्नी, ङा ङौ दूतकी नाकुङ अघि बीर्न्हकाले र
होचे न नाकुङ अघि लाम तयार खास्ले।’ #
मलाकी ३:१
28 “ङा नाखुरीककी डेले, मास्टो भर्मी लकीङ डीन्छ मध्याङ यूहन्ना डेनाङ बाड्को सुर माले। तर परमेश्वरौ राज्याङ पट्ट डेनाङ मार्जा सु ले, होसे न यूहन्ना डेनाङ महान छान्ने।”
29यूहन्नौ बारेयाङ याङ्च कुरा सेयार पट्ट भर्मीको र कर सोट्चकै, परमेश्वरौ लाम साँच्ची न ठिक लेसा डेम मन्डीया हीजैडेनाङ होखुरीकै यूहन्ना लकीङ बप्तिस्मा लामन्या। 30तर फरिसीको र व्यवस्थौ धर्मगुरुकै चहिँ यूहन्ना लकीङ बप्तिस्मा मालाच बाटै परमेश्वरै होखुरीकुङ लागि खास्च योजनाकी मामन्डीया।
31येशूये इट डेया, “इसे पुस्तुङ भर्मीकोलाक हीखाटा दाँजडीङ? होखुरीक कुङ्च ले? 32होखुरीक बजाराङ ङुच मा-मार्जा जजाको ल्याक्च ले। लाहा-लाहा न इट डेचै च्याक्ले,
‘कानै नाखुरीकुङ लागि बाजाको आर्म्हाटा, तर नाखुरीक मास्याहा।
कान दु:ख मन्डीयार राप्नाङ र नाखुरीक मारापा।’
33 “बप्तिस्मा याछ यूहन्ना राहा। होचे रोटो र माज्या होटै अङ्गुरौ मद्य र मागा। तर नाखुरीकै आसकोकी दुष्टआत्मा लग्डीस्च भर्मी डेया। 34भर्मीयो मीजा राहा, होसकै ज्या, गा होटै नाखुरीकै डेया, ‘ङोस्नी, घिचुवा र गाम ह्वाच भर्मी, कर सोट्चको र पापीकुङ लाफा’ डेले। 35बुद्धि ठिक हो डेच कुरा बुद्धि अनुसार ह्वाचकै न प्रमाणित जाट्ले।”
येशूये पापी मास्टोकी क्षमा याछ
36येशूकी काट जना फरिसीये इमाङ ज्यामा ज्याकी आर्घा। होटै येशू नुङार फरिसीयो इमाङ ज्यामा ज्याकी ङुवा। 37होसे सहराङ काट पापीनी मास्टो लेया। येशू फरिसी भर्मीयो इमाङ ज्यामा-गामा जाट्की राम्हे टा डेम सेयार होचे सिङ्गमरमरौ शीशीयाङ अत्तर लार होसे इमाङ राहा। 38होटै येशूओ न्हुङ्लाक मीखुट्या छीनी टोङ्हार, राप्चै होसकुङ मीखुट्या मीरापडीये छीम्हाक्की ठाला, र लहो मीछामै सीट्चै होसकुङ मीखुट्याकी चुम्हार होसे अत्तर मोल्न याहा।
39होसे फरिसी भर्मीये याङ्च कुरा डाङार मेन मीमनाङ इट डेया, “इडीक इसको अगमवक्ता हो डेनाङ च मेखोल्हाकी छुच मास्टो सु हो कुङ्च मास्टो हो डेयार होसकै वार्छ लेया, हीजैडेनाङ इसे च पापीनी हो।” 40येशूये होसे फरिसीकी डेया, “ए सिमोन, हीर कुरा ङा नाकोकी डेले।” होचे डेया, “गुरु ज्यु, डेनी।” 41“नीस जना भर्मीये काट साहुखाटा ऋण लामन्या। काटै बाङा सय चाँदीयो सिक्का#७:४१ चाँदीयो सिक्का काट सिक्का बराबर कायाकौ ज्याला र अर्कोये चहिँ पचास चाँदीयो सिक्का। 42होसे नीसै ऋण तेरीकी माह्योक्चबाटै साहुये नीसौ न ऋण मीन्हा जाट्न याहा। लु अब डेनी, कुचे चहिँ होसे साहुकी वास्टै प्रेम जाट्ले औला?”
43सिमोनै डेया, “ङौ विचाराङ सुये वास्टै क्षमा डुपा” होटै येशूये डेया, “नाकै ठिक न विचार जाटा।” 44होटै मास्टो पट्टी ल्हेसार येशूये सिमोनकी डेया, “इसे मास्टोकी ङोस्नी! ङा नाकुङ इमाङ राहा, तर नाकै ङाकी मीकु हुर्की डेम डी धरी माह्या। तर इचे च ङौ मीकुकी मीरापडीये छीम्हाक्ङ याहा र लहो मीछामै सीटा। 45नाकै ङाकी चुम्हार स्वागत माजाटा, तर इचे च इला रान्हाङ लकीङ न ङौ मीकुवाङ चुम्न्ह ङुम ङुमे। 46नाकै ङौ मीटालुवाङ सीडी र मोल्न माह्या, तर इचे च ङौ मीकुवाङ अत्तर मोल्न याम्हने। 47ङा नाकोकी डेले, इच्यौ पाप वास्टै लेया तर क्षमा छान्नने। होटबाटै इसे मास्टोये ङाकी वास्टै माया टान्हाका। चेक्जा पाप क्षमा छान्च भर्मीये चहिँ चेक्जा न माया जाट्ले।” 48होटै येशूये होसे मास्टोकी डेया, “नाकुङ पाप क्षमा छान्नने” 49होला ज्याकी ङुच भर्मीकै मेखुरीक-मेखुरीक डेकी ठाला, “पाप क्षमा जाट्च इसे सु आले?” 50येशूये होसे मास्टोकी डेया, “नाकुङ विश्वासै नाकोकी जीवाटाक्ने, शान्तिखाटा नुङ्नी।”
Currently Selected:
लूका 7: EMGP
Highlight
Copy
Compare
Share
Want to have your highlights saved across all your devices? Sign up or sign in
© 2025 by Mother Tongue Translators Society and Wycliffe Bible Translators, Inc.
