लूका 9
9
येशूये बाह्र जना चेलाकोलाक बीर्न्हकाच
(मत्ती १०:५-१५; मर्कूस ६:७-१३)
1येशूये बाह्र जना चेलाकोलाक काचुट्या आर्घा होखुरीककी पट्ट न भूतको छ्युकार लगारीच, रोगको गेपाक्च शक्ति र अधिकार याहा। 2होसकै होखुरीककी परमेश्वरौ राज्यौ बारेयाङ सेटाक्की र छाचकोलाक गेपाक्की डेम बीर्न्हका। 3होसकै होखुरीककी डेया, “नाखुरीक ह्वाच लामाङ लाहाखाटा हीर माबुनी: डाङ्गा, नाम्जा, रोटो, पैसा, होटै नीस कमीज र माबुनी। 4कुसे इमुङ भर्मीये नाखुरीककी स्वागत जाट्ले होसे लाङ्घा लकीङ बिदा माछान्ठर होसे इमाङ न ङुनी। 5कुसे सहराङ नाखुरीककी स्वागत माजाट्ले होसे सहरीङ ख्योन्हाङ चेतावनी याछै लहो मीहीलुङ झाबुल खाह्राम यान्ही।”
6चेलाको बिदा छानार होखुरीक पट्ट न ठावाङ सेछ समाचार सेटाक्चै छाचकोलाक गेपाक्चै लाङ्घा-लाङ्घा नुङा।
शासक हेरोद अलमल्ल पर्च
(मत्ती १४:१-१२; मर्कूस ६:१४-२९)
7इसे पट्ट घटनौ बारेयाङ सेयार गालीलौ शासक हेरोद अलमल्ल छाना। हीजैडेनाङ बप्तिस्मा याछ यूहन्ना सीच लकीङ जीवामे डेम कुडीक भर्मीकै डेमन्या। 8कुडीकै चहिँ एलियाकी डाङा डेमन्या। होटै कुडीकै चहिँ खायाकुङ अगमवक्ता मध्याङ काट सोमने डेमन्या। 9होटै हेरोदै डेया, “यूहन्नौ मीटालु च ङै न छ्योलोक्की लैडीच हो। तर होसे भर्मी सु आले, होच्यो बारेयाङ ङा याङ्च कुराको सेमन ले?” होटै हेरोदै येशूकी डुप्च मीमन जाटा।
येशूये बाङा हजार भर्मीकोलाक कास्च
(मत्ती १४:१३-२१; मर्कूस ६:३०-४४; यूहन्ना ६:१-१४)
10बाह्र जना प्रेरितको सेछ समाचार सेटाक्ङ ल्हेस्रखीङ मेखुरीकै जाट्च पट्ट न कुराको येशूकी सेटाका। होसकै होखुरीककी लार मेखुरीक मट्टै बेथसेदा डेच सहराङ नुङा। 11तर याङ्च कुरा थाहा डीन्हार वास्टै भर्मीकै होसकोकी डुटा। होसकै होखुरीककी स्वागत जाटा र परमेश्वरौ राज्यौ बारेयाङ सेटाका, होटै छाच लकीङ गेप्की मीमन जाट्चकोलाक गेपाका।
12नाखान कीम्खी पानाङ बाह्र जना चेलाको राहार होसकोकी डेया, “भीडकी बिदा यान्ही, र होखुरीक नुङार खेरेपुङ लाङ्घाङ बास ङुख्यो, र ज्याच ठोकको पाख्यो। हीजैडेनाङ इसे हीर मालेच ठाउँ हो।”
13तर येशूये होखुरीककी डेया, “नाखुरीकै न इखुरीककी ज्याकी यान्ही।”
होटै होखुरीकै डेया, “कानखाटा बाङा रोटो र नीस डीस्या मट्टै ले। नभा कान नुङार इसे पट्ट न भर्मीकुङ लागि ज्याच ठोक लोकी पर्ले औला।” 14होला बाङा हजार टडीक लेन्जा भर्मीको लेया।
येशूये चेलाकोलाक डेया, “इसे भर्मीकोलाक पचास-पचास जनौ लहराङ ङुवाक्नी।”
15होखुरीकै पट्ट भर्मीकोलाक होटजाट्न न ङुवाका। 16होटै न्हुइङ येशूये होसे बाङा रोटो र नीस डीस्या लार स्वर्गपट्टी ङोस्चै धन्यवाद याहा, र होसकै रोटो र डीस्याकी ग्याकार भर्मीकोलाक पुङ्ङ याखी डेम चेलाकोलाक याहा। 17पट्टकै ह्रास्ठर ज्या। होटै ज्याम माबान्छ टुक्राको चेलाकै बाह्र डालो सोटा।
पत्रुसै येशूकी मुक्ति याछ ख्रीष्ट डेम स्वीकारीच
(मत्ती १६:१३-२३; मर्कूस ८:२७-३३)
18कायाक येशू लाहा काट न प्रार्थना जाट्न न लेया। चेलाको र होसकोखाटा लेया। होटै होसकै होखुरीककी गीना, “भर्मीकै ङाकी सु हो डेले?”
19होखुरीकै डेया, “कुडीकै बप्तिस्मा याछ यूहन्ना डेले, कुडीकै एलिया र डेले, र कुडीकै चहिँ खायाकुङ अगमवक्ताको मध्याङ काट फेरि सोमने डेले।”
20होसकै होखुरीककी डेया, “तर नाखुरीक चहिँ ही डेले? ङा सु हो?” पत्रुसै जवाफ याहा, “नाको परमेश्वरै बीर्न्हकाच मुक्ति याछ ख्रीष्ट हो!”
21होटै येशूये इसे कुरा सुकीर मासेटाक्की डेम आज्ञा याछै होखुरीककी चेतावनी याहा। 22होसकै इट र डेया, “भर्मीयो मीजै वास्टै दु:ख सोट्की पर्ले, होसकी अगुवाकै, मुख्य पूजाहारीकै, धर्मगुरुकै माजाक्ले। होसकोकी साट्ले तर सीच सोमयाकाङ जीवाम सोले।”
चेला छान्नाङ पट्ट न ठोक डास्की पर्च
(मत्ती १६:२४-२८; मर्कूस ८:३४–९:१)
23होटै न्हुइङ होसकै पट्टकी डेया, “सुर ङौ न्हुङ-न्हुङ राछ मीमन जाट्ले डेनाङ होचे लहो मीमन अनुसार जीवाच इच्छाकी डास्की पर्ले। होटै दिन-दिनै लहो क्रूस बुवार ङाकी डुट्की पर्ले। 24हीजैडेनाङ सुये लहो प्राण जीवाटाक्च मीमन जाट्ले होचे होसे गुमडीले। तर सुये ङौ लागि लहो प्राण गुमडीले होचे होसे जीवाटाक्ले। 25भर्मीये संसारकी न मीहुटाङ पार्नाङ र लाहाकी चहिँ नाश पार्ले वा गुमडीले डेनाङ ही फाइदा छाना र? 26तर सुर ङौ वचन लकीङ काराले डेनाङ भर्मीयो मीजा र लहो महिमाङ, र परमेश्वर बोयो होटै पवित्र स्वर्गदूतको महिमाङ रान्हाङ होसेखाटा काराले। 27तर साँच्ची न ङा नाखुरीककी डेले, परमेश्वरौ राज्यकी माडाङ्ठर इला टोङ्छ कुडीक जनै चहिँ मृत्युकी अनुभव जाट्की मापर्ले।”
येशूओ रुप फेरीस्च
(मत्ती १७:१-८; मर्कूस ९:२-८)
28इसे कुरा डेच आठ याक न्हुइङ पत्रुस, यूहन्ना र याकूबकी लाहाखाटा लार प्रार्थना जाट्की डेम होसको डाँडाङ नुङा। 29होसकै प्रार्थना जाट्न ङुच बेलाङ होसकुङ मीटहौ रुप फेरीसा र होसकुङ बढीन सर्घाङ पीज्याछ लेखा न चम्कडीस्न बोच छाना। 30होटै होला नीस जना भर्मी डाङा र येशूखाटा ङाक्की ठाला। होखुरीक मोशा र एलिया लेया। 31होखुरीक स्वर्गुङ ज्योतियो रुपाङ राम्ह येशू सीकी पर्ले डेच बारेयाङ कुरा जाट्न न लेया। इसे कुरा चहिँ होसकै यरूशलेमाङ पूरा जाट्की पर्च लेया।
32पत्रुस र मेन लाफाको मीमीक झुकार लठ्ठै छानन्या। तर रीङ्ह्रखीङ होखुरीकै होसकुङ ज्योति र होसकोखाटा टोङ्छ होसे नीस जना भर्मीकोलाक डाङा। 33होटै होखुरीक होसकोखाटा भार नुङ्की पानाङ पत्रुसै येशूकी डेया, “गुरु ज्यु, काल्हाकी इला न ङुकी सेम्ह लेसा। काल्हा बास ङुच सोम गोठ खासीङ। काट नाकोकी, काट मोशाकी, र काट एलियाकी।” तर पत्रुसकी लहे ङाक्च कुरा थाहा न मालेया।
34पत्रुसै इसे कुरा ङाक्नाङ-ङाक्नाङ न होला डेबु राहार होखुरीककी हुपा होटै होखुरीक डेबु भित्री पर्की पानाङ चेलाको बीह्रीया। 35होडीक न बेला डेबु लकीङ इट डेच स्वर सेया, “इसे ङौ मीजा हो, इसकोकी ङै भाक्ङने इसकुङ वचन सेनी।” 36याङ्च शब्द सेम भ्यारखीङ होला येशू मेखोल्हा काट न छाना। होटै चेलाको माच्याक्ङ ङुवा र होखुरीकै डाङ्च कुराको होस बेला सुकीर माडेया।
दुष्टआत्मा लग्डीस्च रेन्जा भर्मी
(मत्ती १७:१४-१८; मर्कूस ९:१४-२७)
37पीउह्राक लेखो येशू र चेलाको डाँडा लकीङ झाला, होटै भर्मीकुङ बाड्को भीड होसकोकी डुप्की डेम राहा। 38होला भीड लकीङ काट भर्मीये बाड्को स्वरै ङाक्चै डेया, “गुरु ज्यु! ङा नाकोखाटा बिन्ती जाट्ले, ङौ लेन्जा मीजाकी दया जाट्न ङोस्न यान्ही, हीजैडेनाङ इसे ङौ काट्जा लेन्जा मीजा हो। 39ङोस्नी इसकी काट दुष्टआत्मै घोले, होटै मोसोमायाङ चीघारीस्ले र इसकी अइँठडीले र इचे मेङ्गेरीङ घोचोस छ्युक्ले। होटै लछार पछार जाटार बल्ल-बल्ल डास्ले। 40ङै नाकुङ चेलाकोलाक दुष्टआत्माकी छ्युक्ङ यान्ही डेम बिन्ती जाटा, तर होखुरीकै माह्योका।”
41होटै येशूये होखुरीककी डेया, “ए विश्वास मालेच अटेरीको, ङा नाखुरीकखाटा कुडीक याक आङुए? र नाखुरीककी ङै कुडीक सहडीकी?” होटै येशूये होसे भर्मीकी डेया, “नाकुङ मीजाकी इला राक्नी।” 42होटै होसे रान्हाङ-रान्हाङ न भूतै होसकी पछारीकी क्योटा र अइँठन जाटा र होसे पार्टाङ-पार्टाङ छान्की ठाला। तर येशूये होसे भूतकी हक्कारीया, होटै होसे मीजाकी गेपाकार मेन बोइकी जिम्मा याहा। 43इटजाट्न परमेश्वरौ याङ्च बाड्को शक्तियो काम डाङार पट्ट भर्मीको छक्क पर्या।
येशूये लाहा सीच बारेयाङ फेरि डेच
(मत्ती १७:२२-२३; मर्कूस ९:३०-३२)
येशूये जाट्च कामाङ पट्ट भर्मीको छक्क पर्च डाङार होसकै मेखोल्हौ चेलाकोलाक डेया, 44“इसे ङै नाखुरीककी डेच पट्ट कुरा नाखुरीकै सेम्ह सेनी, हीजैडेनाङ भर्मीयो मीजाकी घोवार भर्मीकुङ मीहुटाङ याछ बेला छान्नने।” 45तर होखुरीकै इसे कुरा ही डेकी पाच डेयार माबुझडीसा। हीजैडेनाङ इसे कुरा माबुझडीस्ख्यो डेम होखुरीक लकीङ आर्च्युक्ङन्या। होटबाटै चेलाकै इसे कुरा होसकोखाटा गीन्की बीह्रीमन्या।
पट्ट डेनाङ बाड्को सु हो?
(मत्ती १८:१-५; मर्कूस ९:३३-४०)
46बाह्र जना चेलाकै मेखुरीक-मेखुरीक सु चहिँ बाड्को औला डेम कुरा जाटा। 47तर येशूये होखुरीकुङ मीमनुङ कुरा वाह्रार काट मार्जा जजाकी राकार मेखोल्हौ छेवाङ डा, 48होटै होखुरीककी डेया, “सुये ङौ म्यार्मीनाङ इसे जजाकी मन्डीले, होचे ङाकी मन्डीले, र ङाकी मन्डीचकै ङाकी बीर्न्हकाचकी मन्डीले। हीजैडेनाङ नाखुरीक मध्याङ सु मार्जा ले, होसे न पट्ट डेनाङ बाड्को छान्ने।”
49यूहन्नै डेया, “गुरु ज्यु, काट भर्मीये नाकुङ म्यार्मीनाङ भूतको छ्युक्च कानै डाङा। होटै कानै होसकी होङ्च काम जाट्की माह्या, हीजैडेनाङ होचे कानखाटा नाकै डेच लेखा माजाट्ले।”
50तर होखुरीककी येशूये डेया, “होसकी मारोकडीनी, हीजैडेनाङ नाखुरीककी विरोध माजाट्चको नाखुरीकुङ न पक्षाङ छान्ने।”
सामरीकै येशूकी माजाक्च
51येशूओ स्वर्ग नुङ्च बेला खेरेप छान्चै राछबाटै होसको यरूशलेमाङ मानुङ्ङ माडास्ले डेम मीमन जाटा। 52होसकै समाचार आल्छ भर्मीकोलाक अगाडि न बीर्न्हका। होटै होखुरीक नुङा, होसकोकी डेम ङुच र ज्याच ठोकको तयार जाट्की सामरीकुङ काट लाङ्घाङ नुङा। 53तर होसको यरूशलेमाङ नुङ्ङ न ले डेम सामरीयुङ भर्मीकोलाक थाहा छान्चबाटै होसकोकी सुयेर स्वागत माजाटा। 54होटै याङ्च कुरा थाहा डीन्हार याकूब र यूहन्नै डेया, “प्रभु, नाको इसे लाङ्घाकी स्वर्ग लकीङ म्हे झालाकार बाडाप अट छानै डेम कान अह्रडीइङ?” 55तर येशूये खार्लाप्प ल्हेसार होखुरीककी च्याका। 56होटै होखुरीक अर्को लाङ्घा पट्टी ह्वा।
चेलाकुङ स्वभाव
(मत्ती ८:१९-२२)
57येशू र होसकुङ चेलाको लामाङ नुङ्चै जाट्नाङ काट भर्मी राहार होसकोकी इट डेया, “ए प्रभु, नाको कुला नुङ्ले, ङा र नाकुङ न्हुङ-न्हुङ राल्हे।”
58येशूये होसकी डेया, “सीलाकुङ ङुच दुलो ले, ग्वाजाकुङ मीम ले, तर भर्मीयो मीजौ च मीटालु आर्च्युक्च ठाउँ र माले।”
59होटै अर्को काट भर्मीकी येशूये डेया, “ङा न्हुङ-न्हुङ रान्ही” तर होचे डेया, “गुरु ज्यु, पहिला ङाकी नुङार ङौ बोइकी ठाक्की यान्ही।”
60होसकी येशूये डेया, “मुर्दाकोलाक मुर्दाकै न ठाक्ख्यो। तर नाको चहिँ नुङार परमेश्वरौ राज्यौ बारेयाङ सेछ समाचार सेटाक्नी।”
61काट अर्को भर्मीये र होसकोकी डेया, “प्रभु, ङा र नाको न्हुङ-न्हुङ राल्हे, तर पहिला ङौ इमाङ लेचकोखाटा ङाकी बिदा लाकी यान्ही।” 62होसकी येशूये डेया, “लहो मीहुट गोहोरौ अनवाङ डार न्हुङ्लाक ल्हेसार ङोस्च सुर भर्मीको चहिँ परमेश्वरौ राज्यौ लागि काम मालग्डीस्ले।”
Currently Selected:
लूका 9: EMGP
Highlight
Copy
Compare
Share
Want to have your highlights saved across all your devices? Sign up or sign in
© 2025 by Mother Tongue Translators Society and Wycliffe Bible Translators, Inc.
