लूका 6
6
फरिसीकै म्हुङ बाट्च दिनौ बारेयाङ गीन्च
(मत्ती १२:१-८; मर्कूस २:२३-२८)
1म्हुङ बाट्च दिनाङ अन्न लैडीच ह्याओ लाम छान्चै येशू र मेखोल्हौ चेलाको नुङ्ङ न लेया। होटै होसकुङ चेलाकै अन्नओ बालाको ढुमार मीहुटै आर्जुचै ज्याकी ठाला। 2याङ्च डाङार कोइ-कोइ फरिसीकै चेलाकोलाक डेया, “म्हुङ बाट्च दिनाङ जाट्की माछान्च ठोक नाखुरीकै हीजै जाट्च?” 3होटै येशूये होखुरीककी जवाफ याहार डेया, “नाखुरीकै इसे र मापरेस्नने? दाऊद र होसकुङ लाफाको मीटुक रन्छीनाङ ही जाटा थाहा माले? 4होस बेला कुटजाट्न परमेश्वरौ मन्दिर भित्री चढडीच रोटो डोनार लाफाकोखाटा पुङार ज्या। तर होसे रोटो पूजाहारीकै मट्टै ज्याकी छान्नन्या।” 5येशूये होखुरीककी डेया, “भर्मीयो मीजा म्हुङ बाट्च दिनौ र प्रभु हो।”
मीहुट छोक्च भर्मी गेप्च
(मत्ती १२:९-१४; मर्कूस ३:१-६)
6अर्को म्हुङ बाट्च दिनाङ येशूये यहूदीकुङ सभा ङुच इमाङ नुङार शिक्षा याहा। होला काट डोरमीहुट छोक्च भर्मी र लेया। 7धर्मगुरुको र फरिसीको छानार म्हुङ बाट्च दिनाङ इसे भर्मीयो मीहुट गेपाक्ले कि मागेपाक्ले डेयार येशूकी दोष याखी डेम मौका ङोस्न ङुमन्या। 8तर होखुरीकुङ मीमनौ कुरा वाह्रार येशूये होसे मीहुट छोक्च भर्मीकी डेया, “सोवार इलाक रान्ही।” होटै होसे राहार टोङ्हा। 9येशूये होखुरीककी डेया, “अब ङाकी डेनी, म्हुङ बाट्च दिनाङ ही जाट्की सेछ छान्ने? सेछ जाट्की कि मासेछ जाट्की? साट्की कि जीवाटाक्की, कुसे काम जाट्की सेम्ह छान्ने औला?” 10होटै येशूये होला लेच पट्टकी ङोसार होसे मीहुट छोक्च भर्मीकी डेया, “नाकुङ मीहुट तन्कडीनी!” डेनाङ लेखा न होचे जाटा र होच्यो छोक्च मीहुट गेप्की क्योटा।
11याङ्च डाङार होखुरीक साप्फी मीरीस ख्योहार येशूकी ही जाटीङ डेम मेखुरीक-मेखुरीक सल्लाह जाट्की ठाला।
येशूये बाह्र जना प्रेरितको भाक्च
(मत्ती १०:१-४; मर्कूस ३:१३-१९)
12येशू होसनीक डाँडाङ प्रार्थना जाट्की डेम नुङा र परमेश्वरखाटा प्रार्थना जाट्चै रातभरि बीतडीया। 13गोराक छान्रखीङ येशूये चेलाकोलाक लाहा लेठाङ आर्घा र होखुरीक मध्याङ बाह्र जनाकी भाका। होटै होखुरीककी प्रेरित डेच म्यार्मीन याहा। 14इटजाट्न भाक्च बाह्र जनाको इखुरीक न हो, सिमोन (आसकोकी पत्रुस डेम) म्यार्मीन डा र आसकुङ भाइ अन्द्रियास, याकूब, यूहन्ना, फिलिप र बारथोलोमाइ 15मत्ती, थोमा, अल्फयासौ मीजा याकूब, देशभक्त डेच सिमोन, 16याकूबौ मीजा यहूदा र यहूदास इस्करियोत होचे न न्हुइङ येशूकी घोवाक्ङ याहा।
येशूये वास्टै भर्मीकोलाक गेपाका
(मत्ती ४:२३-२५)
17होटै येशू र प्रेरितको डाँडा लकीङ म्हाका झाल्न चउराङ टाह्रा। होला होसकुङ चेलाकुङ बाड्को भीड लेया, यहूदिया र यरूशलेम सहर समुद्रौ छेवाङ पर्च टुरोस र सीदोन सहरको लकीङ वास्टै भर्मीको होला भेला छानन्या। 18होखुरीक येशूओ शिक्षा सेकी र लाहा लहो रोग लकीङ गेप्की डेम राम्हन्या। दुष्टआत्मा लग्डीसार दु:ख डीन्छ भर्मीको र गेपा। 19पट्ट न भर्मीकै येशूकी छुकी पामन्या, हीजैडेनाङ शक्ति आसको लकीङ ख्योम्हन लेया, होटै पट्ट न भर्मीकोलाक गेपाक्ङन्या।
येशूये याछ उपदेश
(मत्ती ५:१-१२)
20होटै येशूये मेखोल्हौ चेलाकोलाक ङोसार डेया,
“ए गरीबको, नाखुरीक आशिष डुप्चको हो
हीजैडेनाङ परमेश्वरौ राज्य नाखुरीकुङ न हो।
21 ए चाहाँ मीटुक रन्छीचको, नाखुरीक कुडीक आशिषित ले
हीजैडेनाङ नाखुरीक पीहीन ह्रास्ले।
ए चाहाँ राप्चको, नाखुरीक कुडीक आशिषित ले
हीजैडेनाङ नाखुरीक पीहीन रेट्ले।
22 “भर्मीयो मीजाकी विश्वास जाट्च बाटै भर्मीकै नाखुरीककी माजाका, लाङ्घा लकीङ छ्युका, झीरार नाखुरीककी खीस्डीया र दुष्ट आर्मीटार नाखुरीकुङ म्यार्मीनकी गिल्ला जाटा डेनाङ नाखुरीकै आशिष डुप्ले। 23होसनीक नाखुरीक माह्राङ्नी, फोर्झोनी। हीजैडेनाङ ङोस्नी, नाखुरीककी डेयार स्वर्गाङ बाड्को इनाम डाम याम्हने। खायाकुङ अगमवक्ताकोलाक र नाखुरीककी दु:ख याछकुङ बोइ बाज्युकै होटजाट्न न दु:ख याम्हन्या।
24 तर धिक्कार! चाहाँ धनी छान्चको,
हीजैडेनाङ नाखुरीकै सुखौ दिन बीतडीम भ्यामने।
25 धिक्कार! चाहाँ ह्रास्चको,
हीजैडेनाङ नाखुरीक पीहीन शोक जाटार राप्की पर्ले।
धिक्कार! चाहाँ रेट्चको,
हीजैडेनाङ नाखुरीक पीहीन दु:ख छानार राप्की पर्ले।
26 धिक्कार! चाहाँ भर्मीको लकीङ प्रशंसा डुप्चको,
हीजैडेनाङ याङ्च प्रशंसा च होसे भर्मीकुङ बोइ बाज्युकै र झूटो अगमवक्ताकोलाक जाट्न्या।”
शत्रुकी र प्रेम जाट्की पर्ले
(मत्ती ५:३८-४८; ७:१२)
27 “तर नाखुरीक सेचकोलाक ङा डेले, लहो शत्रुकी र प्रेम जाट्नी र लाहाकी माजाक्चकोलाक सेछ व्यवहार जाट्नी। 28नाखुरीककी सराप याछकोलाक आशिष यान्ही। मासेम्ह जाट्चकोलाक प्रार्थना जाट्न यान्ही। 29इडीक सुयेर नाकोकी काट गालाङ डुङा डेनाङ अर्को गाला र ठोम्ह यान्ही। नाकुङ दौरा स्याट्चकी कमीज र यान्ही। 30नाकोखाटा ङेछकोलाक यान्ही। हीर ठोक आल्छकोखाटा माङ्हेनी। 31फोकै नाखुरीककी कुङ्च जाट्च चहडीस्ले, नाखुरीकै र फोकोकोलाक होटन जाट्नी।
32 “प्रेम जाट्चकोलाक मट्टै प्रेम जाटा डेनाङ नाखुरीककी ही स्याबासी छान्ने र? पापीकै र लाहाकी प्रेम जाट्चकोलाक प्रेम जाट्ले। 33लाहाकी सेछ जाट्चकोलाक मट्टै सेछ जाट्ले डेनाङ नाखुरीकै ही स्याबासी डीन्ल्हे र? हीजैडेनाङ पापीकै र होटन जाट्ले।
34 “इडीक तेरीकी ह्योक्चकी मट्टै ऋण याल्हे डेनाङ नाखुरीककी ही स्याबासी ले र? पापीकै र तेरीकी ह्योक्चकोलाक मट्टै ऋण याल्हे।
35 “तर लहो शत्रुकोलाक प्रेम जाट्नी, होखुरीककी भलाइ जाट्नी, ऋण ङेछकोलाक ल्हेट्च आशा माडाम ऋण यान्ही। होटजाटा डेनाङ नाखुरीकै बाड्को इनाम डुप्ले होटै नाखुरीक सर्वोच्चओ मीजाको ठहरीस्ले, हीजैडेनाङ होसकै बैगुनी र स्वार्थीकोलाक कृपा जाट्ले। 36नाखुरीकुङ बोइ कृपालु छान्नाङ लेखा न नाखुरीक र कृपालु छान्नी।”
फोकोकी दोष माह्याखी
(मत्ती ७:१-५)
37 “फोकोकी दोष माह्यानी नाखुरीककी र दोष माह्याले, फोकुङ गल्ती मापानी र नाखुरीकुङ र गल्ती मापाले। क्षमा जाट्नी नाखुरीककी र क्षमा जाट्ले। 38यान्ही र नाखुरीककी र याल्हे। भर्मीकै होयोक्ङ-होयोक्ङ साप्फी खन्डीम-खन्डीम ह्याट्ठर नाखुरीकुङ पोल्टोवाङ काम याल्हे। हीजैडेनाङ नाखुरीकै हीये जापार याल्हे, होखुरीकै र होचे न जापार याल्हे।”
39येशूये होखुरीककी अर्को उदाहरण र याछै डेया, “ही मीमीक माडाङ्चये मीमीक माडाङ्चकी न डोरीकी ह्योक्ले र? इडीक डोरीया डेनाङ र नीस जना न खाडलाङ मापर्ले र? 40कुसेर चेला लहो गुरु डेनाङ बाड्को माछान्ने, तर पाम्ह भ्याच न्हुइङ च होसे र गुरु ल्याक्च न छान्ने।
41 “लहो भायो मीमीकुङ कसिङ्गर चहिँ डाङ्ले लहो मीमीकुङ मुढा चहिँ हीजै थाहा माढीन्ले? 42नाको लहो मीमीकाङ लेच मुढा माडाङ्ले डेनाङ कुटजाट्न लहो भाइकी डेकी ह्योक्ले, ‘ए भाइ, नाकुङ मीमीकुङ कसिङ्गर ङा डोन्न याल्हे’। ए कपटीको! पहिला लहो मीमीकुङ मुढा डोन्नी होटै टी भायो मीमीकुङ कसिङ्गर डोन्की छ्याङ्गै डाङ्की ह्योक्ले।”
सीङ म्यार्टुङ र मीस्या
(मत्ती ७:१६-२०; १२:३३-३५)
43 “कुसेर सेछ म्यार्टुङै मासेछ मीस्या मास्याटाक्ले न त मासेछ म्यार्टुङै सेछ मीस्या स्याटाक्ले। 44पट्ट न म्यार्टुङको मेन मीस्या लकीङ चीन्डीले। हीजैडेनाङ जु लेच म्यार्टुङीङ नेभारा माबटुलीले न अङ्गुर बटुलीले। 45असल भर्मीये लहो मीमनुङ असल भण्डार लकीङ असल न ठोक छ्युक्ले, र दुष्ट भर्मीये लहो मीमनुङ दुष्ट भण्डार लकीङ दुष्ट ठोक न छ्युक्ले। हीजैडेनाङ कुसे कुरै हृदय न्हेप्ले, भर्मीयो मेङ्गेरीङ होसे न ख्योल्हे।”
नीस खाल्या जग
(मत्ती ७:२४-२७)
46 “ङै डेच कुरा माजाट्ले डेनाङ ङाकी नाखुरीकै हीजै ‘प्रभु, प्रभु’ डेले? 47सु ङा लेठाङ राल्हे, ङौ वचन सेले र होसे अनुसार जाट्ले, होसे कुङ्च भर्मी हो, डेम ङा नाखुरीककी डेले। 48होसे काट इम खास्च भर्मी ल्याक्च हो। काट भर्मी होचे लुप्म कोहार इमौ जग चट्टान मीटाक खासा। होटै नामास राहार भल राहा, होसे इमाङ ठोका तर होसे इमकी होयोक्की माह्योका। हीजैडेनाङ इमौ जग बलियो खास्नन्या। 49तर ङै डेच सेम र होसे लेखा माजाटा डेनाङ होसे चहिँ इसे भर्मी ल्याक्च हो। होचे जमिन मीटाक जग बीनुङ इम खासा जब होसे इम मीटाक भल राहार ठोका तब होसे तुरुन्तै फुटा, होसे इमौ बाड्को विनाश छाना।”
Currently Selected:
लूका 6: EMGP
Highlight
Copy
Compare
Share
Want to have your highlights saved across all your devices? Sign up or sign in
© 2025 by Mother Tongue Translators Society and Wycliffe Bible Translators, Inc.
