लूका 5
5
येशूये पहिलो चेलाको भाक्च
(मत्ती ४:१८-२२; मर्कूस १:१६-२०)
1कायाक प्रभु येशू गनेसरेतुङ ताल छेवाङ टोङ्ह ङुमन्या। वास्टै भर्मीको चहिँ परमेश्वरौ वचन सेकी डेम ढुसा-ढुस जाट्न न लेया। 2होसे तालौ किनाराङ येशूये नीस डुङ्गा डाङा, तर जाल ङाप्चको चहिँ डुङ्गा लकीङ बाहिर ङुवार जालको हुर्न ङुमन्या। 3होसे नीस डुङ्गाङ काट चहिँ सिमोनौ लेया। येशू होसे डुङ्गाङ काल्हा र सिमोनकी किनार लकीङ चेक पार्लाक आल्खी लैडीया। होटै येशूये डुङ्गाङ ङुवार भर्मीकोलाक शिक्षा याखी ठाला।
4ङाक्ङ भ्याच न्हुइङ येशूये सिमोनकी डेया, “डुङ्गाकी लुप्च पट्टी आल्न्ही र डीस्या घोकी लहो जाल ङाप्नी।” 5तर सिमोनै डेया, “गुरु ज्यु, कानै नाबीलाङ लकीङ गोराकसम्म जाल ङापा, तर काट र डीस्या मापर्या। इडीक नाकै डेले डेनाङ ङा काखेप फेरि जाल ङाप्ले।” 6होटै सिमोनै जाल ङापा र होस न्हुइङ इडीक वास्टै डीस्या पर्या कि जाल न च्याखी पा। 7होटै होखुरीकै अर्को डुङ्गाङ लेच लाफाकोलाक र सघडीकी आर्घा। होसे लाफाको डुङ्गा लार डीस्या बटुलीकी राहा। नीस डुङ्गाङ न वास्टै डीस्याको न्हेपार डुङ्गा डीयाङ ठाखी पा।
8होटै येशूये याङ्च काम जाट्च डाङार सिमोन पत्रुसै येशूओ मीहीलाङ खुखुप छानार डेया, “ए प्रभु, ङा लकीङ लोस नुङ्की क्योट्नी, हीजैडेनाङ ङा काट पापी भर्मी हो!” 9वास्टै डीस्या पर्चबाटै सिमोन र मेन लाफाको र छक्क पर्या। 10होटै न्हुइङ सिमोनखाटा काम जाट्च जब्दियो मीजाको याकूब, यूहन्ना र छक्क पर्या। येशूये सिमोनकी डेया, “माबीह्रीनी! अब लकीङ आलाक भर्मीकोलाक घोले।” 11होटै होखुरीकै लहो डुङ्गाकोलाक पाखा छ्युकार पट्ट न ठोक डासार येशूकी डुट्की ठाला।
येशूये कुष्ठरोगीकी गेपाक्च
(मत्ती ८:१-४; मर्कूस १:४०-४५)
12कायाक येशू काट सहराङ लेया। होसे सहराङ कुष्ठरोग लग्डीस्च काट भर्मी लेया। होसे भर्मीये येशूकी डाङा र होसकुङ मीहीलाङ खुखुप छान्चै बिन्ती जाट्चै डेया, “ए प्रभु, नाकै मीमन जाटा डेनाङ, ङाकी गेपाक्की ह्योक्ले।” 13येशूये होसे मीटाक मीहुट डार डेया, “ङा मीमन जाट्ले, नाको गेप्की क्योट्नी।” होडीक न बेला होसे कुष्ठरोग लग्डीस्च भर्मी गेप्की क्योटा। 14होटै येशूये होसकी आज्ञा याछै डेया, “इसे कुरा सुकीर मासेटाक्की! तर पूजाहारी लेठाङ नुङार टान्हाक्नी। मोशौ व्यवस्थाङ डेनाङ लेखा न भर्मीकोलाक नाको गेप्च साक्षीयो लागि भेटी यान्ही।”
15होसनीक लकीङ येशूओ चर्चा झन् फैलडीस्चै नुङा। होटै होसकुङ शिक्षा सेकी र लाहा लहो रोग लकीङ गेप्की डेम वास्टै भर्मीको राखी ठाला। 16तर होसको चहिँ सुर मालेच ठावाङ नुङार प्रार्थना जाट्नन्या।
येशूये पक्षाघाती रोगीकी गेपाक्च
(मत्ती ९:१-८; मर्कूस २:१-१२)
17कायाक येशूये शिक्षा याम्हन लेनाङ गालील र यहूदियुङ पट्ट न लाङ्घीङ र यरूशलेम लकीङ राछ फरिसीको र धर्मगुरुको होसकुङ खेरेप न ङुम-ङुमन्या। परमप्रभुओ गेपाक्च शक्ति होसकोखाटा लेया। 18होटै भर्मीकै काट पक्षाघाती#५:१८ पक्षाघाती: कुजो छानार ङुच रोगकी पक्षाघाती रोग डेले रोगीकी खाटखाटा न बुवार राका। होखुरीकै होसकी इम भित्री येशू लेठाङ आल्खी पा। 19तर भर्मीकुङ भीड लेचबाटै भित्री आल्खी माह्योका। होटै होखुरीकै बिरामीकी इमौ छानाङ काल्हाका। होटै छाना च्याटार बिरामीकी खाटखाटा न येशू लेठाङ बिस्तारै झालाका। 20होसे भर्मीकै याङ्च विश्वास जाट्च डाङार येशूये डेया, “नाकुङ पाप क्षमा छान्नने।”
21येशूओ इसे कुरा सेयार धर्मगुरु र फरिसीकै मेखुरीक-मेखुरीक इट डेया, “इश्वर निन्दा जाट्च इसे सु आले? परमेश्वरै मट्टै पाप क्षमा जाट्की ह्योक्ले।” 22तर येशूये होखुरीकुङ मीमनुङ कुरा वाह्रार डेया, “नाखुरीकै मीमनाङ हीजै याङ्च आर्मीट्ने? 23‘नाकुङ पाप क्षमा छान्नने’ डेकी की ‘सोवार ह्वानी’ डेकी कुसे चहिँ सजिलो ले? 24तर भर्मीयो मीजाकी संसाराङ पाप क्षमा जाट्की अधिकार ले डेयार नाखुरीकै वार्न्ह डानी।” अनि येशूये होसे पक्षाघातीकी इट डेया, “ङा नाकोकी डेले सोनी लहो खाट सोटार नुङ्नी।” 25होटै न्हुइङ होसे भर्मी जुरुक सोवार होखुरीकुङ म्याहासाङ न खाट सोटार परमेश्वरौ जय-जयकार जाट्चै इम लाक ह्वा। 26पट्ट न भर्मीको छक्क पर्या र होखुरीकै परमेश्वरौ प्रशंसा जाटा होटै बीह्रीचै डेया, “छीनी कानै अचम्मौ कुरा डाङा!”
येशूये लेवीकी आर्घाच
(मत्ती ९:९-१३; मर्कूस २:१३-१७)
27येशू होटै नुङ्चै जाट्नाङ कर सोट्च लेवी म्यार्मीन जाट्च भर्मीकी कर सोट्च अड्डाङ डुपार येशूये होसकी डेया, “ङाकी डुट्नी।” 28लेवीये इसे कुरा सेच न्हुइङ पट्ट न ठोक डासार येशूकी डुटा।
29होसे न्हुइङ लेवीये येशूकी मेन इमाङ ज्यामा-गामा जाट्की डेम आर्घा। होला कर सोट्चको र अरु वास्टै भर्मीको र भोजाङ ङुमन्या। 30याङ्च डाङार फरिसी र होखुरीकुङ धर्मगुरुकुङ हुद्दाकै गन-गन जाट्चै येशूओ चेलाकोलाक डेया, “नाखुरीक हीजै कर सोट्चको र पापी भर्मीकोखाटा ङुवार ज्याले गाले?” 31होटै येशूये होखुरीककी डेया, “रोगीकोलाक टी बैद्य चहडीस्ले। निरोगीकोलाक माचहडीस्ले! 32ङा र धर्मीकोलाक होइन, तर पापीकोलाक पश्चात्ताप जाट्नी डेम आर्घाकी राछ हो।”
उपवासौ बारेयाङ गीन्च
(मत्ती ९:१४-१७; मर्कूस २:१८-२२)
33कुडीक भर्मीकै येशूकी डेया, “यूहन्नौ चेलाको च वास्टै लेखो उपवास ङुवार प्रार्थना जाट्ले। फरिसीकुङ चेलाकै र होटन जाट्ले तर नाकुङ चेलाकै चहिँ ज्याले गाले।” 34होटै न्हुइङ येशूये होखुरीककी डेया, “ही ब्याहुलाखाटा काठोवाङ लेठर जन्तिकोलाक उपवास ङुकी लैडीकी ह्योक्ले? 35तर होसे दिन र राल्हे, ब्याहुला होखुरीक लकीङ भाक्ले। होटै मट्टै होखुरीक उपवास ङुले।”
36फेरि येशूये काट उदाहरण याछै इट डेया, “सुयेर नयाँ बढीन च्याटार पुरानो बढीनाङ टाल्हो माकाले। इडीक टाल्हो का डेनाङ र नयाँ बढीन र बीगारीस्ले। हीजैडेनाङ पुरानो बढीनाङ नयाँ टाल्हो र माज्योस्ले। 37कुसे भर्मीये र नयाँ अङ्गुरौ मद्य पुरानो छालौ मशकाङ माकाले, नभा च नयाँ मद्यै मशक च्याट्ले होटै अङ्गुरौ मद्य आह्याट्ले, मशक र नष्ट छान्ने। 38नयाँ अङ्गुरौ मद्य चहिँ नयाँ छालौ मशकाङ न डाकी पर्ले। 39कुसे भर्मीये र पुरानो अङ्गुरौ मद्य गार नयाँ अङ्गुरौ मद्य गाकी मापाले, हीजैडेनाङ होचे डेले, ‘पुरानो अङ्गुरौ मद्य जाप्च छान्ने।’”
Currently Selected:
लूका 5: EMGP
Highlight
Copy
Compare
Share
Want to have your highlights saved across all your devices? Sign up or sign in
© 2025 by Mother Tongue Translators Society and Wycliffe Bible Translators, Inc.
