प्रेरित 26
26
1होटै न्हुइङ अग्रिपासै पावलकी डेया, “अब नाकोकी लहो पक्षलकीङ ङाक्की अनुमति ले।” पावलै मीहुट फैलडीयार लाहाकी जोगडीकीयो लागि इटजाट्न ङाक्की ठाला, 2“हे राजा अग्रिपास ज्यु, यहूदीकै ङाकी लैडीच पट्ट न दोषौ विषयाङ छीनी नाकुङ म्याहासाङ ङै लाहाकी जोगडीकीयो लागि ङाक्की डुप्नाङ ङा लाहाकी आशिष डुप्च आर्मीट्ले, 3खास जाट्न हीजैडेनाङ यहूदीकुङ पट्ट न चालचलन र वाद-विवादौ कुराङ नाकोकी सेम्हजा थाहा लेचबाटै ङौ बयान धैर्य जाटार सेम यान्ही डेम ङा बिन्ती जाट्ले।
4“ङा लहो देश र यरूशलेम सहराङ यहूदी जातिको मीघ्याङ होरा। होटबाटै पट्ट न यहूदीकोलाक ङौ जजालकीयुङ बानी व्यहोरा थाहा ले। 5होखुरीककी थाहा लेच न कुरा हो ङा लोट्च समय लकीङ कानुङ धर्मओ पट्ट डेनाङ कट्टर पन्थी दल भित्री काट फरिसी छानार ङौ जीवन बीतडीच जाट्नने। इडीक होखुरीकै मीमन जाटा डेनाङ इसे कुरौ गवाही होखुरीकै याखी ह्योक्ले। 6परमेश्वरै कानुङ बोइ बाज्युकोलाक जाट्च प्रतिज्ञाङ भरोसा डाचबाटै ङै छीनी इटजाट्न नाखुरीकुङ म्याहासाङ ङा टोङ्हने। 7कानुङ बाह्र कुलकै न इसे आशा डुप्कीयो लागि नाबीक नाम्सीन काट चित्तये परमेश्वरकी आराधना जाट्ले। ए राजा अग्रिपास ज्यु! हीजैडेनाङ ङै र इसे न आशा डाचबाटै यहूदीकै ङाकी दोष लैडीमने। 8परमेश्वरै सीचकोलाक जीवाटाक्ले डेच कुराङ नाखुरीकै हीजै विश्वास जाट्की माह्योक्ले?
9“ले की च ङै र ह्योक्ठर नासरतुङ येशूकी विरोध जाट्की पर्ले डेम आर्मीट्नन्या। 10होटबाटै ङै यरूशलेमाङ विरोध जाटा र मुख्य पूजाहारीको लकीङ अधिकार डुपार प्रभु येशूकी विश्वास जाट्च वास्टै पवित्र भर्मीकोलाक ठुनाका र होखुरीककी साट्च बेला ङा र खाटा। 11वास्टै खेप सभा ङुच इमकोवाङ होखुरीककी बारम्बार सजाय याम्ह होखुरीककी विश्वास जाट्की डासाक्च कोशिस जाटा। होखुरीकुङ विरुद्धाङ ख्योछ झोकै जाट्न अरु सहराङ र ङै नुङार होखुरीककी सतडीया।
पावल परिवर्तन छान्च बारेयाङ बयान
(प्रेरित ९:१-१९; २२:६-१६)
12“इटजाट्न मुख्य पूजाहारीको लकीङ अधिकार र आज्ञा डुपार ङा दमस्कस सहरपट्टी नुङ्ङ न लेया। 13ए राजा, मध्य दिनाङ लामाङ ह्वामन लेनाङ ङै स्वर्ग लकीङ नाखान डेनाङ र चम्कडीस्च ज्योति डाङा। होसे चहिँ ङा र ङाखाटा ह्वाच पट्टकुङ वरिपरि चम्कडीसा। 14जब कान पट्ट न झाङ कुरुह्वा, होडीक न बेला हिब्रू भाषाङ ङाकी इट डेच आवाज सेया, ‘शाऊल, ए शाऊल, नाकै ङाकी हीजै सतडीच? गेम्ठाङ लात्तीये यान्हाङ लाहाकी न बीक्ले।’ 15ङै डेया, ‘ए प्रभु, नाको सु आले?’ प्रभुये ङाकी डेया, ‘ङा येशू हो, सुकी नाकै सतडीमन ले। 16अब सोनी, ङा नाकोकी ङौ सेवक र ङौ गवाही याछ भर्मी खास्ले। इटबाटै ङा नाको लेठाङ डाङ्च हो। नाकै ङौ बारेयाङ डाङ्च कुरा र ङै नाकोकी टान्हाक्च कुराको पट्ट न भर्मीकोलाक सेटाक्की पर्ले। 17ङा नाकोकी नाकुङ लहो जाति र अन्यजातिको लकीङ छुटकारा याल्हे। ङा नाकोकी होखुरीक लेठाङ बीर्न्हकाले, 18होखुरीकुङ मीमीक खोलीम याहार होखुरीककी छुम्छ लकीङ ट्याङ्ठाङ र शैतानौ शक्ति लकीङ परमेश्वर पट्टी ल्हेसाक्की पर्ले। होखुरीकै ङा मीटाक विश्वास जाट्ले। होखुरीकुङ पाप मेटडीसार नुङ्ले र होखुरीकै परमेश्वरकी चीन्डीच भर्मीकुङ सङ्गतियाङ ङुकी डुप्ले।’”
19“ए राजा अग्रिपास, स्वर्ग लकीङ डाङ्च इसे दर्शनाङ ङा अनाज्ञाकारी माछाना। 20तर पहिले दमस्कसाङ, तब यरूशलेमाङ र सारा यहूदिया देशभरि लेचकोलाक र अन्यजातिकोलाक पश्चात्ताप जाटार योग्यौ काम जाट्नी डेयार ङै प्रचार जाटा। 21होटबाटै यहूदीकै ङाकी मन्दिराङ घोवार साट्की पा। 22तर छीनीयुङ दिनसम्म ङै परमेश्वर लकीङ न सहायता डुप्म ङुमने। होटबाटै ङा इला लेच बाड्को र मार्जा पट्टकोलाक गवाही याछै टोङ्हने। ङै अगमवक्ताकै र मोशै डेच न्हुइङ छान्च कुराको मट्टै ङाक्ने। 23होखुरीकै इट डेले, मुक्ति याछ ख्रीष्टै दु:ख भोग्डीयार सीकी पर्ले, होसको सीच लकीङ जीवाच मध्याङ पट्ट डेनाङ पहिलो छान्चबाटै होसकै लहो जाति र अन्यजातिकोलाक ज्योतियो घोषणा जाट्ले।”
24पावलै डेच इसे कुरा सेयार फेस्तसै च्याकार डेया, “पावल नाङ बौलडीस्नने, नुओ वास्टै ज्ञानै नाङ्की बौलाहा खासा!” 25तर पावलै डेया, “माननीय फेस्तस, ङा बौलडीस्च होइन, ङा सद्धे र सत्य कुराको जाट्न न ले। 26हीजैडेनाङ अग्रिपास राजा मेखोल्है र इसे कुरा वार्ल्हे, होसकोकी ङा इसे कुराको साहसखाटा डेकी ह्योक्ले। होसकै पक्का न इसे कुराकोवाङ सेम्ह ध्यान याम्हने, हीजैडेनाङ इसे कुराको सुयेर थाहा माढीन्न जाट्च होइन। 27ए राजा अग्रिपास, ही नाकै अगमवक्ताको मीटाक विश्वास जाट्ले? ङाकी थाहा ले, नाकै विश्वास जाट्ले।” 28अग्रिपासै पावलकी डेया, “इडीक थोरै समयाङ नाङ ङाकी ख्रीष्टियान खास्च मीमन जाट्ले?” 29पावलै जवाफ याहा, “थोरै समय लेख्यो की वास्टै, ङा परमेश्वरखाटा प्रार्थना जाट्ले, नाको मट्टै होइन तर छीनी ङौ कुरा सेच जति पट्ट न इसे ङौ मीहुटाङ काच साङ्लीको बाहेक ङा ल्याक्च न छान्ख्यो।”
30तब राजा अग्रिपास, बडा-हाकिम फेस्तस, बरनिकी र होला ङुचको जति पट्ट न सोवा। 31होटै होखुरीक ख्योछ न्हुइङ लाहा लाहाङ इट डेचै कुरा जाटा, “इसे भर्मीये मृत्युदण्ड डुप्च अथवा कैदी छान्की पर्च हीर काम माजाट्नने।” 32अग्रिपासै फेस्तसकी डेया, “इचे कैसर लेठाङ अपिल माजाट्च लेनाङ च इसे भर्मीकी डास्न यान्हाङ र छान्च लेया।”
Currently Selected:
प्रेरित 26: EMGP
Highlight
Copy
Compare
Share
Want to have your highlights saved across all your devices? Sign up or sign in
© 2025 by Mother Tongue Translators Society and Wycliffe Bible Translators, Inc.