प्रेरित 27
27
पावलौ रोम यात्रा
1जब बडा-हाकिमै समुद्रओ लाम छान्चै कान इटालिया नुङ्की पर्ले डेच निर्णय जाटा, तब होचे पावल र कुडीक जना कैदीकोलाक सम्राट अगस्टसौ काट जना युलियस डेच रोमी कप्तानौ जिम्माङ याहा। 2एड्रामिटेनोस लकीङ एशियुङ वास्टै बन्दरगाहको छान्चै नुङ्च जहाजाङ काल्हार कान लाम लग्डीसा। माकेडोनिया इलाकाङ पर्च थेसलोनिके लकीङ राछ अरिस्तार्खस डेच र कानखाटा न लेया।
3पीउह्राक लेखो कान सीदोन सहराङ जहाजीङ झाला। कप्तान युलियसै पावलकी दया जाटार लहो लाफाको लेठाङ नुङार चहडीस्ठर सहायता लाकी डेम अनुमति याहा। 4होटै कानुङ जहाज फेरि लाम लग्डीसा। जहाजौ अगाडि लकीङ नाम्सु क्योस्चबाटै कानै साइप्रस टापुओ आड लार नाम्सु छेलीचै नुङ्की पर्या। 5किलिकिया र पामफिलिया पारीपट्टीयुङ समुद्र तरीसार कान लुकियुङ काट सहर माइराङ टाह्रा। 6होला इटालिया नुङ्च जहाज अलेक्जेन्ड्रिया लकीङ काट जहाज डुपा र कप्तानै कानकी होला काल्हाक्ङ याहा।
7वास्टै दिनसम्म बिस्तारै-बिस्तारैखाटा नुङार बल्ल क्नीडसाङ टाहा। नाम्सुये अगाडि नुङ्की माह्याछबाटै क्रेटौ टापुओ आड लाचै नाम्सु छेलीस्चै-छेलीस्चै कान सालमोने डेच ठाउँ छान्चै नुङा। 8कान मुस्किलखाटा होच्यो किनारै-किनार सुन्दर बन्दरगाह डेच ठावाङ टाह्रा। होटै लासिया सहर खेरेप लेया।
9वास्टै समय र नुङ्ङभ्यामन्या, जहाज अगाडि ह्वास्की र खतरा लेया हीजैडेनाङ यहूदीकुङ उपवासौ दिन र बीतडीस्न भ्यामन्या। होटबाटै पावलै होखुरीककी इट डेम सम्झडीया, 10“ए लाफाको, ङाकी निश्चय न इट सेमने, कान इटै जहाजाङ नुङा डेनाङ जहाज र मालसामानौ मट्टै हैन, तर कानुङ ज्यान समेत नुङ्की ह्योक्च खतरा ले।” 11तर कप्तानै पावलौ कुरा डेनाङ जहाज क्योट्च र जहाजौ मालिकै डेच कुराङ साप्फी विश्वास जाटा। 12होखुरीक लेच ठावाङ हिउँद चेकी सुविधा मालेचबाटै कुसे हालताङ र फोनिक्स सहराङ न टाहार जुङ्छ बीतडीकी पर्ले डेयार होखुरीक मध्याङ वास्टै लेखोये जहाज क्योट्की सल्लाह याहा। फोनिक्स चहिँ क्रेटौ काट बन्दरगाह हो, इसे दक्षिण-पश्चिम र उत्तर-पश्चिम पट्टी ल्हेस्च ले।
समुद्राङ आँधी बेहेरी राछ
13जब दक्षिण लकीङ नाम्सु बिस्तारै क्योस्की ठाला, होखुरीकुङ योजना पूरा छाना डेम विचार जाटार, लङ्गर डोनार होखुरीक क्रेटौ किनारै-किनार छान्चै जहाज ह्वास्की ठाला। 14तर काटछीन न्हुइङ टापु लकीङ बाड्को आँधी बेहेरी उर्लडीसार कान पट्टी राहा, होसे उत्तर-पूर्वी डेच तुफान लेया। 15अनि होसे आँधीये जहाजकी हुपार होच्यो अगाडि कानुङ हीर मालग्डीस्चबाटै जहाजकी कुलाक आल्हे आल्ख्यो डेम कानै डास्न याहा। 16होटै क्लौडा डेच काट माजा टापुओ आडाङ टाह्रखीङ होचे आँधी चेक छेलीम याहा। अनि कानै मुस्किलखाटा जहाजौ न्हुङ्लाक छ्याक्च डुङ्गाकी जोगडीकी ह्योका। 17होसकी टान्डीयार जहाज भित्री काल्हाक्रखीङ जहाज क्योट्चकै जहाजौ म्हाका लकीङ डोरीये बलियो जाट्न छ्याक्चै राका। सिरटिस डेच बालुवा लेच धापाङ जहाज ठाल्हे डेम बीह्रीयार होखुरीकै पाल र झालाक्ङ याहा होटै जहाजकी नाम्सुओ भराङ डास्न याहा। 18इटजाट्न आँधीये कानकी जोडखाटा गाराङ्चै पछारीचै जाट्न न लेया। होटै पीउह्राक लेखो होखुरीकै जहाजाङ लेच कुडीक मालसामानको लोम्ह याहा। 19आपीह्रीन लेखो फेरि होखुरीकै लहो न मीहुटै जहाज क्योट्कीयो लागि चहडीस्च सामानको लोम्ह याहा। 20वास्टै दिनसम्म नाखान, टुगा हीर डाङ्की माडीन्हा। आँधी बेहेरी जोडखाटा क्योस्न ङुचबाटै अन्तिमाङ कानै जीवाच आशा समेत डास्न याहा।
21होखुरीकै हीर माज्याम ङुच वास्टै दिन छानन्या। होटबाटै पावलै होखुरीक लेठाङ राहार डेया, “लाफाको, नाखुरीकै ङौ सल्लाह मन्डीम क्रेट लकीङ जहाज माक्योट्की पर्च लेया। होटै याङ्च बाड्को कष्ट र हानी काल्है भोग्डीकी मापर्च लेया। 22तर ङा नाखुरीककी डेले, अब साहस जाट्नी। नाखुरीक मध्य सुओर ज्यान मानुङ्ले। तर जहाज चहिँ नष्ट छान्ने। 23हीजैडेनाङ ङा परमेश्वरौ भर्मी हो, र होसकुङ न ङा आराधना जाट्ले, छीनीङ नाबीक होसकुङ काट स्वर्गदूत ङा छीनी टोङ्हार 24ङाकी डेया, ‘ए पावल माबीह्रीनी! नाको कैसरौ म्याहासाङ खडा छान्की न पर्ले। नाकुङ न कारणै परमेश्वरै नाकोखाटा जहाजाङ काल्छ जति पट्टकुङ रक्षा जाट्ले।’ 25होटबाटै लाफाको, साहस जाट्नी। हीजैडेनाङ ङा परमेश्वराङ विश्वास जाट्ले, की ङाकी कुङ्च डेमने, ठिक होङ्च न छान्ने। 26तर अब कान चहिँ कुसेर काट टापुवाङ ठोक्ले।”
जहाज टुक्रा-टुक्रा छान्च
27जब चौध दिन छानन्या, एड्रियास डेच समुद्राङ कानुङ जहाज हुत्तडीस्चै ह्वामन लेया। तब आधा राताङ जहाज क्योट्चकै कान कुसेर काट जमिनौ खेरेप टाम्ह न ले डेच अटकल जाटा। 28अनि डी कुडीक्म लुप्च ले डेयार जाप्म ङोस्नाङ होखुरीकै सैंतीस मिटर पत्ता लैडीया। फेरि चेक पारी नुङार जाप्नाङ छब्बीस मिटर पत्ता लैडीया। 29होटै कुसेर चट्टान मीटाक ठोक्की टाल्हे की डेम बीह्रीया। होखुरीकै जहाजौ न्हुङलाक पट्टीङ बुली लङ्गर झालाका। अनि गोराक छान्ख्यो डेयार प्रार्थना जाट्की ठाला। 30तर जहाज क्योट्चको चहिँ भोग्डीस्की डेयार जहाजौ अगाडि लकीङ लङ्गर झालाक्च बाहानै डुङ्गा समुद्राङ झालाक्ङ भ्यामनन्या। 31अनि पावलै कप्तान र सिपाहीकोलाक डेया, “इसे जहाज क्योट्चको जहाजाङ माङुवा डेनाङ नाखुरीक जीवाकी माह्योक्ले।” 32तब सिपाहीकै डुङ्गौ डोरीको चेम याहा, र डुङ्गाकी जोकाक्ङका।
33भुक-भुक ट्याङ्खी पानाङ, पावलै होखुरीक पट्टकी ज्याच ठोक ज्यानी डेम बिन्ती जाट्चै डेया, “छीनी चौध दिन छान्न भ्यामने, नाखुरीक अलमल्लाङ पर्यार हीर माज्याम मुलीन न ङुमने। 34अब नाखुरीक हीर ज्याच ठोक ज्यानी डेम ङा बिन्ती जाट्ले। हीर ज्याच ठोक ज्या डेनाङ नाखुरीकै बल डुप्ले। माबीह्रीनी नाखुरीकुङ सुओर मीटालुङ काट मीछाम र नाश माछान्ने।” 35इसे कुरा डेम भ्यारखीङ पावलै रोटो ला, र पट्टकुङ म्याहासाङ परमेश्वरकी धन्यवाद याहार होसे रोटो ग्याकार ज्या। 36तब होखुरीकै र हौसला डुपार ज्याच ठोक ज्या। 37जहाजाङ लेचको कान जम्मा नीस सय छयहत्तर जना लेया। 38होखुरीकै ह्रास्ठर ज्या, होटै जहाजकी ख्याङ्छ पार्की डेयार होखुरीकै जहाजाङ लेच गहुँ पट्ट न लोम्ह याहा।
39ट्याङ्ह्रखीङ होखुरीकै काट किनारा डाङा तर होखुरीकै होसे ठाउँ चीन्डीकी माह्योका। अनि होखुरीकै खाडीयाङ बालुवा लेच ठाउँ डाङा। ह्योका डेनाङ होखुरीकै जहाजकी होला छेउ लैडीच योजना जाटा। 40होटै होखुरीकै लङ्गरको चेयार समुद्राङ न डास्न याहा। होडीक न बेला पतवारकोलाक छ्याक्ङ डाच डोरीको फोसाक्ङ याहा। अनि अगाडि पट्टीयुङ पाल सोटार नाम्सु राछ पट्टी ल्हेट्न याहा र जहाजकी किनार लाक बड्डीम आल्हा। 41तर डी म्होकी लेच माडाङ्च बालुओ रासाङ जहाज ठोकार होला ठाहा। जहाजौ अगाडियुङ भाग हाकार क्योस्की माह्योका। अनि न्हुङ्लाकुङ भाग चहिँ डीयो जोडखाटा राछ छालकै ग्याक्की ठाला।
42कैदीको पौडडीसार भोग्डीस्ले की डेयार सिपाहीकै होखुरीक पट्टकी साट्च सल्लाह जाटा। 43तर कप्तानै पावलकी जोगडीच मीमन जाट्च बाटै, होखुरीक सुकीर हीर जाट्की माह्या। अनि पौडडीस्की ह्योक्च जति चहिँ जहाजीङ पहिला फाल ङापार पाखा ख्योखी डेच हुकुम होचे याहा, 44होटै अरु बाँकी लेचको जतिकी चहिँ फल्याककोवाङ र जहाजौ टुक्राकोवाङ पारी पट्टी नुङ्की डेया। इटजाट्न कान पट्ट न सुरक्षाखाटा किनाराङ टाहा।
Currently Selected:
प्रेरित 27: EMGP
Highlight
Copy
Compare
Share
Want to have your highlights saved across all your devices? Sign up or sign in
© 2025 by Mother Tongue Translators Society and Wycliffe Bible Translators, Inc.