प्रेरित 25
25
फेस्तसौ म्याहासाङ पावलौ मुद्दा
1फेस्तस लाहा बडा-हाकिम छान्चबाटै लहे डुप्च नयाँ जिम्मेवारीको लाकी कैसरियाङ राहा। होटै सोम याक न्हुइङ यरूशलेमाङ नुङा। 2जब होसे होला टाहार होलुङ मुख्य पूजाहारीको र यहूदीकुङ मुख्य-मुख्य भर्मीकै पावलौ विरुद्धाङ दोष लैडीया, 3अनि होसकी लामाङ न साट्च योजना खासार होखुरीकै पावलकी यरूशलेमाङ बीर्न्हकाम यान्ही डेयार बिन्ती जाटा। 4तर फेस्तसै होखुरीककी डेया, “पावल कैसरियाङ न ठुन्नने, ङा र छिटो न होला नुङ्ङ न ले। 5होटबाटै नाखुरीक मध्युङ शासकको होला ङाखाटा नुङ्ख्यो, र पावलौ हीर गल्ति ले डेनाङ होखुरीकै उजुर याख्यो।”
6फेस्तस आठ दश दिनसम्म यरूशलेमाङ ङुवार कैसरियाङ ल्हेस्की क्योटा। होटै पीउह्राक लेखो न न्याय जाट्च ठावाङ ङुवार होचे पावलकी राक्की डेम हुकुम याहा। 7पावल टाह्रा, अनि यरूशलेमीङ राछ यहूदीकै होसकी वरिपरि घेरीयार होच्यो विरुद्धाङ बाड्को खाल-खाल्या दोषको लैडीया। तर होसे दोषकुङ कुसेर प्रमाण होखुरीकै याखी माह्योका। 8पावल लहो पक्षाङ ङाक्चै डेया, “ङै यहूदीकुङ व्यवस्थौ विरुद्धाङ, मन्दिरौ विरुद्धाङ र कैसरौ विरुद्धाङ हीर अपराध माजाट्नने।”
9तर यहूदीकोलाक खुसी पार्कीयो लागि फेस्तसै पावलकी डेया, “ही नाङ यरूशलेमाङ नुङार होला ङौ म्याहासाङ इसे कुराकुङ विषयाङ न्याय जाट्ख्यो डेच मीमन ले?”
10पावलै डेया, “ङा कैसरौ न्याय जाट्च ठाओ म्याहासाङ खडा ले, इला न ङौ न्याय छान्की पर्ले। ङै यहूदीकुङ विरुद्धाङ हीर मासेछ काम माजाट्नने, इसे बारेयाङ नाकोकी सेम्हजा थाहा ले। 11इडीक ङा अपराधी हो, र ङै सीकी पर्च सजाय डुप्च कुसेर काम जाट्नने डेनाङ ङा सीकी र तयार ले। तर इखुरीकै ङाकी लैडीच दोष साँचो हैन डेनाङ ङाकी इखुरीकुङ मीहुटाङ सुयेर याखी माह्योक्ले। ङा कैसरकी अपिल जाट्ले।”
12होटै फेस्तस मेल्हाकी सल्लाह याछकोखाटा सल्लाह जाटार होचे पावलकी डेया, “नाकै कैसर लेठाङ अपिल जाटा, होटबाटै ङा नाकोकी कैसर लेठाङ न बीर्न्हकाले।”
फेस्तसै अग्रिपास राजाखाटा सल्लाहा लाच
13हीर दिन न्हुइङ फेस्तसकी स्वागत जाट्की अग्रिपास राजा र बरनिकी कैसरियाङ राहा। 14होखुरीक होला कालाप ङुरखीङ फेस्तसै पावलौ कुरा राजौ म्याहासाङ इट डेम डा, “फेलिक्सै ठुनार नुङ्च काट जना भर्मी इला ले। 15होच्यो बारेयाङ, ङा यरूशलेमाङ लेनाङ, मुख्य पूजाहारीको र यहूदीकुङ अगुवाकै होच्यो विरुद्धाङ दोष लैडीयार होसकी दण्ड याखी पर्ले डेम ङाखाटा बिन्ती जाटा। 16तर ङै होखुरीककी डेया, ‘रोमीकुङ चलनाङ भर्मीकी दोषी माठहरीस्ठर दण्ड याछ चलन माले। दोष लैडीच भर्मीकुङ म्याहासाङ दोषी भर्मीये लहो बारेयाङ ङाक्की डीन्खी पर्ले।’ 17होटबाटै जब होखुरीक इला भेला छाना, तब ढिलो माजाट्न न पीउह्राक लेखो ङा न्याय जाट्च ठावाङ ङुवार पावलकी राक्की डेम ङै आज्ञा जाटा। 18जब पावलकी दोष लैडीच विरोधीको खडा छाना, तर ङै सोच्डीच लेखा होचे अपराध जाट्च कुसेर कुराकुङ दोष होखुरीकै होसकी लैडीकी माह्योका। 19तर होखुरीकुङ झगडा चहिँ मेखुरीकुङ न धर्मओ र सीम भ्याच येशू म्यार्मीनुङ भर्मीयो बारेयाङ लेसा। पावलै चहिँ येशू जिउँदै ले डेयार पक्का जाट्न डेमन्या। 20इसे कुरौ बारेयाङ ङा अलमल्ल पर्चबाटै छानबिन जाट्की यरूशलेमाङ नुङ्च होच्यो मीमन ले की डेयार ङै होसकी गीना। 21तर पावलै रोमी सम्राट लकीङ फैसला माछान्ठर ङाकी हिरासताङ न डाकी डेयार बिन्ती जाटा। होसकी कैसर लेठाङ बीर्न्हमाकाठर हिरासताङ न डाकी डेम ङै आज्ञा याहा।”
22अग्रिपासै फेस्तसकी डेया, “इसे भर्मीयो कुरा ङा लहे न सेकी मीमन ले।” अनि होचे डेया, “नाकै पीउह्राक न सेनी।”
पावल अग्रिपासौ म्याहासाङ
23पीउह्राक लेखो अग्रिपास र बरनिकी बाड्को सम्मानखाटा सेनापतिको र सहरुङ पट्टये मन्डीच भर्मीकोखाटा सभा ङुच इम भित्री पर्या। होटै फेस्तसौ आज्ञा डुपार पावलकी होला हाजिर जाटाका। 24फेस्तसै डेया, “राजा अग्रिपास र इला राछ पट्ट न मान्यजनको, नाखुरीकै इसे भर्मीकी डाङने। इच्यौ न बारेयाङ पट्ट यहूदीकै बाड्को स्वरै डेया, ‘अब इसे भर्मी जीवाकी माढीन्ले’ डेयार यरूशलेमाङ अनि इला र ङाखाटा बिन्ती जाट्नन्या। 25तर इचे सीकी पर्च सजाय डुप्च दोष हीर ङै माडुपा। इसे मेल्है र रोमी सम्राट लेठाङ अपिल जाट्च बाटै इसकी ङै बीर्न्हकाच निर्णय जाटा। 26तर इच्यौ बारेयाङ ङै रोमी सम्राटकी ही रीक्की पर्च हो होसे ङाकी थाहा माछाना। होटबाटै ङै होसकी नाखुरीकुङ म्याहासाङ अनि खास जाट्न राजा अग्रिपास, नाकुङ म्याहासाङ राक्की मीमन जाट्च हो। नाखुरीकै इसकी जाँचबुज जाट्रखीङ ङै हीर कुरा रीक्की डुप्ले डेच आशा डामने। 27हीजैडेनाङ कैदीयो विरुद्धाङ हीर दोष माडुप्म होसकी बीर्न्हकाकी ङाकी सेम्ह मासेले।”
Currently Selected:
प्रेरित 25: EMGP
Highlight
Copy
Compare
Share
Want to have your highlights saved across all your devices? Sign up or sign in
© 2025 by Mother Tongue Translators Society and Wycliffe Bible Translators, Inc.