পরমগীত 8
8
1আহ্, যুনি তুই মঅ ভেইবো ধোক্ক্যেন্ অদে
যে মঅ মাবো দুধ্তান হেইয়্যে!
সালে মুই তরে বারেদি পেলেয়ো
চুমি পারিদুং,
কনজনে মরে কিজু কোই ন-পারিদাক্;
2সালে মুই তরে পথ্ দেগেইনে
মঅ মাবো ঘরত্ আনিদুং,
আর তুই মরে শিক্ষ্যে দিদে।
মুই তরে তুম্বাজ্ মজলা-দিয়্যে আংগুর-রস হেবাত্তে দিদুং,
হেবাত্তে দিদুং মর্ ডালিমোর্ মিদে রস।
3মঅ মাঢাবো তলেদি আগেদে তা বাঙ্ আঢ্তান,
আর ডেন্ আঢ্তানে মরে আজাবোদে ধোজ্যে।
4ও যিরূশালেমর্ মিলেগুন,
মুই তমারে কোজোলি গুরিনে কঙর্,
তুমি কোচ্পানাগানরে ন-জাগেয়ো বা উচ্চোমি তুলি ন-দুয়ো
যেদক্কন্ সং তার্ যগাজ্যে সময় ন-অয়।
সমাজ্যেগুনোর্ কধা:
5তার পরাণ্যে উগুরে ভর্ দিইনে
ধূল্যেচর-চাগালাত্তুন্ যে এজের্ সিবে কন্না?
পরাণির্ কধা:
আপেল গাজ তলে মুই তরে জাগেলুং;
তঅ মা সিয়েনত্ পুয়ো পুদেইনে
তরে জর্ম দিয়্যে।
6সীলমহ্র ধোক্ক্যেন্ গুরি তুই মরে তঅ মনত্
আর তঅ আঢত্ রাগা;
কিত্তে কোচ্পানাগান্ মরণ ধোক্ক্যেন্ খেমতাবলা,
পাওনা কোচ্পানার্ আওজ্চান মরণ জাগা ধোক্ক্যেন্ উদি ন-যায়। 7বান পানিগানেয়ো কোচ্পানাগানরে আক্সোই ন-পারে;
বেক্ গাঙ পানিয়েয়ো ন-পারে সিয়েনরে ভাজেই নিবাত্তে।
কোচ্পানাত্তে যুনি কনজনে তার্ বেক্কানিয়ো দি দে
সালে সিয়েন্ অবঅ অমকদ কম্।
সমাজ্যেগুনোর্ কধা:
8আমার্ এক্কো চিগোন্ বোন আঘে,
তার বুগ্ দ্বিবে এজঅ দাঙর্ ন-অয়।
সেদিন্যে আমি কি গুরিবোং
যেদিন্যে তার্ বৌ যেবার্ কধাবাত্তা অবঅ?
9তে যুনি দেবাল অদঅ
সালে আমি তা উগুরে রূবো দিইনে
অজল্ চুগিদার-ঘর বানেদুং।
যুনি তে দোর্ অদঅ
সালে এরস গাজর্ তক্তালোই
আমি তারে বানি রাগেদং।
পরাণির্ কধা:
10মুই দঅ এক্কান্ দেবাল্,
আর মর্ বুগ্ দ্বিবে অজল্ চুগিদার-ঘর ধোক্ক্যেন্।
মুই তা চোগেদি সেধোক্ক্যেন্ অলুং
যিয়েন্ ঈল্ ফুদোনাগান্ আনি পারে।
11বাল্-হামোনত্ শলোমনর্ এক্কান আংগুর খেত্ আঘে;
তে সিয়েন্ চেইচিদিয়্যেগুনোর্ আঢত্ দিয়্যে।
তা ফলুনোর্ দাম ইজেবে
পত্তিজনে বার কেজি রূবো দিয়্যে পরে।
12মর্ নিজোর আংগুর খেত্ আঘে, যিগুন বানা মুই দি পারং।
ও শলোমন, সেই বার কেজি রূবো তরই থোক্,
মাত্তর্ আড়ি কেজি থোক্ তারাত্তে
যিগুনে ফলুনোর্ দেগাশুনো গত্তন্।
পরাণ্যের্ কধা:
13তুই দঅ বাগানে বাগানে থাচ্;
তঅ সমাজ্যেগুনে তঅ রবো শুনোন্,
মরেয়ো সিবে শুনিবাত্তে দে।
পরাণির্ কধা:
14মর্ পরাণ্যে, আঢি আয়;
তুম্বাজ্ মজলা-ভরা মুড়ো উগুরে
তুই চুন্নু উরিঙো ধোক্ক্যেন্ অ
বা উরিঙো ছঅ ধোক্ক্যেন্।
Currently Selected:
পরমগীত 8: CBT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 Bangladesh Bible Society
