পরমগীত 5
5
1মর্ পরাণি, মর্ বৌবো,
মুই মঅ বাগানানত্ এচ্চ্যং;
মঅ তুম্বাজ রস্ছান আর তুম্বাজ মজলানি মুই তুবেয়োং।
মর্ মু বাহ্গান আর মধুগান্ মুই হেইয়োং,
আংগুর-রস আর দুধ হেইয়োং।
সমাজ্যেগুনোর্ কধা:
ভোগ্ গরঅ, ও সমাজ্যেগুন্, ভোগ্ গরঅ,
কোচ্পানাগান্ পরিপুরি গুরি ভোগ্ গরঅ।
পরাণির্ কধা:
2মুই ঘুম্ যেইয়োং, মাত্তর্ মঅ মনান্ জাগন্ এলঅ।
উই শুন্, মর্ পরাণ্যে দোরানত্ বারি মারিনে কোইয়্যেদে,
“মর্ বৌবো, মর্ পরাণি,
মর্ কবো, মর্ খাটি সেই মানুচ্চো,
মরে দোরান্ হুলি দে।
শিরোপানিলোই মঅ মাঢাবো ভিজি যেইয়্যে,
রেদো কুয়ো পানিলোই ভিজি যেইয়্যে মঅ চুলান্।”
3মুই মনে মনে কলুং, “মঅ পোজাক্কান্ মুই হুলি ফেল্যং,
কেধোক্ক্যেন্ গুরিনে আরঅ সিগুন্ উরিম্?
মুই মঅ টেঙান্ ধোইয়োং,
কেধোক্ক্যেন্ গুরিনে সিয়েনি আর কজরা গুরিম্?”
4দোরান্ ফুদো গুরিনে মর্ পরাণ্যে তা আঢ্তান ভোরেল,
মঅ মনান্ তাত্তে উগুদো জাবুদো অলঅ। 5মর্ পরাণ্যেরে দোরান্ খুলি দিবাত্তে মুই উদিলুং,
মঅ আঢ্তান তুম্বাজ রসে ভিজে এলঅ,
মঅ আঙুলুনোর্ তুম্বাজ রসর্ গঙারে
দোরানর্ হেন্ডেল্লো ভিজিলো। 6মঅ পরাণ্যেত্তে মুই দোরান্ খুলিলুং,
মাত্তর্ মঅ পরাণ্যে ন-এলঅ, যেয়েগোই।
তে যেক্কে কধা কোইয়্যে
সেক্কে দুঘে মঅ মনান্ গুলি যেইয়্যে।
মুই তারে তোগেলুং, মাত্তর্ ন-পেলুং;
মুই তারে ডাগিলুং, মাত্তর্ তে শমক্ ন-দিলো।
7চুগিদারুনে শঅরত্ ঘুরি ঘুরি চুগি দিবার্ অক্তত্
মরে দেগিলাক্;
তারা মরে পিদিলাক্, সেক্কে কালাদাগ্ পড়িলো;
শঅর-দেবাল চুগিদারুনে মঅ কিয়্যে কাবড়ান্ কাড়ি নিলাক্।
8ও যিরূশালের্ মিলেগুন্, মুই তমারে কোজোলি গরঙর্,
যুনি তুমি মঅ পরাণ্যেরে দেগঅ
সালে তারে কোই দুয়ো, মুই প্রেমত্ পোজ্যং।
সমাজ্যেগুনোর্ কধা:
9ও বেগত্তুন্ দোল্বি,
অন্যগুনোত্তুন্ তঅ কোচ্পানাগান্ কুন্দি গম্?
তঅ কোচ্পানাগান অন্যগুনোত্তুন কুন্দি গম্ যে,
তুই এবাবোত্যেগুরি আমারে কোজোলি গরর্?
পরাণির্ কধা:
10মঅ পরাণ্যের্ চেঙারাগান্ জোল্জোল্যে,
রাঙোস্যে তা কিয়্যে রঙান্;
দশ হা্জার জন ভিদিরে তে জদবদে একজন।
11তা মাঢাবো খাটি সোনা ধোক্ক্যেন্,
তা চুলান্ সাগর তুবোল ধোক্ক্যেন্ আর সাড়াল্যে কবা ধোক্ক্যেন্ কালা;
12তা চোগ্কুন পানি গঙার পারত্ থেইয়্যে এক জোড়া কঅ ধোক্ক্যেন্,
যিগুন্ দুধ্তোই ধোয়্যে, মানেগ ধোক্ক্যেন্ বোজেয়্যে।
13তা গাল্ দ্বিয়েন যেন তুম্বাজ মজলার্ বিজিতলা,
যিয়েনত্তুন্ তুম্বাজ্ নিগিলের্।
তা ঠুট্তুন দ্বিবে যেন তুম্বাজ রসে ঝুরি যেইয়্যে লিলি ফুল।
14তা আত্ দ্বিয়েন্ যেন বৈদূর্যমণি বোজেয়্যে সোনার লুদিক্,
আর কিয়্যেগান্ নীলকান্তমণিলোই সাজেয়্যে,
পালিশ্ গোজ্যে এদো দাদ ধোক্ক্যেন্।
15তা উলুহুলুন্ দ্বিবে যেন খাটি সোনা খুদো উগুরে বোজেয়্যে
মার্বেল পাত্তরর্ খুদো।
তা কিয়্যেগান্ লেবাননর্ অজল্ মুড়োবো ধোক্ক্যেন্,
লেবাননর্ বেঈ লোইয়্যে এরস গাজ ধোক্ক্যেন্ জোগ্যোক্যে।
16তা মুয়োন্ অমকদ মিদে,
তার্ বেক্কানি দোল্।
ও যিরূশালেমর্ মিলেগুন্,
তেয়ই মর্ কোচ্পানা, মঅ সমাজ্যে।
সমাজ্যেগুনোর্ কধা:
Currently Selected:
পরমগীত 5: CBT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 Bangladesh Bible Society
