পরমগীত 4
4
1মর্ পরাণি, কি দোল্ তুই!
অয়, তুই দোল্বি।
ঘঙদা ভিদিরে তঅ চোগ্কুন দ্বিবে কঅ ধোক্ক্যেন্।
তঅ চুলান্ যেন গিলিয়দ মুড়োবোত্তুন্
লামি এচ্চ্যে ছাগল পাল্।
2তঅ দাদ্তুন্ এমন পাদি ভেড়া পাল ধোক্ক্যেন্
যিগুনে ইক্কিনে কেশ্চানি কাবিনে গাদিগাদাই এচ্চ্যন্।
তারার্ বেক্কুনোর্ জড়া আঘে,
কনবো ন-আজন্!
3তর্ ঠুট্ দ্বিবে রাঙা রংয়র্ সুদো ধোক্ক্যেন্ রাঙা;
কি দোল্ তঅ মুয়োন্!
ঘঙদা ভিদিরে তঅ কবাল দ্বিকিত্তেদি যেন অদ্দেক্ হেইয়্যে ডালোম্।
4তঅ গত্তনাবো যেন দায়ূদোর অজল চুগিদার-ঘর ধোক্ক্যেন্ লাম্বা;
সিয়েনত্ দুলি দুলি আগেদে এক আজারান্ ঢাল্,
সিয়েনি বেক্কানি যুদ্ধোগুরিয়্যেগুনোর্।
5তর্ বুক্ দ্বিবে যেন লিলি ফুলোর্ ঝারত্ বেড়েয়্যে
চুন্নু উরিঙোর্ জামা ছঅ।
6যেদক্কন্ সং বেন্যে পহ্র ন-অয় আর আন্ধারান্ ন-যায়
সেদক্কন্ মুই তুম্বাজ রস মুড়োবোত্, অয়, আগর্বাট্টির্ মুড়োবোত্ থেম্।
7মর্ পরাণি, তঅ কিয়্যেগানর্ বেক্কানি দোল্,
তঅ ভিদিরে কনঅ টেপ্পোজ্যে নেই।
8মেলা ঘরর্ মর্ বৌবো, লেবাননত্তুন্ মঅ সমারে আয়,
মঅ সমারে লেবাননত্তুন্ আয়।
অমানার্ মুড়ো চুক্কোত্তুন্, শনীর আর হর্মোণ মুড়োবোর্ উগুরেত্তুন্,
সিংহ গাদত্তুন্, হোক্যে বাঘর্ মুড়োমুড়ি থেবার্ জাগানত্তুন্
তুই লামি আয়।
9মর্ পরাণি, মর্ বৌবো, তুই মঅ মনান্ চুর্ গোজ্যস্;
তর্ এক চোগো ইজিরেলোই,
তঅ নেগেলেজর্ এক্কো মানেক্কোই
তুই মঅ মনান্ চুর্ গুরি নেযেয়োচ্।
10মর্ পরাণি, মর্ বৌবো,
তঅ কোচ্পানাগানে কত্তমান্ হুজি গরায়!
আংগুর-রসত্তুন্ বেশ্ তঅ কোচ্পানাগান্,
আর বেক্ মজলাগানিত্তুন্ তঅ তুম্বাজ্ছানর্ দোল্ তুম্বাজ্
আরঅ কত্তমান্ বেশ্ গম্!
11মর্ বৌবো, তঅ ঠুট্তোত্তুন্
ফুদো ফুদো মধু ঝরে।
তঅ জিলান তলে আগেদে দুধ আর মধু;
তঅ কাবড় বাজ্ছান লেবানন ঝারর্ তুম্বাজ ধোক্ক্যেন্।
12মর্ পরাণি, মর্ বৌবো,
তুই যেন দেবাল্লোই ঘিজ্যে এক্কান বাগান্;
তুই যেন আক্সো রাগেয়্যে পয়নালা, বানি রাগেয়্যে তান্জাং।
13তুই যেন দোল্ এক্কান ডালুমো বাগান;
সিয়েনত্ আগেদে গম্ গম্ ফল,
মেহেদী আর তুম্বাজ লুদি।
14আগেদে জটামাংসী, জাফরান্, বচ, দারুচিনি
আর নানান্ বাবোত্যে ধূপোর্ গাজ্;
সিদু আগেদে তুম্বাজ রস, অগুরু
আর বেগত্তুন্ গম্ নানান্ বাবোত্যে তুম্বাজ মজলা।
15তুই যেন বাগানর্ পয়নালা,
যেন উদুরে উঠ্যে কূয়ো পানি,
যেন লেবাননত্তুন্ লামি এচ্চ্যে পানি গঙার্।
পরাণির্ কধা:
16উত্তোরেদি বোইয়্যেরান্ জাগি উঠ্, দোগিনে বোইয়্যেরান্ আয়।
মঅ বাগানান উগুরেদি বেই যাহ্
যেনে সিয়েনর্ তুম্বাজ্ছান ছিদি পড়ে।
মর্ পরাণ্যে যেন তা বাগানানত্ এইনে
তার গম্ গম্ ফলুন্ খান্।
পরাণ্যের্ কধা
Currently Selected:
পরমগীত 4: CBT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 Bangladesh Bible Society
