গম্ উপদেজ্ 9
9
গম্ বুদ্ধি আর ভান্ন্যেই বুদ্ধিরে ভাত্যেনা
1গম্ বুদ্ধিগানে তা ঘরান্ বানেয়্যে;
পাত্তর্ কাবিনে তে সাত্তো খুদো বানেয়্যে।
2তে য়েমান কাবিনে য়েরা রান্যে
আর আংগুর-রস সমারে মজলা মিজেয়্যে;
তে হানা দিইনে টেবিল সাজেয়্যে।
3তে তা চাগরানিগুনোরে বেক জাগানিত্ পাধেই দিয়্যে,
আর শঅরর্ বেগ অজল জাগানিত্তুন্
তে ডাগিনে কত্তে,
4“ভুল্ মানুচ্চুন ইদু এজোদোক।”
যিগুনোর বুদ্ধি নেই তারারে তে কয়,
5“এজ, মঅ হানাগান্ হঅ,
মর্ মজলা মিজেয়্যে আংগুর-রস হঅ;
6তুই ভুল্ মানুচ্চুনো লগে মিজেনা বাদ দে,
সেক্কে তুই বাঁজিবে;
তুই বিচেরবুদ্ধির্ পধেদি আঢাউদো গর্।”
7ঠাট্টা-ঈচ্ গুরিয়্যেবোরে যে ঠিগ্ গুরিবাত্তে যায় তে অগমান অয়;
পাজি মানুচ্চুনোর দুজ্ছানি যে দেগেই দে
তারে সে পাজি মানুচ্চো দুষি বানায়।
8ঠাট্টা-ঈচ্ গুরিয়্যেবোরে দুষ্ দেগেই ন-দিচ্,
দিলে তে তরে ঘিনেব;
বরং জ্ঞানি মানুচ্চোরে তা দুষ্ছান দেগেই দে,
তে তরে কোচ্পেব।
9জ্ঞানী মানুচ্চোরে উবদেজ্ দে, সেক্কে তে আরঅ জ্ঞানি অবঅ;
গোজেনভক্ত মানুচ্চোরে শিক্ষ্যে দে, তে আরঅ শিক্ষ্যে পেবঅ।
10লগেপ্রভু উগুরে ভোক্তিবলা দরান্ অলঅ গম্ বুদ্ধির গড়াগান্;
সেই পবিত্র মানুচ্চোরে জানি পারিলে বিচেরবুদ্ধি পায়।
11গম্ বুদ্ধিগানে কয়, “মঅ মাধ্যমে তুই ভালোক্ দিন বাঁজি থেবে,
তঅ আয়ুগান আরঅ ভালোক্ বজর বাড়িবো।
12তুই যুনি জ্ঞানী অস্ সালে তর্ নিজোর লাভ অবঅ,
মাত্তর্ যুনি ঠাট্টা-ঈচগুরিয়্যে অস্ সালে তুই গায় গায় দুঘ্ পেবে।”
13বুদ্ধি নেইয়্যে মিলে ধোক্ক্যেন যে রঅ ছাড়ে
তে কনঅ মানা ন-মানে, তার জ্ঞান নেই।
14তে তার্ ঘর দোরান ইদু
শঅরর্ বেগত্তুন অজল্ জাগান আসনানত্ বজে।
15যিগুনে সেই পথ্তানদি সোজা নিজো পধেদি যান্
তারারে তে ডাগিনে কয়,
16“ভুল্ মানুচ্চুনে ইদু এজোদোক্।”
যিগুনোর বুদ্ধি নেই তারারে তে কয়,
17“চুর্ গোজ্যে পানিগান মিদে;
যে হানাগান লুগি লুগি হা অয় সিয়েন অমকদ সুয়োত্ লাগে।”
18মাত্তর্ তারা হবর্ ন-পান, মরা মানুচ্চুনে সিয়েনত্ থান;
সেই মিলেবোর ভাত্যেয়্যে মানুচ্চুনে মরণ জাগাত্ থান্।
Copyright © 2021 Bangladesh Bible Society