গম্ উপদেজ্ 8
8
গম্ বুদ্ধি পানা
1গম্ বুদ্ধিগানে কি ন-ডাগে?
বিচের বুদ্ধিগানে কি রঅ ছাড়িনে কধা ন-কয়?
2পধ কুরে অজল্ জাগাত্
যিয়েনত্ পথ্তান দ্বপদা ওইয়্যে
সিয়েনত্ গম্ বুদ্ধিগান থিয়্যেই থায়।
3শঅরত্ যেবার পদথ্ গেদো কুরে তে রঅ ছাড়িনে কয়,
4ও মানুচ্চুন্, মুই তমারে ডাগঙর্,
বেক মানুচ্চুনো ইদু রঅ ছাড়িনে কঙর্।
5ভুল্ মানুচ্চুন, চালাগ্ অবাত্তে বুদ্ধি গরঅ;
জ্ঞাননেইয়্যে মানুচ্চুন্, বিচেরবুদ্ধি শিগো।
6শুনো, মুই দোল্ কধা কোম,
গম্ কধা কবাত্তে মঅ মুয়োন হুলিম।
7মুই সত্য কধা কোম্;
বজং কধানি মইদু জঘন্য লাগে,
সেনত্তে মুই সিয়েনি ন-কোম্।
8মঅ মুয়ো কধানি বেক্কানি ঠিগ,
সিয়েনিত্ বেঙাটেরা বা কুজুরোমি নেই।
9যিগুনোর বিচেরবুদ্ধি আঘে তারা ইদু মঅ কধাগান দোল্;
যিগুনোর জ্ঞান আঘে তারা ইদু সিয়েনি দোল্ কধা।
10রূবোত্তুন্ বেশ্ মঅ সল্লাগানি শিগিবাত্তে আওজি অ,
বেঈ লোইয়্যে সনাত্তুন্ বেশ্ জ্ঞান পেবাত্তে আওজি অ;
11কিত্তে প্রবাল পাত্তরত্তুন্অ বেশ্ গম্ বুদ্ধিগানি মংগা;
তর্ চাইদ্যে ধোক্ক্যেন কনঅ জিনিজো সমারে সিয়েনির সং ন-অয়।
12মুই গম্ বুদ্ধি, মুই চালাগ্ অইদ্যে বুদ্ধি সমারে বজত্তি গরঙর্;
জ্ঞান আর গম-ভান্ন্যেই বুঝিবার খেমতা মর্ আঘে।
13লগেপ্রভুরে ভোক্তি গুরিনে দরানা মানে পাজি কামানিরে ঘিনেনা;
বার্বো গরানা, বার্বো কধা, বজং বেবহার
আর বেঙা টেরা কধানি মুই ঘিনেং।
14সল্লা আর তরিৎ বুদ্ধি মত্তুন্ এজে;
মুই বিচেরবুদ্ধি, মুই খেমতা দুয়োং।
15রাজাগুনে রাজাগিরি গরন্ মঅ মাধ্যমে,
আর শাজন্গুরিয়্যেগুনে বানান্ ন্যায়বলা সুদোম;
16মঅ মাধ্যমে শাজন্গুরিয়্যেগুনে আর নেতাগুনে
শাজন-কামানি চালান;
তারা বেক্কুনে বিচেরগর্ কাম গরন্।
17যিগুনে মরে কোচ্পান মুইয়ো তারারে কোচ্পেম;
যিগুনে মনদিইনে মরে তগান্ তারা মরে পান্।
18ধন আর সর্মান মত্তুন্ এজে,
এজে উমর সোম্বোত্তি আর ভালেদি।
19সনাত্তুন্অ বেশ্, এন্ কি, খাটি সনাত্তুন্অ বেশ্
মর্ দিয়্যে ফলুন গম্;
মুই যিয়েনি দুয়োং সিয়েনি বেঈ লোইয়্যে রূবোত্তুন্অ বেশ্ খাটি।
20মুই ন্যায়র পধেদি চলং,
ন্যায়বিচেরর পথ্তান্ ধুরি চলং।
21যিগুনে মরে কোচ্পান তারা ধন-সম্পদ পান;
মুয়ই তারার ধনভান্ডালত্ ভোরেই দুয়োং।
22লগেপ্রভুর কামর্ আরাম্ভত্, তা সিরিস্টির কামান আগেদি
মুই তার্ এলুং;
23সেই পৌইল্যাত্তুন্ ধুরি, পিত্থিমী সিরিস্টির আগেত্তুন্ ধুরি,
বেগ আগেত্তুন্ ধুরি মরে নেযা ওইয়্যে।
24যেক্কেনে কনঅ সাগর ন-এলঅ,
ন-এলঅ কনঅ পয়নালা যিয়েনত্তুন্ পানি গায় গায় এদঅ,
সেক্কেনে মুই জর্মেয়োং।
25মুড়ো-মুড়ি থিদেবর্ গুরিবার আগেদি মুই এলুং।
26যেক্কেনে পিত্থিমীগান্ আর মাদ-গাদ্
বা পিত্থিমীর এক্কো ধূল্যেচর তে ন-বানায়,
সেক্কেনে মুই এলুং।
27তে যেক্কেনে দেবাবো থিদেবর্ গোজ্যে
সেক্কেনে মুই সিদু এলুং;
তে যেক্কেনে সাগর উগুরে চেরোকিত্তে দুযিগুন ঠিগ্ গোজ্যে,
সেক্কেনে মুই সিয়েনত্ এলুং।
28তে যেক্কেনে উগুরেদি আগাজ্ছান থিদেবর্ গোজ্যে
আর মাদি তলেদি দাঙর্ দাঙর্ পয়নালাগুন দরমর গুরি থিদেবর্ গোজ্যে,
29তে যেক্কেনে সাগর দুযিগান থির্ গোজ্যে
যেন পানিগান তা পরিমান বারেদি পার্ ওই ন-এজে,
যেক্কেনে তে পিত্থিমীর গড়াগান ঠিগ্ গোজ্যে,
30সেক্কেনে মুয়ই কালিগর্ ইজেবে তা কায়কুরে এলুং।
দিনকে দিন মুই খুজি ওইনে
তা মুজুঙোত্ নিত্য ফুত্তি গুরিদুং;
31তা পিতথিমীগান্দোই ফুত্তি গুরিদুং,
আহ্ মানুচ্চুনোরে নিইনে হুজি এলুং।
32“মঅ পুয়োগুন, ইক্কিনে মঅ কধাগান শুনো;
যিগুনে মঅ পধেদি চলন্ তারা সুগি।
33মঅ উগুমানি শুনো, জ্ঞানবলা অ,
এলাফেলা ন-গোজ্য।
34যে মানুচ্চো মঅ কধানি শুনে
আর পত্তিদিন মঅ দোরো ইদু জাগি থায়
আর মঅ দোরো ফ্রেমান ইদু বাজ্জেই থেইনে তে সুগি;
35কিত্তে যে মরে পায় তে জিংকানি পায়
আর লগেপ্রভুত্তুন্ দোয়্যে পায়।
36মাত্তর্ যে মরে ন-পায় তে নিজোরে ক্ষতি গরে;
যিগুনে মরে ঘিনেন্ তারা বেক্কুনে মরণানরে গমপান্।”
Copyright © 2021 Bangladesh Bible Society