গম্ উপদেজ্ 10
10
শলোমনর্ গম্ উপদেজ্।
1শলোমনর্ গম্ উপদেজ্।
জ্ঞানীবলা পুয়ো বাবরে হুজি গরে,
মাত্তর্ ভুল-বেদমা পুয়ো মাগুনো জিংকানিত্ দুগ্ আনন্।
2অন্যেয়গুরি পেয়্যে ধন্দোই কনঅ লাভ ন-অয়,
মাত্তর্ গোজেন উগুরে ভোক্তি থেলে মরনত্তুন্ উদ্ধোর গরে।
3লগেপ্রভু তা ভক্তগুনোরে পেটপরা হেবাত্তে ন-দে,
মাত্তর্ তে পাজিগুনোর আওজ্চানি পুরেবাত্তে ন-দে।
4আল্সি জিনিসচানে মান্জ্যরে নাঢা গরে,
মাত্তর্ কাম গুরিলে ধন-সোম্বোত্তি এজে।
5জ্ঞানীবলা পুয়ো হ্রান্যেত্ ফসল তুবেই রাগায়,
মাত্তর্ লাজেয়্যে পুয়ো ফসল কাবিবার অক্তত্ ঘুমোত্ পুড়ি থায়।
6গোজেন ভক্তগুনো ইদু বোউত্ আশিদ্বাদ এজে,
মাত্তর্ পাজি অত্যেচারীগুনোর মনানি
তারার মুয়ো কধালোই ঢাগি দিয়্যে যায়।
7গোজেন ভক্তগুনোর্ স্মৃতিগানিয়ে আশিদ্বাদ আনে,
মাত্তর্ পাজিগুনোর নাঙানি পুযি যায়।
8যিবের্ মনত্ জ্ঞান আঘে তে উগুম মানে,
মাত্তর্ বেশ্ কধা কোইয়্যে বাজে মানুচ্চুন ভস্ত ওই যেবাক্।
9যে গমেডালে চলে তে নিচিদে গুরি আঢাউদো গরে,
মাত্তর্ যে ভান্ন্যেই পধেদি আঢে তে ধরা পুরিবো।
10যে মানুচ্চো চোগোদি ইজিরে দে তে দুঘ্ দে;
বেশ্ কধা কোইয়্যে বাজে মানুচ্চো ভস্ত ওই যেবঅ।
11গোজেন ভক্তগুনোর্ মুয়োনি জিংকানির পয়নালা ধোক্ক্যেন,
মাত্তর্ পাজিগুনোর অত্যেচারি মনানি
তারার মুয়ো কধানিলোই নাঢা যায়।
12ঈচ্ গরানাগানে কোল্-কোজ্যে বাজেই দে,
মাত্তর্ কোচ্পানাগানে বেক অন্যেয়ানিরে ঢাগি রাগায়।
13যিগুনোর বিচেরবুদ্ধি আঘে তারা মুয়োত্ জ্ঞান পাহ্ যায়,
মাত্তর্ যিগুনোর বুদ্ধি নেই তারা পিঠ্তানিত্ আগেদে লুদিক্।
14জ্ঞানী মান্জ্যে জ্ঞান থুবেই রাগায়,
মাত্তর্ বাজে-মান্জ্যর মুয়োনিয়ে দজা ডাগি আনে।
15তাগোয়্যেগুনোর্ ধনানি তারার দেবাল-ঘিজ্যে শঅর্;
নাঢা মানুচ্চুনোর অভাবপানি অল তারার দজা।
16গোজেন ভক্তগুনোর্ বেতন অলঅ দোল্ জিংকানি,
মাত্তর্ পাজিগুনোর আয়লোই পাপ বেজ্ অয়।
17যে শাজন্ মানে তে জিংকানির পধেদি আঢে,
মাত্তর্ যে বুঝোপারা গুরিবার কধা এলাফেলা গরে তে বজং পধেদি যায়।
18যে মানুচ্চো তা মন ভিদিরে ঈচ্ গরেদে কধা গুমরত্ রাগায়
তে মিজে কধা কয়;
19বেজ্ কধা ভিদিরে ভান্ন্যেই কিজু থায়,
মাত্তর্ যে তা মুয়োন দোঙেই রাগায় তে বুদ্ধবলা।
20গোজেন ভক্তগুনোর্ জিলানি আজল্ রূবো ধোক্ক্যেন,
মাত্তর্ পাজিগুনোর মনানি দাম কম।
21গোজেন ভক্তগুনোর্ মুয়োনিয়ে ভালোক্ জনরে পালায়,
মাত্তর্ বুদ্ধির অভাবে বাজে মানুচ্চুনে মুরি যান্।
22লগেপ্রভু যিবেরে বর্ দে তেয়ই তাগোয়্যে;
সেই আশিদ্বাদত্ কনঅ দুঘ্ দরদ ন-থায়।
23বজং কাম গরানা ভুল্ মানুচ্চুনোর রঙ্গফুত্তি,
মাত্তর্ বুদ্ধিবলাগুনোর রঙ্গফুত্তি অল জ্ঞান।
24পাজি মানুচ্চুনে যিয়েনি দরান্ সিয়েনি তারা উগুরে ঘুদিবো,
মাত্তর্ গোজেন ভক্তগুনোর্ আওজ্চানি পুরেই দিয়্যে অবঅ।
25ঝড় বেঈ গেলে পাজিগানি আর ন-থায়,
মাত্তর্ যে গোজেন ভক্ত তে জিংকানিবর্ অদে অদে থায়।
26দাদত্ নল আর চোগোত্ ধূমো দিলে যেধোক্ক্যেন দুঘ্ অয়,
সেধোক্ক্যেন্ যিগুনে আল্সি মান্জ্যরে কনজাগাত্ পাদান্ তারা দুঘ্ পান।
27লগেপ্রভু উগুরে ভোক্তিবলা দর্ থেলে আয়ু বাড়ায়,
মাত্তর্ পাজিগুনোর আয়ুগানি কোমেই দিয়্যে অবঅ।
28গোজেন ভক্তগুনোর্ আজাগানিত্ ফুত্তি আঘে,
মাত্তর্ পাজিগুনোর আজাগানিত্ ছেই পুরিবো।
29লগেপ্রভুর পথ্তান গম্ মানুচ্চুনোর ঘর ধোক্ক্যেন্,
মাত্তর্ যিগুনে বজং কাম গরন্ তারাত্তে সিয়েন দজা।
30গোজেন ভক্ত মানুচ্চুনে আমিঝে অদে অদে থান্,
মাত্তর্ পাজি মানুচ্চুনে দেজত্ বজত্তি গুরি ন-পারিবাক্।
31গোজেন ভক্তগুনোর্ মুয়োনিত্তুন্ জ্ঞান কধা নিগিলি এজে,
মাত্তর্ যে জিলানে বেঙা বেঙা কধা কয় সিয়েন কাবি ফেলা অবঅ।
32গোজেন ভক্তগুনোর্ মুয়োনিয়ে যোগাজ্যেগুরি কধা কোই জানে,
মাত্তর্ পাজিগুনোর মুয়োনিয়ে বানা বেঙা বেঙা কধা কয়।
Copyright © 2021 Bangladesh Bible Society