গম্ উপদেজ্ 7
7
1মঅ পুয়োবো, মঅ কধাগান শুন্
আর মর্ বেক উগুমানি তঅ মনঅ ভিদিরে
থুবেই রাগা।
2মঅ উগুমানি পালা, সেক্কে তুই বাঁজিবে।
মর্ দিয়্যে শিক্ষ্যেনি তঅ চোগোর্ মানেক্কুন্ ধোক্ক্যেন গুরি
চুগি দি রাগা;
3তঅ আঙুলুনোত্ সিয়েনি বানি রাগা,
তঅ মনঅ খাতাদ্ সিয়েনি লিগি রাগা।
4জ্ঞানানরে কঅ, “তুই মর্ বোন,”
আর বুদ্ধিগানরে সমাজ্যে কঅ;
5যেনে তারা তরে বেশ্যেগুনো আঢত্তুন্ রোক্ষ্যে গরন্,
রোক্ষ্যে গরন সেই মিদে কধালোই ভরা
ভান্ন্যেই পধেদি যেইয়্যে মিলেগুনো আঢত্তুন্।
বেশ্যেমিলেবোর্ ভাত্যেনা
6মঅ ঘর জানালাগানন্দি মুই বারেদি চেলুং।
7ভুল্ মানুচ্চুনো ভিদিরে মুই রিনি চেলুং,
গাবুজ্যেগুনো ভিদিরে মুই এন এক্কো গাবুজ্যেরে খিয়েল্ গুরিলুং
যিবের্ বুদ্ধির অভাব এলঅ।
8তে সেই মিলেবো ঘর কায়-কুরে পথ্তানদি যার্,
সে পরেদি তে তা ঘর পথ্তানদি যেইনে সুমিলো;
9সেক্কে দিনো পহ্রান্ মিলেই যেবার পরেদি সাজোন্যে ওইনে
রেদো গভিন্ আন্ধারান্ লামি এলঅ।
10সে অক্তত্ এক্কো মিলে তা লগে দেগা গুরিবাত্তে
নিগিলি এলঅ;
তা কিয়্যেত্ বেশ্যেমিলের্ পজাক্ উজ্যে আর তা মনান্ এলদে ছলনালোই ভরা।
11তে ভান্ন্যেই পধেদি যেইয়্যে মিলে, রঅ ছাড়ি ছাড়ি কধা কয়,
তা টেঙানি কনদিন্অ ঘরত্ ন-থায়;
12কনদিন পদথ্, কনদিন বাজারত্, পত্তি পধ মুয়োত্ তে উৎ পাদি থায়।
13তে সেই গাবুজ্যেবোরে ধুরিনে চুমিলো আর লাজ্ নেই মুয়োদি কলঅ,
14“মঅ ঘরত্ উদোলোলি-উৎসর্বর য়েরা আঘে,
এচ্চ্যে মুই মান্যেগান্ ছিড়েয়োং।
15সেনত্তে মুই তমা লগে দেগা গুরিবাত্তে নিগিলি এচ্চ্যং;
মুই তরে তোগেইনে তরে পেয়োং।
16মিসর দেজর নানান্ বাবোত্যে বানেয়্যে কাবড়লোই
মুই বিচ্ছোনান্ বিজেয়োং;
17গন্ধরস, অগুরু আর দারচিনিলোই
মঅ বিচ্ছোনান্ তুম্বাজ্ গোজ্যং।
18এজঅ, আমি বেন্যেমাদান্ সং রঙ্গ-ফুত্তি গুরিই,
গভিন্ কোচ্পানালোই হুজি রাজি গুরিই।
19মঅ নেক্কো ঘরত্ নেই, তে দূরোত্ যেয়্যেগোই;
20তে থৈল্যে ভরা টেঙা নেযেয়্যে,
পূন্নিমার্ আগে ঘরত্ ন-ফিরিবো।”
21মন ভুলেয়্যে কধাবাত্তালোই তে তারে ভান্ন্যেই পধেদি নেযেল,
মিদে কধালোই তারে ভুলেই নেযেল,
22আর তে সেক্কেনে সেই মিলেবো পিজেদি গেলঅ।
গোরুগুন যেবাবোত্যেগুরি কাবা পদত্ যান্,
শিগোল্লোই বান্যে বাঁজে মান্জ্যে যেধোক্ক্যেন তা সাজাগান্ পায়,
23পেগ্কুনে যেবাবোত্যেগুরি ফালত্ পুরিবাত্তে যান
আর যেরেদি তা কলিজেত্ সেল্ ফুদি যায়,
সেধোক্ক্যেন গুরি সেই মানুচ্চো হবর্অ ন-পায়, ইয়েনত্ তার পরাণান্ যেবঅ।
24মঅ পুয়োগুন, ইক্কিনে তুমি মঅ কধানি শুনো,
মুই যিয়েনি কঙ্ সিয়নি কান পাদি শুনো।
25তমা মনানি সেই মিলেগুনো ইন্দি যেবাত্তে ন-দুয়ো,
তুমি সিগুনো পধেদি ন-ঘুজ্য;
26কিত্তে তে বোউত্ মান্জ্যরে সর্বনাশ গোজ্যে,
আর যিগুনোরে তে শেজ্ গোজ্যে সিগুন জনেদি ভালোক্কুন্ এলাক্।
27তা ঘরান অলদে মরণ জাগাত্ যেবার পথ্তান,
যে পথ্তান মরণ ঘরত্ লাম্মেগোই।
Copyright © 2021 Bangladesh Bible Society