গম্ উপদেজ্ 6
6
ভুলো পৌইদ্যেনে উজিয়ার কধা
1মঅ পুয়োবো, তুই যুনি কারঅ জাবিন্ ওই থাচ্,
অন্যজনর্ জাবিন্ অবাত্তে আত্ মিলেই থাচ্,
2যিয়েনি কোইয়োচ্ যুনি তা ফালত্ পড়চ্,
যুনি তঅ মুয়ো কধালোই ধরা হাচ্,
3তো মঅ পুয়োবো, তুই যেক্কেনে অন্যগুনো ইদু ধরা পোজ্যস্,
সেক্কে নিজোরে ছাড়ি নেযেবাত্তে এ কামানি গর্-
তাইদু যেইনে নিজেই চিগোন্ অ,
তারে কোজোলি গর্,
4তঅ চোগ্কুনোরে ঘুম যেবাত্তে ন-দিচ্,
চোগো পাদানিরে চোগ্ কাদিবাত্তে ন-দিচ্।
5শিগেরী আঢত্তুন্ উরিঙো ধোক্ক্যেন্ গুরি,
পেগো শিগেরীত্তুন পেগো ধোক্ক্যেন্ গুরি
তুই নিজোরে ছাড়েই নেযা।
6ও আল্সিয়্যে, তুই পিগিড়েবো ইদু যাহ্,
তা আঢাউদো দেগিনে জ্ঞানবলা অ।
7তারে উগুম গুরিবার কনজন নেই,
তা উগুরে কনঅ পরিচালগ বা শাজন্গুরিয়্যে নেই;
8তো তে হরান্যেত্ তা হানাগান তুবেই রাগায়
আর ফসল কাবিবার অক্তত্ হানা তগায়।
9ও আল্সিয়্যে, আর কয়দিন তুই পরি থেবে?
কক্কেনে ঘুমোত্তুন্ উদিবে?
10তুই কোই থাচ্, “আর এক্কেনা ঘুম, আর এক্কেনা ঘুমোর্ ভাব,
জিরেবাত্তে আর এক্কেনা আত্তানি বোজেই রাগাং।”
11মাত্তর্ বার্ বার্ গর্বা এলে বা আত্যের্লোই সাজি থেইয়্যে
ডাগেদ আঢত্ পড়িলে যেধোক্ক্যেন্ অভাব এজে,
ঠিগ্ সেধোক্ক্যেন্ গুরি তর্অ অভাব এবঅ।
12যে মানুচ্চো জঘন্য আর পাজি
তে ভান্ন্যেই কধা মুয়োত্ গুরিনে ঘুরি ঘুরি বেড়ায়;
13তে চোগেদি ইজিরে গরে,
টেঙোই ইংগিদ্ দে,
আঙুল্লোই দেগায়,
14বজং মনে নিত্য কুজুরোমি গরে
আর যাগুলুক্ বাজায়।
15সেনত্তে আদিক্ক্যেন্গুরি তা উগুরে দজা এবঅ;
যে কনঅ সময়োত্ তে ভস্ত ওই যেবঅ,
তে আর্ উদি ন-পারিবো।
16লগেপ্রভু কমেদি সাততান্ জিনিস ঘিনেই
সিয়েনি তাইদু জঘন্য:
17বার্বো বার্বো চোগ,
মিজেকধা কোইয়্যে জিলান্,
গম্ মান্জ্যরে খুন্গোজ্যে যে আঢ্তানি,
18কুজুরোমিলোই ভরা মনান্,
অন্যেয় কাম গুরিবাত্তে ধাবা যেইয়্যে টেঙানি,
19মিজে কধা কোইয়্যে মিজে সাক্ষি,
আর ভেইয়্যে ভেইয়্যে যাগুলুক্ বাজেয়্যে মানুচ্।
বেশ্যে পৌইদ্যেনে উজিয়ার কধা
20মঅ পুয়োবো, তুই তঅ বাবঅ উগুমান পালা,
আর মাবোর দিয়্যে শিক্ষ্যেনি পুরি ন-ফেলেচ্।
21জনমত্তে তঅ মনত্ সিয়েনি গাঢেই রাগা,
তঅ গত্তনাত্ সিয়েনি বানি রাগা।
22আঢিবার সময়োত্ সিয়েনিয়ে তরে পথ্ দেগেব,
ঘুমেবার সময়োত্ তরে চুগি দিবো
আর জাগিলে তঅ সমারে কধা কবঅ;
23কিত্তে এ উগুমানি চেরাগ ধোক্ক্যেন, এ শিক্ষ্যেগানি পহর্ ধোক্ক্যেন্,
আর অমকদ গেইল্ দিইনে শাজন্ গরানা অলঅ জিংকানির পথ্তান।
24ইয়েনি তরে বজং মিলেগুনো আঢত্তুন্ রোক্ষ্যে গুরিবো,
রোক্ষ্যে গুরিবো ভান্ন্যেই পধেদি যেইয়্যে মিলেগুনোর
মিদে মিদে কধানিত্তুন্।
25তা দোলান্ চেইনে তুই লুভ্ ন-গুরিচ্,
তা চোগো পাদাত্ তুই নিজোরে বন্দি অবাত্তে ন-দিচ্;
26কিত্তে বেশ্যেবো যেরেদি তরে হানা দুঘোত্
ফেলেব,
আর বেশ্যেবো তঅ দোল্ জিংকানিগান শিগের্ গুরিবো।
27যুনি কনজনে আগুন তুলি লোইনে নিজো করত্ রাগান
সালে কি তা কাবড়ান পুড়ি ন-যেবঅ?
28যুনি কনজনে জোল্ জোল্যে আঙারা উগুরে আঢন্
সালে কি তা টেঙান্ পুড়ি ন-যেবঅ?
29যে মানুচ্চো অন্য মোগো ইদু যায় তা দজাগান্ এবাবোত্যে অয়;
যে সেই মিলেবোরে ধরে তাত্তুন্ সাজা পাহ্ পড়িবো।
30হেই ন-পেইনে ভুগ্ মারেবাত্তে যে চুর্ গরে,
সেই চুর্বোরে মান্জ্যে ঘিনাইদে চোগেদি ন-দেগন্।
31তো যেক্কেনে তে ধরা পুরিবো
সেক্কেনে অয়ত তারে সাতগুন ফিরেই দিয়্যে পুরিবো,
অয়ত তা ঘরর্ বেক ধনানিয়ো তারে দি দিয়্যে পুরিবো।
32যে সিনেলী গরে তার বুদ্ধির অভাব আঘে;
তে সিয়েনি গুরিনে নিজোরে ভস্ত গরে।
33তা ভাগ্যত্ আগেদে আঘাত আর অগমান্,
তা দুর্নামানি কনদিন্অ ঢাগা ন-যেবঅ;
34কিত্তে মনর্ জ্বালাগানে নেগর্ দর্গরেপারে রাগ্কানরে জাগেই দে;
হেনা সুজিবার অক্তত্ তে কনঅ দোয়্যে ন-দেগেব।
35কনঅ ক্ষতিপূরণ তে মানি ন-লবঅ,
ভালোক্কুন্ ঘুষ্ দিলেয়ো তে হুজি ন-অবঅ।
Copyright © 2021 Bangladesh Bible Society