গম্ উপদেজ্ 5
5
বেশ্যে পৌইদ্যেনে উজিয়ার কধা
1মর্ পুয়োবো, মুই যে জ্ঞানর কধা কঙর্ সিয়েন গমেডালে শুন্;
মঅ বিচেরবুদ্ধির্ কধানি শুন্।
2সেক্কে তুই গম্-ভান্ন্যেই বুঝিবার খেমতাগান রোক্ষ্যে গুরি পারিবে,
আর তঅ মুয়োনত্তুন্ জ্ঞানর কধা বার্ অবঅ।
3বেশ্যেমিলেবোর ঠুদোত্তুন্ যেন মধু ঝুরি পড়ে,
তা কধাবাত্তানি তেলত্তুন্ বেশ্ নরম;
4মাত্তর্ সিয়েনর শেজ্ ফল অয় বিষো ধোক্ক্যেন্ তিদে,
দ্বিকিত্তেদি ধার্ দিয়্যে ছুরি ধোক্ক্যেন ধারেয়্যে।
5তা পথ্তান মরণ জাগাত্ লাম্মেগোই,
সিয়েন উজু গুরি যেইয়্যে মরণ জাগান ইন্দি।
6জিংকানির ইন্দি যেবার পধ কধা তে চিদে চজ্জায়ো ন-গরে;
তা আঢিবার পথ্তান বেঙা, মাত্তর্ তে সিয়েন হবর্ ন-পায়।
7মঅ পুয়োগুন, এবেরা মঅ কধাগান শুনো,
মুই যিয়েন কঙর্ সিয়েনত্তুন্ এক্কেনায়ো ন-লড়িবা।
8সেই মিলেবোত্তুন্ তঅ টেঙানি দূরোত্ তঅ,
তা ঘর দোরান ইদুয়ো ন-যেচ্;
9যুনি যাচ্ সালে তর্ গাবুরো বলান্ অন্যগুনো ইদু দি দিবে
আর তঅ আয়ুগান দি দিবে চিৎ নপুজ্যে মানুচ্চুনোরে।
10সেক্কে ন-চিন্যে মানুচ্চুনে তঅ ধন-সোম্বোত্তিগানি ভোগ গুরিবাক্,
আর তঅ কামর্ ফলুন যেবাক্ অন্য মানুচ্চুনো ঘরত্।
11জিংকানির শেজত্ যেক্কেনে তঅ কিয়্যে আর য়েরাগান ভস্ত অবঅ
সেক্কেনে তুই আবিলেচ্ হেবে।
12তুই কবে, “হায়! মুই শাজন্ গরানাগান্ ঘিনেয়োং,
মঅ মনানে বুদুলিবার কধাগান ঈচ্ গোজ্যে।
13মঅ মাস্তরুনো কধা মুই ন-শুনোং,
যিগুনে মরে শিক্ষ্যে দুয়োন তারা কধা মুই কান ন-পাদং।
14সমাজ মানুচ্চুনো আঢত্ পুরিনে
মুই পেরায় মুরি যাঙর্।”
নিজো মোক্কো ইদু হুজি অনা
15তর্ নিজোর তুবেয়্যে পানিত্তুন্ তুই পানি হাহ্;
তর্ নিজো কূয়োবোর লগেলগ্ পানি হাহ্।
16তর্ নিজো পয়নালাবোর্ পানিগান কিত্তে বারেদি পুরিবো?
তর্ নালা পানিগান কিত্তে পদথ্ পুরিবো?
17তঅ পুয়ো-ছাগুন তর্ গায় গায় থোক্,
বেশ্যেমিলেগুনোর সিয়েনত্ ভাগ ন-থোক্,
18তঅ পয়নালাবো ইদু বর্ দুয়োং,
তঅ গাবুজ্যে মোক্কোরে নিইনে তুই রঙ্গ-ফুত্তি গর্।
19সেই কোচ্পেইয়্যে মিলেবো, অমকদ দোল্ মিলেবো;
তা বুক্কো তরে নিত্য হুজি রাগোক্,
তুই নিত্য তা কোচ্পানালোই মিলেমিলি গুরি থেচ্।
20মঅ পুয়োবো, কিত্তে তুই বেশ্যে মিলেবোলোই রঙ্গ-ফুত্তি গুরি থেবে?
তা বুগোত্ কিত্তে তুই বেড়েকোরে ধুরিবে?
21মানুচ্চুনোর্ আঢাউদো উগুরে লগেপ্রভু চোগ্ রাগেয়্যে;
তারার বেক্ পথ্তানি তে পোরোক্ষ্যে গুরি দে।
22পাজি মানুচ্চো তা ভান্ন্যেই কামর ফালত্ পড়ে,
তে নিজো পাপ দুড়িত্ বানা হায়।
23শাজনর্ অভাবে তে মুরি যায়;
নিজোর্ অমকদ ভুলোর কারনে তে তা পথ্তানত্ থির্ ন-থায়।
Copyright © 2021 Bangladesh Bible Society