গম্ উপদেজ্ 4
4
জ্ঞানিগুনোর্ পথ
1ঝি-পুয়োগুন, বাবঅ উপদেজ্ছানি শুনো,
বিচেরবুদ্ধি পেবাত্তে মনযোগ্ দুয়ো।
2মুই তমারে গম্ শিক্ষ্যে দুয়োঙর্,
সেনত্তে মঅ উগুমোর অবাধ্য ন-ওয়ো।
3মুইঅ দঅ মঅ বাবর্ পুয়ো এলুং,
মাবো চোগেদি কুজি আর বানা এক্কো পুয়ো এলুং।
4সেক্কে বাবা মরে শিক্ষ্যে দিইনে কদঅ,
“তর্ বেক মনান্দোই মঅ কধাগান ধুরি রাগেচ্;
মঅ উগুমান মানিনে চুলিচ্, সেক্কে বাঁজিবে।
5জ্ঞান লাভ গর্, বিচের বুদ্ধি লাভ গর্;
মঅ কধানি ভুলি ন-যেচ্, সিয়েনিত্তুন্ সুরি ন-যেচ্।
6জ্ঞানানরে ন-ছাড়িচ্, তেয়ই তরে রোক্ষ্যে গুরিবো;
তারে কোচ্পেচ্, তেয়ই তঅ উগুরে খিয়েল্ রাগেব।
7জ্ঞানী অনার পত্তমান্ অলঅ জ্ঞানান্ পানা;
তর্ যিয়েনি আঘে বেক্কানিলোই বিচেরবুদ্ধি লাভ গর্।
8জ্ঞানানরে পত্তমে রাগা, তেয়ই তরে অজলত্ তুলিবো;
তারে আজাবোদে ধর্, তে তরে সর্মান দিবো।
9তে তঅ মাঢা উগুরে দোল্ মালাছড়া দিবো
আর দোল্ মুকুট বক্শিজ্ দিবো।”
10মঅ পুয়োবো, শুনিচ্, মঅ কধানি তুই মনত্ রাগেচ্,
সেক্কে তুই ভালোক্ বজর বাঁজি থেবে।
11মুই তরে জ্ঞানর পথ্তান দেগেই দুয়োঙর্,
উজু পধেদি তরে চালেই নেযেয়োং।
12সেনত্তে আঢিবার অক্তত্ টেঙান বাড়াদে কনঅ অসুবিধে ন-পেবে,
দাবা দিবার অক্তত্ উজোত্ ন-হেবে।
13উপদেজ্ছানি মনত্ রাগেচ্, ভুলি ন-যেচ্;
সিয়েন রোক্ষ্যে গর্, কিত্তে সিয়েনই তর্ জিংকানি।
14পাজিগুনোর পধেদি তুই টেঙানি ন-বাড়েস্,
ভান্ন্যেই মানুচ্চুনোর পধেদি ন-আঢিচ্।
15সে পথ্তান্ তুই বাদ দে,
সিয়েন উগুরেদি তুই ন-আঢিচ্;
সে পধেদি ন-যেইনে বরং উজেই যাহ্;
16কিত্তে ভান্ন্যেই কাম ন-গুরিলে পাজিগুনোর ঘুম্ ন-অয়;
কাররে উজোত্ হাবেই ন-পারিলে তারার ঘুম্ ন-এজে।
17পাজিগানি অলঅ তারার হানা আর অত্যেচারানি অলঅ তারার মদ।
18গোজেন ভক্তগুনোর্ পথ্তানি বেন্যেমাদান্ বেল পহ্র ধোক্ক্যেন্,
যিবে দিবুজ্যে ন-অনা সং
জোল্ জোল্যেত্তুন্ আরঅ জোল্ জোল্যে ওই থায়।
19মাত্তর্ পাজিগুনোর পথ্তানি গভীন আন্ধার ধোক্ক্যেন্;
তারা হবর্ ন-পান কুবোন্দোই তারা উজোত্ হান।
20মঅ পুয়োবো, মুই যিয়েন কোইয়োং সিয়েনত্ মন দে,
মঅ কধানি শুনিচ্।
21কধানি তর্ চোগো আন্দল্ অবাত্তে ন-দিচ্,
তঅ মনত্ সিয়েনি রাগেচ্।
22যিগুনে এবাবোত্যে গরন্ তারাত্তে সিয়েনি অয় জিংকানি,
সিয়েনিয়ে তারারে পক্তামক্তা গরে।
23বেক্কানিত্তুন্ তঅ মনানরে বেশ্ চুগি দিইনে রাগেচ্,
কিত্তে মনত্তুন্ তঅ জিংকানিগানর বেক্কানি নিগিলি এজে।
24তঅ মুয়োনত্তুন্ বেঙা টেরা কধাগানি দূর গুরি দে,
ঠুদোত্তুন্ বজং কধানি দূরোত্ সোরেই দে।
25তঅ চোগ্কুনে যেন উজুগুরি মুজুঙেদি চায়,
তঅ চোগ্খুনোর রিনি চানাগান্ মুজুঙেদি থির্ রাগা।
26তর্ আঢিবার পথ্তান সং গর্,
সেক্কে তঅ পথ্তান তুই থির্ গুরি পারিবে।
27ডেনেদি বা বাঙেদি ন-ফিরিবে;
ভান্ন্যেয়ত্তুন্ তঅ টেঙানি দুরোত্ রাগেচ্।
Copyright © 2021 Bangladesh Bible Society