গম্ উপদেজ্ 3
3
আরঅ গম্ বুদ্ধি দেনা
1মঅ পুয়োবো, তুই মঅ শিক্ষ্যেনি ভুলি ন-যেচ্,
বেক্ মনান্ দিইনে তুই মঅ উগুমানি পালা;
2কিত্তে সেক্কে তুই বোউত্ আয়ু পেবে
আর তর্ বোউত্ ভালেদি অবঅ।
3বিশ্বেজ্চান আর গম কামানিয়ে যেন কনদিন্অ তরে ছাড়িনে ন-যায়;
তঅ গত্তনাত্ সিয়েনি বানি রাগা,
তঅ মন খাতাদ্ সিয়েনি লিগি রাগা।
4সিয়েনি গুরিলে গোজেন আর মান্জ্য মুজুঙোত্
তুই দোয়্যে আর সুনাঙ্ পেবে।
5তর্ বেক মনান্ দিইনে লগেপ্রভু উগুরে নির্ভর গর্;
তর্ নিজো বিচের বুদ্ধি উগুরে ভরসা ন-গুরিচ্।
6তর্ আঢিবার পধত্ গোজেনরে মুজুঙোত্ রাগেচ্;
তেয়ই তর্ বেক পথ্তানি উজু গুরি দিবো।
7তঅ নিজো চোগেদি জ্ঞানি ন-ওচ্;
লগেপ্রভুরে ভোক্তিগুরিনে দোরেচ্, ভান্ন্যেই কামত্তুন্ দূরোত্ যাহ্।
8সেক্কে তুই পক্তামক্তা অবে আর তঅ আড়ুন্ মগজবলা অবাক্।
9তঅ ধন-সোম্বোত্তিগানিলোই
আর তর্ পৌল্যে কাপ্যে খেত-খেত্তিগানি উৎসর্ব গুরিনে
তুই লগেপ্রভুরে সর্মান দেগা;
10সেক্কে তর্ গলা ঘরানি শোজ্যলোই ভুরি যেবঅ
আর তর্ আড়িগুন্ নুয়ো আংগুর-রসে ভুরি যেবাক্।
11মঅ পুয়োবো, লগেপ্রভুর শাজনান্ এলাফেলা ন-গুরিচ্,
তে গেইল্ দিলে সিয়েন ঈচ্ ন-গুরিচ্;
12কিত্তে বাব্পো যেবাবোত্যেগুরি তা কোচ্পেয়্যে পুয়োবোরে অমকদ গেইল্ দে,
ঠিগ্ সেবাবোত্যেগুরি লগেপ্রভু যিবেরে কোচ্পায় তারে গেইল্ দে।
13বর্ পেইয়্যে সেই মানুচ্চো যে গম্ বুদ্ধিগানি তোগেইনে পায় আর বিচের বুদ্ধি পায়,
14কিত্তে সিয়েনিত্ রূবো বেবসাত্তুন্অ বেশ্ লাভ পাহ্ যায়,
সনাত্তুন্অ বেশ্ সিয়েনিত্ লাভ অয়;
15মণি মুক্তোত্তুন্অ বেশ্ গমবুদ্ধিগানি মংগা,
তর্ চেবার মত কনঅ জিনিজো সমারে সিয়েনর্ তুলোনা ন-অয়।
16তার্ ডেন্ আঢেদি আঘে বোউত্ আয়ু,
বাঙ্ আঢেদি আঘে ধন আর সর্মান।
17তা পধেদি পাহ্ যায় হুজি,
আর তার বেক পধেদি ভালেদি আঘে।
18যিগুনে তারে ধরন তারা ইদু সিয়েন জিংকানি গাজ ধোক্ক্যেন্;
যিগুনে তারে আক্সোনে ধুরি রাগান তারা বর্ পান।
19লগেপ্রভু গম্ বুদ্ধি দিইনে পিত্থিমীর গড়াগান বানেয়্যে,
বিচের বুদ্ধিলোই আগাজ্ছানরে তা জাগানত্ রাগেয়্যে।
20তে জ্ঞান দিইনে মাদি তলেদি পানিগান নিগিলেই আন্যে,
আর আগাজত্তুন্ ফুদো ফুদো শিরো পানি পড়ে।
21মঅ পুয়োবো, তুই তরিৎ বুদ্ধি আর বিচের বুদ্ধি রোক্ষ্যে গর্,
সিয়েনত্ মনযোগ দিচ্।
22তত্তে সিয়েন অবঅ জিংকানি,
তঅ গত্তনাবোত্তে সিয়েন অবঅ দোল্ নেগেলেচ্ ধোক্ক্যেন্।
23সেক্কে তুই গমেডালে তঅ পধেদি যেই পারিবে,
তঅ টেঙত্ উজোত্ ন-লাগিবো।
24ঘুমেবার অক্তত্ তুই ন-দোরেবে,
আর তঅ ঘুমান অবদে সুগোর্।
25আদিক্ক্যেন্গুরি দজা এলে তুই ন-দোরেচ্,
পাজি মানুচ্চুনোর ভস্ত অনা দেগিনে ন-দোরেয়ো;
26কিত্তে তুই লগেপ্রভু উগুরে বিশ্বেজ্ গুরিবে,
আর তে ফালত্ পড়ানাত্তুন্ তঅ টেঙান রোক্ষ্যে গুরিবো।
27যিগুনে উপকার পেবার যগাজ্যে
তারারে উপকার গুরিবার খেমতা যেক্কে তঅ আঢত্ থেবঅ
সেক্কে সিয়েন গত্তে তুই অস্বিগের ন-গুরিচ্।
28সাহায্য গুরিবার খেমতা তঅ আঢত্ থেলে কাররে ন-কোচ্,
“যাহ্, পরেদি এইচ্, এজেত্তে কেল্যে গুরিম।”
29তঅ পাড়াল্যেগুনো বিরুদ্ধে কনঅ বজং সল্লা ন-গুরিচ্,
তে দঅ তঅ কায়-কুরে গমেডালে বজত্তি গরের্।
30যে মানুচ্চো তর্ কনঅ ক্ষোতি ন-গরে,
এনেবাদে তারে দুযি ন-গুরিচ্।
31কনঅ অত্যেচারি মান্জ্যরে দেগিনে ইংসেই ন-জুলিচ্,
বা তার কনঅ পধ্অ তুই বেঈ ন-নেযেচ্;
32কিত্তে বেঙা পধেদি যেইয়্যে মানুচ্চুনোরে লগেপ্রভু ঈচ্ গরে,
মাত্তর্ গম্ মন মানুচ্চুনো সমারে তে উদো লোলি রাগায়।
33পাজি মান্জ্য ঘর উগুরে লগেপ্রভুর অভিশাব থায়,
মাত্তর্ গোজেন ভক্তগুনোর্ ঘরানিরে তে বর্ দে।
34যিগুনে ঠাট্টা-তামাজা গরন তারারেয়ো তে ঠাট্টা-তামাজা গরে,
মাত্তর্ নম্রগুনোরে দোয়্যে গরে।
35জ্ঞানিগুনে সর্মান পেবাক্,
মাত্তর্ বিবেচনা নেইয়্যে মানুচ্চুনোর পাওনা অলঅ লাজ্ পানা।
Copyright © 2021 Bangladesh Bible Society