গম্ উপদেজ্ 2
2
গম্ বুদ্ধি দেনা
1মঅ পুয়োবো, তুই যুনি মঅ কধাগান শুনোচ্
আর তঅ মনান ভিদিরে মর্ বেক উগুমানি
থুবেই রাগাচ্,
2যুনি গম বুদ্ধিগানি শুনোচ্
আর বিচের বুদ্ধিগানি ইন্দি মনান্ দুয়োচ্,
3যুনি মগজ্ছান এক্কা লাড়াচ্
আর রঅ ছাড়ি ছাড়ি বিচের বুদ্ধিগানরে ডাগচ্,
4যুনি রূবো তগাইদ্যে ধোক্ক্যেন্ গুরি গম বুদ্ধিগানরে তগাচ্
আর লুগেয়্যে ধন ধোক্ক্যেন গুরি সিয়েন তোগেই চাহ্,
5সালে লগেপ্রভু উগুরে ভোক্তিবলা দরানাগান্ কি,
সিয়েন তুই বুঝি পারিবে আর গোজেন পৌইদ্যেনে জ্ঞান পেবে;
6কিত্তে লগেপ্রভু গম বুদ্ধি দান গরে,
তা মুয়োত্তুন্ জ্ঞান আর বিচের বুদ্ধি নিগিলি এজে।
7গম্ মনর্ মানুচ্চুনোত্তে
তে তরিত্ বুদ্ধি থুবেই রাগায়;
যিগুনে গমেডালে চলন্ তে তারার ঢাল অয়,
8যেন তে দোল্ বিচের গুরি পারে,
আর তা ভক্তগুনোর্ পথ্তানি রোক্ষ্যে গুরি পারে।
9যুনি তুই মঅ কধাগান শুনোচ্,
সালে বুঝি পারিবে কুবোন্ যগাজ্যে, দোল্ আর গম
আর বুঝি পারিবে ভালেদির্ বেক পধ্তানি;
10কিত্তে গম বুদ্ধিগানি তঅ মনত্ চোমেব,
আর জ্ঞানানে তঅ পরাণান্ হুজি রাগেব।
11তর্ গম-ভান্ন্যেই বুঝিবার খেমতাগানে তরে রোক্ষ্যে গুরিবো,
আর বিচের বুদ্ধিগানে তরে চুগি দিবো।
12সেক্কে পাজি মানুচ্চুনোত্তুন্ জ্ঞানানে তরে রোক্ষ্যে গুরিবো;
রোক্ষ্যে গুরিবো তারাত্তুন্-
যিগুনে মিজে কধা কন্,
13যিগুনে আন্ধার পধেদি আঢিবাত্তে উজু পথ্তান্ বাদ দুয়োন,
14যিগুনে ভান্ন্যেই কামত্ হুজি অন,
ভান্ন্যেই কু কামত্ যিগুনোর রঙ্গ-ফুত্তি,
15আর যিগুনে বেঙা আহ্ বজং পধেদি চলন্।
16জ্ঞানানে তরে রোক্ষ্যে গুরিবো বেশ্যে মিলেগুনোর আঢত্তুন্,
মিদে কধালোই ভরা বজং পধেদি যেইয়্যে মিলেগুনো আঢত্তুন্।
17তে তার গাবুরো অক্তত্ নেক্কোরে ছাড়ি দিয়্যে
আর তার গোজেনর থিদেবর্ গোজ্যে সুদোমানি অমান্য গোজ্যে।
18তুই তা ঘরত্ সোমেলে মরণ পধেদি উজেই যেবে,
তা লগে মিজেলে মরাগুনো ইদু লুমিবে।
19যিগুনে তাইদু যান্ তারা কনজনে আর্ ফিরি ন-এজন,
তারা বাঁজিবার পথ্তান্ ন-পান।
20জ্ঞানানে তরে সিয়েনিত্তুন্ রোক্ষ্যে গুরিবো
যেনে তুই গম্ মানুচ্চুনোর পধেদি,
গোজেন ভক্তগুনোর্ পধেদি যেই পারচ্।
21গম্ মানুচ্চুনে দেজত্ বজত্তি গুরি পারিবাক্,
নিদ্দুযি মানুচ্চুনে সিগুনো ভিদিরে টিগি থেবাক্;
22মাত্তর্ দেজত্তুন্ পাজি মানুচ্চুনোরে কাবি ফেলা অবঅ
আর অবিশ্বেজিগুনোর শিঙোরানি উগুড়ে ফেলা অবঅ।
Copyright © 2021 Bangladesh Bible Society