গম্ উপদেজ্ 29
29
1ভালোক্বার সংশোধনর কধা শুনিনেয়ো যে মানুচ্চো
গত্তনাবো দরমর গুরি রাগায়
তে যে কনঅ সময়োত ভস্ত ওই যেবঅ;
তে আর উদি ন-পারিবো।
2গোজেন ভক্ত মানুচ্চুন্ বাড়িলে মান্জ্যে হুজি অন্,
মাত্তর্ পাজি মানুচ্ শাজন্গুরিয়্যে অলে মান্জ্যে ছদ্ফদান।
3যে মানুচ্চো জ্ঞান কোচ্পায় তে তা বাবরে হুজি গরায়,
মাত্তর্ যে বেশ্যেগুনো লগে থায় তে তার ধন বরবাত্ লাগায়।
4ন্যায়বিচেরলোই রাজা দেজ্ছানরে থির্ রাগায়,
মাত্তর্ যে ঘুষ্ হেবাত্তে গম্পায় তে দেজ্ছানরে ভস্ত গুরি ফেলায়।
5যে মানুচ্চো পাড়াল্যেগুনোর চাম্চাগিরি গরে
তে নিজো টেঙত্ তলে জালান্ পাদে।
6পাজি মান্জ্যে নিজোর পাপে ফালত্ পড়ে,
মাত্তর্ গোজেন ভক্ত মান্জ্যে হুজি অন আর গিদ্ গান।
7নাঢা মানুচ্চুনো উগুরে যেন ন্যায় বিচের গরা অয়
সিন্দি গোজেন ভক্ত মানুচ্চুনোর চোগ্ আঘে,
মাত্তর্ পাজিগুনে ইয়েনি কিচ্চু ন-বুঝোন্।
8ঠাট্টা-মশ্কারি গুরিয়্যেগুনে শঅর ভিদিরে যাগুলুক্ বাজেই দুয়োন্,
মাত্তর্ জ্ঞানী মানুচ্চুনে মান্জ্যর রাগ্কানি থামেই দুয়োন্।
9বুদ্ধিমান মান্জ্যে যুনি বাজে মান্জ্যর বিরুদ্ধে মগদ্দমা গরে
সালে সে মানুচ্চো অয়ত রাগ্ উদিবো নয়ত আজিবো,
আরে সেক্কে কনঅ মীমাংসা ন-অবঅ।
10যিগুনে লো ঝরান্ তারা নিদ্দুযি মান্জ্যরে ঈচ্ গরন
আর গম মান্জ্যরে মারে ফেলেবার চেট্ট্যা গরন।
11বিবেচনা নেইয়্যে মান্জ্যে তা রাগ্কান বেক্কান ফগদাং গরে,
মাত্তর্ জ্ঞানী মান্জ্যে তা রাগ্কান দোঙেই রাগায়।
12যে শাজন্গুরিয়্যেবো মিজে কধা শুনে তার বেক চাগরি গুরিয়্যেগুন পাজি।
13নাঢা আর অত্যেচারী মানুচ্চুনে এক্কান পৌইদ্যেনে সংসং-
লগেপ্রভু তারার দ্বিজনরে জিংকানি দিয়্যে।
14যে রাজাবো গমেডালে নাঢা মানুচ্চুনোর বিচের গরে
তা সিংহাসনান্ নিত্য থির্ থায়। 15সংশোধন কধা আর শাজন্ গুরিবার লুদিক্কো জ্ঞান দান গরে,
মাত্তর্ যে পুয়োবোরে শাজন্ গরা ন-অয়
তে তার মাবোরে লাজ্ দে।
16পাজি মানুচ্চুন্ বাড়িলে পাপ বেজ্ অয়,
মাত্তর্ গোজন ভক্ত মান্জ্যে তারার ভস্তগান দেগন্।
17তঅ পুয়োবোরে শাজন্ গর্,
সেক্কে তে তরে গমেডালে রাগেব
আর তঅ পরাণানত্ হুজি দিবো।
18যিয়েনত্ ভাববাদীগুনোর ভিদিরেদি গোজেনে তার সত্যগান ফগদাং ন-গরে
সে জাগার মানুচ্চুনে হযবরল অন;
মাত্তর্ সে মানুচ্চো বর্ পেইয়্যে যে লগেপ্রভুর সুদোমানি মানি চলে।
19বানা কধালোই চাগররে সংশোধন গরা ন-যায়;
তে বুঝিলেয়ো সিয়েন ন-মানিবো।
20তুই কি এধোক্ক্যেন মান্জ্যরে দেখ্যচ্
যে যাদিমাদি গুরিনে কধা কবাত্তে যায়?
তাত্তুন্ বরং বিবেচনা নেইয়্যেগুনো পৌইদ্যেনে আজা আঘে।
21চিগোনত্তুন্ ধুরি যুনি কনঅ চাগররে আশ্কারা দিয়্যে অয়,
যেরেদি তারে দোঙা ন-যায়।
22রাগী মান্জ্যে কোল্-কোজ্যে বাজেই দুয়োন্,
আর বদ্মেজাজী মান্জ্যে বোউত্ পাপ গরন্।
23বাড়্বো গরানাগানে মান্জ্যরে তলে ফেলায়,
মাত্তর্ নম্র স্বভাবর মান্জ্যে সর্মান পান্।
24যে চুর্ গোজ্যেবোর সমাজ্যে তে নিজে নিজোর্ শত্রু;
তারে শমক্ গোজ্যেগান্ শুনেলেয়ো তে কনঅ কিজু স্বিগের্ ন-গরে।
25মান্জ্যরে যে দরায় সে দরানে তা তপ্পে ফাল্ অয়,
মাত্তর্ যে লগেপ্রভু উগুরে বিশ্বেজ্ গরে তে গমেডালে থায়।
26বিচেরত্ ভালোক্জনে শাজন্ গুরিয়্যেবোরে নিজোর তপ্পে আনিবাত্তে চান্,
মাত্তর্ লগেপ্রভুত্তুন্ মান্জ্যে দোল্ বিচের পান্।
27গোজেন ভক্ত মানুচ্চুনে অন্যেয় গুরিয়্যেবোরে ঈচ্ গরন্,
আর যে মানুচ্চো সোজা পধেদি যায় পাজিগুনে তারে ঈচ্ গরন্।
Copyright © 2021 Bangladesh Bible Society