গম্ উপদেজ্ 27
27
1এজেত্তে কেল্যে পৌইদ্যেনে বাড়্বো ন-গোজ্য,
কিত্তে কন্ দিন কি অবঅ সিয়েন তুই হবর্ ন-পাজ্।
2অন্য জনে তরে নাঙ্ গিনোক্,
তঅ নিজো মুয়োনে ন-গোরোক্;
অয়, অন্য জনে সিয়েন গোরোক্।
3পাত্তরুন্ গুয়োর্ আর কোরোলীগানিয়ো গুয়োর্,
মাত্তর্ বাজে মান্জ্যরে রাগ্ তুলি দিলে
তে সেই দ্বিয়েনত্তুন্অ গুয়োর্ অবঅ।
4রাগ্ জিনিস্চান চিৎনপুজ্যে আর দাঙর্ বান পানি ধোক্ক্যেন্,
মাত্তর্ ইংসে-নিন্দে মুজুঙোত্ কনজনে থিয়্যেই থেই ন-পারে।
5কনজনে যুনি তরে কোচ্পান অদচ সিয়েন ফগদাং ন-গরে,
তাত্তুন্ বরং কনজনে যুনি তরে
গমেডালে দুজ্ছান দেগেই দুয়োন সিয়েন গম্।
6শত্রুয়ে বোউত্ চুমি পারন,
মাত্তর্ সমাজ্যের্ দিয়্যে আঘাদত্ বিশ্বেজ্ আঘে।
7যিবে পেট্তো ভরা মধুয়ো গম্ ন-পায়,
মাত্তর্ যিবের পেট্ পুরে তাইদু তিদেগান্অ মিদে লাঘে।
8পেগো বাহ্ ইরি দিয়্যে ঘুরি বেড়েয়্যে পেক্কো যেধোক্ক্যেন্,
ঘর্ ইরি দিয়্যে ঘুরি বেড়েয়্যে মানুচ্চোয়ো সেধোক্ক্যেন্।
9তুম্বাজ্ তেল আর আগর্বাট্টি্বো মনানরে হুজি রাগায়;
ঠিগ্ সেধোক্ক্যেন সমাজ্যের্ দিয়্যে উবদেজ্
সমাজ্যে ইদু মিদে লাগে।
10নিজোর বা বাবঅ সমাজ্যেবোরে ছাড়ি ন-দুয়ো;
দজাত্ পড়িলে ভেইয়ো ঘরত্ ন-যেয়ো;
দূরোত্ থেইয়্যে ভেইয়োত্তুন্ কায়-কুরে পাড়াল্যেগুন্ গম্।
11মঅ পুয়োবো, তুই জ্ঞানবলা অ
আর মঅ মনানরে হুজি গর্;
সেক্কে যিগুনে মরে ঈচ্ গরন্
তারারে মুই জোব্ দি পারিম্।
12উজিয়ার মান্জ্যে দজা দেগিনে আশ্রয় নেযান্,
মাত্তর্ ভুল্ মান্জ্যে দজা দেগিনে যাহ্ ধরন্
আর সিয়েনত্তে সাজা পান্।
13যে মান্জ্যে বিদেশী মান্জ্যর জামিন অয় তা পজাক্কানি নেযা;
যে মান্জ্যে অন্য কনঅ দেজ মান্জ্যর জামিন অয়
তারে বন্ধগী জিনিস ইজেবে রাগা।
14যে মানুচ্চো বেন্যেপোত্যে উদিনে রঅ ছাড়িনে তা পাড়াল্যেগুনোরে বর্ দে
সিয়েন অভিশাব্ বিলিনে ধুরি নেযা পুরিবো।
15কোল্-কোজ্যে গুরিয়্যে মোগ্ আর ঝড় দিনোত্ টপ্ টপ্ গুরি পানি পড়ানা-
দুনোগান্ এক্কুই।
16বোইয়্যেরানরে যেধোক্ক্যেন্ লুগেই ন-পারে,
আর ডেন্ আঢ্তোই লাগেয়্যে তুম্বাজ্ তেল বাজ্ছান্
যেধোক্ক্যেন লুগেই ন-পারে,
সেধোক্ক্যেন্ কোল্ বাজেয়্যে মিলেরেয়ো লুগেই ন-পারে।
17লুয়োরে যেধোক্ক্যেন্ লুয়োই ধারায়,
সেধোক্ক্যেন্ এক্কো আর এক্কোর জিংকানিগানরে
কামর্ যগাজ্যে গুরি দে।
18যে মানুচ্চো ডোমোর গাজরে যত্তন্ গরে তে তার ফলুন্ হেবঅ;
যে তা গিরোজ্সোরে সেবা গরে তে সর্মান পেবঅ।
19পানিত্ যেধোক্ক্যেন্ মুয়ো চেঙারাগান দেগা যায়,
সেধোক্ক্যেন্ অন্য একজনর খাচ্চ্যত্ চেইনে নিজোর খাচ্চ্যত্তান্ বুঝো যায়।
20গোর জাগা আর নরগর্ যেধোক্ক্যেন কনদিন্অ ঈল্ ন-অয়,
সেধোক্ক্যেন্ মান্জ্য চোগোর্অ ঈল্ ন-অয়।
21রূবো পোরোক্ক্যে চেবাত্তে গোলেবার পিলে আঘে,
আর সনাত্তে চুলো আঘে,
মাত্তর্ মান্জ্যে যে বাঈনীগান্ পায় সিয়েন্দোই তারে পোরোক্ক্যে গরা অয়।
22বাজে-বিবেক্ মান্জ্যরে যুনিয়ো শোজ্যলোই
হামানদিস্তালোই গুড়ি গরা অয়,
তো তার ভুলানে তারে ছাড়ি ন-যেবঅ।
23তঅ ছাগল-ভেড়াগুনোর অবস্থা
তুই গমেডালে হবর্ রাগা,
আর তর য়েমান পালুনো ইন্দি মনান্ দিচ্;
24কিত্তে ধনান্ জিংকানিবর্ নয়,
আর মুকুট্তো বংশর পর বংশ টিগি ন-থায়।
25খেদত্তুন্ যেক্কে খেড়ানি কাবি ফেলা অবঅ আর নূয়ো ঘাস উদিবো
আর মুড়োত্তুন্ ঘাস কাবিনে আনা অবঅ,
26সেক্কে ভেড়া ছঅগুনে তঅ কাবড়ানি যুক্কুলেবাক্,
আর ছাগলুনে নুয়ো ভুইয়োর্ দাম্ দিবাক্;
27ইয়েনি বাদেয়ো তর আর তঅ গিরিত্তে
তুই যগাজ্যে দুধ পেবে;
তর্ গাবুজ্যে চাগরানীগুনেয়ো সিয়েনি হেইনে পক্তামক্তা অবাক্।
Copyright © 2021 Bangladesh Bible Society