গম্ উপদেজ্ 25
25
শলোমনর্ আরঅ কিজু উপদেজ
1ইয়েনি শলোমনর্ কোইয়্যে আরঅ গম্ উপদেজ্।
যিহূদার রাজা হিষ্কিয়োর মানুচ্চুনে ইয়েনি তোগেইনে
আরঅ লিগি নেযেয়োন।
2গোজেনে কনঅ পৌইদ্যেনে গুমুরোত্ রাগেলে সিয়েন তার বাঈনী অয়;
রাজাগুনে কনঅ পৌইদ্যেনে হবর্ লোইনে ফগদাং গুরিলে
সেক্কে তারার্ বাঈনী অয়।
3আগাজ্ছান যেধোক্ক্যেন অজল্ আর পিত্থিমীগান গভিন্,
সেধোক্ক্যেন্ রাজাগুনোর রিবেঙানি তোগেইনে ন-পায়।
4রূবোত্তুন্ আজলান্ নিগিলেই ফেল,
সালে বান্যেবো সিয়েনিলোই
দোল্ জিনিস বানেই পারিবো।
5পাজি চাগর্বোরে রাজা মুজুঙেত্তুন্ সোরেই দুয়ো,
সালে গম্ কামর ভিদিরেদি তা সিংহাসনান্ থির্ থেবঅ।
6রাজার মুজুঙোত্ নিজোরে জাহির্ ন-গোজ্য;
মহৎ মানুচ্চুনো ভিদিরে নিজোত্তে জাগা দাবি ন-গোজ্য;
7কিত্তে তুই যেধোক্ক্যেন্ আগেত্তুন্ ধুরি দেখ্যচ্
সেধোক্ক্যেন্ গুরি দাঙর্ মান্জ্য মুজুঙোত্ চিগোন অনাত্তুন্
বরং তরে কনা উজিত, “ইদু উদি আয়।”
8যাদিমাদি মগদ্দমাত্ ন-যেচ্,
কিত্তে যেরেদি তঅ পাড়াল্যেবো যুনি তরে লাজত্ ফেলায়
সেক্কে তুই কি গুরিবে?
9পাড়াল্যে বিরুদ্ধে যুনি মাম্লা গরচ্
সালে অন্যগুনোর গুমুরো কধানি ফগদাং গুরি ন-দিচ্;
10যুনি সিয়েন গরচ্ সালে যে শুনিবো তে তরে নিন্দে গুরিবো,
আর তঅ বদ্নাং গরানাগান কনদিন্অ কাঢা ন-যেবঅ।
11ঠিগ্মজিম কধা কনা যেন নক্সা গোজ্যে রূবো উগুরে বোজেয়্যে
সোনার ফল।
12সনার দুল্ বা গম্ সনার নেগেলেচ্ যেধোক্ক্যেন্,
সেধোক্ক্যেন্ বাধ্য মান্জ্যর কানত্ জ্ঞানী মান্জ্যর সংশোধনর কধা।
13বিশ্বেজি হবর্ দিয়্যেবো তা গিরোজ ইদু
যেন খেত-খেত্তি কাবিবার অক্তত্ ঠান্ডা তুষার;
কিত্তে যিগুনে তারে পাদেয়োন তে সেই গিরোজ্সোর পরানান্ জুড়োয়।
14যে মানুচ্চো দান গুরিবার পৌইদ্যেনে দাঙর্ দাঙর্ কধা কয়
অদচ্ সিয়েন ন-গরে,
তে এমন্ হুয়ো আর বোইয়্যের ধোক্ক্যেন
যিয়েন সমারে কনঅ ঝড় ন-এজে।
15রাগ্ দোঙেই রাগেলে নেতারে নিজোর তপ্পে আনা যায়;
নম্র কধাবাত্তা আড়্গড়া ভাঙি ফেলেই পারে।
16তুই মধু পেলে পরিমান মজিম্ হেচ্,
বেশ্ হেলে উগুলিবে।
17পাড়াল্যেগুনোর ঘরত্ কম যেচ্,
বেশ্ গেলে তে তরে গম্ ন-পেবঅ।
18যে মানুচ্চো পাড়াল্যে বিরুদ্ধে মিজে সাক্ষি দে
তে গদা, তলোয়ার আর ধারেয়্যে সেল ধোক্ক্যেন্।
19দজাত্ পড়িনে অবিশ্বেজি মান্জ্য উগুরে নির্ভর গরানা
বজং দাত্ আর আদুড়ো টেঙ ধোক্ক্যেন্।
20যিবের মনান্ গম্ নয় তা মুজুঙোত্ যে গান গায়
তে এমন্ মান্জ্য ধোক্ক্যেন যে ঝার্কালত্ কাবড় হুলি ফেলায়
বা সোডা উগুরে সির্কা দে।
21তঅ শত্রুর যুনি পেট্ পুড়ে তারে হেবাত্তে দে,
যুনি তার পানি তিরেস্ পায় তারে পানি দে;
22সিয়েন গুরিলে তুই তা মাধাত্ জোল্ জোল্যে আঙারা কুরেই রাগেবে,
আর লগেপ্রভু তরে বক্শিজ্ দিবো।
23উত্তেরেদি বোইয়্যেরানে যেধোক্ক্যেন্ ঝড় আনে,
সেধোক্ক্যেন্ নিন্দেগুরিয়্যেবোর কধালোই অন্যগুনোর মুয়োত্ রাগর্ ভাব দেগা যায়।
24কোজ্যে বাজেয়্যে মিলে সমারে ঘর ভিদিরে বজত্তি গরানাত্তুন্
বরং ছাল উগুরে এক কনাত্ গায় গায় বজত্তি গরানা গম্।
25পানি তিরেস্ পেইয়্যে মান্জ্যত্তে যেধোক্ক্যেন ঠান্ডা পানি,
সেধোক্ক্যেন্ দূরোত্তুন্ এচ্চ্যে গম্ হবর্।
26ঘুল্ গুরি ফেল্যে আর দুষিত গোজ্যে পয়নালাবোর পানিগান যেধোক্ক্যেন্,
পাজি মান্জ্যর কারনে পাপত্ পোজ্যে গোজেন ভক্ত মানুচ্অ সেধোক্ক্যেন্।
27বেশ্ মধু হানা গম্ নয়;
বাঈনী গরা হেবাত্তে চেরেস্তা গরানায়ো গম্ নয়।
28যে মানুচ্চো নিজোরে দোঙেই ন-পারে
তে এবাবোত্যে শঅর ধোক্ক্যেন্ যিয়েনর দেবালান্ ভাঙি ফেলা ওইয়্যে।
Copyright © 2021 Bangladesh Bible Society