গম্ উপদেজ্ 24
24
1তুই পাজি মানুচ্চুনোরে ইংসে ন-গুরিচ্,
তারা লগে থেবাত্তে আওজ্ ন-গুরিচ্;
2কিত্তে তারার রিবেঙানিয়ে অত্যেচার্ গুরিবার কুজুরোমি গরে,
আর তারার মুয়োনি অন্যেয় গুরিবার কধা কয়।
(২০)
3জ্ঞানর বলে ঘরানি বানা অয়,
আর বুদ্ধিলোই সিয়েনি থির্ রাগা অয়;
4জ্ঞানর বলে গুদিগুন ভরা অয়
মূল্যবান্ আর দোল্ দোল্ জিনিসচোই।
(২১)
5জ্ঞানী মান্জ্যর বোউত্ খেমতা আঘে,
আর বুদ্ধিবলা মানুচ্ নিজোর খেমতা বাড়ায়।
6যুদ্ধো গুরিবাত্তে গেলে তুই গম্ সল্লা নিবে,
আর বোউত্ সল্লাদিয়্যে থেলে জিদে যায়।
(২২)
7জ্ঞানান্ বাজে-বিবেক্ মান্জ্যর নাগাল বারেদি;
শঅর-গেদো তেম্মাঙত্ তার কিজু কবার যোগ্যতা ন-থায়।
(২৩)
8যে কনজনে ভান্ন্যেয়র পরিকল্পনা গরে
মান্জ্যে তারে কুজুরোমি গুরিয়্যে বিলি হবর্ পান।
9বাজে-বিবেক্ মান্জ্যর কুজুরোমিগানি অলঅ পাপ;
মান্জ্যে ঠাট্টা-ঈচ্ গুরিয়্যেবোরে ঘিনেন্।
(২৪)
10দজার্ দিনোত্ যুনি তুই আজা নেইয়্যে অচ্,
সালে দঅ তঅ খেমতাগান বেশ্ নয়।
(২৫)
11যিগুনোরে মরণ ইন্দি নেযা অর্
তারারে উদ্ধোর্ গর্;
যিগুনে টল্তে টল্তে জবাই ওই যাদন্
তারারে রোক্ষ্যে গুরিবাত্তে অস্বিগের্ ন-গুরিচ্।
12তুই যুনি কচ্, “মাত্তর্ আমি কিচ্চু হবর্ ন-পেদং,”
মাত্তর্ যিবে রিবেঙান্ মাবে
তে কি তঅ কধাগান বিচের গুরি ন-চেবঅ না?
যিবে তঅ জিংকানগান রোক্ষ্যে গরে
তে কি সিয়েন হবর্ ন-পেবঅ না?
তে কি পত্তি মান্জ্যরে তার কাম মজিম
ফল ন-দিবো না?
13মঅ পুয়োবো, মধু হা, কিত্তে সিয়েন গম;
মু বাত্তুন্ মধু হা, সিয়েন তঅ মুয়োদি মিদে লাগিবো।
(২৬)
14ইয়েন হবর্ পেবে, জ্ঞানান্ তঅ রিবেঙানত্তে মধু ধোক্ক্যেন্ মিদে;
যুনি তুই জ্ঞান পাচ্ সালে তর্ ভবিচ্চদর আজা আঘে,
আর তঅ আজাগান ভাঙি দিয়্যে ন-অবঅ।
(২৭)
15ও পাজি মানুচ্, গোজেন ভক্ত মান্জ্যর ঘরান বিরুদ্ধে
তুই উদ্ পাদি ন-থেচ্,
তার থেবার জাগানত্ হানা ন-দিচ্;
16কিত্তে গোজেন ভক্ত মান্জ্যে সাত পল্লা পুড়িলেয়ো আরঅ উদে,
মাত্তর্ পাজিগুনোর দজা এলে তারা এক্কুবারে ভাঙি পড়ন্।
(২৮)
17তঅ শত্রুবো পড়ি গেলে রঙ্গফুত্তি ন-গুরিচ্;
তে উজোদ্ হেলে তঅ রিবেঙানরে হুজি অবাত্তে ন-দিচ্।
18যুনি সিয়েন গরচ্ সালে লগেপ্রভু সিয়েন দেগিনে বেজার্ অবঅ,
আর শত্রুগুনো উগুরেত্তুন্ তার অমকদ বেজার্ অনাগান্ সোরেই নেযেব।
(২৯)
19তুই পাজি মানুচ্চুনোর বেপারানিলোই মন্ যাগুলুক্ ন-গুরিচ্,
বা বজং মানুচ্চুনোরে দেগিনে ইংসে ন-গুরিচ্;
20কিত্তে পাজি মানুচ্চুনোর ভবিচ্চদর কনঅ আজা নেই,
আর বজং মানুচ্চুনোর জিংকানির-চেরাগ্কো মুরি যেবঅ।
(৩০)
21মঅ পুয়োবো, লগেপ্রভু আর রাজারে ভোক্তি গর্,
আর উল্লোমি গুনো সমারে ন-মিজেয়ো;
22কিত্তে তারা উগুরে অদাতৎ দজা এবঅ,
লগেপ্রভু আর রাজা ইত্তুন্ কিবাবোত্যে দজা এবঅ
সিয়েন কন্না হবর্ পায়?
আরঅ কিজু উপদেজ্
23ইয়েনিয়ো জ্ঞানীগুনোর কোইয়্যে কধা।
বিচেরত্ কারঅ পক্ষ নেযানা গম্ নয়।
24যে মান্জ্যে দুষি মান্জ্যরে কয়, “তুই নিদ্দুযি,”
নানান্ দেজর মানুচ্চুনে সিয়েনিরে নিন্দে গরন,
আর নানান্ জাদে তারে অভিশাব দে।
25মাত্তর্ দুযিরে যিগুনে দুযি বিলিনে রায় দে
তারা উগুরে বোউত্ আশিদ্বাদ পড়ে,
আর তারা সুগি অয়।
26ভন্ডামি নেইয়্যে জোব্পানাগান্ চুমু পানা ধোক্ক্যেন্।
27তঅ খেত্-খামারুন যুক্কোল্ গুরিনে তুই বারেদি কামানি থুম্ গর্,
সে পরেদি তঅ ঘরান্ বান্।
28কিচ্চু হবর্ ন-পেইয়্যে গুরি তঅ পাড়াল্যেগুনো বিরুদ্ধে সাক্ষ্য ন-দিচ্,
বা মুয়োন্দোই ছলনা ন-গুরিচ্।
29এ কধাগান ন-কোইয়ো, “তে তঅ উগুরে যেধোক্ক্যেন গোজ্যে
মুইয়ো তা উগুরে সেধোক্ক্যেন্ গুরিম;
তে যিয়েন গোজ্যে তা ফল তারে দিম্।”
30মুই আল্সি মান্জ্যর খেদন্দি গেলুং,
ভুল্ মান্জ্যর আংগুরো খেদন্দি গেলুং;
31চেলুং বেগ জাগায়ানত্ কাদা গাজ্ জোর্মেয়োন,
হের্লোই মাঢিগান ঢাগা যেইয়্যে,
আর পাত্তর দেবালান্অ ভাঙি পোজ্যে।
32মুই যিয়েন দেগিলুং সিয়েনত্ মনান্ দিলুং,
সিয়েন দেগিনে মুই এ শিক্ষ্যেগান পেলুং,
33“‘আর এক্কেনা ঘুম, আর এক্কেনা ঘুমো ভাব,
জিরেবাত্তে আর এক্কেনা আঢ্তান গুজেই রাগাং।’
34মাত্তর্ বার বার গর্বা এলে বা আত্যের্লোই সাজিনে
দস্যু আঢত্ পড়িলে যেধোক্ক্যেন্ অভাব এজে,
ঠিগ্ সেবাবোত্যে তর্অ অভাব এবঅ।”
Copyright © 2021 Bangladesh Bible Society