গম্ উপদেজ্ 23
23
1তুই যেক্কে শাজন্গুরিয়্যেবো লগে হেবাত্তে বুজিবে,
সেক্কে তঅ মুজুঙোত্ কি আঘে সিয়েন গমেডালে খিয়েল্ গুরিবে।
2যুনি তুই পেটুক্ অচ্ সালে উজিয়ার্!
তুই নিজোরে দোঙেই রাগেইনে হেচ্।
3তার্ মংগা মংগা হানাগানিত্ লুভ্ ন-গুরিচ্,
কিত্তে সে হানাগানি দেনার্ পিজেদি আগেদে
শাজন্ গুরিয়্যেবোর্ কনঅ উদ্দেশ্য।
(৭)
4ধন পেবাত্তে হিজে-হিচ্যে ন-ওইয়ো;
এ পৌইদ্যেনে তঅ বুদ্ধিগান উগুরে বিশ্বেজ্ ন-গুরিচ্।
5ধন-সোম্বোত্তি ইন্দি একবার রিনি চেলে দেগিবে সিয়েনি আর্ নেই,
কিয়া সিয়েনিত্ পুয়োর্ গেজেব
আর ঈগল ধোক্ক্যেন আগাজত্ উড়ি যেবঅ।
(৮)
6লুভি মান্জ্যর হানা ন-হেয়ো;
তার মংগা মংগা হানাগানি হেবাত্তে ন-চেয়ো;
7কিয়া তে এমন্ মানুচ্ যে নিত্য
তা হানাগানর দামান কধা ভাবে।
তে তরে কয়, “হানা-দানা গর্,”
মাত্তর্ তে মনেদি-মুয়োদি এক নয়।
8যিয়েনি তুই হেইয়োচ্ সিয়েনি তুই উগুলি ফেলেবে,
আর তর্ বাঈনী গরানাগান মিজে ওই যেবঅ।
(৯)
9বিবেচনা নেইয়্যে মান্জ্য ইদু কধা ন-কোইয়ো;
তঅ কধাগানত্ যে জ্ঞানান্ আঘে সিয়েন তে ঈচ্ গুরিবো।
(১০)
10দুযিগানর পুরোনা চিহ্নো-পাত্তর্ তুই সোরেই ন-দিচ্
বা বাপ্-মা নেইয়্যেগুনোর ভূইয়ানি গজক্ ন-গুরিচ্,
11কিত্তে তারার্ উদ্ধোর্ গুরিয়্যেবো খেমতাবলা;
তে তঅ বিরুদ্ধে মগদ্দমাত্ কুদুম্মো ইজেবে
তারার তপ্পে নিবো।
(১১)
12তুই শিক্ষ্যেন্দি মনান্ দে,
আর জ্ঞানর কধানি শুন্।
(১২)
13ঝি-পুয়োগুনোরে শাজন্ গুরিবাত্তে এলাফেলা ন-গোজ্য;
তারে লুদিক্কোই মারিলে তে ন-মুরিবো।
14তারে হামাক্কায় তুই লুদিক্কোই মারিনে সাজা দিবে,
সেক্কে গোরত্তুন্ তারে রোক্ষ্যে গুরিবে।
(১৩)
15মঅ পুয়োবো, তঅ মনান্ যুনি জ্ঞানে ভর্পুনং অয়
সালে মঅ মনান্ সুগি অবঅ, অয়, মুই সুগি ওম্।
16যেক্কে তঅ মুয়োনে ঠিগ্ কধা কবঅ
সেক্কে মঅ মনানে হুজি অবঅ।
(১৪)
17তঅ রিবেঙো পাপীগুনোরে ইংসে ন-গোরোক্,
বরং নিত্য লগেপ্রভুরে ভোক্তি গুরি দোরেইনে
তুই আঢাউদো গর্।
18সালে তর্ ভবিচ্চদর্ আজা আঘে,
আর তঅ আজাগান ভাঙি দিয়্যে ন-অবঅ।
(১৫)
19মঅ পুয়োবো, কধাগান শুন, জ্ঞানী অ,
তঅ রিবেঙান্ ঠিগ্ পধেদি চালা।
20যিগুনে বেশ্ গুরিনে আংগুরো-রস হান্
বা যিগুনে বেশ্ পেদুক্ আর বেশ্ য়েরা হান্,
তুই তারা সমারে ন-মিজেস্;
21কিত্তে মাত্তল্ আর পেদুক্কুনে নাঢা ওই যান্,
আর ঘুম ঘুম ভাব্ মান্জ্যরে ফাদা কাবড় উরোই।
(১৬)
22তঅ বাবঅ কধা শুন্
যিবে তরে জর্ম দিয়্যে;
তর্ মাবো বুড়ো ওই গেলে তারে ঈচ্ ন-গুরিচ্।
23যে কনঅ মূল্যে ওক্ সত্য, জ্ঞান, শিক্ষ্যে
আর বিচেরবুদ্ধি পাহ্;
কনঅ কিজুর্ বদলে সিয়েনি অন্যরে ন-দুয়ো।
24গোজেন ভক্তবোর্ বাব্পো বোউত্ হুজি অয়;
জ্ঞানীবলা পুয়োবোর বাব্পো তা পুয়োবোলোই সুগি অয়।
25তঅ মা-বাবে যেন সুগি অয়;
যিবে তরে পুদেয়্যে তে যেন হুজি অয়।
(১৭)
26মঅ পুয়োবো, মঅ শিক্ষ্যেগান মনযোগ দে;
মঅ জিংকানিগান দেগিনে যেন তুই হুজি অচ্।
27চাহ্, বেশ্যের গভিন গাদ ধোক্ক্যেন্,
আর ভান্ন্যেই পধেদি যেইয়্যে মিলেবো যেন লাম্বা গাদ ধোক্ক্যেন্।
28সেবাবোত্যে মিলে ডাগেদ ধোক্ক্যেন্ উৎ পাদি থান্,
আর মান্জ্য ভিদিরে অবিশ্বেজি বাড়েই দুয়োন্।
(১৮)
29কন্না হায় হায় গরে? কন্না আবিলেচ্ গরে?
কন্না কোল্-কোজ্যে গরে? কন্না বেশ্ কধা কয়?
কন্না এনেবাদে আঘাত্ পায়? কা চোগ্কুন রাঙা অন্?
30যিগুনে ভালক্কন্ সং মদ্ হান তারার এবাবোত্যে অয়;
তারা মিজেয়্যে মদ্ হেবাত্তে সিয়েন তোগেবাত্তে যান্।
31মদ কিত্তেদি ন-চেয়ো যুনিয়ো সিয়েন রঙর্,
যুনিয়ো সিয়েন গলজত্ জোগ্জোক্যে,
যুনিয়ো সিয়েন সহজে গত্তনাত্ পড়েগোই;
32যেরেদি সিয়েনে সাপ ধোক্ক্যেন্ কামাড়াই,
আর বিষ্বলা সাপ ধোক্ক্যেন কামাড়াই।
33তঅ চোগ্কুনে সেক্কে আমক্ অবার কান্ড দেগিবাক্
আর মনানে উগুদো যাবুদো কধা ভাবিবো।
34তুই অবে বড়্ গাঙত্ ঘুম যেইয়্যে মান্জ্য ধোক্ক্যেন্,
বা মাস্তুল উগুরে পুরি থেইয়্যে মান্জ্য ধোক্ক্যেন্।
35তুই কবে, “তারা মরে আঘাত্ গোজ্যন্
মাত্তর্ মুই পিড়ে ন-পাং,
মরে তারা মাজ্যন্ মাত্তর্ মুই তার্ ন-পাং।
কক্কনে মুই জাগি উদিনে আরঅ মদ্ তোগেবাত্তে যেম্?”
(১৯)
Copyright © 2021 Bangladesh Bible Society