গম্ উপদেজ্ 1
1
উদ্দেশ্য আর আজল্ কধাগান
1দায়ূদোর পুয়ো ইস্রায়েলর রাজা শলোমনর্ গম্ উপদেজ্।
2ইয়েনি লেগা ওইয়্যেদে যেন মানুচ্চুনে গম্ বুদ্ধি আর শিক্ষ্যে পান,
যেন তারার বিচের্ বুদ্ধি বাড়ে,
3যেন মানুচ্চুনে অন্যগুনো সমারে বিবেচনা গুরিনে চলন্,
যেন বেক্কুনো লগে তারা গমেডালে, দোল্ আর গম্ বেবহার গরন,
4যেন ভুল্ মানুচ্চুনে চালাগ্ অন
আর গাবুজ্যেগুনে জ্ঞান আর বিচেরবুদ্ধি পান,
5-জ্ঞানীগুনে এ উপদেজ্ছানি শুনোদোক্ আর শিক্ষ্যে পাদোক্,
আর বুদ্ধিবলাগুনে শুনিনে পধেদি যাদে কাবিল্ ওদোক্-
6যেন মানুচ্চুনে চলেত্যে কধানি সিয়েনি আর ভেদ্বলা কধানি
আর জ্ঞানীগুনোর কধানি আর ভানাগানি বুঝোন্।
7লগেপ্রভুরে ভোক্তি গুরিনে দরানা অলঅ জ্ঞানর গড়াগান্,
মাত্তর্ যিগুনোর চিদে চজ্জা বাজে ধরনর তারা গম বুদ্ধি আর শিক্ষ্যেনি ঈচ্ গরন।
গাবুজ্যেগুনো ইদু উপদেজ্
8পুয়োবো মর্, তুই তঅ বাব্পো উপদেজ শুনিচ্;
তর্ মা দিয়্যে শিক্ষ্যেনি ভুলি ন-যেচ্।
9সিয়েনি অবঅ তঅ মাঢাবোত্ বেড়েবার দোল্ মালাছড়া
আর গত্তনার নেগেলেচ্ ধোক্ক্যেন।
10পুয়োবো মর্, পাপিগুনে যুনি তরে ভান্ন্যেই পধেদি নিবাত্তে চান
তুই রাজি ন-ওচ্।
11ধোজ্য, কনজনে কলঅ, “আমা লগে এজঅ,
খুন গুরিবাত্তে যেই আমি হাপ্ দি থেই,
কনঅ নিদ্দুযি মান্জ্যরে ধুরিবাত্তে পোল্ল্যেই থেই।
12তারা যেবাবোত্যেগুরি পুরো কিয়্যেগান্দোই জেদাবাদে
মরণ জাগাত, অত্তাৎ সে গাত্তোত্ লামন্দোই,
সেবাবোত্যেগুরি এজঅ, আমি তারারে জেদাবাদে
পুরো গিলি ফেলেই;
13সেক্কে আমি নানান্ বাবোত্যে মংগা মংগা জিনিস পেবং,
আর লুদেয়্যে জিনিসছোই আমা ঘরানি ভোরেবং।
14আমা লগে তঅ ভাগ্যগান্ তুই গুরি লঅ,
আমা টেঙা থৈল্যে এক্কো অবঅ।”
15মঅ পুয়োবো, তুই তারা লগে ন-যেচ্,
তারা পধেদি তঅ টেঙান্ ন-ফেলেচ্;
16কিত্তে তারা টেঙানি পাপ কামত্ যায়,
খুন গুরিবাত্তে তারা ধাবা যান্।
17মান্জ্যে কন, “পেখ্কুনো চোগো মুজুঙোত্ জাল পাদিলে
কনঅ লাভ্ ন-অয়।”
18এ মানুচ্চুনে নিজে খুন্ অবাত্তে হাপ্ দি থান,
নিজে শেজ্ অবাত্তে পৌল্যেই থান্।
19ভান্ন্যেই পধেদি কনঅ কিজু পেবাত্তে যিগুনে যান
তারার বেক্কুনোর দজা এবাবোত্যে অয়;
তারা যিয়েনি পান সিয়েনিলোই তারা জিংকানিগানি শেজ্ গুরি দুয়োন।
দোল্ বুদ্ধির ডাগনি
20দোল্ বুদ্ধি পধে পধে রঅ ছাড়িনে ডাগে,
বাজারত্ রঅ ছাড়ে।
21কোল-কোজ্যেলোই ভরা পধ মুয়োত্ তে রঅ ছাড়ে,
শঅর গেদোত্ সুমিবার পদথ্ তে এ কধাগান কয়,
22ভুল্ মানুচ্চুন, আর কয়দিন তুমি তমার
ভুলো কামানি গম্পেবা?
যিগুনে ঈচ্ গরন তারা আর কয়দিন তারা ইদু
রঙ্গ-ফুত্তি পেবাক্?
যিগুনোর চিদে চজ্জা নেই তারা আর কয়দিন জ্ঞানানরে ঘিনেবাক্?
23মর্ শাজন কধালোই যুনি তুমি শুনিদা,
সালে মঅ আত্মাগান মুই তমা উগুরে ঢালি দিদুং,
মঅ মনঅ কধানি তমারে জানেদুং।
24মুই যেক্কেনে ডাগিলুং সেক্কেনে তুমি মরে এলাফেলা গুরিলে,
আত্ বাবেলেয়ো কনজনে সেক্কে মরে শমক্ ন-দিলে।
25তুমি যেক্কে মর্ বেক উপদেজ্ছানি এলাফেলা গুরিলে,
দুষ্ দেগেই দিলেয়ো সিয়েনি শুনিবাত্তে ন-চেলা,
26সেক্কে তমা ভস্ত অনা দেগিনে মুই আজিম্,
তমা উগুরে দজা এলে তামাজা গুরিম।
27দজা ঝড় ধোক্ক্যেন্ তমা উগুরে লামি এলে,
দজাগানে ঠুত্যে বোইয়্যের ধোক্ক্যেন তমারে ঘুরি ঘুরি নেযেলে,
দুঘোত্-দজাত্ তুমি পুরিলে,
মুই তামাজা গুরিম্।
28“ভুল্ মানুচ্চুনে সেক্কে মরে ডাগিবাক্ মাত্তর্ মুই শমক্ ন-দিম;
তারা মরে তোগেবাক্ মাত্তর্ মরে তোগেইনে ন-পেবাক্।
29তারা জ্ঞানানরে ঈচ্ গোজ্যন্
আর লগেপ্রভুরে ভোক্তিগুরিনে ন-দরান্।
30সেনত্তে মঅ উপদেজ্ছান তারা ন-শুনোন্,
আর ঠিগ গুরিবাত্তে মুই যিয়েনি কোইয়োং সিয়েনি ঈচ্ গোজ্যন্;
31সেনত্তে তারার নিজোর কামর ফল পেবাক্,
নিজো সল্লা গোজ্যে ফল্লোই পেট ভরা পুরিবো।
32ভুল মানুচ্চুনোর ভান্ন্যেই পধেদি যানাগান তারার মরণর দযা অবঅ,
জ্ঞান নেইয়্যেগুনোর চিদেচজ্জা নেইয়্যে মনভাব্পানি তারারে ভস্ত গুরিবো;
33মাত্তর্ যিগুনে মঅ কধাগান শুনোন্ তারা গমেডালে বজত্তি গুরিবাক্;
তারা সুগে-শান্দিয়্যে থেবাক্, অমংগলরে ন-দোরেবাক্।”
Copyright © 2021 Bangladesh Bible Society