গম্ উপদেজ্ 19
19
1যে বিবেচনা নেইয়্যে মানুচ্চো বেঙা-টেরা কধা কয়
তাত্তুন্ সেই নাঢা মানুচ্চো গম্
যে গমেডালে আঢাউদো গরে।
2আরঅ জ্ঞাননেইয়্যে অনায়ো গম্ নয়;
যে মানুচ্চো হিজেহিচ্চ্যে গুরিনে বেক্ কামানি গুরিবাত্তে যায়
তে ভুল্ গরে।
3মান্জ্যর নিজোর ভুলানে তারে ভান্ন্যেয়দি নেযায়,
মাত্তর্ তো তা মনান্ লগেপ্রভু বিরুদ্ধে যায়।
4ধনানে বোউত্ সমাজ্যে আনে,
মাত্তর্ তো নাঢা মান্জ্যে তা সমাজ্যেগুন আরায়।
5মিজে সাক্ষিগুনে সাজা পেবাক্কে পেবাক্;
যে সাক্ষিবো মিজে কধা কয় তে রেহাই ন-পেবঅ।
6দাঙর্ পোজিশন মানুচ্চুনে দোয়্যে পেবাত্তে
বোউত্জনে তার চালাগি গরন্,
আর যিবে দান গরে বেক্কুনে তার সমাজ্যে অন্।
7নাঢা মান্জ্যরে তা কুদুম্মোগুনে বেক্কুনে যেক্কে চোগেদি ন-দেগন্
সেক্কেনে ইয়েন ঘেচ্চেক্গুরি তা সমাজ্যেগুনে
তাত্তুন্ দূরোত্ থেবাক্;
তা কোজোলীলোই তারা কান ন-পাদিবাক্।
8যে নিজোরে কোচ্পায় তে বুদ্ধি পায়;
যে বিচেরবুদ্ধি বেবহার গুরিনে চলে তে আশিদ্বাদ পায়।
9মিজে সাক্ষিবলা সাজা পেবাক্কে পেবাক্;
যে সাক্ষিবো মিজে কধা কয় তে ভস্ত অবঅ।
10বিবেচনা নেইয়্যেবোর্ তপ্পে সুগ্ ভোগ গরানা যেক্কে যগাজ্যে নয়,
সেক্কে চাগর তপ্পে রাজ্পুরুজো উগুরে সদ্দার অনা
আরঅ যগাজ্যে নয়।
11যে মানুচ্চোর বুদ্ধি আঘে সে বুদ্ধিগানে তারে সহজে
রাগ গুরিবাত্তে ন-দে;
তা বিরুদ্ধে কনজনে দুষ্ গুরিলে সিয়েন ন-ধরানা তা পক্ষে বাঈনী গরে পারা।
12রাজার রাগ্কান সিংহ গুজুরোনি ধোক্ক্যেন্,
মাত্তর্ তা দোয়্যেগান যেন ঘাস উগুরে পোজ্যে শিরোপানি।
13বিবেচনা নেইয়্যে পুয়ো তা বাবর সর্বনাশর কারন অয়,
আর কোজ্যে বাজেয়্যে মোগ্ টপ্ টপ্ গুরি ফুদো পড়েদে ধোক্ক্যেন্।
14ঘর-সংসার আর ধন বাবত্তুন্ পাহ্ যায়,
মাত্তর্ বুদ্ধিবলা মোগ্ পাহ্ যায় লগেপ্রভু ইত্তুন্।
15আল্সিগানে গভিন্ ঘুমোত্ নেযায়;
আল্সি মান্জ্যে পেট্পরায় দুঘ্ পায়। 16যে মানুচ্চো গোজেনর সুদোমানি পালায় তে তার জিংকানিগান রোক্ষ্যে গরে;
মাত্তর্ যে তার জিংকানির পথ্তান ইন্দি মনান্ ন-দে তে মুরিবো।
17যে মান্জ্যে নাঢা মান্জ্যরে দোয়্যে গরে তে লগেপ্রভুরে উদোর্ দে;
লগেপ্রভু তার সে উপকারর ফল্ দিবো।
18তঅ পুয়োবোরে শামালা, কিত্তে সিয়েনত্ আজা আঘে;
তা মরণান্ ঘোদেবাত্তে ন-চেয়ো।
19অমকদ রাগি মান্জ্যত্তুন্ সাজা পাহ্ পুরিবো;
তারে একপল্লা রোক্ষ্যে গুরিলে বার্ বার্ গরা পুরিবো।
20উপদেশ শুন্, শাজন্ মানি নেযা;
যেরেদি তুই জ্ঞানি ওই পারিবে।
21মান্জ্য মনত্ বোউত্ সল্লা থায়,
মাত্তর্ লগেপ্রভু যিয়েন ঠিগ্ গোজ্যে সিয়েনই অবঅ।
22মানুচ্ মান্জ্যত্তুন্ গম্ কোচ্পানা পেবাত্তে চায়;
মিজে কধা কোইয়্যেবোত্তুন্ নাঢা মানুচ্চো গম্।
23লগেপ্রভু উগুরে ভোক্তিবলা দরানে পরিপূরোন জিংকানি ইন্দি নেযায়;
যিবের সেই জিংকানিগান আঘে তে ভর্পুনোং থায়,
কনঅ দযা তাইদু এই ন-পারে।
24আল্সি মান্জ্যে বাজোন্নোত্ আঢ্তান ভুরান;
তে আঢ্তান মুয়োনত্ তুলিবাত্তেয়ো ন-চায়।
25ঠাট্টা-মশ্কারি গুরিয়্যেবোরে পিদিলে ভুল্ মানুচ্চো উজিয়ার অয়;
বুদ্ধিবলারে সংশোধন গুরিলে তে জ্ঞান পেবঅ।
26যে পুয়োবো বাবঅ উগুরে অত্যেচার গরে আর মাবোরে ধাবেই দে,
তে তারা উগুরে লাজানাগান্ আর অগমানান্ ডাগি আনে।
27মর্ পুয়োবো, যুনি তুই শাজন্ ন-মানচ্
সালে তুই জ্ঞানর শিক্ষ্যেত্তুন্ অন্যকিত্তেন্দি সুরি যেবে।
28পাজি সাক্ষিগুনে দোল্ বিচেরানি ঈচ্ গরন্;
পাজিগুনে ভান্ন্যেই কামত্ থান।
29ঠাট্টা-মশ্কারি গুরিয়্যেগুনোত্তে সাজাগান্ যুক্কোল্ ওইয়্যে,
আর বিবেচনা নেইয়্যে গুনোর পিঠ্তানিত্তে আগেদে চাবুক্।
Copyright © 2021 Bangladesh Bible Society