গম্ উপদেজ্ 20
20
1যে মানুচ্চো আংগুর-রস হেইনে মাত্তল্ অয় তে ঠাট্টা-মশ্কারি গরে,
আর যিবে মদ হায় তে অমকদ কোল্-কোজ্যে গরে;
ইয়েনি হেইনে যে মাত্তল্ অয় তে জ্ঞানি নয়।
2রাজার রাগ্কান সিংহ গুজুরোনি ধোক্ক্যেন্;
তারে যে রাগ্ তুলি দে তে নিজো পরানানরে দজাত্ ফেলায়।
3কোল্-কোজ্যে ন-গরন্দে মানুচ্চুনে সর্মান পান্;
যিগুনোর বিবেক্ বাজে ধরনর্ তারা বেক্কুনে
কোল্-কোজ্যে গুরিবাত্তে যুক্কোল্ থান্।
4আল্সি মান্জ্যে ঝার্ কালত্ চাষ ন-গরন্,
সেনত্তে খেত্-খেত্তি কাবিবার অক্তত্ তে চেলেয়ো কিচ্চু ন-পেবঅ।
5মান্জ্যর মন আজাগান মাদিত্ তলে থেইয়্যে পানি ধোক্ক্যেন্,
মাত্তর্ বুদ্ধিবলা মান্জ্যে সিয়েন তুলি আনে।
6বোউত্ মান্জ্যে নিজোরে বিশ্বেজি বিলিনে দাবি গরন্,
মাত্তর্ বিশ্বেজবলা মানুচ্ কন্না থোগেইনে পায়?
7গোজেন ভক্ত মান্জ্যে গমেডালে চলে;
বর্ পেইয়্যে তার বংশগুন!
8রাজাবো যেক্কে বিচের্ গুরিবাত্তে সিংহাসনত্ বজে
সেক্কে চোগো ইজিরেলোই তে বেক্ পাজি কামানিরে দূর্ গুরি দে।
9কন্না কোই পারে, “মঅ মনান্ মুই দোল্ গোজ্যং,
মঅ পাপত্তুন্ মুই সাব্ ওইয়োং”?
10ঠিগ্ নেইয়্যে সিল্ আর পাল্লালোই মাবানা-এ দ্বিয়েন লগেপ্রভু ঘিনেই।
11হার্কোজ্যে গাবুজ্যে-গাবুরীগুনোর কামানি দোল্ আর ঠিগ্ ওক্ বা ন-ওক্,
সে কামানিলোই তারা নিজোরে পরিচয় দিবাক্।
12শুনিবাত্তে কানানি আর চেবাত্তে চোগ্-
লগেপ্রভু এ দ্বিয়েন বানেই দিয়্যে।
13ঘুমানরে গম ন-পেয়ো, সেক্কে তুই নাঢা অবে;
জাগন্ থাগঅ, সেক্কে তর্ যগাজ্যে হানা থেবঅ।
14কিনিয়্যেবো কয়, “সিয়েন গম্ নয়, গম্ নয়।”
সে পরেদি তে কিনি নেযায়
আর তা কিনে জিনিসছানিলোই বাড়্বো গরে।
15সনা আঘে, মংগা পাত্তর্অ বোউত্ আঘে,
মাত্তর্ যে মুয়োনে জ্ঞানর্ কধা কয় তা দামান সিত্তুনো বেশ্।
16যে মানুচ্চো বিদেশি মান্জ্যর জাবিন্ অয় তা পোজাক্কানি নেযঅ;
যে মান্জ্যে অন্য কনঅ দেজ মান্জ্যর জাবিন্ অয়
তারে বন্ধগী জিনিস ইজেবে রাগ।
17ঠোগেইনে পেইয়্যে হানা মান্জ্য ইদু মিদে লাগে,
মাত্তর্ যেরেদি তা মুয়োন ভুরি যায়।
18সল্লা গুরিনে পরিকল্পনা গরঅ;
গম্ সল্লা ন-গুরিনে তুই যুদ্ধো ফগদাং ন-গুরিচ্।
19যে ইংসে-নিন্দে গুরিনে বেড়ায় তে গুমর কধানি ফগদাং গুরি দে;
সেনত্তে যে বেশ্ কধা কয় তা সমারে ন-মিজেয়ো।
20যিবের কধালোই মা-বাব উগুরে ভোক্তি ন-থায়,
ঘুর্ঘুজ্যে আন্ধারত্ তা জিংকানিগান মিলেই যেবঅ।
21বাবঅ সোম্বোত্তির ভাগ্ যুনি যাদিমাদি পাহ্ যায়
সালে যেরেদি সিয়েনত্ আশীদ্বাদ্ পাহ্ ন-যেবঅ।
22তুই ন-কোজ্, “এ অন্যেয়ানর হেনা শুজিম্।”
লগেপ্রভুত্তে বাজ্জেই থাগ্, তে সেই দজানত্তুন্
তরে রোক্ষ্যে গুরিবো।
23লগেপ্রভু মাবদি কম্ সিলুন্ ঘিনেই;
ঠগাইদে পাল্লাবো গম্ নয়।
24বীরমরত্তুনোর্ আঢিবার পথ্তানি যুনি লগেপ্রভু ঠিগ্ গুরি দে,
সালে সাধারন মান্জ্যে তা নিজোর পথ্তান
কেধোক্ক্যেন গুরি বুঝিবো?
25ভাবি ন-চেইনে যাদিমাদি
লগেপ্রভুর নাঙে কন কিজু মানানা
মান্জ্যত্তে ফাল্ অয়।
26চাপ্ দিইনে যেধোক্ক্যেন্ শোজ্য মাড়া অয়,
সেধোক্ক্যেন জ্ঞানীবলা রাজা তা খেমতাগান বেবহার গুরিনে
পাজিগুনোরে দূর্ গুরি দে।
27মান্জ্যর আত্মাগান্ অলঅ লগেপ্রভুর চেরাগ;
সিয়েন মান্জ্য মনর্ গভীনোত্ তোগেই চাই।
28বিশ্বেজ্ আর সততাগানে রাজারে গমেডালে রাগায়;
বিশ্বেজ্ছোই তা সিংহাসনান থির্ থায়।
29গাবুজ্যেগুনোর বলান্ অলঅ তারার দোল্,
আর বুড়োগুনোর বাড়্বো গরানাগান অলঅ পাগানা চুলান্।
30অমকদ মের্ হেলে ভান্ন্যেয়ানি যায়,
আর মনত্ দুঘ্ পেলে মনর্ গভীন্ জাগায়ানি
সাংসাঙে ওই যায়।
Copyright © 2021 Bangladesh Bible Society