গম্ উপদেজ্ 15
15
1গমেডালে জোব্ দিলে রাগ্ কুমি যায়,
মাত্তর্ কড়া কধানিয়ে রাগ্ বাড়েই দে।
2জ্ঞানী মান্জ্যর মুয়োনে জ্ঞানান্ গমেডালে বেবহার গরে,
মাত্তর্ জ্ঞাননেইয়্যে মুয়োনিত্তুন্ ভুল্-বেদমা
গঙার ধোক্ক্যেন নিগিলি এজে।
3লগেপ্রভুর চোগ্কুন বেক্কানিত্ আঘে;
সিয়েনি গম্-ভান্ন্যেই মানুচ্চুনো উগুরে খিয়েল্ আঘে।
4যে কধাগানে মান্জ্য জিংকানিত্ ভালেদি আনে সিয়েন জিংকানি-গাজ ধোক্ক্যেন্,
মাত্তর্ ছলনা কধাগানিয়ে মান্জ্যর মনানি ভাঙি দে।
5বাজে মান্জ্যে তা বাব শাজনানরে তুচ্চো গরে,
মাত্তর্ উজিয়ার বলা মান্জ্যে সংশোধনর কধানি শুনে।
6গোজেন ভক্তগুনোর্ ঘরানি অলঅ ধনভান্ডালে ভরা
মাত্তর্ পাজিগুনোর আয় দজা ডাগি আনে।
7জ্ঞানীগুনোর্ মুয়োনিয়ে জ্ঞান ছিদি দে,
মাত্তর্ জ্ঞাননেইয়্যেগুনোর মনানি সিয়েনি ন-গরে।
8পাজিগুনোর উৎসর্বয়ানি লগেপ্রভু ঘিনেই,
মাত্তর্ গম্ মানুচ্চুনোর তবনাগানি তে হুজি অয়।
9লগেপ্রভু পাজিগুনোর পথ্তানি ঘিনেই,
মাত্তর্ যিগুনে গম্ কাম গুরিবাত্তে উজেই যান্
তারারে তে কোচ্পায়।
10যিগুনে গম্ পথ্তান ছাড়দন্ তারাত্তে দরমর সাজাগানে বাজ্জেই আঘে;
যে মানুচ্চো সংশোধন কধা ঘিনেই তে মুরিবো।
11লগেপ্রভু দঅ ভস্ত অনার্ জাগায়ান, অত্তাৎ মরণ জাগায়ান দেগে;
সালে মান্জ্যর মনানি তে আরঅ কত্তমান্ বেশ্ গুরি তে দেগে!
12ঠাট্টা-ঈচ্ গুরিয়্যেগুনে সংশোধন কধা গম্ ন-পান;
তে জ্ঞানীগুনো ইদু ন-যায়।
13মনত্ হুজি থেলে মুয়োন্অ হুজি লাগে,
মাত্তর্ মনত্ দুঘে মন ভাঙি যায়।
14যিবের মনত্ বিচেরবুদ্ধি আঘে তে জ্ঞান তগায়,
মাত্তর্ জ্ঞাননেইয়্যেগুনোর হানাগান অলঅ ভুল্ কামানি।
15দুঘি মান্জ্যর দিনুন্ দুঘে ভরা,
মাত্তর্ যিবের মনান্ হুজি থায় তার বেক্ দিনুন যেন হানার দিন।
16অশান্তি গুরিনে জদবদে ধন পানাত্তুন্
লগেপ্রভু উগুরে ভোক্তি গুরিনে দরানা এক্কেনায়ো গম্।
17তাগোয়্যে মান্জ্যর কোচ্পানা নেইয়্যে ঘরত্ পক্তামক্তা দামাড়া গোরু থানাত্তুন্
নাঢা মান্জ্যর কোচ্পানালোই ভরা ঘরত্ শাক-পাদ্অ গম।
18রাগী মান্জ্যে কোল্-কোজ্যে বাজান্,
মাত্তর্ যে মান্জ্যে সহজে রাগ ন-গরে তে কোল্-কোজ্যে থামেই দে।
19আল্সি মান্জ্যর পথ্তান দ্বিকিত্তেদি কাদা বেড়া দিয়্যে পধ ধোক্ক্যেন,
মাত্তর্ গম্ মান্জ্যর পথ্তান যেন রাজপদ ধোক্ক্যেন।
20জ্ঞানী পুয়ো বাবর্ জিংকানিত্ হুজি আনে,
মাত্তর্ জ্ঞাননেইয়্যে মান্জ্যে মাবোরে ঈচ্ গরে।
21যিবের বুদ্ধি নেই তে ভুল্ কামত হুজি পায়,
মাত্তর্ যিবের বিচেরবুদ্ধি আঘে তে উজু পধেদি আঢে।
22তেম্মাঙর্ অভাবে সল্লাগানি মিজে ওই যায়,
মাত্তর্ সল্লাদিয়্যে বেশ্ অলে সল্লাগানি ফলে।
23যে মানুচ্চো যগাজ্যে জোব্ দি পারে তে হুজি অয়;
যগাজ্যেগুরি কোইয়্যে কধানি কেজান্ গম!
24বুদ্ধিবলা মান্জ্যর জিংকানির পথ্তানে তারে উগুরেদি নেযায়,
আর সেক্কে তে তলেদি মরণ জাগাত্ যানাত্তুন্ রোক্ষ্যে পায়।
25লগেপ্রভু বাড়্বো গুরিয়্যেগুনোর ঘরানি ভাঙি ফেলায়,
মাত্তর্ তে রানিমিলে দুযিগান ঠিগ্ রাগায়। 26লগেপ্রভু বেক্ কুজুরোমিগানি ঘিনায়,
মাত্তর্ ভালেদির কধাবাত্তানি তা চোগেদি দোল্।
27লুভি মান্জ্যে তা পরিবারত্ দুঘ্ তাঙায়,
মাত্তর্ যে মান্জ্যে ঘুষ্ ঘিনায় তে দোল্ জিংকানি পেবঅ।
28গোজেন ভক্ত মান্জ্যর মনানিয়ে চিন্তে গুরিনে জোব্ দে,
মাত্তর্ পাজিগুনোর মুয়োনিত্তুন্ ভান্ন্যেই কধানি নিগিলি এজে।
29লগেপ্রভু পাজিগুনোত্তুন্ দূরোত্ থায়,
মাত্তর্ তে গোজেন ভক্তগুনোর্ তবনাগানি শুনে।
30আজি-হুজিয়ে ভরা চোগ্কুনে অন্যগুনোরে ফুত্তি দে,
আর দোল্ হবরানিয়ে কিয়্যেগানরে গম্ রাগায়।
31যে মান্জ্যে জিংকানি দানগুরিয়্যেবোর্ সংশোধন কধানি শুনে
তে জ্ঞানিগুনো সমারে বজত্তি গুরিবো।
32যে মান্জ্যে শাজন্ এলাফেলা গরে তে নিজোরে তুচ্চো গরে,
মাত্তর্ যে মান্জ্যে সংশোধন কধানি শুনে তে বুদ্ধি পায়।
33লগেপ্রভু উগুরে ভোক্তিবলা দর্ মান্জ্যরে জ্ঞান শিগেয়,
আর নম্রতাগানে সর্মান আনে।
Copyright © 2021 Bangladesh Bible Society