গম্ উপদেজ্ 14
14
1বুদ্ধিবলা মিলে তা সংসারর্ ভালেদি গরে,
মাত্তর্ যে মিলেবোর মনান্ বাজে
তে নিজে তা সংসারান্ ভাঙে।
2যে গমেডালে চলে তে লগেপ্রভুরে ভোক্তিগুরিনে দরায়,
মাত্তর্ যে বেঙা পধেদি আঢে তে তারে ঈচ্ গরে।
3যিবের মনান্ বাজে তা কধা বাত্তালোই বাড়্বো গরানাগান ফগদাং পায়,
মাত্তর্ জ্ঞানীগুনে তারার কধালোই রোক্ষ্যে পান।
4গোরু ন-থেলে খাজাবো সুদো থায়,
মাত্তর্ বলদ বল্লোই বোউত্ ফসল পাহ্ যায়।
5বিশ্বেজি সাক্ষি মিজে কধা ন-কয়,
মাত্তর্ অবিশ্বেজি সাক্ষি মিজে কধা কয়।
6যে ঠাট্টা-ঈচ্ গরে তে জ্ঞানান্ তোগেলেয়ো ন-পায়,
মাত্তর্ যিবের বিচেরবুদ্ধি আঘে তে সহজে জ্ঞানান্ পায়।
7ভুল্ মান্জ্যর কায়-কুরেত্তুন্ তুই ধেই যাহ্,
কিত্তে তা মুয়োত্তুন্ তুই জ্ঞান কধা ন-পেবে।
8বিচেরবুদ্ধি মজিম্ চলানা অলঅ উজিয়ার মান্জ্যর জ্ঞান,
মাত্তর্ ছলনাগান অলঅ ভুল্ মান্জ্যর বুদ্ধি।
9বাজে-মন মানুচ্চুনে তারা দুষ্চানিলোই
একজন আর একজন সমারে টানা টান্যে থান,
মাত্তর্ গম্ মানুচ্চুনে টানা টান্যে থান্ ভালেদি গুরিবার আওজ্সোই।
10যিবের মনান্ তিদে তে সিয়েন নিজে বুঝে;
একজন মন হুজির ভাগি অন্যজনে ওই ন-পারে।
11পাজিগুনোর ঘরানি ভস্ত ওই যেবঅ,
মাত্তর্ গম্ মানুচ্চুনোর তাম্বুলানি দাঙরত্তুন্ আরঅ দাঙর্ অবঅ।
12এক্কান পথ আঘে যিয়েন মান্জ্য চোগেদি ঠিগ্ মনে অয়,
মাত্তর্ সে পথ্তানর শেজদি থায় মরণ।
13আজিবার সময়োত্অ মনত্ দুঘ্ থেই পারে,
আর হুজির পরেদিয়ো দুঘ্ থেই পারে।
14অবিশ্বেজি মানুচ্চুন নিজোর আচার-বেবহারলোই হুজি অন্,
মাত্তর্ গম্ মানুচ্চুনে নিজো আচার-বেবহারলোই আরঅ বেশ্ হুজি অন্।
15ভুল্ মান্জ্যে বেক্ কধানি বিশ্বেজ্ গরন,
মাত্তর্ উজিয়ারবলা মান্জ্যে বিচের্ বুদ্ধি খাদেইনে চলন্।
16জ্ঞানি মান্জ্যে ভান্ন্যেয়ানরে দোরেইনে সিয়েনত্তুন্ সুরি যান,
মাত্তর্ জ্ঞান নেইয়্যে মান্জ্যে নিজো উগুরে বেশ্ বিশ্বেজ্ গুরিনে
দুঘ্ সাহসী অন।
17বদমেজাজি মানুচ্ ভুলো ধোক্ক্যেন কাম গরন,
আর কুজুরোমি গুরিয়্যেবোরে বেক্কুনে ঘিনান্।
18ভুল্ মানুচ্চুনে পাওনা ইজেবে পান নির্বুদ্ধিগানি,
আর উজিয়ার বলাগুনে বক্শিজ্ ইজেবে পান জ্ঞান।
19বজং মানুচ্চুনে গম্ মানুচ্চুনো মুজুঙোত্ মাঢা নিগিরোন্,
আর পাজিগুনে গোজেন ভক্তগুনো দোরো ইদু মাঢা নিগিরোন।
20নাঢা মান্জ্যরে তা পাড়াল্যেগুনেয়ো ঈচ্ গরন,
মাত্তর্ তাগোয়্যেগুনোর বোউত্ সমাজ্যে থান্।
21যে তার পাড়াল্যেবোরে ঈচ্ গরে তে পাপ গরে,
মাত্তর্ যে অভাবিগুনোরে দোয়্যে গরে তে বর্ পেইয়্যে।
22যিগুনে বজং কাম গুরিবাত্তে ফন্দি গরন্ তারা কি ভান্ন্যেই পধেদি ন-যান?
মাত্তর্ যিগুনে বজং কাম গুরিবাত্তে সল্লা গরন
তারার বিশ্বেজ্ আর সততাগান্ আঘে।
23বেক্ কামানিয়ে লাভ্ আনে,
মাত্তর্ বানা কধাবাত্তানিয়ে অভাব ইন্দি নেযায়।
24জ্ঞানীগুনোর্ বক্শিজ্ অলঅ তারার ধন,
মাত্তর্ জ্ঞাননেইয়্যেগুনোর ভুলানি আরঅ ভুলোর জর্ম দে।
25যে সাক্ষিবো সত্য কধা কোইনে তে আর একজনর জিংকানি বাজায়,
মাত্তর্ মিজে সাক্ষি ছলনা গরে।
26লগেপ্রভু উগুরে ভোক্তিবলা দরত্তুন্ দোল্ আজা এজে
আর তা ঝি-পুয়োগুনোত্তে আশ্রয়র জাগা থায়।
27লগেপ্রভু উগুরে ভোক্তিবলা দর্ অলঅ জিংকানির পয়নালা ধোক্ক্যেন;
সিয়েন মান্জ্যরে মরণ ফালত্তুন্ দূরোত্ রাগায়।
28মানুচ্ বেশ্ অলে রাজার বাঈনী অয়,
মাত্তর্ প্রজা কম্ থেলে রাজার দজা অয়।
29যে মানুচ্চো এনেবাদে রাগ্ ন-গরে তে বুদ্ধিবলা,
মাত্তর্ যে মানুচ্চো অদাদৎ রাগ্ তুলে তে ভুলান্ ফগদাং গরে।
30শান্ত মন কিয়্যেগানরে গম্ রাগায়,
মাত্তর্ ইংসে কিয়্যেগানরে অসুগ্ বানায়।
31যিবে নাঢা মান্জ্য উগুরে অত্যেচার গরে
তে তার সিরিষ্টি গুরিয়্যেবোরে অগমান গরে,
মাত্তর্ যে মানুচ্চো অভাবীগুনোরে দোয়্যে গরে
তে তার সিরিষ্টি গুরিয়্যেবোরে সর্মান গরে।
32পাজিগুনোর অন্যেয় কামানিয়ে তারারে তলে লামেই দে,
মাত্তর্ গোজেন ভক্ত মানুচ্চুনোর মরণর সময়ত্অ আজা থায়।
33যিগুনোর বিচের বুদ্ধি আঘে তারার মনত্ জ্ঞানানি ঠান্দা গুরি থায়,
মাত্তর্ জ্ঞান নেইয়্যেগুনে তারার জ্ঞানানি
বাড়্ গুরিবাত্তে হিজে-হিস্যে বাজান্।
34গোজেন উগুরে ভোক্তি জাদরে সর্মান গরে
মাত্তর্ পাপ জাদরে অসর্মানত্ ফেলায়।
35যে মানুচ্চো বুদ্ধি গুরিনে কাম গরে রাজা তারে গমেডালে চায়,
মাত্তর্ যে মানুচ্চো লাজ্ গরেপারা কাম গরে
তে তার রাগী মানুচ্ অয়।
Copyright © 2021 Bangladesh Bible Society