গম্ উপদেজ্ 13
13
1জ্ঞানীবলা পুয়ো বাব শাজন্ মানে,
মাত্তর্ ঠাট্টা-ঈচ্ গুরিয়্যেবো সংশোধনত্ কান্ ন-পাদে।
2মান্জ্যে নিজো কধালোই ভালেদি ওই পারন্;
অবিশ্বেজি মান্জ্যে অত্যেচার গুরিবাত্তে চান।
3যে তা মুয়োন উজিয়ার গুরি রাগায় তে তা পরাণান্ বাজায়,
মাত্তর্ যে উজিয়ার ন-ওইয়্যে গুরি কধা কয় তার দজা অয়।
4আল্সি মান্জ্যে পেবাত্তে চায় মাত্তর্ কিচ্চু ন-পায়,
মাত্তর্ কাম্যগুনে তারার চানাত্তুন্ বেশ্ পান।
5গোজেন ভক্তগুনে মিজে কধানিরে ঘিনেন্,
মাত্তর্ পাজি মানুচ্চুনে লাজত্ আর দুন্নামর ভাগি অন্।
6গোজেন উগুরে ভোক্তি গম মানুচ্চুনোরে রোক্ষ্যে গরে,
মাত্তর্ পাজি কামানিয়ে পাপিগুনোর দজা ঘদায়।
7কেউ নিজোরে তাগোয়্যে দেগান্ মাত্তর্ তার কিচ্চু নেই;
আরঅ কেউ নিজোরে নাঢা মানুচ্ দেগান মাত্তর্ তার বোউত ধন আঘে।
8তাগোয়্যেবো তা ধনানিলোই নিজো পরাণান্ রোক্ষ্যে গরা পরে,
মাত্তর্ নাঢা মান্জ্যরে কনজনে দর্বুক্ ন-লাগান্।
9গোজেন ভক্তগুনোর্ পহ্রান জোল্ জোল্যে গুরি জলে,
মাত্তর্ পাজিগুনোর বাত্তিগুন্ মুরি যান।
10বাড়্বো গরানাগানে বানা কোল্-কোজ্যে বাজেই দে,
মাত্তর্ যিগুনে উবদেজ্ শুনোন্ তারা ইদু জ্ঞান পাহ্ যায়।
11কাম ন-গোজ্যে গুরি যে টেঙাগুন্ পাহ্ যায় সিগুন কুমি যান্,
মাত্তর্ যে মানুচ্চো কাম গুরিনে টেঙা থুবোয় তা টেঙাগুন্ বাড়ন্।
12আজা পুরেবাত্তে দেরি অলে মনান্ ভাঙি পড়ে,
মাত্তর্ আওজ্ পুরোনাগান জিংকানি গাজ ধোক্ক্যেন্।
13যে মানুচ্চো গোজেন কধানি বাজে মনে গরে তে নিজো দজাগান্ ডাগি আনে,
মাত্তর্ যে মানুচ্চো গমেডালে দোরেইনে গোজেন উগুমানি মানে
তে তার পাওনা পায়।
14জ্ঞানী মান্জ্যর দিয়্যে শিক্ষ্যেনি জিংকানির পয়নালা ধোক্ক্যেন্;
সিয়েনে মান্জ্যরে মরণর ফালত্তুন্ দূরোত রাগায়।
15যিবের বুদ্ধিগান গম্ তে সর্মান পায়,
মাত্তর্ অবিশ্বেজি মানুচ্চুনে শেজ্ ওই যেবাক্।
16উজিয়ারবলা মানুচ্ জ্ঞানদোই কাম গরন্,
মাত্তর্ কান্ড জ্ঞান নেইয়্যে মানুচ্ তার ভুলানি ফগদাং গরে।
17পাজি হবর্ দিয়্যেবো দজাত্ পড়ে,
মাত্তর্ গম্ হবর্ দিয়্যেবো ভালেদি আনে।
18যে মানুচ্চো শাজনান্ এলাফেলা গরে তে অভাবত্ পড়ে আর লাজ্ পায়,
মাত্তর্ যে মানুচ্চো সংশোধন কধানি শুনে তে সর্মানিত অয়।
19মন-আওজ্ পুরেলে রিবেঙানত্ ঈল্ পুদে,
মাত্তর্ কান্ড-জ্ঞান নেইয়্যেগুনে ভান্ন্যেয়ানিত্তুন্ দূরোত্ সুরি যেবাত্তে
ঘিনেন্।
20জ্ঞানীগুনো সমারে যে আঢাউদো গরে তে জ্ঞানী অয়,
মাত্তর্ যে মানুচ্চো কান্ড-জ্ঞান নেইয়্যেগুনোর সমাজ্যে তার ক্ষতি অয়।
21ফীবলাগানে পাপীগুনো পিজে পিজে এজে,
মাত্তর্ ভালেদিগান অলঅ গোজেন ভক্তগুনোর্ পাওনা।
22গম্ মান্জ্যে তা নাদিন-পুদিনুনোত্তে অধিকার থোই যায়,
মাত্তর্ পাপীগুনো ধনানি গোজেন ভক্তগুনোত্তে থুবো অয়।
23নাঢা মান্জ্যর ভূইয়োত্ বোউত শোস্য জর্মায়,
মাত্তর্ অবিচেরর্ কারনে সিয়েনি গজক্ গরা অয়।
24যে তার পুয়োবোরে সাজা ন-দে তে তারে কোচ্ ন-পায়,
মাত্তর্ যে তারে কোচ্পায়
তে তার শাজন ইন্দি মনযোগ দে।
25গোজেন ভক্ত মানুচ্চুনে পেট্ভরা হান্,
মাত্তর্ পাজিগুনে পেট্ভরা হেই ন পান।
Copyright © 2021 Bangladesh Bible Society