গম্ উপদেজ্ 12
12
1যে মানুচ্চো শাজন্ গমপায় তে জ্ঞান গম পায়,
মাত্তর্ যে মানুচ্চো সংশোধনর কধা ঘিনেই তে য়েমান ধোক্ক্যেন্।
2গম্ মান্জ্যে লগেপ্রভু ইত্তুন্ দোয়্যে পায়,
মাত্তর্ যে কুজুরোমি গরে লগেপ্রভু তারে দুষি বিলিনে ঠিগ্ গরে।
3বজং কাম্বোই কনঅ মান্জ্যর জিংকানিত্ থিদেবর্ ন-এজে,
মাত্তর্ গোজেন ভক্তগুনোর্ জিংকানির গড়াগান অদে অদে থায়।
4গম্ আর গুণবলা মোগ্ নেগর্ মাঢাবোর মুকুট ধোক্ক্যেন্,
মাত্তর্ যে মোক্কো লাজ্ গরে পারা কাম গরে
তে তা নেক্কোর পঁচা আড় ধোক্ক্যেন।
5গোজেন ভক্ত মানুচ্চুনোর মনানি দোল্,
মাত্তর্ পাজিগুনোর সল্লানিত্ আগেদে ছলনা।
6পাজি মানুচ্চুনে লো জোড়েবাত্তে উৎ পাদি থেবার কধা কন্,
মাত্তর্ ন্যায়বলাগুনে রোক্ষ্যে গুরিবার কধা কন্।
7পাজি মানুচ্চুন্ ভস্ত ওই যান, তারার বংশগুন ন-থান,
মাত্তর্ গোজেন ভক্ত মানুচ্চুনোর বংশগুন অদে অদে থান্।
8মান্জ্যে যেবাবোত্যেগুরি বুদ্ধি খাদান্ সেই মজিম্ নাঙ্ গিনেনাগান্ পান,
মাত্তর্ কুজুরো মন মানুচ্চুনোরে ঈচ্ গরা অয়।
9যে মানুচ্চো নিজোরে দাঙর্ বিলিনে ভান্ গরে মাত্তর্ ঘরত্ হেবার নেই,
তাত্তুন্ বেশ্ যে দাঙর্ নয় অদচ চাগর রাগায় বরং তে গম।
10গোজন ভক্ত মানুচ্ তা এ্যামানুনোরে যত্তন্ গরে,
মাত্তর্ পাজিগুনোর মেয়্যেগানিয়ো চিৎনপুজ্যেলোই ভরা।
11যে মানুচ্চো নিজো ভূইয়োত্ কাম গরে তার বোউত্ হানা থায়,
মাত্তর্ যে বাজে কামত্ লাগি থায় তার বুদ্ধির অভাব আঘে।
12পাজিগুনে বজং মানুচ্চুনোর লুদেয়্যে জিনিস্চানি পেবাত্তে চান,
মাত্তর্ গোজেন ভক্ত মানুচ্চুনোর জিংকানিত্ বর্ এজে।
13বজং মানুচ্ তা পাপে ভরা কধাবাত্তালোই ফালত্ পড়ে,
মাত্তর্ গোজেন ভক্ত মানুচ্ দুঘোত্তুন্ রেহাই পান্।
14মানুচ্ তা কধালোই ভালেদি ওই পারে,
আর তা কাম মজিম্ তে ফল পায়।
15বাজে-বুদ্ধিবলা মান্জ্যর্ পথ্তান তার নিজো ইদু গম্ বিলিনে মনে অয়,
মাত্তর্ জ্ঞানি মান্জ্যে সল্লা শুনে।
16যিবের চিদে-চজ্জানি বাজে তে তার লবাদোস্যেগানি ফগদাং গুরি ফেলায়,
মাত্তর্ উজিয়ারবলা মানুচ্ নিজোর অগমানানি নাঢি দে।
17সত্যবাদী সাক্ষির ফলে গম্ বিচের অয়,
মাত্তর্ মিজেকধা কোইয়্যে সাক্ষির ফলে ভুল বিচের্ অয়।
18আপাদাজ্যে কধা ছুরি ধোক্ক্যেন্ বুগোত্ ফুদে,
মাত্তর্ জ্ঞানীগুনোর্ কধা গম্ লাগে।
19সত্য কধা কোইয়্যেবোর কধানি জিংকানিবর্ এক্কুই,
মাত্তর্ মিজে কধা কোইয়্যেবোর কধানি কয়েক দিনোত্তে।
20যিগুনে কুজুরোমি গরন্ তারার মনত্ ছলনা থায়,
মাত্তর্ যিগুনে ভালেদির সল্লা দুয়োন তারার মনানি হুজি থায়।
21গোজেন ভক্ত মানুচ্চুনোর জিংকানিত্ অমংগল ন-অয়,
মাত্তর্ পাজিগুনোর জিংকানিত্ অমংগলে ভরা থায়।
22মিজেকধলোই ভরা মুয়োনরে লগেপ্রভু ঘিনাই,
মাত্তর্ যে মানুচ্চুনে গমেডালে চলন্
তারা উগুরে তে হুজি অয়।
23উজিয়ারবলা মানুচ্ যিয়েনি হবর্ পায় সিয়েনি কোই কোই ন-বেড়ায়,
মাত্তর্ বিবেচনা নেইয়্যে মানুচ্চুনে তারা কধালোই বুদ্ধি নেইদ্যেগান ফগদাং গরন।
24কামগুরিয়্যে মানুচ্চুনে কাবিদ্যংগিরি গরন্,
মাত্তর্ আল্সি মানুচ্চুনে পর অধিনোত্ অন্।
25বাজে চিদে-চজ্জালোই মান্জ্যর মনানি ভাঙি পড়ে,
মাত্তর্ এক্কেনা উচ্চোমির কধাগানে তারে ফুত্তি আনি পারে।
26গোজেন ভক্ত মানুচ্ তা আদাম্মেবোরে পথ দেগায়,
মাত্তর্ পাজিগুনে এন্ পধেদি চলন যিয়েনিয়ে তারারে ভান্ন্যেই পধেদি নেযায়।
27আল্সি মান্জ্যে নিজে হেবাত্তে শিগের গুরিবাত্তেয়ো ন-যায়,
মাত্তর্ মান্জ্যর বেগত্তুন্ মংগা সোম্বোত্তি অলঅ কাম্য অনা।
28ন্যায়র পধেদি জিংকানি থায়,
সে পধেদি মরণ নেই।
Copyright © 2021 Bangladesh Bible Society