গণাণা 5
5
তাম্বুলোর শুদ্ধো-সাংগ পৌইদ্যেনে
1লগেপ্রভু মোশিরে কলঅ, 2তুই ইস্রায়েলীয়গুনোরে এই উগুমান্ দে যেনে তারা তাম্বুলোত্তুন এমন্ বেক্ মানুচ্চুনোরে সোরেই দুয়োন্ যিগুনোর্ কনঅ চামাড়া রুগ আঘে বা যিগুনোর্ কিয়্যেত্তুন্ কনঅ রকম্ স্রাব অর্ বা মরাকিয়্যের্ কারনে যিগুনে ফি-বলা ওইয়োন্। 3তে মিলেমানুচ্ ওক্ বা মরদ্পূঅ ওক্ তারে সোরেই দিয়া পুরিবো। এবাবোত্যে মানুচ্চুনে যেনে তাম্বুলান ফি-বলা ন-গরন্ সেনত্তেই তাম্বুলোত্তুন্ তারারে বারেন্দি সোরেই দিয়া পুরিবো, কিত্যে সিয়েনত্ মুই ইস্রায়েলীয়গুনো ভিদিরে বজত্তি গরং।
4ইস্রায়েলীয়গুনে সিয়েনোই গুরিলাক। তারা সেই বেক্ মানুচ্চুনোরে তাম্বুলো বারেন্দি সোরেই দিলাক্। লগেপ্রভু মোশিরে যে উগুমান্ দিয়্যে ইস্রায়েলীয়গুনে সিয়েনোই গুরিলাক।
বিশ্বেজ্ ন-গরানার পৌইদ্যেনে
5যেরেন্দি লগেপ্রভু মোশিরে কলঅ, 6“তুই ইস্রায়েলীয়গুনোরে কঅ, মান্জ্যে সচরাচর্ যেদক্কানি পাপ গরন্ সিয়েনির কনঅ এক্কান্ গুরিনে যুনি কনঅ মরদ্ বা মিলেমান্জ্যে লগেপ্রভু উগুরে বিশ্বেজ ন-অয়্ সালে তারে দুষী বিলি ধরা অবঅ। 7তে যে পাপ্ গোজ্যে সিয়েন্ তাত্তুন্ স্বীগের্ গরা পুরিবো। তে যিয়েন উগুরে অন্যেয় গোজ্যে তাত্তুন সিয়েনর অন্যেয়র্ পুরো ক্ষেতিপূরোণান্ দিয়া পুরিবো। যে জিনিসচান পৌইদ্যেনে তে অন্যেয় গোজ্যে সেই জিনিসচানর দামান সমারে আরঅ পাঁচ ভাগর্ একভাগ দাম বেশ্ গুরিনে তাত্তুন্ দিয়া পুরিবো। 8ক্ষেতিপূরোণ নিবাত্তে যুনি সেই মানুচ্চোর্ কনঅ সদর্ কুদুম্মো ন-থায় সালে সিয়েন্ লগেপ্রভুর্ পাওনা অবঅ। সেই ক্ষেতিপূরোণ আর তার্ পাপ্পানি নাঢি দিবার্ ভেড়াছাগল্লো ধর্মগুরুগুনোরে দিয়া পুরিবো। 9যেদক্কানি পবিত্র পজা-পিরা ইস্রায়েলীয়গুনে ধর্মগুরুগুনো ইদু আনিবাক্ সিয়েনি বেক্কানি ধর্মগুরুগুনোর্ অবঅ। 10পত্তিজনর উৎসর্ব গোজ্যে পজা-পিরানি ধর্মগুরুগুনোর্ অবঅ। ধর্মগুরুগুনোর্ আদত্ দিয়া জিনিস্চানি ধর্মগুরুগুনোরই অবঅ।”
11-13ইয়েনর্ পরেদি লগেপ্রভু মোশিরে কলঅ, তুই ইস্রায়েলীয়গুনোরে জানেই দে, যুনি কারর্ মোক্ ভান্ন্যেই পধেদি যায় আর নেগ উগুরে বিশ্বেজ ন-গুরিনে অন্য মরদ সমারে সিনেলী গুরি ফিবলা অয়, আর সিয়েন্ যুনি তা নেক্কো হবর্ ন-পায় আর সিয়েন্ গমুরোত্ থেই যায়-কিত্যে সিয়েনর্ বিরুদ্ধে কনঅ স্বাক্ষী নেই আরঅ সেই কামত্ তে ধরায়ো ন-খায় 14-15মাত্তর্ তো যুনি মোক্কো উগুরে সন্দেহ গুরিনে নেক্কোর মনান্ জুলি উদে সালে তে তারে ধর্মগুরুগুনো ইদু নেযেব; মোক্কো যুনি অসতী নয়ো অয় তো সন্দেহ গুরিলে নেক্কো তারে ধর্মগুরুগুনো ইদু নেযা পুরিবো। সেই সমারে তা মোক্কোর্ পক্ষ ওইনে উৎসর্ব গুরিবাত্তে তাত্তুন্ এক কেজি আস্তোশত গ্রাম মোক্কের্ মোয়দেও নেযা পুরিবো। তে ইয়েন উগুরে কনঅ তেল্ বা লোবান ন-দিবো কিত্যে ইয়েন্ সন্দেহর্ কারনে শোজ্য-উৎসর্ব, অত্তাৎ লগেপ্রভু ইদু অন্যেয় তুলি ধুরিবার্ উৎসর্ব। 16ধর্মগুরুবো সেই মিলেমানুচ্চোরে লগেপ্রভুর্ মুজুঙোত্ থিয়েই রাগেব। 17সে পরেদি তে এক্কো মাদির্ পিলেত্ কিজু পবিত্র পানি নিবো আর থেবার্-তাম্বুলোর্ তলাত্তুন্ কিজু ধূল্যে তুলি নেযেইনে সেই পানিগান ভিদিরে দিবো। 18মিলেমানুচ্চোরে লগেপ্রভুর্ মুজুঙোত্ থিয়্যেই রাগেবার্ পরেদি ধর্মগুরুবো তার্ চুলান্ খুলি দিবো আর অন্যেয়ানি তুলি ধুরিবাত্তে আন্যে উৎসর্বর জিনিস্চানি, অত্তাৎ সন্দেহর্ কারনে শোজ্য-উৎসর্বর জিনিস্চানি তা আদত্ দিবাক। ধর্মগুরুবো তার্ নিজোর্ আদত্ রাগেব অভিশাব আন্যে তিদে পানিগান। 19পরেদি ধর্মগুরুবো মিলেমানুচ্চোরে শমক্ খাবেইনে তারে কবদে, বো যানার্ পরেদি কনঅ মানুচ্ যুনি তঅ সমারে সিনেলী ন-গুরি থান্ আর তুই যুনি ভান্ন্যেই পধেদি যেইনে অসতী ওই থাচ্ সালে অভিশাব আন্যে এই তিদে পানিগানে যেন তর্ কনঅ ক্ষেতি ন-গরে। 20মাত্তর্ বো যানার্ পরেদি ভান্ন্যেই পধেদি যেইনে কারঅ সমারে সিনেলী গুরিনে যুনি অসতী ওই থাচ্- 21ইয়েন সং কোইনে ধর্মগুরুবো সেই মিলেমানুচ্চোরে দিইনে তার নিজো উগুরে অভিশাব ডাগি আনেদে শমক্ খাবেইনে আরঅ্ কবদে, মাত্তর্ লগেপ্রভু এধোক্ক্যেন গোরোক্ যেনে মিলেবোর্-কিয়্যেগান্ অকেজো ওইনে তর্ পেট্টো ফুলি উদে, যিয়েনর্ কারনে তর্ মানুচ্চুনেই অভিশাব আর শমক্ হেবার্ সময়োত্ তর্ নাঙান্ বেবহার্ গুরিবাক। 22এই অভিশাবর্ পানিগান্ তর্ কিয়্যেত্ চুমিনে যেনে এমন্গুরি কাম্ গরে যেনে তর্ পেট্টো ফুলি উদে আর তর্ মোক্কোর্-জিনিসচান অকেজো ওই যায়।
ইয়েনর জোবত্ মিলেমানুচ্চোত্তুন্ কুয়ো পুড়িবো, সিয়েনোই ওক।
23ধর্মগুরুবো এই বেক্ অভিশাপ্পানি চামান উগুরে লিগিনে পানি ঢালিনে লেগাগান্ সেই তিদে পানিগানত্ ফেলে দিবো। 24অভিশাবর্ সেই তিদে পানিগান্ তে মিলেমানুচ্চোরে হাবানার্ পরেদি সেই পানিগান্ তার্ পেদথ্ যেইনে তারে অমহদ দুখ্ দিবো। 25পত্তমে ধর্মগুরুবো মিলেমানুচ্চোর্ আদত্তুন্ সন্দেহর্ কারনে আন্যে সেই শোজ্য-উৎসর্ব লোইনে লগেপ্রভুর মুজুুঙোত দুলেইনে সিবে পূজোবো ইদু নেযেব। 26ধর্মগুরুবো যেরেন্দি পুরো উৎসর্বর বদলে সিয়োত্তুন্ এক মুঠ্ তুলি নেযেইনে পূজোবো উগুরে পুড়ি ফেলেব। পরেদি তে সেই পানিগান্ মিলেমানুচ্চোরে হেবাত্তে দিবো। 27মিলেমানুচ্চো যুনি অসতী ওইনে নেগরে বিশ্বেজ্ ন-গরে সালে অভিশাবর্ এই পানিগান্ তারে হাবানার্ পরেদি সিয়েন্ তার্ পেদত্ যেইনে তারে অমহদ দুখ্ দিবো। তার্ পেট্টো ফুলি উদিবো আর মিলে-জিনিসচান অকেজো ওই যেবঅ আর তা মানুচ্চুনে তার্ নাঙান্ অভিশাব ইজেবে বেবহার্ গুরিবাক। 28মাত্তর্ মিলেমানুচ্চো যুনি অসতী ন-ওইনে নির্দুজি ওই থায়্ সালে তারে যে দুষ্ দিয়া ওইয়্যে সিয়োত্তুন্ তে ছড়ান পেবঅ আর পুয়ো-ছার্ মা অবার্ খেমতা তার্ থেই যেবঅ।
29-30“কনঅ মিলেমানুচ্ যুনি বো যানার্ পরেদি ভান্ন্যেই পধেদি যেইনে অসতী অয় বা যুনি কনঅ মরদর্ মন্ মোক্কো উগুরে সন্দেহ গুরিনে বিষাক্ত ওই উদে সালে এ সুদোমে তাত্তুন বেবস্থা গরা পুরিবো। নেক্কো তা মোক্কোরে লগেপ্রভুর মুজুঙোত্ নেযেব আর ধর্মগুরুবো এই পুরো সুদোমান তার্ উগুরে খাদেব। 31সেক্কে নেক্কো অন্যেয় গুরিবার নালিজোত্তুন্ মুক্তো থেবঅ, মাত্তর্ অন্যেয়্ গুরি থেলে মিলেমানুচ্চো তার্ ফল ভোগ্ গুরিবো।”
Copyright © 2021 Bangladesh Bible Society