গণাণা 4
4
কহাতীয়গুনে
1লগেপ্রভু মোশি আর হারোণরে কলদে, 2তুমি লেবীয়গুনো ভিদিরেত্তুন্ বংশ আর পরিবার্ মজিম কহাতীয়গুনোর সোংখ্যেগুণ গুণি নেযঅ। 3ত্রিশ বজত্তুন্ ধুরি পঞ্চাশ বজর্ বয়জর্ যে কহাতীয় মরত্তুনে মিলন-তাম্বুলোত কাম্ গুরিবাত্তে এবাক্ বানা তারার্ সোংখ্যেগুন গুণিবা। 4মিলন-তাম্বুলোত্ কহাতীয়গুনোর্ কাম্ অবঅ দাঙর্ পবিত্র পজা পিরানির দেগাশুনো গরানা। 5তাম্বুল তুলিনে যেবার্ সময় অলে হারোণ আর তার্ পূঅগুনে থেবার্-তাম্বুলো ভিদিরে যেইনে সাক্ষ্য-সুন্দুক্কো নাঢি রাগেবার্ পর্দাগান লামেইনে সিয়েন্দোই সুন্দুক্কো নাঢি দিবাক। 6সে পরেদি তারা শুশুকোর্ চামাড়ালোই সিবে নাঢিনে সিবে উগুরে এমন্ এক্কান্ কাবড়্ বিজেই দিবো যিবের বেক্কান্ য়েল্ রংয়র, আর সাক্ষ্য-সুন্দুগোর্ লাগাড়াগুন জাগা মজিম ভোরেই দিবে। 7মুজুঙো-রুটি রাগেবার টেবিলো উগুরে তারা এক্কান্ য়েল্ কাবড়্ বিজিইনে সিবে উগুরে টেবিলোর্ দাঙর্ আর চিগোন্ বাজোনুন্, কদরা আর ঢালেদে-উৎসর্বর কুমুন্ রাগেবা। যে রুটিগানি নিত্য টেবিলো উগুরে থায় সিয়েনি টেবিলো উগুরেই থেবঅ। 8ইগুনো উগুরে এক্কান্ রাঙা রংয়র্ কাবড়্ বিজেইনে শুশুকোর্ চাম্বোই নাঢি দিবে আর টেবিলোর খুদোগুন জাগা মজিম ভোরেই দিবে। 9পহ্র দিবাত্তে যে চেরাগ বদঙুন্ আঘে সিবে আর তার্ বেক্ চেরাক্কুন, চেরাগ বুদ্ধিগানি সাব্ গুরিবার চিম্টি আর চেরাগর বুদ্ধিগানর ভাগ্ রাগেবার্ জাগাবো আর চেরাক্কোত্ তেল্ লায়েনর জাগাবো তারা এক্কান য়েল্ কাবড়্ দিইনে নাঢি দিবাক। 10পরেদি তারা বেক্ পজা-পিরানি সুদ্ধো চেরাগ বদঙো শুশুকোর্ চামানত্ মিজেইনে সিবে তাত্তুন্ বুয়োই নেযেবার তক্তা উগুরে রাগেবা। 11সনার্ পূজোবো উগুরে এক্কান্ য়েল্ কাবড়্ বিজেইনে তারা সিয়েন্ শুশুকোর্ চামান্দোই নাঢি দিবাক আর পূজোবোর্ লাগাড়াগুন জাগা মজিম ভোরেই দিবাক। 12পবিত্র তাম্বুলর কামত্ বেবহার্ গুরিবার্ বেক্ পজা-পিরানি য়েল্ কাবড়ত্ মিজেইনে শুশুকোর্ চামান্দোই নাঢিনে সিয়েন্ তারা বুয়োই নেযেবার্ তক্তাগান উগুরে রাগেবাক্। 13পিদোলর্ পূজোবোর্ বেক্ ছেইয়ান্ ফেলে দিইনে তারা এক্কান্ বিগুন রংয়র্ কাবড়্ সিয়েন উগুরে বিজেই দিবাক্। 14সে পরেদি সিয়েন উগুরে তারা পূজোবোর্ বেক্ থাল্-বাজোন্, আগুন্ রাগেবার্ পিলে, য়েরা ফেলেবার্ কাঁদা, হাতা আর উৎসর্বর লো রাগেবার্ কদরা রাগেবাক্। তারা সিয়েন উগুরে শুশুকোর্ চামান বিজেই দিবাক্ আর তার্ লাগাড়াগুন জাগা মজিম ভোরেই দিবাক্।
15“হারোণ আর তার্ পূঅগুনে যেক্কে এই বেক্ পবিত্র পজা-পিরানি আর পবিত্র তাম্বুলোর পজা-পিরানি নাঢি দেনা শেজ্ গুরিবাক আর মানুচ্চুনে তাম্বুলান বুদিনে যেবাত্তে যুক্কোল্ অবাক্ সেক্কে কহাতীয়গুনে এই বেক্কানি বুয়োই নেযেবাত্তে এবাক। মাত্তর্ কনঅ পবিত্র জিনিজোত্ তারার্ আত্ বাজেই ন-পারিবাক্। বাজেলে তারা মুরি যেবাক। মিলন-তাম্বুলোত্ যেদক্কানি জিনিস থেবঅ কহাতীয়গুনোর্ সিয়েনি বুয়োই নেযা পুরিবো। 16চেরাগর্ তেল, তুম্বাজ্ পৌইরেক, সুদোম মজিম্ শোজ্য-উৎসর্ব আর অভিষেগ-তেলর দায়িত্বো থেবঅ ধর্মগুরু্ হারোণর পূঅ ইলীয়াসর উগুরে। বেক্ থেবার-তাম্বুলান্ আরঅ সিয়েন ভিদিরে বেক্কানি, অত্তাৎ পবিত্র তাম্বুলোর আর সিয়েনর্ পজা-পিরানির দায়িত্বো থেবঅ ইলীয়াসর উগুরে।”
17ইয়েনর্ পরেদি লগেপ্রভু মোশি আর হারোণরে কলঅ, 18“তুমি চেইয়ো যেনে লেবি-গুট্টির্ ভিদিরেত্তুন্ কহাতীয় বংশগুন্ বাদ ন-যান। 19যেনে তারা দাঙর্ পবিত্র পজা-পিরানি ইধু যেইনে মারা ন-পড়ন্ বরং বাঁজি থান্ সেই আজাই হারোণ আর তার্ পূঅগুনে পবিত্র তাম্বুলো ভিদিরে যেইনে পত্তিজনর কাম্ কি আরঅ তাত্তুন কি বুয়োই নেযা পুরিবো সিয়েন্ ঠিগ্ গুরি দিবাক। 20মাত্তর্ সেই বেক্ পবিত্র জিনিস্চানি চেবাত্তে কহাতীয়গুনো ভিদিরে যানা দরকার নেই, কানক্ষণত্তেয়ো না। গেলে তারা মুরি যেবাক।”
গের্শোনীয়গুনে
21লগেপ্রভু মোশিরে কলঅ, 22পরিবার আর বংশ মজিম তুই গের্শোনীয়গুনোরে গুণিই নেযা। 23ত্রিশত্তুন্ ধুরি পঞ্চাশ বজর বয়জর্ যে গের্শোনীয় মরত্তুনে মিলন-তাম্বুলোত্ কাম্ গুরিবাত্তে এবাক্ বানা তারারে গুণিবা।
24-25মিলন-তাম্বুলো কাম্ গুরিবার আরঅ বুধি বুয়োবার অক্তত্ গের্শোনীয় বংশগুনোর্ দায়িত্বো অলঅ থেবার্-তাম্বুলোর্ মসীনার কাবড়, সিয়েন উগুরে বিজেয়ে ছাগল কেজর্ ঢাগনি, সিয়েন উগুরে ভেড়া ছাগলর চামর ঢাগনি আর শুশুকোর্ চামর্ ঢাগনি আর মিলন-তাম্বুলোত্ চুমিবার্ দোরানর্ পর্দাগান্ বুয়োই নেযানা। 26ইয়েনবাদে থেবার-তাম্বুলান আর পূজোবোর্ চেরোকিত্তে উদোনর্ পর্দাগান, উদোনত্ চুমিবার্ দোরোর্ পর্দাগান, থেবার-তাম্বুল টাঙেবার দুড়িগানি আর ইয়েনি কামত্ লাগেবার্ বেক্ লাগেদে পজা-পিরানিয়ো তারাত্তুন্ বুয়োই নেযা পুরিবো। এ পৌইদ্যেনে আর যেদক্কানি কাম্ আঘে তার্ বেক্কানি গের্শোনীয়গুনোত্তুন্ গরা পুরিবো। 27বুধি বুয়োবার কাম্ ওক্ বা আরঅ অন্য যে কনঅ কাম্ ওক্, বেক্ কামানিই হারোণ আর তার্ পূঅগুনোর্ উগুমো ধোক্ক্যেন্ তারাত্তুন্ গরা পুরিবো। যেদক্কানি জিনিস বুয়োই নেযানা তারার্ দায়িত্বো সিয়েন্ তুমি তারারে কোই দিবা। 28মিলন-তাম্বুলোত্ গের্শোনীয় বংশগুনোর্ ইয়েনই অলঅ কাম্। তারার্ কামর দেগাশুনো গুরিবার্ দায়িত্বো থেবঅ ধর্মগুরু হারোণর পূঅ ঈথামর উগুরে।
মরারীয়গুনে
29“বংশ আর পরিবার মজিম তুমি মরারীয়গুনোর্ সোংখ্যেগুন গুণি নেযঅ। 30ত্রিশত্তুন্ ধুরি পঞ্চাশ বজর বয়জর্ যে মরারীয় মরত্তুনে মিলন-তাম্বুলোত্ কাম্ গুরিবাত্তে এবাক্ বানা তারার্ সোংখ্যেগুন গুণিবে। 31মিলন-তাম্বুলো কামত্ মরারীয়গুনোর্ দায়িত্বো অলঅ থেবার-তাম্বুলোর বেক্ ফ্রেমানি, হুককুন্, খুঁদো আর টেং-টক্কুন্ বুয়োই নেযানা। 32ইয়েন্বাদে, চেরোকিত্তে উদোনর্ বেক্ টেং-টক্কুন্ সহ খুঁদো, তাম্বুলোর খুঁদো, উদোন পর্দাগানর্ দুড়িগান্ আর সিয়েনির বেক্ মেশিনানি আর সিয়েনি কামত্ লাগেবার্ বেক্ লাগেদে পজা-পিরানিয়ো তারাত্তুন বুয়োই নেযা পুরিবো। কন্না কি বুয়োই নেযেব সিয়েনি তুমিই তারারে ঠিগ্ গুরি দিবে। 33ইয়েনই অলঅ মিলন-তাম্বুলোর কামত্ মরারীয় বংশগুনোর দায়িত্বো। তারার্ কামানি দেগাশুনো গুরিবার্ দায়িত্বো থেবঅ ধর্মগুরু হারোণর পূঅ ঈথামর উগুরে।”
লেবীয় বংশগুনোর্ মানুচ্ গুণোনা
34বংশ আর পরিবার মজিম মোশি, হারোণ আর ইস্রায়েলীয় নেতাগুনে কহাতীয়গুনোরে গুণি নেযেলাক্। 35ত্রিশত্তুন্ ধুরি পঞ্চাশ বজর বয়জ সং যিগুনোর্ মিলন-তাম্বুলোত্ কাম্ গুরিবাত্তে এবার্ কধা, 36বংশ মজিম তারারে গুণিবার্ পরেদি দেগা গেলঅ তারা জনেদি দ্বিআজার্ সাতশত পঞ্চাশ জন। 37ইগুনোই এলাক্ সেই বেক্ কহাতীয় বংশগুনোর্ বেক্কুন। মোশিরে দিইনে লগেপ্রভুর দিয়া উগুম মজিম মোশি আর হারোণে তারার্ সোংখ্যেগুন গুণি নেযেয়োন।
38বংশ আর পরিবার মজিম গের্শোনীয়গুনোরে গুণি নেযা ওইয়্যে। 39ত্রিশত্তুন্ ধুরি পঞ্চাশ বজর বয়স সং যিগুনে মিলন-তাম্বুলোত কাম্ গুরিবাত্তে এবার্ কধা, 40বংশ আর পরিবার মজিম তারারে গুণিবার পরেদি দেগা গেলঅ তারা জনেদি দ্বিআজার্ ছয়শত ত্রিশজন। 41ইগুনোই অলাক্ সেই বেক্ গের্শোনীয় বংশগুনোর্ বেক সোংখ্যেগুন। লগেপ্রভুর উগুম্ মজিম মোশি আর হারোণে তারারে গুণি লোইয়্যে।
42বংশ আর পরিবার মজিম মরারীয়গুনোরে গুণি নেযা ওইয়্যে। 43ত্রিশত্তুন্ ধুরি পঞ্চাশ বজর বয়জ্ সং যিগুনে মিলন-তাম্বুলোত কাম্ গুরিবাত্তে এবার্ কধা, 44বংশ মজিম তারারে গুণিবার পরেদি দেগা গেলঅ তারা জনেদি তিন আজার্ দ্বিশত। 45ইগুনোই অলাক্ সেই বেক্ মরারীয় বংশগুনোর্ বেক সোংখ্যেগুন। মোশিরে দিইনে লগেপ্রভুর্ দিয়া উগুম্ মজিম মোশি আর হারোণে তারারে গুণি লোইয়্যে।
46মোশি, হারোণ আর ইস্রায়েলীয় নেতাগুনে ইঙিরিনে বংশ আর পরিবার্ মজিম বেক্ লেবীয়গুনোরে গুণি ললাক্। 47-48ত্রিশত্তুন্ ধুরি পঞ্চাশ বজর্ বয়জ্ সং যিদক্কুন্ মান্জ্যর্ মিলন-তাম্বুলোত্ সেবার্ কাম্ আর পজা-পিরা ববার কাম্ গুরিবাত্তে এবার্ কধা তারার্ বেক সোংখ্যেগুনে অলাক আস্টো আজার্ পাঁচশ আশি। 49মোশিরে দিইনে লগেপ্রভুর্ দিয়া উগুম্ মজিম বেক্কুনেই তার্ কাম্ আর কিঙিরিনে বুয়োই নেযা পুরিবো সিয়েন্ ঠিগ্ গুরি দিয়া ওইয়্যে।
মোশিরে লগেপ্রভু যে উগুমান দিয়্যে সেই মজিম এবাবোত্যেগুরি লেবীয়গুনোর্ মান্জ্যর সোংখ্যেগুন গণা ওইয়্যে।
Copyright © 2021 Bangladesh Bible Society