গণাণা 6
6
নাসরীয়গুনোর কামানি
1লগেপ্রভু মোশিরে কলঅ, 2তুই ইস্রায়েলীয়গুনোরে জানেই দে, যুনি কনঅ মরদ বা মিলেমানুচ্ নাসরীয় ইজেবে লগেপ্রভুর নাঙে যুদো ওই থেবাত্যে বিশেষ গুরি শমক্ খান্, 3তার্ আংগুর-রস বা কনঅ বাবোত্তে মদ হেই ন-পারিবো। তে আংগুর-রস বা মদত্তুন্ বানেইয়্যে সিরকায়ো হেই ন-পারিবো। এমন্ কি, কাজা আংগুর-রস, আংগুর বা কিশমিশঅ তে হেই ন-পারিবো। 4আজল্ কধা, তে যেদকদিন নাসরীয় থেবঅ সেদকদিন সং আংগুর ফলর কনঅ কিজু তে হেই ন-পারিবো, ইবের্ বিজিয়ো না বা খোজাগুনঅ না।
5যেদকদিন সং তে নাসরীয় ইজেবে নিজোরে যুদো গুরি রাগেব বিলি শমক্ গোজ্যে সেদকদিন সং তার্ মাদাত্ ক্ষুর্ বাজেই ন-পারিবো। লগেপ্রভুর্ নাঙে যুদো ওই থেবার্ সময়োত্ তাত্তুন্ লগেপ্রভুর ওইনে থাহ্ পুরিবো। তার্ চুলান্ লাম্বা অবাত্তে সুযোগ দিয়া পুরিবো। 6এ সময়ত্ তে কনঅ মরাকিয়্যের্ কায়কুরে যেই ন-পারিবো। 7মা-বাপ্-ভেই-বোনুনোর কনজন মুরি গেলেয়ো তাত্তুন্ নিজোরে ফি-বলা গুরি ন-পারিবো, কিত্যে তার্ মাঢাবোত্ আঘে গোজেনর নাঙে যুদো ওইনে থেবার্ চিহ্নো। 8তার্ এই যুদো ওই থেবার্ বেক্ সময়ানত্ তাত্তুন্ লগেপ্রভুর্ ওইনে থাহ্ পুরিবো।
9যুনি কনজনে আদিক্কেনগুরি তার্ মুজুঙোত্ মুরি যায় আর সেক্কে লগেপ্রভুর্ নাঙে রাগেয়ে তার্ চুলান্ ফি-বলা ওই যায় সালে সাত দিনোর্ দিন্নোত্, অত্তাৎ তার্ শুদ্ধো-সাংগ অবার্ দিন্নোত্ তার্ মাঢাবো মুড়েই ফেলা পুরিবো। 10আস্টো দিনোর্ দিন্নোত্ তাত্তুন্ মিলন-তাম্বুলোর দোরানত্ ধর্মগুরুগুনো ইদু দ্বিবে কঅ ন-অলে দ্বিবে কোদোর্ নেযা পুরিবো। 11মরা মান্জ্যর কায়কুরে থেবার্ কারনে তে ফি-বলা ওইয়্যে বিলি তার্ ফি-বলাগান্ ঢাগি দিবাত্তে ধর্মগুরুবো এক্কো পেখ্কোই পাপ-উৎসর্ব আর অন্যবোলোই পুজ্যে-উৎসর্ব গুরিবো। সেদিন্যে তার্ মাঢাবোর্ চুলান্ তাত্তুন্ লগেপ্রভুর্ নাঙে নুয়ো গুরি রাগা পুরিবো, 12আর সেই সমারে তাত্তুন্ নিজোরে আগঅ ধোক্ক্যেন্ লগেপ্রভুর আওজে যুদো গুরি রাগেবার্ শমক্ গরা পুরিবো। ইয়েন্বাদে দুষ-উৎসর্বত্তে তাত্তুন্ এক বজরর্ এক্কো ভেড়াছাগলর ছঅ আনা পুরিবো। ইয়েনর আগেন্দি যেদকদিন তে লগেপ্রভুর নাঙে যুদো ওই রোইয়্যে সেই দিনুন্ বাতিল ওই যেবঅ, কিত্যে সে সময়োত্ তে ফি-বলা ওইয়্যে।
13লগেপ্রভুর নাঙে এক্কো নাসরীয়োর যুদো ওই থেবার্ সময়ান্ পার্ ওই যানার্ পরেদি এই অনুষ্ঠানান্ পালন গরা পুরিবো। তাত্তুন্ মিলন-তাম্বুলোর দোরান কায়কুরে যাহ্ পুরিবো। 14সিয়েনত্ লগেপ্রভুর নাঙে তাত্তুন উৎসর্ব ইজেবে পূজ্যে-উৎসর্বত্তে এক বোজোজ্যে এক্কো দাগ্দুগ্ নেইয়্যে ভেড়াছাগলর-ছঅ্, পাপ-উৎসর্বত্তে এক বজরর্ এক্কো দাগ্দুগ্ নেইয়্যে পাদি ভেড়াছাগলর-ছঅ আর উদোলোলি-উৎসর্বত্তে এক্কো দাগ্দুগ্ নেইয়্যে ভেড়াছাগল আনা পুুরিবো। 15ইগুনো সমারে থেবঅ ইবের্ লগে শোজ্য-উৎসর্ব আর ঢালন-উৎসর্বর জিনিস আর এক কট্টা সদাছাড়া পিদে। এই পিদেগানি অবঅ তেলর্ ময়ান্ দিয়া নিগুজ মোয়দের্ পিদে আর তেল্ মিজেয়ে চাপাটি। 16ধর্মগুরুবোত্তুন্ ইয়েনি লগেপ্রভুর মুজুঙোত্ নেযেইনে রাগা পুরিবো আর তাত্তুন পাপ-উৎসর্বর, পূজ্যে-উৎসর্বর অনুষ্ঠান গরা পুরিবো। 17ইয়েনবাদে তাত্তুন্ উদোলোলি-উৎসর্বর ভেড়াছাগল্লো কাবিনে সিবে উৎসর্ব গুরিবার সময় লেইবোর্ পিদেগানিয়ো উৎসর্ব গরা পুরিবো আর ইয়েনি সমারে শোজ্য-উৎসর্ব আর ঢালন-উৎসর্বর অনুষ্ঠানঅ গরা পুরিবো। 18সে পরেদি মিলন-তাম্বুলোর দোরান কায়কুরে নাসরীয়বোত্তুন্ তার্ লগেপ্রভুর নাঙে রাগেয়ে চুলান্ মুড়ো পুরিবো। এই চুলান্ নেযেইনে তে উদোলোলি-উৎসর্বর্ তলেদি আগুনোত্ ফেলে দিবো। 19লগেপ্রভুর্ নাঙে রাগেয়্যে চুলানি মুড়ে ফেলানার পরেদি ধর্মগুরুবো ভেড়াছাগল্লোর এক্কান্ সিদ্ধো গোজ্যে আঢ রান্ আর লেইবোত্তুন্ এক্কান সদাছাড়া পিদে আর চাপাটি লোইনে সেই নাসরীয়োবোর্ আঢত্ দিবো। 20সে পরেদি ধর্মগুরুবো দোলন-উৎসর্ব ইজেবে সিবে লগেপ্রভুর মুজুঙোত্ দুলেব। ইগুন্ পবিত্র আর ধর্মগুরুগুনোর্ পাওনা। ইগুনবাদে দুলেই রাগেয়ে বুগোর্ য়েরা আর উৎসর্ব গোজ্যে নলাপেট্টোয়ো ধর্মগুরুগুনোর্ পাওনা। এদক্কানি ওই যানার্ পরেদি সেই নাসরীয়বো আংগুরো-রস হেই পারিবো।
21“নাসরীয়বোত্তে ইয়েনোই অলঅ সুদোম। লগেপ্রভুর নাঙে যুদো ওই থেবার্ শমক্ মজিম তাত্তুন্ এদক্কানি উৎসর্বর অনুষ্ঠান গরা পুরিবো। ইয়েনবাদে যুনি তে নিজোর্ খেমতা ধোক্ক্যেন আরঅ্ কিজু দিবার্ শমক্ গুরি থায় সালে সিয়েনঅ তাত্তুন্ দিয়া পুরিবো। তে যিয়ান্ এগেম্ গোজ্যে লগেপ্রভুর নাঙে যুদো ওই থেবার্ সুদোম মজিম তাত্তুন্ এই বেক্কানি দিয়া পুরিবো।”
ধর্মগুরুবোর বর্ দেনা
22লগেপ্রভু মোশিরে কলঅ, 23তুই হারোণ আর তার্ পূঅগুনোরে কোইদে, তারা এই কধাগান্ কোইনে ইস্রায়েলীয়গুনো উগুরে বর্ দিবাক্:
24লগেপ্রভু তরে বর্ দোক্
আরঅ রোক্ষে গোরোক্;
25লগেপ্রভুর দোয়্যেগান্ পহ্র ধোক্ক্যেন
তর্ উগুরে পোড়োক্;
তাঁর্ কোচ্পানাগান তঅ উগুরে থোক্।
26লগেপ্রভু তাঁর মুয়োন্ তইন্দি ফিরোক্
আর তরে সাজা দুয়োক্।
27“এবাবোত্যেগুরি তারা ইস্রায়েলীয়গুনো উগুরে মর্ নাঙান্ কুয়ো ধুরিবাক্, সেক্কে মুয়ই তারারে বর্ দিম।”
Copyright © 2021 Bangladesh Bible Society