গণাণা 3
3
লেবীয়গুন
1ইয়েন অলঅ হারোণ আর মোশির্ বংশগুনোর কধা যেক্কে লগেপ্রভু সিনাই মুড়োবোত্ মোশির্ লগে কধা কোইয়্যে।
2-3হারোণর পূঅগুন অলাক নাদব, অবীহূ, ইলীয়াসর আর ঈথামর। ইগুনো ভিদিরে নাদবে এলঅ দাঙর্বো। ধর্মগুরু ইজেবে খেমতা দিইনে ইগুনোরে সেবা-কামত্ লাগেই দিয়া ওইয়্যে। 4মাত্তর্ নাদব আর অবীহূ সিনাই ধূল্যেচর-চাগালাত্ লগেপ্রভুর্ নাঙে সুদোমর্ বারেন্দি আগুন্দোই পোইরেক জ্বালেবার সময় লগেপ্রভুর মুজুঙোত্ মুরি যেইয়োন। তাঁরার কনঅ পূঅ ন-এলাক বিলিনে ইলীয়াসর আর ইথামরর্ বাপ্পো বাঁজি থাগদে ধর্মগুরু ইজেবে সেবার্ কাম্ গোজ্যে।
5যেরেন্দি লগেপ্রভু মোশিরে কলঅ, 6“লেবি-গুট্টির মানুচ্চুনোরে ডাগি আনিনে হারোণর্ আদত্ দে যেনে তারা তারে সাহায্য গুরি পারন। 7তারা বেক্ ইস্রায়েলীয়গুনোর্ ওইনে মিলন-তাম্বুলোত হারোণর অধীনোত্ থেবার-তাম্বুলর কাম্ গুরিবাক। 8তারা মিলন-তাম্বুলোর্ পজা-পিরানি দেগাশুনো আর থেবার-তাম্বুলর কাম্ গুরিনে ইস্রায়েলীয়গুনোর্ দায়িত্তো আর কামানি পালেবাক্। 9লেবীয়গুনোরে তুই হারোণ আর তার্ পূঅগুনো আঢত্ দে। ইস্রায়েলীয়গুনো ভিদিরেত্তুন্ ইগুন্ বেক্কুনোরে হারোণর আঢত্ দিদে পুরিবো। 10ধর্মগুরু ইজেবে কাম গুরিবাত্তে তুই হারোণ আর তার পূঅগুনোরে নেযা। তারা বাদেয়ো আর কনজনে যুনি ধর্মগুরুর কাম্ গুরিবাত্তে যান্ সালে তারে মারে ফেলা অবঅ।”
11লগেপ্রভু মোশিরে আরঅ কলঅ, 12“ইস্রায়েলীয় মিলেমানুচ্চুনোর্ পত্তম পূঅবোর জাগানত্ মুই ইস্রায়েলীয়গুনো ভিদিরেত্তুন্ লেবীয়গুনোরে নেযেয়োং। লেবীয়োগুন মর্, 13কিত্যে ইস্রায়েলীয়গুনোর্ বেগঅ পত্তম পূঅবো মর্। মিসর দেজর্ পত্তম পূঅগুনোরে মারে ফেলেবার্ সময় মুই ইস্রায়েলীয়গুনো ভিদিরে পত্তম মরদ্ পূঅবোরে মত্তে যুদো গুরি রাগেয়োং-তে মানজ্যর্ ওক্ বা য়েমানর্ ওক্। তারা মর্; মুই লগেপ্রভুর্।”
14সিনাই ধূল্যেচর-চাগালাত্ লগেপ্রভু মোশিরে কলঅ, 15“তুই পরিবার আর বংশ মজিম লেবীয়গুনোরে গুণি নেযা। এক মাস আর তাত্তুন্ বেশ্ বয়জর্ বেক্ মরত্তুনোরে গুণি লঅ।” 16লগেপ্রভুর উগুম মজিম মোশি লেবীয়োগুনোরে গুণি নেযেল। 17লেবীর পূঅগুনোর্ নাঙানি অলঅ গের্শোন, কহাৎ আর মরারি। 18গের্শোনর্ পূঅ লিব্নি আর শিমিয়ি এলাক দ্বিবে বংশর বাপ। 19কহাতর পূঅ অম্রাম, যিষ্হর, হিব্রোণ আর উষীয়েলদাগি এলাক চের্বো বংশর বাপ্। 20মরারির্ পূঅ মহলি আর মূশি অলাক দ্বিবে বংশর বাপ্। ইগুন অলাক বংশ-বাপ মজিম লেবি-গুট্টির নানান্ বংশর্ পরিচয়।
21গের্শোন অলঅ লিব্নি আর শিমিয়ি বংশর পুরোণি মানুচ্। 22এই বংশগুনোর্ এক মাস আর তাত্তুন্ বেশ্ বয়জর্ বেক্ মরত্তুনোরে গুণিবার্ পরেদি দেগা গেলদে, তারা জনেদি সাত আজার্ পাঁচশত। 23পোজিমেন্দি থেবার-তাম্বুলো পিজেন্দি গের্শোনীয়গুনোরে তাম্বুল ফেলেবাত্তে কুয়ো ওইয়্যে। 24গের্শোনীয় বংশগুনোর্ নেতা এলঅ লায়েলর পূঅ ইলীয়াসফ। 25মিলন-তাম্বুল পৌইদ্যেনে গের্শোনীয়গুনোর্ দায়িত্তো এলঅ থেবার-তাম্বুলান, তা উগুরে বিজেইয়ে ছাগল কেজর্ ঢাগনি, তা উগুরে ছাল্ দ্বিয়েন, মিলন-তাম্বুলত চুমিবার্ দোরানর পর্দাগান্, 26উদোনর্ পর্দাগানি, থেবার্-তাম্বুলান আর পূজোবোর্ চেরোকিত্তে যে উদোনান্ আঘে সিয়েনত্ চুমিবার্ দোরো পর্দাগান্ আর থেবার্-তাম্বুলোর বেক্ দুড়িগানি দেগাশুনো গরানা আর ইয়েনি সমারে অন্য বেক্ কামানি গরানা।
27কহাৎ এলদে অব্রাম, যিষহর, হিব্রোণ আর উষীয়েলর বংশর পুরোণি মানুচ্। 28এই বংশগুনোর্ এক মাস আর তাত্তুন্ বেশ্ বয়জর্ বেক্ মরত্তুনে জনেদি অলাক আস্টো আজার্ ছয়শত। পবিত্র তাম্বুলর দেগাশুনোর্ দায়িত্বো এলঅ কহাতীয়গুনো উগুরে। 29থেবার-তাম্বুলোর্ দোগিণেদি কহাতীয়গুনোরে তাম্বুল টাঙেবাত্তে কুয়া ওইয়্যে। 30কহাতীয় বংশগুনোর্ নেতা এলদে উষীয়েলর পূঅ ইলীষাফণ। 31কহাতীয়গুনোর দায়িত্তো এলদে সাক্ষ্য-সুন্দুক্কো, টেবিল, চেরাগ বদং, পূজোগুন্, পবিত্র তাম্বুলর সেবা-কামত্ বেবহারর্ পযা-পিরানি আর দাঙর্ পবিত্র জাগানর্ পর্দাগানি দেগাশুনো গরানা আর ইয়েনি সমারে অন্য বেক্ কামানি গরানা। 32লেবীয়গুনোর বেগঅ দাঙর্ নেতা এলদে ধর্মগুরু হারোণর পূঅ ইলীয়াসর। পবিত্র তাম্বুলোর দেগাশুনো গুরিবার্ ভারান্ যিগুনোরে দিয়া ওইয়্যে তারারে দেগাশুনো গুরিবাত্তে ইলীয়াসররে নেযা ওইয়্যে।
33মরারি এলদে মহলি আর মূশির বংশর পুরোণি মানুচ্। 34এই বংশগুনোর্ একমাস আর তাত্তুন্ বেশ্ বয়জর্ বেক্ মরত্তুনোরে গুণি নেযানার্ পরেদি দেগা গেলদে, তারা জনেদি ছয় আজার্ দুইশত জন। 35মরারীয় বংশগুনোর নেতা এলদে অবীহয়িলেরর্ পূঅ সূরীয়েল। থেবার-তাম্বুলো উত্তোরেদি তারার্ তাম্বুলানি টাঙেবাত্তে কুয়ো ওইয়্যে। 36মরারীয়গুনোর্ দায়িত্বো এলদে থেবার-তাম্বুলোর ফ্রেমানি, তার হুক্, খুদো, টেঙানি আর তার্ বেক্ পযাপিরানি, 37চেরোকিত্তে উদোনর্ খুদো আর টেঙানি, উদোন পর্দার খুঁদোগুন আর দুড়িগানি দেগাশুনো গরানা আর ইয়েনি সমারে অন্য বেক্ কামানি গরানা।
38মিলন-তাম্বুলো মুজুঙোত্, অত্তাৎ থেবার-তাম্বুলো পূগেন্দি মোশি, হারোণ আর তাঁর পূঅগুনোরে তাম্বুল তুলিবাত্তে কুয়ো ওইয়্যে। তাঁরার্ দায়িত্বো এলদে ইস্রায়েলীয়গুনোর্ ওইনে পবিত্র তাম্বুর বেক্ কামানি পরিচালনা গরানা। তাঁরা বাদে আর কনজনে পবিত্র তাম্বুল ইদু গেলে তারে মারে ফেলেবাত্তে কুয়ো ওইয়্যে।
39লগেপ্রভুর উগুমে বংশ মজিম মোশি আর হারোণর গুণি নেযেয়্যে লেবীয় মরত্তুনোর্ বেক্ সোংখ্যেগুন ওইয়োন্ বেইশ্ আজার্। ইগুনে বেক্কুনে এলাক এক মাস আর তাত্তুন্ বেশ্ বয়জর।
40ইয়েন পরেদি লগেপ্রভু মোশিরে কলঅ, “তুই ইস্রায়েলীয়গুনো ভিদিরে পত্তম জোর্মেয়োন এধোক্কেন বেক্ এক মাস আর তাত্তুন্ বেশ্ বয়জর্ মরত্তুনোর্ সোংখ্যেগুন গুণি নেযেইনে তারার্ নাঙানর্ এক্কান লিস্টি বানেই লঅ। 41ইস্রায়েলীয়গুনোর্ বেক্ পত্তম মরদ্ পূঅগুনোর্ জাগানত্ লেবীয়গুনোর্ আর ইস্রায়েলীয়গুনোর্ য়েমান পত্তম ছঅবোর্ জাগানত্ লেবীয়গুনো য়েমানর্ পত্তম ছঅবো মর্ বিলিনে ধুরিবা। মুই লগেপ্রভু।”
42লগেপ্রভুর দিয়্যে উগুম্ মজিম্ মোশি ইস্রায়েলীয়গুনো ভিদিরে পত্তম জোর্মেয়োন এবাবোত্যে বেক্ মরত্তুনোরে গুণিলাক। 43পত্তম জোর্মেয়োন এবাবোত্যে বেক্ এক মাস আর তাত্তুন্ বেশ্ বয়জর্ মরত্তুনোর্ নাঙানি লেগানার্ পরেদি দেগা গেলদে, তারার্ বেক্ সোংখ্যেগুন বেইশ্ আজার্ দুইশঅ তেয়োত্তুর জন।
44লগেপ্রভু মোশিরে আরঅ কলঅ, 45“তুই ইস্রায়েলীয়গুনোর্ বেক্ পত্তম মরদ্ পূঅগুনো জাগানত্ লেবীয়গুনোর্ আর ইস্রায়েলীয়গুনোর্ য়েমানর পত্তম ছঅবো জাগানত্ লেবীয়গুনোর্ য়েমানর ছঅবো ধুরি নেযেবে। লেবীয়োগুনে অবাক্ মর্; মুই লগেপ্রভু। 46-47লেবীয়গুনোর বেক সোংখ্যেত্তুন্ ইস্রায়েলীয়গুনোর্ পত্তম মরদ্ পূঅগুনোর্ সোংখ্যে দিশঅ তেয়োত্তুর্ জন বেশ্ বিলি তারার্ বেক্কুনোরে ছাড়েই নিবাত্তে তুই জন পত্তি দশ গ্রাম ওজনর্ ধর্মীয় শেখেলর পাচ্ শেখেল গুরি রূবো আদায় গুরিবে। 48তারারে ছাড়েই নিবার্ এ রূবোগান্ তুই হারোণ আর তার্ পূঅগুনোরে দি দিবে।” 49লেবীয়গুনোরে দিইনে ইস্রায়েলীয়গুনোরে ছাড়েই নিবার্ পরেদি ইস্রায়েলীয়গুনোর্ যে সোংখ্যেবো বাড়িলাক্ মোশি তারারে ছাড়েই নিবার্ রূবোগানি আদায় গুরিলো। 50ইস্রায়েলীয়গুনোর্ পত্তম মরদ্ পূঅগুনোত্তুন্ তে ধর্মীয় মাবর্ ওজন মজিম্ তের কেজি ছয়শত পঞ্চাশ গ্রাম রূবো আদায় গুরিলো। 51মোশি লগেপ্রভুর উগুম্ মজিম্ এই ছাড়েই নিবার্ রূবোগানি হারোণ আর তার পূঅগুনোরে দিলো।
Copyright © 2021 Bangladesh Bible Society