গণাণা 2
2
তাম্বুল খাদেবার জাগান পৌইদ্যেনে উগুম্
1ইয়েনর্ পরেদি লগেপ্রভু মোশি আর হারোণরে কলদে, 2মিলন-তাম্বুলত্তুন্ কিজু দূরোত্ সিয়েনর্ চেরোকিত্তে ইস্রায়েলীয়গুনে তারার্ তাম্বুলান্ টাঙেবাক্। পত্তি জনত্তুন তার্ চাগালার বাবতা আর বংশর নিশান ইদু থাহ্ পুরিবো।
3-4যিহূদা-চাগালার মানুচ্চুনে মিলন-তাম্বুলর্ পূগেন্দি তাম্বুলান টাঙেবাক্। যিহূদা-গুট্টির নেতা অলঅ অম্মীনাদবর পূঅ নহশোন আর তার মানুচ্চুন অলাক চুয়োত্তুর্ আজার্ ছয়শত। 5-8যিহূদা-গুট্টির এক কিত্তেন্দি ইষাখর-গুট্টি আর অন্য কিত্তেন্দি সবূলূন-গুট্টির মানুচ্চুনে তাম্বুল টাঙেলাক্। ইষাখর-গুট্টির নেতা অলাক সূয়ারর পূঅ নথনেল আর তা মানুচ্চুন সোংখ্যেদি অলাক চুপ্পান্ন আজার্ চেরশত। সবূলূন-গুট্টির নেতা অলঅ হেলোনর পূঅ ইলীয়াব আর তা মানুচ্চুনোর সোংখ্যে অলাক সাতান্ন আজার্ চেরশত। 9যিহূদা-চাগালার্ গুণি নেযেয়ে বেক মানুচ্চুন জনেদি অলাক এক লাখ্ ছিয়েশি আজার্ চেরশত। ইগুনোর্ পত্তমে যাহ্ পুরিবো।
10-11দোগিণেদি তাম্বুল টাঙেবাক্ রূবেণ-চাগালার মানুচ্চুনে। রূবেণ-গুট্টির নেতা অলঅ শদেয়ূরোর পূঅ ইলীষূর আর তা মানুচ্চুন জনেদি অলাক্ ছয়চোল্লিশ আজার্ পাচশত। 12-15রূবেণ-গুট্টির এক কিত্তেন্দি শিমিয়োন-গুট্টি আর অন্য কিত্তেন্দি গাদ-গুট্টির মানুচ্চুনে তাম্বুল টাঙেবাক্। শিমিয়োন-গুট্টির নেতা অলঅ সূরীশদ্দয়র পূঅ শলুমীয়েল আর তা মানুচ্চুন জনেদি অলাক্ উনষায়েট্ আজার্ তিনশত। গাদ-গুট্টির নেতা অলঅ রূয়েলর পূঅ ইলীয়াসফ আর তা মানুচ্চুন জনেদি অলাক্ পাঁচ্চোল্লিশ আজার্ ছয়শ পঞ্চাশ। 16রূবেণ-চাগালার্ গুণি নেযেয়ে বেক মানুচ্চুন জনেদি অলাক এক লাখ্ একান্ন আজার্ চেরশ পঞ্চাশ। ইগুনে দ্বিলম্বর দল ইজেবে আদা মারিবাক্।
17সে পরেদি মিলন-তাম্বুলান নেযেইনে আদা মারিবাক্ লেবি-গুট্টির মানুচ্চুনে। ইগুনে থেবাক্ বেক্ চাগালাগানর্ সংমোধ্যে। এক্কানর্ পর্ এক্কান্ যিঙিরিনে তারা তাম্বুলানি টাঙেবাক্ সেধোক্কেগুরি তারাত্তুন্ পর পর আদা মারিবাক্। পত্তি জনত্তুন্ তার্ নিজোর দল সমারে থাহ্ পুরিবো।
18-19পোজিমেন্দি তাম্বুল টাঙেবাক ইফ্রয়িম-ভাগর মানুচ্চুনে। ইফ্রয়িম-গুট্টির নেতা অলঅ অম্মীহূদোর্ পূঅ ইলীশামা আর তা মানুচ্চুন জনেদি অলাক চোল্লিশ আজার্ পাঁচশত। 20-23ইফ্রয়িম-গুট্টির এক কিত্তেন্দি মনঃশি-গুট্টিগুন আর অন্য কিত্তেন্দি বিন্যামীন-গুট্টির মানুচ্চুনে তাম্বুল টাঙেবাক্। মনঃশি-গুট্টির নেতা অলাক পদাহসূরোর পূঅ গমলীয়েল, আর তা মানুচ্চুন জনেদি অলাক বোত্রিশ আজার্ দুইশত। বিন্যামীন-গুট্টির নেতা অলাক গিদিয়োনর্ অবীদান আর তা মানুচ্চুন জনেদি অলাক পাত্রিশ আজার্ চেরশত। 24ইফ্রয়িম-ভাগর গুণি নেযেয়্যে বেক্ মানুচ্চুন জনেদি অলাক এক লাখ্ আস্টো আজার্ একশত। ইগুনে তিন লম্বর দল ইজেবে আদা মারিবাক।
25-26“উত্তোরেদি তাম্বুল টাঙেবাক্ দান-চাগালার্ মানুচ্চুনে। দান-গুট্টির নেতা অলঅ অম্মীশদ্দয়র্ পূঅ অহীয়েষর আর তা মানুচ্চুন জনেদি অলাক বাষোট্টি আজার্ সাতশত। 27-30দান-গুট্টির এক কিত্তেদি আশের-গুট্টি আর অন্য কিত্তেন্দি নপ্তালি-গুট্টির মানুচ্চুনে তাম্বুল টাঙেবাক্। আশের-গুট্টির নেতা অলঅ অক্রণর পূঅ পগীয়েল আর তা মানুচ্চুন জনেদি অলাক একচোল্লিশ আজার্ পাঁচশত। নপ্তালি-গুট্টির নেতা অলঅ ঐননর পূঅ অহীরঃ আর তা মানুচ্চুন জনেদি অলাক্ তিপ্পান্ন আজার্ চেরশত। 31দান-চাগালার্ গুণি লোইয়্যে বেক্ মানুচ্চুন জনেদি অলাক এক লাখ্ সাতান্ন আজার্ ছয়শত। ইগুনে বেক্কুনোর শেজদি নিজোর্ বিভাগ সমারে আদা মারিবাক্।”
32এই বেক্ ইস্রায়েলীয়গুনোর্ বংশ মজিম গুণি নেযা ওইয়্যে। নানান্ বিভাগর্ গুণি লোইয়্যে বেক মানুচ্চুন জনেদি অলাক্ ছয় লাখ্ তিন আজার্ পাচশ পঞ্চাশ জন। 33লগেপ্রভু মোশিরে যে উগুম্ দিয়্যে সেই মজিম ইস্রায়েলীয়গুনে গুণিবার্ সময়োত্ লেবীয়গুনোরে বাদ দিয়া ওইয়্যে।
34মোশিরে দিয়া লগেপ্রভুর উগুম মজিম্ ইস্রায়েলীয়গুনে বেক্কানি গুরিদাক্। তা উগুম মজিম্ তারা যার্ যার্ চাগালাত্ তাম্বুল টাঙেদাক্ আর তাঁর্ উগুম মজিম তারা যার্ যার্ বংশ আর পরিবার্ মজিম আদা মারিদাক্।
Copyright © 2021 Bangladesh Bible Society