গণাণা 1
1
মানুচ্ গণানা
1ইস্রায়েলীয়গুনে মিসর দেজত্তুন্ নিগিলি এজানার্ পরেদি দ্বিবজরর্ দ্বিমাজর্ পত্তম দিনোত্ লগেপ্রভু সিনাই ধূল্যেচর চাগালাত্ মিলন-তাম্বুলো ভিদিরে মোশির লগে কধা কোইয়্যে। তে কলদে, 2-3“তুই বংশ আর পরিবার্ ইজেবে ইস্রায়েলীয়গুনো ভিদিরে যিদুক্কুন্ মরদর্ বয়স কুড়ি বা তাত্তুন্ বেশ্, অত্তাৎ যিগুনে যুদ্ধোত্ যেবার্ অক্ত ওইয়োন্ তারার্ নাঙানি এক্কান এক্কান্ গুরি লিগিনে পত্তিজনরে দল মজিম তুই আর হারোণে মানুচ্চুনোরে গুণিবা। 4পত্তি গুট্টিত্তুন্ একজন গুরি মান্জ্যে তরে সাহায্য গুরিবাক, আর সেই মানুচ্চোত্তুন্ তার্ বংশর্ নেতাবো উয়ো পরিবো। 5যিগুনে তরে সাহায্য গুরিবাক তারার্ নাঙানি অলঅ রূবেণ-গুট্টির্ শদেয়ূরোর্ পূঅ ইলীষূর, 6শিমিয়োন-গুট্টির সূরীশদ্দয়র পূঅ শলুমীয়েল, 7যিহূদা-গুট্টির অম্মীনাদবর পূঅ নহশোন, 8ইষাখর-গুট্টির সূয়ারর্ পূঅ নথনেল, 9সবূলূন-গুট্টির হেলোনর পূঅ ইলীয়াব, 10যোষেফর পূঅগুনোর্ মোধ্যে ইফ্রয়িম-গুট্টির অম্মীহূদর পূঅ ইলীশামা আর মনঃশি-গুট্টির পদাহসূরোর্ পূঅ গমলীয়েল, 11বিন্ন্যামীন-গুট্টির গিদিয়োনির পূঅ অবীদান, 12দান-গুট্টির অম্মীশদ্দয়র্ পূঅ অহীয়েষর, 13আশের-গুট্টির অক্রণর পূঅ পগীয়েল, 14গাদ-গুট্টির দ্যূয়েলর পূঅ ইলীয়াসফ, 15নপ্তালি-গুট্টির ঐননর পূঅ অহীরঃ।”
16ইস্রায়েলীয়গুনো ভিদিরেত্তুন্ এ বেক্ মানুচ্চুনোরে নেযা অলঅ। ইগুনে অলাক্ তারার্ পুরোণি মানুচ্চুনোর্ গুট্টির মুরুব্বী আর ইস্রায়েলীয়গুনোর্ ভালোক্ বংশর্ আজার উগুরে এক্কো নেতা। 17-18লগেপ্রভু যিগুনোর্ নাঙানি কোইয়্যে মোশি আর হারোণে তারারে ডাগি নিলো আর সেই বজরর্ দ্বিমাজর্ পত্তম দিনোত্ তারা বেক্ ইস্রায়েলীয়গুনোরে এক সমারে এগত্তর্ গুরিলাক। ইস্রায়েলীয়গুনে বংশ আর পরিবারর্ নাঙানি কোইনে তারার্ পুরোণি মানুচ্চুনোর্ পরিচয় দিলাক্। কুড়ি আর তাত্তুন্ বেশ্ বয়জর্ মরত্তুনোর্ নাঙানি এক্কান্ এক্কান্ গুরি লিগি নেযা অলঅ। 19সিনাই ধূল্যেচর চাগালাত্ মোশি লগেপ্রভুর উগুম্ মজিম মানুচ্চুনোরে গুণি নেযেল।
20ইস্রায়েলর্ দাঙর্ পূঅ রূবেণর বংশধরুনো ভিদিরে যিগুনোর্ বয়স কুড়ি বা তাত্তুন্ বেশ্, অত্তাৎ যিগুনে যুদ্ধোত্ যেবার্ অক্ত ওইয়োন্, বংশ আর পরিবারর্ পরিচয় মজিম একজন একজন গুরি তারার্ নাঙানি লিগি নেযা অলঅ। 21রূবেণ-গুট্টিত্তুন্ যিগুনোরে পাহ্ গেল তারার্ সোংখ্যে অলাক ছয়চোল্লিশ আজার্ পাঁচশত।
22শিমিয়োনর্ বংশধরুনো ভিদিরে যিগুনোর্ বয়স কুড়ি বা তাত্তুন্ বেশ্, অত্তাৎ যিগুনে যুদ্ধোত্ যেবার্ অক্ত ওইয়োন, বংশ আর পরিবারর্ পরিচয় মজিম গুণি লোইনে একজন একজন গুরি তারার্ নাঙানি লিগি নেযা অলঅ। 23শিমিয়োন-গুট্টিত্তুন যিগুনোরে পাহ্ গেলঅ তারার্ সোংখ্যে অলাক উনষায়েট্ আজার্ তিনশত।
24গাদর বংশধরুনো ভিদিরে যিগুনোর্ বয়স কুড়ি বা তাত্তুন্ বেশ্, অত্তাৎ যিগুনে যুদ্ধোত্ যেবার্ অক্ত ওইয়োন, বংশ আর পরিবারর্ পরিচয় মজিম তারার্ নাঙানি লিগি নেযা অলঅ। 25গাদ-গুট্টিত্তুন্ যিগুনোরে পাহ্ গেলঅ তারার্ সোংখ্যে অলাক পাঁচ্চোল্লিশ্ আজার্ ছয়শ পঞ্চাশ জন।
26যিহূদার বংশধরুনো ভিদিরে যিগুনোর্ বয়স কুড়ি বা তাত্তুন্ বেশ্, অত্তাৎ যিগুনে যুদ্ধোত্ যেবার্ অক্ত ওইয়োন, বংশ আর পরিবারর্ পরিচয় মজিম তারার্ নাঙানি লিগি নেযা অলঅ। 27যিহূদা-গুট্টিত্তুন্ যিগুনোরে পাহ্ গেলঅ তারার্ সোংখ্যে অলাক চুয়োত্তুর আজার্ ছয়শ।
28ইষাখরর বংশধরুনো ভিদিরে যিগুনোর বয়স কুড়ি বা তাত্তুন্ বেশ্, অত্তাৎ যিগুনে যুদ্ধোত্ যেবার্ অক্ত ওইয়োন, বংশ আর পরিবারর্ পরিচয় মজিম তারার্ নাঙানি লিগি নেযা অলঅ। 29ইষাখর-গুট্টিত্তুন্ যিগুনোরে পাহ্ গেলঅ তারার্ সোংখ্যে অলাক চুপ্পান্ন আজার্ চেরশত।
30সবূলূনোর বংশধরুনো ভিদিরে যিগুনোর বয়স কুড়ি বা তাত্তুন্ বেশ্, অত্তাৎ যিগুনে যুদ্ধোত্ যেবার্ অক্ত ওইয়োন, বংশ আর পরিবারর্ পরিচয় মজিম তারার্ নাঙানি লিগি নেযা অলঅ। 31সবূলূন-গুট্টিত্তুন্ যিগুনোরে পাহ্ গেলঅ তারার্ সোংখ্যে অলাক সাতান্ন আজার্ চেরশত।
32যোষেফর পূঅগুনো ভিদিরে ইফ্রয়িমোর্ বংশধরুনো ভিদিরে যিগুনোর্ বয়স কুড়ি বা তাত্তুন্ বেশ্, অত্তাৎ যিগুনে যুদ্ধোত্ যেবার্ অক্ত ওইয়োন, বংশ আর পরিবারর্ পরিচয় মজিম তারার্ নাঙানি লিগি নেযা অলঅ। 33ইফ্রয়িম-গুট্টিত্তুন্ যিগুনোরে পাহ্ গেলঅ তারার্ সোংখ্যে অলাক চোল্লিশ আজার্ পাচশত।
34মনঃশির বংশধরুনো ভিদিরে যিগুনোর্ বয়স কুড়ি বা তাত্তুন্ বেশ্, অত্তাৎ যিগুনে যুদ্ধোত্ যেবার্ অক্ত ওইয়োন্, বংশ আর পরিবারর্ পরিচয় মজিম তারার্ নাঙানি লিগি নেযা অলঅ। 35মনঃশি-গুট্টিত্তুন যিগুনোরে পাহ্ গেলঅ তারার্ সোংখ্যে অলাক বোত্রিশ আজার্ দুইশত্।
36বিন্যামীনোর বংশধরুনো ভিদিরে যিগুনোর বয়স কুড়ি বা তাত্তুন্ বেশ্, অত্তাৎ যিগুনে যুদ্ধোত্ যেবার্ অক্ত ওইয়োন, বংশ আর পরিবারর্ পরিচয় মজিম তারার্ নাঙানি লিগি নেযা অলঅ। 37বিন্যামীন-গুট্টিত্তুন্ যিগুনোরে পাহ্ গেলঅ তারার্ সোংখ্যে অলাক পাঁত্রিশ আজার্ চেরশত।
38দানর বংশধরুনো ভিদিরে যিগুনোর বয়স কুড়ি বা তাত্তুন বেশ্, অত্তাৎ যিগুনে যুদ্ধোত্ যেবার্ অক্ত ওইয়োন, বংশ আর পরিবারর্ পরিচয় মজিম তারার্ নাঙানি লিগি নেযা অলঅ। 39দান-গুট্টিত্তুন্ যিগুনোরে পাহ্ গেলঅ তারার্ সোংখ্যে অলাক বাষট্টি আজার্ সাতশত।
40আশের বংশধরুনো ভিদিরে যিগুনোর বয়স কুড়ি বা তাত্তুন্ বেশ্, অত্তাৎ যিগুনে যুদ্ধোত্ যেবার্ অক্ত ওইয়োন, বংশ আর পরিবারর্ পরিচয় মজিম তারার্ নাঙানি লিগি নেযা অলঅ। 41আশের-গুট্টিত্তুন্ যিগুনোরে পাহ্ গেলঅ তারার্ সোংখ্যে অলাক একচোল্লিশ আজার্ পাচশত।
42নপ্তালির বংশধরুনো ভিদিরে যিগুনোর বয়স কুড়ি বা তাত্তুন বেশ্, অত্তাৎ যিগুনে যুদ্ধোত্ যেবার্ অক্ত ওইয়োন্, বংশ আর পরিবারর্ পরিচয় মজিম তারার্ নাঙানি লিগি নেযা অলঅ। 43নপ্তালি-গুট্টিত্তুন্ যিগুনোরে পাহ্ গেলঅ তারার্ সোংখ্যে অলাক তিপ্পান্ন আজার্ চেরশত।
44মোশি, হারোণ আর ইস্রায়েলীয়গুনোর বারজন নেতা এই বেক্ মানুচ্চুনোর্ সোংখ্যেগুন গুণি নেযেলাক। ইগুনে বেক্কুনে তাঁর নিজোর্ বংশর নেতা এলাক্। 45বেক্ ইস্রায়েলীয়গুনো ভিদিরে যিগুনোর বয়স কুড়ি বা তাত্তুন্ বেশ্, অত্তাৎ যিগুনে যুদ্ধোত্ যেবার্ অক্ত ওইয়োন্ পরিবার মজিম তারারে গুণি নেযা অলঅ। 46তারার্ মোট সোংখ্যে এলাক ছয় লাখ্ তিন আজার্ পাঁচশ পঞ্চাশ জন।
47মাত্তর্ ইগুনো সমারে লেবি-গুট্টির মানুচ্চুনোরে গুণি নেযা ন-অয়। 48লগেপ্রভু মোশিরে কলদে, 49“তুই লেবি-গুট্টিবোরে ন-গুণিবে, বা মানুচ্ গুণিবার সময় অন্য ইস্রায়েলীয়গুনো ভিদিরে তারারে ন-ধুরিবে। 50সাক্ষ্য-তাম্বুলর সাজ-গুজোর জিনিসচানি আর তার্ বেক্কানি দেগাশুনোর দায়িত্তো তুই তারা উগুরে দিবে। তারার্ কাম অবঅ থেবার-তাম্বুল আর তার্ বেক্ সাজ-গুজ্চানি বুয়োই নেযানা। ইয়েনর দেগাশুনোর্ ভারান তারাত্তুনো নেযা পুরিবো আর তারাত্তুনো ইয়েনর চেরোকিত্তে তাম্বুল-বানেইনে থাহ্ পুরিবো। 51থেবার্-তাম্বুলান যেক্কে অন্য কনকিত্তে নেযা পুরিবো সেক্কে লেবীয়গুনেই সিবে খুলিবাক আর যেক্কে সিবে মিলেই জানা পুরিবো সেক্কে তারাত্তুনো সিবে মিলে পুরিবো। অন্য কনজনে তাইদু গেলে তারে মারে ফেলা অবঅ। 52নিজোর্ নিজোর্ দল মজিম ইস্রায়েলীয়গুনে তারার্ তাম্বুলান তুলিবাক্। পত্তিজনেই তারার্ নিজোর্ ভাগগোজ্যে জাগাত্ বিভাগীয় বাবতার্ তলে থাহ্ পুরিবো। 53যেনে ইস্রায়েলীয়গুনো উগুরে লগেপ্রভুর সাজা লামি ন-এজে সেনত্তে সাক্ষ্য-তাম্বুলর্ চেরোকিত্তে লেবীয়গুনে তাম্বুল বানেইনে থাহ্ পুরিবো। সাক্ষ্য-তাম্বুলোর দেগাশুনোত্তে লেবীয়গুনেই দায়ী থেবাক্।”
54লগেপ্রভু মোশিরে যেধোক্ক্যেন উগুম্ গোজ্যে ইস্রায়েলীয়গুনে ঠিগ্ সেধোক্ক্যেন গুরিলাক্।
Copyright © 2021 Bangladesh Bible Society