মথি 19
19
মোগ্ ছাড়ি দেনা পৌইদ্যেনে শিক্ষ্যে
(মার্ক ১০:১-১২)
1এই কধানি কনা থুম্ গুরিনে যীশু গালীল রেজ্যগান্ ফেলেইনে যর্দন গাঙ উকুলে যিহূদিয়া রেজ্যত্ গেলঅ। 2বোউত্ মানুচ্ তা পিজে পিজে গেলাক্ আর তে সিয়েনত্ তারারে গম্ গুরিলো।
3সেক্কে কয়েক্কো ফরীশী যীশুরে জগা চেবাত্তে তাইধু এইনে কলাক্, “মোশির সুদোম মজিম্ যে কনঅ কারনে মোগোরে ছাড়ি দেনা কি কারঅ পক্ষে উচিত্?”
4জোবত্ যীশু কলঅ, “তুমি কি ন-পড়অ, সৃট্টি গুরিয়্যেবো পত্তমে তারারে মরদ্ আর মিলে ইজেবে বানেয়্যে আর কোইয়্যেদে, 5‘ইয়েনত্তে মানুচ্ মা-বাবরে ছাড়িনে তা মোগো সমারে এক্ ওইনে থেবাক্ আর তারা দ্বিজনর্ এক্কান্ কিয়্যে অবঅ’? 6ইয়েনত্তে তারা আর দ্বিজন নয়, মাত্তর্ এক্কানকিয়্যে। সেনত্তে গোজেনে যিয়েন্ এক সমারে মিজেয়্যে মানুচ্ সিয়েন ফারগ্ ন-গোরোক্।”
7সেক্কে ফরীশীগুনে তারে কলাক্, “সালে মোশি কিত্তে ছুড়্ কাবোজ্ দিইনে মোগোরে ছাড়ি দিবাত্তে উগুম্ গোজ্যে?”
8যীশু জোব্ দিলো, “তমার শিক্ষ্যেনি আগাত্যে বিলিনে মোগোরে ছাড়ি দিবাত্তে মোশি তমারে উগুম দিয়্যে। মাত্তর্ পৌইল্যাত্তুন্ ধুরি এবাবোত্যে ন-এলঅ। 9মুই তমারে কঙর্, যে কনজনে বেভিচের দুষ্ বাদে অন্য কনঅ কারনে মোগোরে ছাড়ি দিইনে আরেক্ জনরে লয় তে বেভিচের্ গরে।”
10সেক্কে তা শিচ্চ্যগুনে তারে কলাক্, “নেগ-মোগোর্ মিল্ যুনি এবাবোত্যে অয় সালে দঅ জড়া ন-গরানা গম্।”
11যীশু তারারে কলঅ, “বেক্কুনে এ কধাগান মানি লোই ন-পারন্; বানা যিগুনোরে সেই খেমতাগান্ দিয়্যে ওইয়্যে তারা সিয়েন্ মানি লোই পারন্। 12কেঅ কেঅ গুজোং ওইনে জর্মান্, সেনত্তে তারা মোগ্ ন-লন্। আর কাররে কাররে মান্জ্যে গুজোং গরন্, সেনত্তে তারা মোগ্ ন-লন্। আরঅ এমন্ কেঅ কেঅ আগন্ যিগুনে স্বর্গ-রেজ্যত্তে মোগ্ ন-লবাক্ বিলি মনান্ থির্ গরন্। যে এ কধাগান মানি লোই পারে তে মানি নেযোক্।”
প্রভু যীশু আর চিগোন্ গুরোগুন্
(মার্ক ১০:১৩-১৬; লূক ১৮:১৫-১৭)
13পরেদি মানুচ্চুনে চিগোন্ চিগোন্ গুরোগুনোরে যীশু ইধু আনিলাক্ যেন তে তারা মাঢাগুনো উগুরে আঢ্ বাজেইনে তবনা গরে। মাত্তর্ শিচ্চ্যগুনে তারারে গেইল্ দিয়্যে ধুরিলাক্।
14সেক্কে যীশু কলঅ, “চিগোন্ গুরোগুনোরে মইধু এবাত্তে দুয়ো, মানা ন-গোজ্য; কিয়া স্বর্গ-রেজ্যগান্ ইগুনো ধোক্ক্যেন্ মানুচ্চুনোত্যে।” 15চিগোন্ গুরোগুনো মাঢা উগুরে আঢ্ বাজেইনে তবনা গরানার্ পরেদি যীশু সিয়েনত্তুন্ গেলগোই।
এক্কো ঠাগোয়্যে গাবুর্ মরদ্
(মার্ক ১০:১৭-৩১; লূক ১৮:১৮-৩০)
16পরেদি এক্কো মানুচ্ যীশু ইধু এলঅ, “তে পুযোর্ গুরিলো, মাষ্টরবাবু, উমর জিংকানি পেবাত্তে মুই কি গুরিম্।”
17যীশু তারে কলঅ, “গম্ কি জিনিস সে পৌইদ্যেনে কিত্তে মরে পুযোর্ গরর্? গম্ বানা একজনে আঘে। যুনি তুই উমর জিংকানি পেবাত্তে চাজ্ সালে তার্ বেক্ উগুমানি পালা।”
18সে গাবুজ্যে মরত্তো কলঅ, “কন্ কন্ উগুমানি?”
যীশু কলঅ, “খুন্ ন-গুরিচ্, সিনেলী ন-গুরিচ্, চুর্ ন-গুরিচ্, মিজে সাক্ষি ন-দিচ্, 19মা-বাবরে সর্মান গর্ আর তঅ আদাম্মেগুনোরে নিজো ধোক্ক্যেন্ কোচ্পেজ্।”
20সে গাবুজ্যে মরত্তো যীশুরে কলঅ, “মুই ইয়েনি বেক্কানি পালেই এজঙর্, মাত্তর্ মত্তুন্ আর কি গরা পড়িবো?”
21যীশু তারে কলঅ, “যুনি তুই পুরোপুরি খাটি অবাত্তে চাজ্ সালে যেইনে তর্ বেক্ সোম্বোত্তিগানি বিজিনে নাঢা মানুচ্চুনোরে দান্ গর্। সেক্কে তুই স্বর্গত্ ধন পেবে। সে পরেদি এইনে মঅ শিচ্চ্য অগি।”
22যেক্কেনে এ কধাগান গাবুর্ মরত্তো শুনিলো, তে দুঘ্ পেইনে গেলগোই, কিয়া তে ভারী থাগোইয়্যে মানুচ্ এলঅ।
23সেক্কে যীশু তা শিচ্চ্যগুনোরে কলঅ, “মুই তমারে ঘেচ্চেকগুরি কঙর্, থাগোইয়্যে মান্জ্যর্ পক্ষে স্বর্গ-রেজ্যত্ সমানা আঘাত্যে অবঅ। 24মুই আরঅ কঙর্, থাগোইয়্যে মান্জ্যর্ পক্ষে গোজেন রেজ্যত্ সমানাত্তুন্ বরং সূচো কানাবোদি উটোর্ যানা উৎচ্য।”
25যেক্কেনে শিচ্চ্যগুনে এ কধাগান শুনিলাক্, তারা আমক্ ওইনে কলাক্, “সালে কন্না পাপত্তুন্ উদ্ধোর্ গুরি পারে?”
26যীশু তারা ইন্দি উজুগুরি রিনি চেইনে কলঅ, “মান্জ্যর্ পক্ষে ইয়েন্ অসম্ভব ঠিগ্, মাত্তর্ গোজেনর্ পক্ষে বেক্কানি সম্ভব।”
27সেক্কে পিতরে তারে কলঅ, “চাহ্, আমি বেক্কানি ছাড়িনে তঅ শিচ্চ্য ওইয়্যেই; আমি কি পেবং?”
28যীশু তারারে কলঅ, মুই তমারে ঘেচ্চেকগুরি কঙর্, তুমি যিগুনে মঅ শিচ্চ্য ওইয়ো, নুয়ো সিরিষ্টিত্ যেক্কে মান্জ্য পুয়োবো তা সর্মানর্ সিংহাসনত্ বুজিবো সেক্কে তুমিয়ো বারগান্ সিংহাসনত্ বুজিবা আর ইস্রায়েলর্ বারবো গুট্টির বিচের্ গুরিবা।
29আর যে কেঅ মত্তে ঘর-বাড়ি, ভেই-বোন, মা-বাপ, পুয়ো-ঝি বা জাগা-জোবিন্ ছাড়ি দুয়োন্, তে সিয়েনির একশতগুন্ বেশ্ পেবঅ আর উমর জিংকানিয়ো দিয়্যে অবঅ। 30মাত্তর্ যিগুনে পত্তম সুরোত্ আগন্ তারা ভিদিরেত্তুন্ ভালোক্জনে বেগ যেরেদি পড়িবাক্, আর যিগুনে বেগ যেরেদি সুরোত্ আগন্ তারা ভিদিরেত্তুন্ ভালোক্জনে পত্তম্ অবাক্।
Currently Selected:
মথি 19: CBT
Highlight
Share
Copy
Want to have your highlights saved across all your devices? Sign up or sign in
Copyright © 2021 Bangladesh Bible Society
