মথি 20
20
আংগুর্ খেদঅ চাগরুনে
1স্বর্গ-রেজ্যগান্ এক্কো ঘর গিরোজ ধোক্ক্যেন্। তে একদিনে বেন্যেমাদান্ খেদ কামত্ চাগর্ কাদেবাত্তে বারেদি গেলঅ। 2তে চাগরুনো লগে ঠিগ্ গুরিলোদে, দিনে এক দীনার্ গুরি দিবো। ইয়েনর্ পরেদি তে তারারে তা আংগুর-খেদত্ পাধেই দিলো। 3প্রায় নটা সময় আরঅ তে বারেদি গেলঅ আহ্ বাজারত্ আরঅ কয়েকজনরে কাম্ নেই গুরি থিয়্যেই থাগদে দেগিলো। 4তে তারারে কলঅ, তুমিয়ো মঅ আংগুর খেদত্ কাম্ গুরিবাত্তে যঅ। মুই তমারে যগাজ্যেগুরি বেতন্ দিম্। 5সেক্কে সে মানুচ্চুনেয়ো কাম্ গুরিবাত্তে গেলাক্।
সে ঘর গিরোজ্সো আরঅ প্রায় বারটায় আহ্ তিনটায় বারেদি যেইনে তে আগ ধোক্ক্যেন্ গুরিলো। 6প্রায় পাচটা সময় বারেদি যেইনে অন্য কয়েক জনরে থিয়্যেই থাগদে দেগিনে তে তারারে কলঅ, তুমি কাম্ ন-গুরিনে গোদা দিন্নো ইয়োত্ থিয়্যেই আঘ কিত্তে?
7তারা তারে কলাক্, কেঅ আমারে কামত্ ন- লাগায়।
তে সে মানুচ্চুনোরে কলঅ, তুমিয়ো মঅ আংগুর খেদর্ কামত্ যঅ।
8পরেদি সাজোন্যে অলে আংগুর খেদ গিরোজ্সো তা চাগর্বোরে কলঅ, কাম্ গুরিয়্যেগুনোরে ডাগিনে বেগ যেরেদি মানুচ্চোত্তুন ধুরি আরাম্ভ গুরিনে পৌইল্যাবো সং পত্তিজনরে বেতন দে।
9বেল্যে পাচটা সময় যে চাগরুনোরে কামত্ লাগা ওইয়্যে তারা এইনে পত্তিজনে এক এক দীনার গুরি নেযেলাক্। 10ইয়েন্দোই যিগুনোরে পৌইল্যাদি কামত্ লাগা ওইয়্যে তারা বেশ্ পেবাক্ বিলি মনে গুরিলাক্, মাত্তর্ তারায়ো পত্তিজনে এক দীনার গুরিনে পেলাক্। 11সেক্কে তারা সে গিরোজ্সো বিরুদ্ধে মনত্ দুঘে কুয়ো ধুরিলাক্, 12আমি গোদা দিন্নো রোদোত্ পুড়িনে কাম্ গোজ্যেই। মাত্তর্ যিগুনোরে যেরেদি কামত্ লাগা ওইয়্যে তারা বানা এক ঘন্টা কাম্ গোজ্যন্, অদচ তারারে তুই আমা সং সং বেতন দিলে।
13“সেক্কে গিরোজ্সো তারা ভিদিরেত্তুন্ একজনরে কলঅ, ‘মঅ সমাজ্যেবো, মুই তঅ উগুরে দঅ অন্যেয় ন-গরং। তুই কি এক দিনারে কাম্ গুরিবাত্তে রাজী ন-অচ্? 14তর্ পাইদ্যে টেঙাগুন্ লোইনে যাগোই। তরে যেবাবোত্তে দুয়োং, এই যেরেদি মানুচ্চোরেয়ো সেবাবোত্যে দিবাত্তে মর্ আওজ্। 15যিয়েন্ মর্ নিজোর্, সিয়েন মর্ হুজি মজিম্ বেবহার গুরিবার অধিকার কি মর্ নেই? নাহি মুই দোয়্যেলু বিলি তঅ চোগোত্ ইংসে লাগের্।’ ”
16কিত্ত্যবোর্ শেজদি যীশু কলঅ, “সেনত্যে যিগুনে বেগ যেরেদি আগন্ তারা পত্তম্ অবাক্, আর পত্তমে যিগুনে তারা বেগ যেরেদি পড়িবাক্।”
আরঅ তার্ মরণর্ কধা
(মার্ক ১০:৩২-৩৪; লূক ১৮:৩১-৩৪)
17যীশু যিরূশালেমত্ যেবার পদথ্ তার বারজন শিচ্চ্যরে এক কিত্তেদি ডাগিনে নিজেই কধা কলঅ, তারা যাহ্ ধুরিলাক্। 18“শুনো, তে তারারে কলঅ, আমি যিরূশালেমত্ যের্। সিধু মান্জ্যপুয়োবোরে আজল্ ধর্মগুরু আর ধর্ম-মাষ্টরুনো আঢত্ ধোরেই দিয়্যে অবঅ। 19তারা তা বিচের্ গুরিনে তারে মরণর যোগাজ্যে বিলি থির্ গুরিবাক্। তারা তারে ঠাট্টা-মশকারী গুরিবাক্ আর চাবুক্ মারিবাক্ আর ক্রুশোত্ দিবাত্তে অযিহূদীগুনো আঢত্ দিবাক্; পরেদি তিন দিনোত্ তে মরণত্তুন্ জেঈ উদিবো।”
যাকোব আর যোহন মাবোর্ কোজোলী
(মার্ক ১০:৩৫-৪৫)
20পরেদি সিবদিয় মোক্কো দ্বিবে পুয়োরে সমারে লোইনে যীশু ইধু এলঅ আর তাইধু কিজু চেবার্ আজায় তারে সালাম গুরিলো। 21যীশু তারে কলঅ, “তুই কি চাজ্?”
তে কলঅ, “মরে কধা দে যেক্কেনে তুই রাজা অবে এই দ্বিবে পুয়োত্তুন্ এক্কো তঅ ডেনেদি আর এক্কো বাঙেদি বৈই পারে।”
22জোবত্ যীশু পুয়োগুনোরে কলঅ, “তুমি কি পুযোর্ গরর্ সিয়েন্ ন-জান। যে দুঘোর্ গলজত্ মুই হেবাত্তে যাঙর্ সিবেত্ কি তুমি হেই পারিবা?”
তারা জোবত্ কলাক্, “পারিবোং।”
23সেক্কে যীশু তারারে কলঅ, “ঘেচ্চেকগুরি তুমি মঅ গলজ্সোত্ হেবা, মাত্তর্ মঅ ডেনেদি বা বাঙেদি বুজিবাত্তে দিবার্ অধিকার মর্ নেই। মঅ বাপ্পো যিগুনোত্তে সিয়েন ঠিগ্ গুরি রাগেয়্যে তারা সিয়েন্ পেবাক্।”
24যেক্কেনে এই কধানি অন্য দশজন শিচ্চ্যই শুনিলাক্, তারা সেই দ্বিভেইয়ো উগুরে রাগ গুরিলাক্। 25সেক্কে যীশু বেক্ থুবেয়্যে গুনোরে ডাগিনে কলঅ, “তুমি এ কধাগান হবর্ পঅ, অযিহূদীগুনো ভিদিরে শাসন গুরিয়্যেগুনে তারার্ প্রভু অন্ আর নেতাগুনে তারা উগুরে উগুম চালান্। 26মাত্তর্ তমা ভিদিরে সেধোক্ক্যেন্ অনা উচিত নয়। তমা ভিদিরে যে দাঙর্ অবাত্তে চায় তাত্তুন্ তমার সেবাগুরিয়্যে উয়ো পড়িবো, 27আর যে পত্তম অবাত্তে চায় তাত্তুন্ তমার চাগর্ উয়ো পড়িবো। 28ইদোত্ রাগেয়ো, মান্জ্যপুয়োবো সেবা পেবাত্তে ন-এজে বরং সেবা গুরিবাত্তে এচ্চ্যে আর ভালোক্কুন্ মান্জ্যর্ উদ্ধোরর্ দাম্ ইজেবে তারা পরাণানির্ বদলে নিজো পরাণান্ দিবাত্তে এচ্চ্যে।”
দ্বিজন কানা গম্ অলাক্
(মার্ক ১০:৪৬-৫২; লূক ১৮:৩৫-৪৩)
29যীশু আর তা শিচ্চ্যগুনে যিরীহো শঅরান্ ফেলেই যেবার্ অক্তত্ বোউত্ মানুচ্ যীশুর পিজে পিজে গেলাক্। 30পধ পাজারত্ দ্বিবে কান্ মানুচ্ বুয়োই এলাক্। যীশু সে পধেদি যার্ শুনিনে তারা রঅ ছাড়িনে কলাক্, “প্রভু, দায়ূদোর বংশধর, আমারে দোয়্যে গর্।”
31তারা যেন অলর্ অন্ সেনত্তে মানুচ্চুনে তারারে ধমক্ দিলাক্। মাত্তর্ তারা আরঅ রঅ ছাড়িনে কলাক্, “প্রভু, দায়ূদোর বংশধর, আমারে দোয়্যে গর্।”
32সেক্কে যীশু থিয়্যেল আর তারারে ডাগিনে কলঅ, “তুমি কি চঅ? মুই তমাত্তে কি গুরিম?”
33তারা তারে কলাক্, “প্রভু, আমা চোখ্কুন খুলি দে।”
34তারা উগুরে যীশুর দোয়্যে অলঅ আর তারার্ চোগ্কুন ধুরিলো; আর সেক্কেনে তারা চোগেদি দেগিলাক্ আর তা পিজে পিজে যাহ্ ধুরিলাক্।
Currently Selected:
মথি 20: CBT
Highlight
Share
Copy
Want to have your highlights saved across all your devices? Sign up or sign in
Copyright © 2021 Bangladesh Bible Society
