লেবীয় 11
11
শুদ্ধো-সাংগ আর ফিবলা হানা
1-3লগেপ্রভু মোশি আর হারোণরে ইস্রায়েলীয়গুনোরে কবাত্তে কলঅ, মাদি উগুরে বজত্তি গোজ্যে য়েমান ভিদিরে যিগুনে ঘাস উল্ল্যান্ আর সে সমারে সিগুনোর টেঙ টুক্কুন্ পুরোদমে দ্বিভাগ চিজ্যা বানা সিগুনোর য়েরাগানি তুমি হেই পারিবা। 4কন্ কন্ য়েমানে বানা ঘাস উল্ল্যান্, আরঅ কন্ কন্ য়েমানর্ বানা চিজ্যা টুক্ আঘে; সিগুন তুমি হেই ন-পারিবা। উট্তুনে ঘাস উল্ল্যেলেয়ো তারার্ টুক্কুন্ চিজ্যা নয়, সেনত্যেই সিগুন তমাত্তে ফিবলা। 5শাফনেয়ো ঘাস উল্ল্যান্ মাত্তর্ তার টুক্কুন্ চিজ্যা নয়, সেনত্যেই সিবেয়ো তমাত্তে ফিবলা। 6খরগোস ঘাস উল্ল্যেলেয়ো তার টুক্কুন্ চিজ্যা নয়, সেনত্যেই সিবেয়ো ফিবলা। 7শূগোরুনোর্ টুক্কুন্ এক্কুবারে দ্বিভাগে চিজ্যা, মাত্তর্ তারা ঘাস ন-উল্ল্যান্, সিয়েনত্তে দঅ তমাত্তে ফিবলা। 8ইগুনোর য়েরা তুমি ন-হেবা আর তারার্ মরা কিয়্যেগানিয়ো ন-ধুরিবা। ইয়েনি তমাত্যে ফিবলা।
9বড়গাঙ্ আর গাঙর্ পানিত্ যিদুক্কুন প্রাণী বজত্তি গরন তারা ভিদিরে যিগুনোর ডুয়ো আর কিয়্যেত্ পোর্ আঘে সিগুন তুমি হেই পারিবা। 10মাত্তর্ যিগুনোর ডুয়ো আর পোর্ নেই সিগুন ঘিনাইদে জিনিস্ বিলি তমাত্তুন ধুরি নেযা পুরিবো-সিগুন পানিত্ ঝাক গুরি বেরেয়্যে প্রাণীই ওক্ বা অন্য প্রাণীই ওক্। 11ঘিনাইদে জিনিস বিলিনে সিগুন তুমি হেই ন-পারিবা আর সিগুনোর মরা কিয়্যেগানিয়ো ঘিনাইদে জিনিস বিলি তমাত্তুন্ ধুরি নেযা পুরিবো। 12পানিত্ থান্ অদচ ডুয়ো আর পোর্ নেই এধোক্ক্যেন্ বেক্ পরাণ বলাগুলোরে ঘিনাইদে জিনিস বিলিনে ধুরি নেযা পুরিবো।
13কুদুক্কুন্ পেগ্অ আগন্ যিগুন ঘিনাইদে জিনিস বিলি তমাত্তুন ধুরি নেযা পুরিবো, আর সেনত্যেই সিগুন তমার হানা ন-চুলিবো। সিগুন অলঅ ঈগল, শকুন, কালা শকুন, 14-16চিল, নানান্ বাবোত্যে শিগেরী বাজ পেক্কুন, নানান্ বাবোত্যে কবাগুন, উট পেক্, লক্ষ্মীপেজা, মুড়ো-পেজা, গাংচিল, নানান্ বাবোত্যে বাজ পেগ্, 17কালাপেজা,আড়গিল্যে, হুতুম পেজা, 18দুব্ পেজা, মুড়ো-পেজা, সিন্ধুবাজ, 19সারস, নানান্ বাবোত্যে বগা, হুপ্পু পেগ্ আর বাদোল্।
20যিদুক্কুন চের্ টেঙ্যে আদন্দে পুক্ উড়ি বেড়ান্ সিগুনোরে ঘিনাইদে জিনিস বিলি ধুরি নেযা পুরিবো। 21মাত্তর্ সিগুনো ভিদিরে যিগুনোর আদু আঘে বিলি মাদি উগুরে ফাল্ল্যেনে বেড়েই পারন্ সিগুনোর কুগুন কুগুন তুমি হেই পারিবা। 22সিগুন্ অলাক্ নানান্ বাবোত্যে পুগ্-যুগ্, বাঘা-ফিড়িং, গঙরা বা ঘাস ফিড়িং। 23মাত্তর্ অন্য যিদুক্কুন্ উড়ি বেড়ান্দে পুগোর্ চেরান্ টেং আঘে সিগুনোরে ঘিনাইদে জিনিস বিলি ধুরি নেযা অবঅ।
24ইগুন্দোই তুমি ফিবলা অবা; যে কনজনে তারার্ মরা কিয়্যেনি ধরে তে সাজোন্যে সং ফিবলা অবস্থায় থেবঅ। 25যে কনজনে তারার্ কনঅ এক্কানর্ মরাকিয়্যে আত্তোই তুলোন্ সেক্কে তাত্তুন্ তার্ কাবড়-চুগোর্ ধোই ফেলা পুরিবো আর সাজোন্যে সং ফিবলা অবস্থায় থেবঅ।
26যিদুক্কুন্ য়েমানর্ টুক্ চিজ্যা অলেয়ো পুরোপুরি দ্বিভাগে ভাগ গোজ্যে নয় অথবা যিদুক্কুন্ য়েমানে ঘাস ন-উল্ল্যান সিগুন্ তমাত্তে ফিবলা। যে ইগুন ধুরিবো তে ফিবলা অবঅ। 27চের্টেংগোই আদন্দে য়েমানুনো ভিদিরে যিগুনে থাবালোই ভর্ গুরি আদন্ সিগুন তমাত্তে ফিবলা। যে তারার মরাকিয়্যেনি ধুরিবো তে সাজন্যা সং ফিবলা ওই থেবঅ। 28যে কনজনে তারার্ মরাকিয়্যেগান্ আঢ্ দিইনে তুলিবাক্, তাত্তুন্ তার্ কাবড়-চুগোড়ানি ধোই ফেলা পুরিবো আর তে সাজন্যা সং ফিবলা অবস্থায় থেবঅ। এ বেক্ য়েমানুন্ তমাত্তে ফিবলা।
29যিদুক্কুন্ চিগোন-চাগোন্ প্রাণী মাদি উগুরে ঘুরি বেড়ান সিগুনো ভিদিরে বিজি, উন্দুর্, নানান্ বাবোত্যে টোগ্টোগি; 30হক্কেং, গুই, টোগ্টোগি, সামলক্, কাকলাস তমাত্তে ফিবলা। 31চিগোন্-চাগোন্ প্রাণিগুনো ভিদিরে ইগুনোই অবাক্ তমাত্যে ফিবলা। ইগুনোর্ মরাকিয়্যেগানি যে ধরে তে সাজোন্যে সং ফিবলা অবস্থায় থেবঅ। 32ইগুনোর্ যে কনঅ এক্কো মুরিনে কনঅ জিনিজো উগুরে পুরিলে সিয়েন্ ফিবলা অবঅ-সিয়েন্ তক্তা, কাবড়, চামাড়া অথবা চট যিয়েন্দোই বানা অদ সাৎ আর যে কনঅ কাম্বই অদ সাৎ। সেই জিনিস্ছান্ পানিত্ ভুরেই রাগা পুরিবো। তে সাজন্যা সং ফিবলা অবস্থায় থেবঅ, সে পরেদি তে শুদ্ধো-সাংগ অবঅ। 33ইগুনো ভিদিরে কনঅ এক্কো যুনি কনঅ মাদির্ পিলেবো ভিদিরে পড়ে ছালে সে ভিদিরে বেক্ জিনিস্ছানি ফিবলা ওই যেবঅ। সেই পিলেবো ভাঙি ফেলা পুরিবো। 34সেই পিলেবোর্ পানিগান যুনি কনঅ হেবার্ জিনিজো উগুরে পড়ে ছালে সেই হেবার্ জিনিস্ছানঅ ফিবলা ওই যেবঅ। সেই পিলেবো ভিদিরে যুনি কনঅ পানীয় থায়্ ছালে সিয়েনঅ ফিবলা ওই যেবঅ। 35ইগুনোর্ মরাকিয়্যেগানি কনঅ কিজু উগুরে পুরিলে সিয়েন্অ ফিবলা ওই যেবঅ। ইগুন্ কনঅ ওলোন্ ছালত্ বা কনঅ চুলোত্ পুরিলে সিবে ভাঙি ফেলা পুরিবো। সে ওলোন্ ছালান বা চুলোবো ফিবলা, আর তমাত্তুন্ সিবে ফিবলা বিলি মানা পুরিবো। 36মাত্তর্ সিগুন যুনি কনঅ উইপুদ্ অথবা কূয়ো ভিদিরে পড়ন্ ছালে সে উইপুদোত্ বা কূয়োবো ফিবলা ন-অবঅ; মাত্তর্ ইগুনোর্ মরাকিয়্যেগানি যে ধুরিবো তে নিজে ফিবলা অবঅ। 37ভূইয়োত্ ফেলেবাত্তে থোইয়্যে কনঅ বীজ উগুরে যুনি ইগুনোর্ কনঅ মরা কিয়্যেত্ পড়ন্ ছালে সিগুন্ ফিবলা ন-অবঅ; 38মাত্তর্ বীজ উগুরে পানি দেনার্ পরেদি যুনি সিগুন্ পড়ন্ ছালে সে বীজ্চুন্ তমাত্তে ফিবলা অবাক্।
39তমার্ হেবার্ মানা নেই এধোক্ক্যেন কনঅ য়েমান মুরি গেলে যে তার্ মরা কিয়্যেগান্ ধুরিবো তে সাজোন্যে সং ফিবলা অবস্থায় থেবঅ। 40কনজনে যুনি সেই মরা য়েমানর্ য়েরাগান খায়্ ছালে তাত্তুন্ তার্ কাবড়-চুগোর্ ধোয় ফেলা পুরিবো আর তে সাজন্যে সং ফিবলা অবস্থায় থেবঅ। কনজনে যুনি সেই মরা য়েমান্নো আঢ্তোই তুলে ছালে তাত্তুন্ তার্ কাবড়-চুগোর্ ধোয় ফেলা পুরিবো আর তে সাজোন্যে সং ফিবলা অবস্থায় থেবঅ।
41যিদুক্কুন্ চিগোন-চাগোন্ প্রাণী মাদি উগুরে ঘুরি বেড়ান্ তমাত্তুন্ সিগুনোরে ঘিনাইদে জিনিস বিলি ধুরি নেযা পুরিবো। সিগুন্ তমার্ হানা ন-চুলিবো। 42মাদি উগুরে ঘুরি বেড়েয়্যে চিগোন-চাগোন্ কনঅ প্রাণী তুমি ন-হেবা। সিগুন্ বেক্কুন্ ঘিনাইদে জিনিস-সিগুনে পেদ উগুরে ভর দিইনে আঢ্তোক্ আর চের্ টেংগোই অথবা ভালক্কানি টেংগোই আঢ্তোক্। 43সিগুনোর্ কনবোলোই তুমি নিজোরে ঈচ্ গরে পারা ন-অবা। তুমি সিগুন্দোই নিজোরে ফিবলা ন গুরিবা অথবা সিগুনোরে তমার্ ফিবলা গুরিবাত্তে ন-দিবা। 44মুই লগেপ্রভু তমার্ গোজেন। সেনত্তে তুমি মর্ নাঙে নিজোরে ফারক্ গুরি রাগেবা আর পবিত্র অবা, কিত্তে মুই পবিত্র। মাদি উগুরে ঘুরি বেড়েয়্যে চিগোন-চাগোন্ কনঅ প্রাণীলোই তুমি নিজোরে ফিবলা ন-অবা, 45কিত্তেই মুই লগেপ্রভু; তমার্ গোজেন অবাত্তে মুই মিসর দেজত্তুন্ তমারে নিগিলেই আন্যং। মুই পবিত্র বিলি তমাত্তুনো পবিত্র অয়া পুরিবো।
46“য়েমান, পেখ্ আর পানি ভিদিরে প্রাণী আর মাদি উগুরে ঘুরি বেড়েয়্যে বেক্ চিগোন-চাগন্ পরাণবলাগুনো পৌইদ্যেনে ইয়েন্ অলঅ মর্ আইন। 47কুবো শুদ্ধো-সাংগ আর কুবো ফিবলা, কন্ এ্যামানর্ য়েরা তুমি হেই পারিবা আর কন্ য়েমানর্ য়েরা তুমি হেই ন-পারিবা সিয়েনি বুঝিনে তমাত্তুন্ আঢা পুরিবো।”
Currently Selected:
লেবীয় 11: CBT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 Bangladesh Bible Society
